૫૩. ભિક્ખુનીદૂસકવત્થુ

૧૧૫. તેન ખો પન સમયેન સમ્બહુલા ભિક્ખુનિયો સાકેતા સાવત્થિં અદ્ધાનમગ્ગપ્પટિપન્ના હોન્તિ. અન્તરામગ્ગે ચોરા નિક્ખમિત્વા એકચ્ચા ભિક્ખુનિયો અચ્છિન્દિંસુ, એકચ્ચા ભિક્ખુનિયો દૂસેસું. સાવત્થિયા રાજભટા નિક્ખમિત્વા એકચ્ચે ચોરે અગ્ગહેસું, એકચ્ચે ચોરા પલાયિંસુ. યે તે પલાયિંસુ, તે ભિક્ખૂસુ પબ્બજિંસુ. યે તે ગહિતા, તે વધાય ઓનિય્યન્તિ. અદ્દસંસુ ખો તે પલાયિત્વા પબ્બજિતા તે ચોરે વધાય ઓનિય્યમાને, દિસ્વાન એવમાહંસુ ‘‘સાધુ ખો મયં પલાયિમ્હા, સચા ચ મયં ગય્હેય્યામ, મયમ્પિ એવમેવ હઞ્ઞેય્યામા’’તિ. ભિક્ખૂ એવમાહંસુ ‘‘કિં પન તુમ્હે, આવુસો, અકત્થા’’તિ. અથ ખો તે પબ્બજિતા ભિક્ખૂનં એતમત્થં આરોચેસું. ભિક્ખૂ ભગવતો એતમત્થં આરોચેસું. ભિક્ખુનિદૂસકો, ભિક્ખવે, અનુપસમ્પન્નો ન ઉપસમ્પાદેતબ્બો, ઉપસમ્પન્નો નાસેતબ્બોતિ. સઙ્ઘભેદકો, ભિક્ખવે, અનુપસમ્પન્નો ન ઉપસમ્પાદેતબ્બો, ઉપસમ્પન્નો નાસેતબ્બોતિ. લોહિતુપ્પાદકો, ભિક્ખવે, અનુપસમ્પન્નો ન ઉપસમ્પાદેતબ્બો, ઉપસમ્પન્નો નાસેતબ્બોતિ.