૫૦. માતુઘાતકવત્થુ

૧૧૨. તેન ખો પન સમયેન અઞ્ઞતરો માણવકો માતરં જીવિતા વોરોપેસિ. સો તેન પાપકેન કમ્મેન અટ્ટીયતિ હરાયતિ જિગુચ્છતિ. અથ ખો તસ્સ માણવકસ્સ એતદહોસિ – ‘‘કેન નુ ખો અહં ઉપાયેન ઇમસ્સ પાપકસ્સ કમ્મસ્સ નિક્ખન્તિં કરેય્ય’’ન્તિ? અથ ખો તસ્સ માણવકસ્સ એતદહોસિ – ‘‘ઇમે ખો સમણા સક્યપુત્તિયા ધમ્મચારિનો સમચારિનો બ્રહ્મચારિનો સચ્ચવાદિનો સીલવન્તો કલ્યાણધમ્મા. સચે ખો અહં સમણેસુ સક્યપુત્તિયેસુ પબ્બજેય્યં, એવાહં ઇમસ્સ પાપકસ્સ કમ્મસ્સ નિક્ખન્તિં કરેય્ય’’ન્તિ. અથ ખો સો માણવકો ભિક્ખૂ ઉપસઙ્કમિત્વા પબ્બજ્જં યાચિ. ભિક્ખૂ આયસ્મન્તં ઉપાલિં એતદવોચું – ‘‘પુબ્બેપિ ખો, આવુસો ઉપાલિ, નાગો માણવકવણ્ણેન ભિક્ખૂસુ પબ્બજિતો. ઇઙ્ઘાવુસો ઉપાલિ, ઇમં માણવકં અનુયુઞ્જાહી’’તિ. અથ ખો સો માણવકો આયસ્મતા ઉપાલિના અનુયુઞ્જીયમાનો એતમત્થં આરોચેસિ. આયસ્મા ઉપાલિ ભિક્ખૂનં એતમત્થં આરોચેસિ. ભિક્ખૂ ભગવતો એતમત્થં આરોચેસું…પે… માતુઘાતકો, ભિક્ખવે, અનુપસમ્પન્નો ન ઉપસમ્પાદેતબ્બો, ઉપસમ્પન્નો નાસેતબ્બોતિ.