૩૯. આહુન્દરિકવત્થુ

૧૦૨. તેન ખો પન સમયેન ભગવા તત્થેવ રાજગહે વસ્સં વસિ, તત્થ હેમન્તં, તત્થ ગિમ્હં. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘આહુન્દરિકા સમણાનં સક્યપુત્તિયાનં દિસા અન્ધકારા, ન ઇમેસં દિસા પક્ખાયન્તી’’તિ. અસ્સોસું ખો ભિક્ખૂ તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. અથ ખો તે ભિક્ખૂ ભગવતો એતમત્થં આરોચેસું. અથ ખો ભગવા આયસ્મન્તં આનન્દં આમન્તેસિ – ‘‘ગચ્છાનન્દ, અવાપુરણં [અપાપુરણં (ક.)] આદાય અનુપરિવેણિયં ભિક્ખૂનં આરોચેહિ – ‘‘ઇચ્છતાવુસો ભગવા દક્ખિણાગિરિં ચારિકં પક્કમિતું. યસ્સાયસ્મતો અત્થો, સો આગચ્છતૂ’’તિ. એવં, ભન્તે, તિ ખો આયસ્મા આનન્દો ભગવતો પટિસ્સુણિત્વા અવાપુરણં આદાય અનુપરિવેણિયં ભિક્ખૂનં આરોચેસિ – ‘ઇચ્છતાવુસો ભગવા દક્ખિણાગિરિં ચારિકં પક્કમિતું. યસ્સાયસ્મતો અત્થો, સો આગચ્છતૂ’’’તિ. ભિક્ખૂ એવમાહંસુ – ‘‘ભગવતા, આવુસો આનન્દ, પઞ્ઞત્તં દસવસ્સાનિ નિસ્સાય વત્થું, દસવસ્સેન નિસ્સયં દાતું. તત્થ ચ નો ગન્તબ્બં ભવિસ્સતિ, નિસ્સયો ચ ગહેતબ્બો ભવિસ્સતિ, ઇત્તરો ચ વાસો ભવિસ્સતિ, પુન ચ પચ્ચાગન્તબ્બં ભવિસ્સતિ, પુન ચ નિસ્સયો ગહેતબ્બો ભવિસ્સતિ. સચે અમ્હાકં આચરિયુપજ્ઝાયા ગમિસ્સન્તિ, મયમ્પિ ગમિસ્સામ; નો ચે અમ્હાકં આચરિયુપજ્ઝાયા ગમિસ્સન્તિ, મયમ્પિ ન ગમિસ્સામ. લહુચિત્તકતા નો, આવુસો આનન્દ, પઞ્ઞાયિસ્સતી’’તિ. અથ ખો ભગવા ઓગણેન ભિક્ખુસઙ્ઘેન દક્ખિણાગિરિં ચારિકં પક્કામિ.

આહુન્દરિકવત્થુ નિટ્ઠિતં.