૩૭. અહિવાતકરોગવત્થુ

૧૦૦. તેન ખો પન સમયેન અઞ્ઞતરં કુલં અહિવાતકરોગેન કાલઙ્કતં હોતિ. તસ્સ પિતાપુત્તકા સેસા હોન્તિ. તે ભિક્ખૂસુ પબ્બજિત્વા એકતોવ પિણ્ડાય ચરન્તિ. અથ ખો સો દારકો પિતુનો ભિક્ખાય દિન્નાય ઉપધાવિત્વા એતદવોચ – ‘‘મય્હમ્પિ, તાત, દેહિ; મય્હમ્પિ, તાત, દેહી’’તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘અબ્રહ્મચારિનો ઇમે સમણા સક્યપુત્તિયા. અયમ્પિ દારકો ભિક્ખુનિયા જાતો’’તિ. અસ્સોસું ખો ભિક્ખૂ તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. અથ ખો તે ભિક્ખૂ ભગવતો એતમત્થં આરોચેસું. ન, ભિક્ખવે, ઊનપન્નરસવસ્સો દારકો પબ્બાજેતબ્બો. યો પબ્બાજેય્ય, આપત્તિ દુક્કટસ્સાતિ.

તેન ખો પન સમયેન આયસ્મતો આનન્દસ્સ ઉપટ્ઠાકકુલં સદ્ધં પસન્નં અહિવાતકરોગેન કાલઙ્કતં હોતિ, દ્વે ચ દારકા સેસા હોન્તિ. તે પોરાણકેન આચિણ્ણકપ્પેન ભિક્ખૂ પસ્સિત્વા ઉપધાવન્તિ. ભિક્ખૂ અપસાદેન્તિ. તે ભિક્ખૂહિ અપસાદિયમાના રોદન્તિ. અથ ખો આયસ્મતો આનન્દસ્સ એતદહોસિ – ‘‘ભગવતા પઞ્ઞત્તં ‘ન ઊનપન્નરસવસ્સો દારકો પબ્બાજેતબ્બો’તિ. ઇમે ચ દારકા ઊનપન્નરસવસ્સા. કેન નુ ખો ઉપાયેન ઇમે દારકા ન વિનસ્સેય્યુ’’ન્તિ? અથ ખો આયસ્મા આનન્દો ભગવતો એતમત્થં આરોચેસિ. ઉસ્સહન્તિ પન તે, આનન્દ, દારકા કાકે ઉડ્ડાપેતુન્તિ? ઉસ્સહન્તિ, ભગવાતિ. અથ ખો ભગવા એતસ્મિં નિદાને એતસ્મિં પકરણે ધમ્મિં કથં કત્વા ભિક્ખૂ આમન્તેસિ – ‘‘અનુજાનામિ, ભિક્ખવે, ઊનપન્નરસવસ્સં દારકં કાકુડ્ડેપકં પબ્બાજેતુ’’ન્તિ.

અહિવાતકરોગવત્થુ નિટ્ઠિતં.