૧૨. સત્તસતિકક્ખન્ધકં

૧. પઠમભાણવારો

૪૪૬. તેન ખો પન સમયેન વસ્સસતપરિનિબ્બુતે ભગવતિ વેસાલિકા વજ્જિપુત્તકા ભિક્ખૂ વેસાલિયં દસ વત્થૂનિ દીપેન્તિ – કપ્પતિ સિઙ્ગિલોણકપ્પો, કપ્પતિ દ્વઙ્ગુલકપ્પો, કપ્પતિ ગામન્તરકપ્પો, કપ્પતિ આવાસકપ્પો, કપ્પતિ અનુમતિકપ્પો, કપ્પતિ આચિણ્ણકપ્પો, કપ્પતિ અમથિતકપ્પો, કપ્પતિ જળોગિં પાતું, કપ્પતિ અદસકં નિસીદનં, કપ્પતિ જાતરૂપરજતન્તિ.

તેન ખો પન સમયેન આયસ્મા યસો કાકણ્ડકપુત્તો વજ્જીસુ ચારિકં ચરમાનો યેન વેસાલી તદવસરિ. તત્ર સુદં આયસ્મા યસો કાકણ્ડકપુત્તો વેસાલિયં વિહરતિ મહાવને કૂટાગારસાલાયં. તેન ખો પન સમયેન વેસાલિકા વજ્જિપુત્તકા ભિક્ખૂ તદહુપોસથે કંસપાતિં [કંસચાટિં (સ્યા.)] ઉદકેન પૂરેત્વા મજ્ઝે ભિક્ખુસઙ્ઘસ્સ ઠપેત્વા આગતાગતે વેસાલિકે ઉપાસકે એવં વદન્તિ – ‘‘દેથાવુસો, સઙ્ઘસ્સ કહાપણમ્પિ અડ્ઢમ્પિ પાદમ્પિ માસકરૂપમ્પિ. ભવિસ્સતિ સઙ્ઘસ્સ પરિક્ખારેન કરણીય’’ન્તિ. એવં વુત્તે આયસ્મા યસો કાકણ્ડકપુત્તો વેસાલિકે ઉપાસકે એતદવોચ – ‘‘માવુસો, અદત્થ સઙ્ઘસ્સ કહાપણમ્પિ અડ્ઢમ્પિ પાદમ્પિ માસકરૂપમ્પિ. ન કપ્પતિ સમણાનં સક્યપુત્તિયાનં જાતરૂપરજતં; ન સાદિયન્તિ સમણા સક્યપુત્તિયા જાતરૂપરજતં; ન પટિગ્ગણ્હન્તિ સમણા સક્યપુત્તિયા જાતરૂપરજતં; નિક્ખિત્તમણિસુવણ્ણા સમણા સક્યપુત્તિયા અપેતજાતરૂપરજતા’’તિ. એવમ્પિ ખો વેસાલિકા ઉપાસકા આયસ્મતા યસેન કાકણ્ડકપુત્તેન વુચ્ચમાના અદંસુયેવ સઙ્ઘસ્સ કહાપણમ્પિ અડ્ઢમ્પિ પાદમ્પિ માસકરૂપમ્પિ.

અથ ખો વેસાલિકા વજ્જિપુત્તકા ભિક્ખૂ તસ્સા રત્તિયા અચ્ચયેન તં હિરઞ્ઞં ભિક્ખગ્ગેન [ભિક્ખુગ્ગેન (સ્યા.)] પટિવીસં [પટિવિંસં (સી.), પટિવિસં (સ્યા.)] ઠપેત્વા ભાજેસું. અથ ખો વેસાલિકા વજ્જિપુત્તકા ભિક્ખૂ આયસ્મન્તં યસં કાકણ્ડકપુત્તં એતદવોચું – ‘‘એસો તે, આવુસો યસ, હિરઞ્ઞસ્સ પટિવીસો’’તિ. ‘‘નત્થિ, મે આવુસો, હિરઞ્ઞસ્સ પટિવીસો, નાહં હિરઞ્ઞં સાદિયામી’’તિ. અથ ખો વેસાલિકા વજ્જિપુત્તકા ભિક્ખૂ – ‘‘અયં આવુસો યસો કાકણ્ડકપુત્તો ઉપાસકે સદ્ધે પસન્ને અક્કોસતિ, પરિભાસતિ, અપ્પસાદં કરોતિ; હન્દસ્સ મયં પટિસારણીયકમ્મં કરોમા’’તિ તે. તસ્સ પટિસારણીયકમ્મં અકંસુ. અથ ખો આયસ્મા યસો કાકણ્ડકપુત્તો વેસાલિકે વજ્જિપુત્તકે ભિક્ખૂ એતદવોચ – ‘‘ભગવતા, આવુસો, પઞ્ઞત્તં – ‘પટિસારણીયકમ્મકતસ્સ ભિક્ખુનો અનુદૂતો દાતબ્બો’તિ. દેથ મે, આવુસો, અનુદૂતં ભિક્ખુ’’ન્તિ.

અથ ખો વેસાલિકા વજ્જિપુત્તકા ભિક્ખૂ એકં ભિક્ખું સમ્મન્નિત્વા આયસ્મતો યસસ્સ કાકણ્ડકપુત્તસ્સ અનુદૂતં અદંસુ. અથ ખો આયસ્મા યસો કાકણ્ડકપુત્તો અનુદૂતેન ભિક્ખુના સદ્ધિં વેસાલિં પવિસિત્વા વેસાલિકે ઉપાસકે એતદવોચ – ‘‘અહં કિરાયસ્મન્તે ઉપાસકે સદ્ધે પસન્ને અક્કોસામિ, પરિભાસામિ, અપ્પસાદં કરોમિ; યોહં અધમ્મં અધમ્મોતિ વદામિ, ધમ્મં ધમ્મોતિ વદામિ, અવિનયં અવિનયોતિ વદામિ, વિનયં વિનયોતિ વદામિ.

૪૪૭. ‘‘એકમિદં, આવુસો, સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તત્ર ખો, આવુસો, ભગવા ભિક્ખૂ આમન્તેસિ – [અ. નિ. ૪.૫૦] ‘ચત્તારોમે, ભિક્ખવે, ચન્દિમસૂરિયાનં ઉપક્કિલેસા, યેહિ ઉપક્કિલેસેહિ ઉપક્કિલિટ્ઠા ચન્દિમસૂરિયા ન તપન્તિ, ન ભાસન્તિ, ન વિરોચન્તિ. કતમે ચત્તારો? અબ્ભં, ભિક્ખવે, ચન્દિમસૂરિયાનં ઉપક્કિલેસો, યેન ઉપક્કિલેસેન ઉપક્કિલિટ્ઠા ચન્દિમસૂરિયા ન તપન્તિ, ન ભાસન્તિ ન વિરોચન્તિ. મહિકા, ભિક્ખવે, ચન્દિમસૂરિયાનં ઉપક્કિલેસો, યેન ઉપક્કિલેસેન ઉપક્કિલિટ્ઠા ચન્દિમસૂરિયા ન તપન્તિ, ન ભાસન્તિ, ન વિરોચન્તિ, ધૂમરજો, ભિક્ખવે, ચન્દિમસૂરિયાનં ઉપક્કિલેસો, યેન ઉપક્કિલેસેન ઉપક્કિલિટ્ઠા ચન્દિમસૂરિયા ન તપન્તિ, ન ભાસન્તિ, ન વિરોચન્તિ. રાહુ, ભિક્ખવે, અસુરિન્દો ચન્દિમસૂરિયાનં ઉપક્કિલેસો, યેન ઉપક્કિલેસેન ઉપક્કિલિટ્ઠા ચન્દિમસૂરિયા ન તપન્તિ, ન ભાસન્તિ, ન વિરોચન્તિ. ઇમે ખો, ભિક્ખવે, ચત્તારો ચન્દિમસૂરિયાનં ઉપક્કિલેસા, યેહિ ઉપક્કિલેસેહિ ઉપક્કિલિટ્ઠા ચન્દિમસૂરિયા ન તપન્તિ, ન ભાસન્તિ, ન વિરોચન્તિ. એવમેવ ખો, ભિક્ખવે, ચત્તારોમે સમણબ્રાહ્મણાનં ઉપક્કિલેસા, યેહિ ઉપક્કિલેસેહિ ઉપક્કિલિટ્ઠા એકે સમણબ્રાહ્મણા ન તપન્તિ, ન ભાસન્તિ, ન વિરોચન્તિ. કતમે ચત્તારો? સન્તિ, ભિક્ખવે, એકે સમણબ્રાહ્મણા સુરં પિવન્તિ, મેરયં પિવન્તિ, સુરામેરયપાના અપ્પટિવિરતા – અયં, ભિક્ખવે, પઠમો સમણબ્રાહ્મણાનં ઉપક્કિલેસો, યેન ઉપક્કિલેસેન ઉપક્કિલિટ્ઠા એકે સમણબ્રાહ્મણા ન તપન્તિ, ન ભાસન્તિ, ન વિરોચન્તિ. પુન ચપરં, ભિક્ખવે, એકે સમણબ્રાહ્મણા મેથુનં ધમ્મં પટિસેવન્તિ, મેથુનધમ્મા અપ્પટિવિરતા – અયં, ભિક્ખવે, દુતિયો સમણબ્રાહ્મણાનં ઉપક્કિલેસો, યેન ઉપક્કિલેસેન ઉપક્કિલિટ્ઠા એકે સમણબ્રાહ્મણા ન તપન્તિ, ન ભાસન્તિ, ન વિરોચન્તિ. પુન ચપરં, ભિક્ખવે, એકે સમણબ્રાહ્મણા જાતરૂપરજતં સાદિયન્તિ, જાતરૂપરજતપ્પટિગ્ગહણા અપ્પટિવિરતા – અયં, ભિક્ખવે, તતિયો સમણબ્રાહ્મણાનં ઉપક્કિલેસો, યેન ઉપક્કિલેસેન ઉપક્કિલિટ્ઠા એકે સમણબ્રાહ્મણા ન તપન્તિ, ન ભાસન્તિ, ન વિરોચન્તિ. પુન ચપરં, ભિક્ખવે, એકે સમણબ્રાહ્મણા મિચ્છાજીવેન જીવિતં કપ્પેન્તિ; મિચ્છાજીવા અપ્પટિવિરતા – અયં, ભિક્ખવે, ચતુત્થો સમણબ્રાહ્મણાનં ઉપક્કિલેસો, યેન ઉપક્કિલેસેન ઉપક્કિલિટ્ઠા એકે સમણબ્રાહ્મણા ન તપન્તિ, ન ભાસન્તિ, ન વિરોચન્તિ. ઇમે ખો, ભિક્ખવે, ચત્તારો સમણબ્રાહ્મણાનં ઉપક્કિલેસા, યેહિ ઉપક્કિલેસેહિ ઉપક્કિલિટ્ઠા એકે સમણબ્રાહ્મણા ન તપન્તિ, ન ભાસન્તિ, ન વિરોચન્તિ’. ‘‘ઇદમવોચાવુસો, ભગવા. ઇદં વત્વાન સુગતો અથાપરં એતદવોચ સત્થા –

‘‘રાગદોસપરિક્લિટ્ઠા, એકે સમણબ્રાહ્મણા;

અવિજ્જાનિવુટા [અવિજ્જાનીવુતા (સ્યા.)] પોસા, પિયરૂપાભિનન્દિનો.

‘‘સુરં પિવન્તિ મેરયં, પટિસેવન્તિ મેથુનં;

રજતં જાતરૂપઞ્ચ, સાદિયન્તિ અવિદ્દસૂ.

‘‘મિચ્છાજીવેન જીવન્તિ, એકે સમણબ્રાહ્મણા;

એતે ઉપક્કિલેસા વુત્તા, બુદ્ધેનાદિચ્ચબન્ધુના.

‘‘યેહિ ઉપક્કિલેસેહિ ઉપક્કિલિટ્ઠા, એકે સમણબ્રાહ્મણા;

ન તપન્તિ ન ભાસન્તિ, અસુદ્ધા સરજા મગા.

‘‘અન્ધકારેન ઓનદ્ધા, તણ્હાદાસા સનેત્તિકા;

વડ્ઢેન્તિ કટસિં ઘોરં, આદિયન્તિ પુનબ્ભવન્તિ.

‘‘એવંવાદી કિરાહં આયસ્મન્તે ઉપાસકે સદ્ધે પસન્ને અક્કોસામિ, પરિભાસામિ, અપ્પસાદં કરોમિ; યોહં અધમ્મં અધમ્મોતિ વદામિ, ધમ્મં ધમ્મોતિ વદામિ, અવિનયં અવિનયોતિ વદામિ, વિનયં વિનયોતિ વદામિ.

૪૪૮. [સં. નિ. ૪.૩૬૨ ઇદં વત્થુ આગતં] ‘‘એકમિદં, આવુસો, સમયં ભગવા રાજગહે વિહરતિ વેળુવને કલન્દકનિવાપે. તેન ખો પન સમયેન રાજન્તેપુરે રાજપરિસાયં સન્નિસિન્નાનં સન્નિપતિતાનં અયમન્તરકથા ઉદપાદિ – ‘કપ્પતિ સમણાનં સક્યપુત્તિયાનં જાતરૂપરજતં; સાદિયન્તિ સમણા સક્યપુત્તિયા જાતરૂપરજતં; પટિગ્ગણ્હન્તિ સમણા સક્યપુત્તિયા જાતરૂપરજત’ન્તિ. તેન ખો પનાવુસો સમયેન, મણિચૂળકો ગામણી તસ્સં પરિસાયં નિસિન્નો હોતિ. અથ ખો, આવુસો, મણિચૂળકો ગામણી તં પરિસં એતદવોચ – ‘મા અય્યા એવં અવચુત્થ. ન કપ્પતિ સમણાનં સક્યપુત્તિયાનં જાતરૂપરજતં; ન સાદિયન્તિ સમણા સક્યપુત્તિયા જાતરૂપરજતં; ન પટિગ્ગણ્હન્તિ સમણા સક્યપુત્તિયા જાતરૂપરજતં; નિક્ખિત્તમણિસુવણ્ણા સમણા સક્યપુત્તિયા અપેતજાતરૂપરજતા’તિ. અસક્ખિ ખો, આવુસો, મણિચૂળકો ગામણી તં પરિસં સઞ્ઞાપેતું.

‘‘અથ ખો, આવુસો, મણિચૂળકો ગામણી તં પરિસં સઞ્ઞાપેત્વા યેન ભગવા તેનુપસઙ્કમિ, ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો, આવુસો, મણિચૂળકો ગામણી ભગવન્તં એતદવોચ – ‘ઇધ, ભન્તે, રાજન્તેપુરે રાજપરિસાયં સન્નિસિન્નાનં સન્નિપતિતાનં અયમન્તરકથા ઉદપાદિ – કપ્પતિ સમણાનં સક્યપુત્તિયાનં જાતરૂપરજતં; સાદિયન્તિ સમણા સક્યપુત્તિયા જાતરૂપરજતં; પટિગ્ગણ્હન્તિ સમણા સક્યપુત્તિયા જાતરૂપરજતન્તિ. એવં વુત્તે અહં ભન્તે, તં પરિસં એતદવોચં – મા અય્યા એવં અવચુત્થ. ન કપ્પતિ સમણાનં સક્યપુત્તિયાનં જાતરૂપરજતં; ન સાદિયન્તિ સમણા સક્યપુત્તિયા જાતરૂપરજતં; ન પટિગ્ગણ્હન્તિ સમણા સક્યપુત્તિયા જાતરૂપરજતં; નિક્ખિત્તમણિસુવણ્ણા સમણા સક્યપુત્તિયા અપેતજાતરૂપરજતાતિ. અસક્ખિં ખો અહં, ભન્તે, તં પરિસં સઞ્ઞાપેતું. કચ્ચાહં, ભન્તે, એવં બ્યાકરમાનો વુત્તવાદી ચેવ ભગવતો હોમિ, ન ચ ભગવન્તં અભૂતેન અબ્ભાચિક્ખામિ, ધમ્મસ્સ ચાનુધમ્મં બ્યાકરોમિ, ન ચ કોચિ સહધમ્મિકો વાદાનુવાદો ગારય્હં ઠાનં આગચ્છતી’તિ? ‘તગ્ઘ ત્વં, ગામણિ, એવં બ્યાકરમાનો વુત્તવાદી ચેવ મે હોસિ; ન ચ મં અભૂતેન અબ્ભાચિક્ખસિ [પારા. ૫૮૨], ધમ્મસ્સ ચાનુધમ્મં બ્યાકરોસિ, ન ચ કોચિ સહધમ્મિકો વાદાનુવાદો ગારય્હં ઠાનં આગચ્છતિ. ન હિ, ગામણિ, કપ્પતિ સમણાનં સક્યપુત્તિયાનં જાતરૂપરજતં; ન સાદિયન્તિ સમણા સક્યપુત્તિયા જાતરૂપરજતં; ન પટિગ્ગણ્હન્તિ સમણા સક્યપુત્તિયા જાતરૂપરજતં; નિક્ખિત્તમણિસુવણ્ણા સમણા સક્યપુત્તિયા અપેતજાતરૂપરજતા. યસ્સ ખો, ગામણિ, જાતરૂપરજતં કપ્પતિ, પઞ્ચપિ તસ્સ કામગુણા કપ્પન્તિ. યસ્સ પઞ્ચ કામગુણા કપ્પન્તિ એકંસેનેતં, ગામણિ, ધારેય્યાસિ – અસ્સમણધમ્મો અસક્યપુત્તિયધમ્મોતિ. અપિ ચાહં, ગામણિ, એવં વદામિ તિણં તિણત્થિકેન પરિયેસિતબ્બં; દારુ દારુત્થિકેન પરિયેસિતબ્બં; સકટં સકટત્થિકેન પરિયેસિતબ્બં; પુરિસો પુરિસત્થિકેન પરિયેસિતબ્બો. ન ત્વેવાહં, ગામણિ, કેનચિ પરિયાયેન જાતરૂપરજતં સાદિતબ્બં પરિયેસિતબ્બન્તિ વદામી’તિ.

‘‘એવંવાદી કિરાહં આયસ્મન્તે ઉપાસકે સદ્ધે પસન્ને અક્કોસામિ, પરિભાસામિ, અપ્પસાદં કરોમિ; યોહં અધમ્મં અધમ્મોતિ વદામિ, ધમ્મં ધમ્મોતિ વદામિ, અવિનયં અવિનયોતિ વદામિ, વિનયં વિનયોતિ વદામિ.

૪૪૯. ‘‘એકમિદં, આવુસો, સમયં ભગવા રાજગહે આયસ્મન્તં ઉપનન્દં સક્યપુત્તં આરબ્ભ જાતરૂપરજતં પટિક્ખિપિ, સિક્ખાપદઞ્ચ પઞ્ઞપેસિ. એવંવાદી કિરાહં આયસ્મન્તે ઉપાસકે સદ્ધે પસન્ને અક્કોસામિ, પરિભાસામિ, અપ્પસાદં કરોમિ; યોહં અધમ્મં અધમ્મોતિ વદામિ, ધમ્મં ધમ્મોતિ વદામિ, અવિનયં અવિનયોતિ વદામિ, વિનયં વિનયોતિ વદામી’’તિ.

એવં વુત્તે વેસાલિકા ઉપાસકા આયસ્મન્તં યસં કાકણ્ડકપુત્તં એતદવોચું – ‘‘એકોવ ભન્તે, અય્યો યસો કાકણ્ડકપુત્તો સમણો સક્યપુત્તિયો. સબ્બેવિમે અસ્સમણા અસક્યપુત્તિયા. વસતુ, ભન્તે, અય્યો યસો કાકણ્ડકપુત્તો વેસાલિયં. મયં અય્યસ્સ યસસ્સ કાકણ્ડકપુત્તસ્સ ઉસ્સુક્કં કરિસ્સામ ચીવરપિણ્ડપાતસેનાસનગિલાનપ્પચ્ચયભેસજ્જપરિક્ખારાન’’ન્તિ. અથ ખો આયસ્મા યસો કાકણ્ડકપુત્તો વેસાલિકે ઉપાસકે સઞ્ઞાપેત્વા અનુદૂતેન ભિક્ખુના સદ્ધિં આરામં અગમાસિ.

અથ ખો વેસાલિકા વજ્જિપુત્તકા ભિક્ખૂ અનુદૂતં ભિક્ખું પુચ્છિંસુ – ‘‘ખમાપિતાવુસો, યસેન કાકણ્ડકપુત્તેન વેસાલિકા ઉપાસકા’’તિ? ‘‘ઉપાસકેહિ પાપિકં નો, આવુસો, કતં. એકોવ યસો કાકણ્ડકપુત્તો સમણો સક્યપુત્તિયો કતો. સબ્બેવ મયં અસ્સમણા અસક્યપુત્તિયા કતા’’તિ. અથ ખો વેસાલિકા વજ્જિપુત્તકા ભિક્ખૂ – ‘‘અયં, આવુસો, યસો કાકણ્ડકપુત્તો અમ્હેહિ અસમ્મતો ગિહીનં પકાસેસિ; હન્દસ્સ મયં ઉક્ખેપનીયકમ્મં કરોમા’’તિ. તે તસ્સ ઉક્ખેપનીયકમ્મં કત્તુકામા સન્નિપતિંસુ. અથ ખો આયસ્મા યસો કાકણ્ડકપુત્તો વેહાસં અબ્ભુગ્ગન્ત્વા કોસમ્બિયં પચ્ચુટ્ઠાસિ.

૪૫૦. અથ ખો આયસ્મા યસો કાકણ્ડકપુત્તો પાવેય્યકાનઞ્ચ [પાઠેય્યકાનઞ્ચ (સ્યા.)] અવન્તિદક્ખિણાપથકાનઞ્ચ ભિક્ખૂનં સન્તિકે દૂતં પાહેસિ – ‘‘આગચ્છન્તુ આયસ્મન્તા; ઇમં અધિકરણં આદિયિસ્સામ. પુરે અધમ્મો દિપ્પતિ, ધમ્મો પટિબાહિય્યતિ; અવિનયો દિપ્પતિ, વિનયો પટિબાહિય્યતિ; પુરે અધમ્મવાદિનો બલવન્તો હોન્તિ, ધમ્મવાદિનો દુબ્બલા હોન્તિ; અવિનયવાદિનો બલવન્તો હોન્તિ, વિનયવાદિનો દુબ્બલા હોન્તી’’તિ.

તેન ખો પન સમયેન આયસ્મા સમ્ભૂતો સાણવાસી અહોગઙ્ગે પબ્બતે પટિવસતિ. અથ ખો આયસ્મા યસો કાકણ્ડકપુત્તો યેન અહોગઙ્ગો પબ્બતો, યેનાયસ્મા સમ્ભૂતો સાણવાસી તેનુપસઙ્કમિ, ઉપસઙ્કમિત્વા આયસ્મન્તં સમ્ભૂતં સાણવાસિં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા યસો કાકણ્ડકપુત્તો આયસ્મન્તં સમ્ભૂતં સાણવાસિં એતદવોચ – ‘‘ઇમે, ભન્તે, વેસાલિકા વજ્જિપુત્તકા ભિક્ખૂ વેસાલિયં દસ વત્થૂનિ દીપેન્તિ – કપ્પતિ સિઙ્ગિલોણકપ્પો, કપ્પતિ દ્વઙ્ગુલકપ્પો, કપ્પતિ ગામન્તરકપ્પો, કપ્પતિ આવાસકપ્પો, કપ્પતિ અનુમતિકપ્પો, કપ્પતિ આચિણ્ણકપ્પો, કપ્પતિ અમથિતકપ્પો, કપ્પતિ જળોગિં પાતું, કપ્પતિ અદસકં નિસીદનં, કપ્પતિ જાતરૂપરજતન્તિ. હન્દ મયં, ભન્તે, ઇમં અધિકરણં આદિયિસ્સામ. પુરે અધમ્મો દિપ્પતિ, ધમ્મો પટિબાહિય્યતિ; અવિનયો દિપ્પતિ, વિનયો પટિબાહિય્યતિ; પુરે અધમ્મવાદિનો બલવન્તો હોન્તિ, ધમ્મવાદિનો દુબ્બલા હોન્તિ; અવિનયવાદિનો બલવન્તો હોન્તિ, વિનયવાદિનો દુબ્બલા હોન્તી’’તિ. ‘‘એવમાવુસો’’તિ ખો આયસ્મા સમ્ભૂતો સાણવાસી આયસ્મતો યસસ્સ કાકણ્ડકપુત્તસ્સ પચ્ચસ્સોસિ. અથ ખો સટ્ઠિમત્તા પાવેય્યકા ભિક્ખૂ – સબ્બે આરઞ્ઞિકા, સબ્બે પિણ્ડપાતિકા, સબ્બે પંસુકૂલિકા, સબ્બે તેચીવરિકા, સબ્બેવ અરહન્તો – અહોગઙ્ગે પબ્બતે સન્નિપતિંસુ. અટ્ઠાસીતિમત્તા અવન્તિદક્ખિણાપથકા ભિક્ખૂ – અપ્પેકચ્ચે આરઞ્ઞિકા, અપ્પેકચ્ચે પિણ્ડપાતિકા, અપ્પેકચ્ચે પંસુકૂલિકા, અપ્પેકચ્ચે તેચીવરિકા, સબ્બેવ અરહન્તો – અહોગઙ્ગે પબ્બતે સન્નિપતિંસુ. અથ ખો થેરાનં ભિક્ખૂનં મન્તયમાનાનં એતદહોસિ – ‘‘ઇદં ખો અધિકરણં કક્ખળઞ્ચ, વાળઞ્ચ; કં નુ ખો મયં પક્ખં લભેય્યામ, યેન મયં ઇમસ્મિં અધિકરણે બલવન્તતરા અસ્સામા’’તિ.

૪૫૧. તેન ખો પન સમયેન આયસ્મા રેવતો સોરેય્યે પટિવસતિ – બહુસ્સુતો આગતાગમો ધમ્મધરો વિનયધરો માતિકાધરો પણ્ડિતો વિયત્તો મેધાવી લજ્જી કુક્કુચ્ચકો સિક્ખાકામો. અથ ખો થેરાનં ભિક્ખૂનં એતદહોસિ – ‘‘અયં ખો આયસ્મા રેવતો સોરેય્યે પટિવસતિ – બહુસ્સુતો આગતાગમો ધમ્મધરો વિનયધરો માતિકાધરો પણ્ડિતો વિયત્તો મેધાવી લજ્જી કુક્કુચ્ચકો સિક્ખાકામો. સચે મયં આયસ્મન્તં રેવતં પક્ખં લભિસ્સામ, એવં મયં ઇમસ્મિં અધિકરણે બલવન્તતરા અસ્સામા’’તિ. અસ્સોસિ ખો આયસ્મા રેવતો – દિબ્બાય સોતધાતુયા વિસુદ્ધાય અતિક્કન્તમાનુસિકાય – થેરાનં ભિક્ખૂનં મન્તયમાનાનં. સુત્વાનસ્સ એતદહોસિ – ‘‘ઇદં ખો અધિકરણં કક્ખળઞ્ચ વાળઞ્ચ. ન ખો મેતં પતિરૂપં યોહં એવરૂપે અધિકરણે ઓસક્કેય્યં. ઇદાનિ ચ પન તે ભિક્ખૂ આગચ્છિસ્સન્તિ. સોહં તેહિ આકિણ્ણો ન ફાસુ ગમિસ્સામિ. યંનૂનાહં પટિકચ્ચેવ ગચ્છેય્ય’’ન્તિ. અથ ખો આયસ્મા રેવતો સોરેય્યા સઙ્કસ્સં અગમાસિ.

અથ ખો થેરા ભિક્ખૂ સોરેય્યં ગન્ત્વા પુચ્છિંસુ – ‘‘કહં આયસ્મા રેવતો’’તિ? તે એવમાહંસુ – ‘‘એસાયસ્મા રેવતો સઙ્કસ્સં ગતો’’તિ. અથ ખો આયસ્મા રેવતો સઙ્કસ્સા કણ્ણકુજ્જં [કન્નકુજ્જં (સી.)] અગમાસિ. અથ ખો થેરા ભિક્ખૂ સઙ્કસ્સં ગન્ત્વા પુચ્છિંસુ – ‘‘કહં આયસ્મા રેવતો’’તિ? તે એવમાહંસુ – ‘‘એસાયસ્મા રેવતો કણ્ણકુજ્જં ગતો’’તિ. અથ ખો આયસ્મા રેવતો કણ્ણકુજ્જા ઉદુમ્બરં અગમાસિ. અથ ખો થેરા ભિક્ખૂ કણ્ણકુજ્જં ગન્ત્વા પુચ્છિંસુ – ‘‘કહં આયસ્મા રેવતો’’તિ? તે એવમાહંસુ – ‘‘એસાયસ્મા રેવતો ઉદુમ્બરં ગતો’’તિ. અથ ખો આયસ્મા રેવતો ઉદુમ્બરા અગ્ગળપુરં અગમાસિ. અથ ખો થેરા ભિક્ખૂ ઉદુમ્બરં ગન્ત્વા પુચ્છિંસુ – ‘‘કહં આયસ્મા રેવતો’’તિ? તે એવમાહંસુ – ‘‘એસાયસ્મા રેવતો અગ્ગળપુરં ગતો’’તિ. અથ ખો આયસ્મા રેવતો અગ્ગળપુરા સહજાતિં [સહંજાતિં (ક.)] અગમાસિ. અથ ખો થેરા ભિક્ખૂ અગ્ગળપુરં ગન્ત્વા પુચ્છિંસુ – ‘‘કહં આયસ્મા રેવતો’’તિ? તે એવમાહંસુ – ‘‘એસાયસ્મા રેવતો સહજાતિં ગતો’’તિ. અથ ખો થેરા ભિક્ખૂ આયસ્મન્તં રેવતં સહજાતિયં સમ્ભાવેસું.

૪૫૨. અથ ખો આયસ્મા સમ્ભૂતો સાણવાસી આયસ્મન્તં યસં કાકણ્ડકપુત્તં એતદવોચ – ‘‘અયં, આવુસો, આયસ્મા રેવતો બહુસ્સુતો આગતાગમો ધમ્મધરો વિનયધરો માતિકાધરો પણ્ડિતો વિયત્તો મેધાવી લજ્જી કુક્કુચ્ચકો સિક્ખાકામો. સચે મયં આયસ્મન્તં રેવતં પઞ્હં પુચ્છિસ્સામ, પટિબલો આયસ્મા રેવતો એકેનેવ પઞ્હેન સકલમ્પિ રત્તિં વીતિનામેતું. ઇદાનિ ચ પનાયસ્મા રેવતો અન્તેવાસિકં [અન્તેવાસિં (સ્યા.)] સરભાણકં ભિક્ખું અજ્ઝેસિસ્સતિ. સો ત્વં તસ્સ ભિક્ખુનો સરભઞ્ઞપરિયોસાને આયસ્મન્તં રેવતં ઉપસઙ્કમિત્વા ઇમાનિ દસ વત્થૂનિ પુચ્છેય્યાસી’’તિ. ‘‘એવં ભન્તે’’તિ ખો આયસ્મા યસો કાકણ્ડકપુત્તો આયસ્મતો સમ્ભૂતસ્સ સાણવાસિસ્સ પચ્ચસ્સોસિ. અથ ખો આયસ્મા રેવતો અન્તેવાસિકં સરભાણકં ભિક્ખું અજ્ઝેસિ. અથ ખો આયસ્મા યસો કાકણ્ડકપુત્તો તસ્સ ભિક્ખુનો સરભઞ્ઞપરિયોસાને યેનાયસ્મા રેવતો તેનુપસઙ્કમિ, ઉપસઙ્કમિત્વા આયસ્મન્તં રેવતં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા યસો કાકણ્ડકપુત્તો આયસ્મન્તં રેવતં એતદવોચ – ‘‘કપ્પતિ, ભન્તે, સિઙ્ગિલોણકપ્પો’’તિ? ‘‘કો સો, આવુસો, સિઙ્ગિલોણકપ્પો’’તિ? ‘‘કપ્પતિ, ભન્તે, સિઙ્ગિના લોણં પરિહરિતું – યત્થ અલોણકં ભવિસ્સતિ તત્થ પરિભુઞ્જિસ્સામી’’તિ? ‘‘નાવુસો, કપ્પતી’’તિ. ‘‘કપ્પતિ, ભન્તે, દ્વઙ્ગુલકપ્પો’’તિ? ‘‘કો સો, આવુસો, દ્વઙ્ગુલકપ્પો’’તિ? ‘‘કપ્પતિ, ભન્તે, દ્વઙ્ગુલાય છાયાય વીતિવત્તાય, વિકાલે ભોજનં ભુઞ્જિતુ’’ન્તિ? ‘‘નાવુસો, કપ્પતી’’તિ. ‘‘કપ્પતિ, ભન્તે, ગામન્તરકપ્પો’’તિ? ‘‘કો સો, આવુસો, ગામન્તરકપ્પો’’તિ? ‘‘કપ્પતિ, ભન્તે – ઇદાનિ ગામન્તરં ગમિસ્સામીતિ – ભુત્તાવિના પવારિતેન અનતિરિત્તં ભોજનં ભુઞ્જિતુ’’ન્તિ? ‘‘નાવુસો, કપ્પતી’’તિ. ‘‘કપ્પતિ, ભન્તે, આવાસકપ્પો’’તિ? ‘‘કો સો, આવુસો, આવાસકપ્પો’’તિ? ‘‘કપ્પતિ, ભન્તે, સમ્બહુલા આવાસા સમાનસીમા નાનુપોસથં કાતુ’’ન્તિ? ‘‘નાવુસો, કપ્પતી’’તિ. ‘‘કપ્પતિ, ભન્તે, અનુમતિકપ્પો’’તિ? ‘‘કો સો, આવુસો, અનુમતિકપ્પો’’તિ? ‘‘કપ્પતિ, ભન્તે, વગ્ગેન સઙ્ઘેન કમ્મં કાતું – આગતે ભિક્ખૂ અનુમાનેસ્સામા’’તિ [અનુજાનિસ્સામાતિ, અનુજાનેસ્સામાતિ, અનુમતિં આનેસ્સામાતિ (ક.)]? ‘‘નાવુસો, કપ્પતી’’તિ. ‘‘કપ્પતિ, ભન્તે, આચિણ્ણકપ્પો’’તિ? ‘‘કો સો, આવુસો, આચિણ્ણકપ્પો’’તિ? ‘‘કપ્પતિ, ભન્તે, ઇદં મે ઉપજ્ઝાયેન અજ્ઝાચિણ્ણં, ઇદં મે આચરિયેન અજ્ઝાચિણ્ણં, તં અજ્ઝાચરિતુ’’ન્તિ? ‘‘આચિણ્ણકપ્પો ખો, આવુસો, એકચ્ચો કપ્પતિ, એકચ્ચો ન કપ્પતી’’તિ. ‘‘કપ્પતિ, ભન્તે, અમથિતકપ્પો’’તિ? ‘‘કો સો, આવુસો, અમથિતકપ્પો’’તિ? ‘‘કપ્પતિ, ભન્તે, યં તં ખીરં ખીરભાવં વિજહિતં, અસમ્પત્તં દધિભાવં, તં ભુત્તાવિના પવારિતેન અનતિરિત્તં પાતુ’’ન્તિ? ‘‘નાવુસો, કપ્પતી’’તિ? ‘‘કપ્પતિ, ભન્તે, જળોગિં પાતુ’’ન્તિ? ‘‘કા સા, આવુસો, જળોગી’’તિ? ‘‘કપ્પતિ, ભન્તે, યા સા સુરા આસુતા, અસમ્પત્તા મજ્જભાવં, સા પાતુ’’ન્તિ? ‘‘નાવુસો, કપ્પતી’’તિ. ‘‘કપ્પતિ, ભન્તે, અદસકં નિસીદન’’ન્તિ? ‘‘નાવુસો, કપ્પતી’’તિ. ‘‘કપ્પતિ, ભન્તે, જાતરૂપરજત’’ન્તિ? ‘‘નાવુસો, કપ્પતી’’તિ. ‘‘ઇમે, ભન્તે, વેસાલિકા વજ્જિપુત્તકા ભિક્ખૂ વેસાલિયં ઇમાનિ દસ વત્થૂનિ દીપેન્તિ. હન્દ મયં, ભન્તે, ઇમં અધિકરણં આદિયિસ્સામ. પુરે અધમ્મો દિપ્પતિ, ધમ્મો પટિબાહિય્યતિ; અવિનયો દિપ્પતિ, વિનયો પટિબાહિય્યતિ; પુરે અધમ્મવાદિનો બલવન્તો હોન્તિ, ધમ્મવાદિનો દુબ્બલા હોન્તિ; અવિનયવાદિનો બલવન્તો હોન્તિ, વિનયવાદિનો દુબ્બલા હોન્તી’’તિ. ‘‘એવમાવુસો’’તિ ખો આયસ્મા રેવતો આયસ્મતો યસસ્સ કાકણ્ડકપુત્તસ્સ પચ્ચસ્સોસિ.

પઠમભાણવારો નિટ્ઠિતો.

૨. દુતિયભાણવારો

૪૫૩. અસ્સોસું ખો વેસાલિકા વજ્જિપુત્તકા ભિક્ખૂ – ‘‘યસો કિર કાકણ્ડકપુત્તો ઇદં અધિકરણં આદિયિતુકામો પક્ખં પરિયેસતિ, લભતિ ચ કિર પક્ખ’’ન્તિ. અથ ખો વેસાલિકાનં વજ્જિપુત્તકાનં ભિક્ખૂનં એતદહોસિ – ‘‘ઇદં ખો અધિકરણં કક્ખળઞ્ચ વાળઞ્ચ. કં નુ ખો મયં પક્ખં લભેય્યામ, યેન મયં ઇમસ્મિં અધિકરણે બલવન્તતરા અસ્સામા’’તિ.

અથ ખો વેસાલિકાનં વજ્જિપુત્તકાનં ભિક્ખૂનં એતદહોસિ – ‘‘અયં ખો આયસ્મા રેવતો બહુસ્સુતો આગતાગમો ધમ્મધરો વિનયધરો માતિકાધરો પણ્ડિતો વિયત્તો મેધાવી લજ્જી કુક્કુચ્ચકો સિક્ખાકામો. સચે મયં આયસ્મન્તં રેવતં પક્ખં લભેય્યામ, એવં મયં ઇમસ્મિં અધિકરણે બલવન્તતરા અસ્સામા’’તિ.

અથ ખો વેસાલિકા વજ્જિપુત્તકા ભિક્ખૂ પહૂતં સામણકં પરિક્ખારં પટિયાદેસું – પત્તમ્પિ, ચીવરમ્પિ, નિસીદનમ્પિ, સૂચિઘરમ્પિ, કાયબન્ધનમ્પિ, પરિસ્સાવનમ્પિ, ધમ્મકરણમ્પિ. અથ ખો વેસાલિકા વજ્જિપુત્તકા ભિક્ખૂ તં સામણકં પરિક્ખારં આદાય નાવાય સહજાતિં ઉજ્જવિંસુ; નાવાય પચ્ચોરોહિત્વા અઞ્ઞતરસ્મિં રુક્ખમૂલે ભત્તવિસ્સગ્ગં કરોન્તિ. અથ ખો આયસ્મતો સાળ્હસ્સ રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ – ‘‘કે નુ ખો ધમ્મવાદિનો – પાચીનકા વા ભિક્ખૂ, પાવેય્યકા વા’’તિ? અથ ખો આયસ્મતો સાળ્હસ્સ, ધમ્મઞ્ચ વિનયઞ્ચ ચેતસા પચ્ચવેક્ખન્તસ્સ, એતદહોસિ – ‘‘અધમ્મવાદિનો પાચીનકા ભિક્ખૂ, ધમ્મવાદિનો પાવેય્યકા [પાઠેય્યકા (સ્યા.)] ભિક્ખૂ’’તિ.

અથ ખો અઞ્ઞતરા સુદ્ધાવાસકાયિકા દેવતા આયસ્મતો સાળ્હસ્સ ચેતસા ચેતોપરિવિતક્કમઞ્ઞાય – સેય્યથાપિ નામ બલવા પુરિસો સમિઞ્જિતં વા બાહં પસારેય્ય, પસારિતં વા બાહં સમ્મિઞ્જેય્ય, એવમેવ સુદ્ધાવાસેસુ દેવેસુ અન્તરહિતા – આયસ્મતો સાળ્હસ્સ સમ્મુખે પાતુરહોસિ. અથ ખો સા દેવતા આયસ્મન્તં સાળ્હં એતદવોચ – ‘‘સાધુ, ભન્તે સાળ્હ, અધમ્મવાદી પાચીનકા ભિક્ખૂ, ધમ્મવાદી પાવેય્યકા ભિક્ખૂ. તેન હિ, ભન્તે સાળ્હ, યથાધમ્મો તથા તિટ્ઠાહી’’તિ. ‘‘પુબ્બેપિ ચાહં, દેવતે, એતરહિ ચ યથાધમ્મો તથા ઠિતો; અપિ ચાહં ન તાવ દિટ્ઠિં આવિ કરોમિ, અપ્પેવ નામ મં ઇમસ્મિં અધિકરણે સમ્મન્નેય્યા’’તિ.

૪૫૪. અથ ખો વેસાલિકા વજ્જિપુત્તકા ભિક્ખૂ તં સામણકં પરિક્ખારં આદાય યેનાયસ્મા રેવતો તેનુપસઙ્કમિંસુ, ઉપસઙ્કમિત્વા આયસ્મન્તં રેવતં એતદવોચું – ‘‘પટિગ્ગણ્હાતુ, ભન્તે, થેરો સામણકં પરિક્ખારં – પત્તમ્પિ, ચીવરમ્પિ, નિસીદનમ્પિ, સૂચિઘરમ્પિ, કાયબન્ધનમ્પિ, પરિસ્સાવનમ્પિ, ધમ્મકરણમ્પી’’તિ. ‘‘અલં, આવુસો, પરિપુણ્ણં મે પત્તચીવર’’ન્તિ ન ઇચ્છિ પટિગ્ગહેતું.

તેન ખો પન સમયેન ઉત્તરો નામ ભિક્ખુ વીસતિવસ્સો આયસ્મતો રેવતસ્સ ઉપટ્ઠાકો હોતિ. અથ ખો વેસાલિકા વજ્જિપુત્તકા ભિક્ખૂ યેનાયસ્મા ઉત્તરો તેનુપસઙ્કમિંસુ, ઉપસઙ્કમિત્વા આયસ્મન્તં ઉત્તરં એતદવોચું – ‘‘પટિગ્ગણ્હાતુ આયસ્મા ઉત્તરો સામણકં પરિક્ખારં – પત્તમ્પિ, ચીવરમ્પિ, નિસીદનમ્પિ, સૂચિઘરમ્પિ, કાયબન્ધનમ્પિ, પરિસ્સાવનમ્પિ, ધમ્મકરણમ્પી’’તિ. ‘‘અલં, આવુસો, પરિપુણ્ણં મે પત્તચીવર’’ન્તિ ન ઇચ્છિ પટિગ્ગહેતું. ‘‘મનુસ્સા ખો, આવુસો ઉત્તર, ભગવતો સામણકં પરિક્ખારં ઉપનામેન્તિ. સચે ભગવા પટિગ્ગણ્હાતિ, તેનેવ તે અત્તમના હોન્તિ. નો ચે ભગવા પટિગ્ગણ્હાતિ, આયસ્મતો [આયસ્મતો ચ (સ્યા.)] આનન્દસ્સ ઉપનામેન્તિ – પટિગ્ગણ્હાતુ, ભન્તે, થેરો સામણકં પરિક્ખારં. યથા ભગવતા પટિગ્ગહિતો, એવમેવ સો ભવિસ્સતીતિ. પટિગ્ગણ્હાતુ આયસ્મા ઉત્તરો સામણકં પરિક્ખારં. યથા થેરેન પટિગ્ગહિતો, એવમેવ સો ભવિસ્સતી’’તિ. અથ ખો આયસ્મા ઉત્તરો વેસાલિકેહિ વજ્જિપુત્તેહિ ભિક્ખૂહિ નિપ્પીળિયમાનો એકં ચીવરં અગ્ગહેસિ. ‘‘વદેય્યાથ, આવુસો, યેન અત્થો’’તિ. ‘‘એત્તકં આયસ્મા ઉત્તરો થેરં વદેતુ; એત્તકઞ્ચ, ભન્તે, થેરો સઙ્ઘમજ્ઝે વદેતુ – ‘પુરત્થિમેસુ જનપદેસુ બુદ્ધા ભગવન્તો ઉપ્પજ્જન્તિ. ધમ્મવાદી પાચીનકા ભિક્ખૂ, અધમ્મવાદી પાવેય્યકા ભિક્ખૂ’’’તિ. ‘‘એવમાવુસો’’તિ ખો આયસ્મા ઉત્તરો વેસાલિકાનં વજ્જિપુત્તકાનં ભિક્ખૂનં પટિસ્સુત્વા યેનાયસ્મા રેવતો તેનુપસઙ્કમિ, ઉપસઙ્કમિત્વા આયસ્મન્તં રેવતં એતદવોચ – ‘‘એત્તકં, ભન્તે, થેરો સઙ્ઘમજ્ઝે વદેતુ – ‘પુરત્થિમેસુ જનપદેસુ બુદ્ધા ભગવન્તો ઉપ્પજ્જન્તિ. ધમ્મવાદી પાચીનકા ભિક્ખૂ, અધમ્મવાદી પાવેય્યકા ભિક્ખૂ’’’તિ. ‘‘અધમ્મે મં ત્વં, ભિક્ખુ, નિયોજેસી’’તિ થેરો આયસ્મન્તં ઉત્તરં પણામેસિ.

અથ ખો વેસાલિકા વજ્જિપુત્તકા ભિક્ખૂ આયસ્મન્તં ઉત્તરં એતદવોચું – ‘‘કિં, આવુસો ઉત્તર, થેરો આહા’’તિ? ‘‘પાપિકં નો, આવુસો, કતં. ‘અધમ્મે મં ત્વં, ભિક્ખુ, નિયોજેસી’’’તિ થેરો મં પણામેસીતિ. ‘‘નનુ ત્વં, આવુસો [આવુસો ઉત્તર (સ્યા. કં.)], વુડ્ઢો વીસતિવસ્સોસી’’તિ? ‘‘આમાવુસો, અપિ ચ મયં ગરુનિસ્સયં ગણ્હામા’’તિ.

૪૫૫. અથ ખો સઙ્ઘો તં અધિકરણં વિનિચ્છિનિતુકામો સન્નિપતિ. અથ ખો આયસ્મા રેવતો સઙ્ઘં ઞાપેસિ –

‘‘સુણાતુ મે, આવુસો, સઙ્ઘો. સચે મયં ઇમં અધિકરણં ઇધ વૂપસમેસ્સામ, સિયાપિ મૂલાદાયકા [મૂલદાયકા (સી.)] ભિક્ખૂ પુનકમ્માય ઉક્કોટેય્યું. યદિ સઙ્ઘસ્સ પત્તકલ્લં, યત્થેવિમં અધિકરણં સમુપ્પન્નં, સઙ્ઘો તત્થેવિમં અધિકરણં વૂપસમેય્યા’’તિ.

અથ ખો થેરા ભિક્ખૂ વેસાલિં અગમંસુ – તં અધિકરણં વિનિચ્છિનિતુકામા.

તેન ખો પન સમયેન સબ્બકામી નામ પથબ્યા સઙ્ઘત્થેરો વીસવસ્સસતિકો ઉપસમ્પદાય, આયસ્મતો આનન્દસ્સ સદ્ધિવિહારિકો, વેસાલિયં પટિવસતિ. અથ ખો આયસ્મા રેવતો આયસ્મન્તં સમ્ભૂતં સાણવાસિં એતદવોચ – ‘‘અહં, આવુસો, યસ્મિં વિહારે સબ્બકામી થેરો વિહરતિ, તં વિહારં ઉપગચ્છામિ. સો ત્વં કાલસ્સેવ આયસ્મન્તં સબ્બકામિં ઉપસઙ્કમિત્વા ઇમાનિ દસ વત્થૂનિ પુચ્છેય્યાસી’’તિ.

‘‘એવં ભન્તે’’તિ ખો આયસ્મા સમ્ભૂતો સાણવાસી આયસ્મતો રેવતસ્સ પચ્ચસ્સોસિ. અથ ખો આયસ્મા રેવતો, યસ્મિં વિહારે સબ્બકામી થેરો વિહરતિ, તં વિહારં ઉપગચ્છિ. ગબ્ભે આયસ્મતો સબ્બકામિસ્સ સેનાસનં પઞ્ઞત્તં હોતિ, ગબ્ભપ્પમુખે આયસ્મતો રેવતસ્સ. અથ ખો આયસ્મા રેવતો – અયં થેરો મહલ્લકો ન નિપજ્જતીતિ – ન સેય્યં કપ્પેસિ. આયસ્મા સબ્બકામી – અયં ભિક્ખુ આગન્તુકો કિલન્તો ન નિપજ્જતીતિ – ન સેય્યં કપ્પેસિ. અથ ખો આયસ્મા સબ્બકામી રત્તિયા પચ્ચૂસસમયં પચ્ચુટ્ઠાય આયસ્મન્તં રેવતં એતદવોચ – ‘‘કતમેન ત્વં ભૂમિ વિહારેન એતરહિ બહુલં વિહરસી’’તિ? ‘‘મેત્તાવિહારેન ખો અહં, ભન્તે, એતરહિ બહુલં વિહરામી’’તિ. ‘‘કુલ્લકવિહારેન કિર ત્વં ભૂમિ એતરહિ બહુલં વિહરસિ. કુલ્લકવિહારો એસો [હેસો (સ્યા.)] ભૂમિ યદિદં મેત્તા’’તિ. ‘‘પુબ્બેપિ મે, ભન્તે, ગિહિભૂતસ્સ આચિણ્ણા મેત્તા. તેનાહં એતરહિપિ મેત્તાવિહારેન બહુલં વિહરામિ, અપિ ચ ખો મયા ચિરપ્પત્તં અરહત્ત’’ન્તિ. ‘‘થેરો પન, ભન્તે, કતમેન વિહારેન એતરહિ બહુલં વિહરતી’’તિ? ‘‘સુઞ્ઞતાવિહારેન ખો અહં ભૂમિ એતરહિ બહુલં વિહરામી’’તિ. ‘‘મહાપુરિસવિહારેન કિર, ભન્તે, થેરો એતરહિ બહુલં વિહરતિ. મહાપુરિસવિહારો એસો, ભન્તે, યદિદં સુઞ્ઞતા’’તિ. ‘‘પુબ્બેપિ મે ભૂમિ ગિહિભૂતસ્સ આચિણ્ણા સુઞ્ઞતા. તેનાહં એતરહિપિ સુઞ્ઞતાવિહારેન બહુલં વિહરામિ, અપિ ચ મયા ચિરપ્પત્તં અરહત્ત’’ન્તિ. અયઞ્ચરહિ થેરાનં ભિક્ખૂનં અન્તરાકથા વિપ્પકતા, અથાયસ્મા સમ્ભૂતો સાણવાસી તસ્મિં અનુપ્પત્તો હોતિ. અથ ખો આયસ્મા સમ્ભૂતો સાણવાસી યેનાયસ્મા સબ્બકામી તેનુપસઙ્કમિ, ઉપસઙ્કમિત્વા આયસ્મન્તં સબ્બકામિં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા સમ્ભૂતો સાણવાસી આયસ્મન્તં સબ્બકામિં એતદવોચ – ‘‘ઇમે, ભન્તે, વેસાલિકા વજ્જિપુત્તકા ભિક્ખૂ વેસાલિયં દસ વત્થૂનિ દીપેન્તિ – કપ્પતિ સિઙ્ગિલોણકપ્પો, કપ્પતિ દ્વઙ્ગુલકપ્પો, કપ્પતિ ગામન્તરકપ્પો, કપ્પતિ આવાસકપ્પો, કપ્પતિ અનુમતિકપ્પો, કપ્પતિ આચિણ્ણકપ્પો, કપ્પતિ અમથિતકપ્પો, કપ્પતિ જળોગિં, પાતું કપ્પતિ અદસકં નિસીદનં, કપ્પતિ જાતરૂપરજતન્તિ. થેરેન, ભન્તે, ઉપજ્ઝાયસ્સ મૂલે બહુધમ્મો ચ વિનયો ચ પરિયત્તો. થેરસ્સ ભન્તે, ધમ્મઞ્ચ વિનયઞ્ચ પચ્ચવેક્ખન્તસ્સ કથં હોતિ? કે નુ ખો ધમ્મવાદિનો – પાચીનકા વા ભિક્ખૂ, પાવેય્યકા વા’’તિ? ‘‘તયાપિ ખો, આવુસો, ઉપજ્ઝાયસ્સ મૂલે બહુ ધમ્મો ચ વિનયો ચ પરિયત્તો. તુય્હં પન, આવુસો, ધમ્મઞ્ચ વિનયઞ્ચ પચ્ચવેક્ખન્તસ્સ કથં હોતિ? કે નુ ખો ધમ્મવાદિનો – પાચીનકા વા ભિક્ખૂ, પાવેય્યકા વા’’તિ? ‘‘મય્હં ખો, ભન્તે, ધમ્મઞ્ચ વિનયઞ્ચ પચ્ચવેક્ખન્તસ્સ એવં હોતિ – અધમ્મવાદી પાચીનકા ભિક્ખૂ, ધમ્મવાદી પાવેય્યકા ભિક્ખૂતિ; અપિ ચાહં ન તાવ દિટ્ઠિં આવિ કરોમિ, અપ્પેવ નામ મં ઇમસ્મિં અધિકરણે સમ્મન્નેય્યા’’તિ. ‘‘મય્હમ્પિ ખો, આવુસો, ધમ્મઞ્ચ વિનયઞ્ચ પચ્ચવેક્ખન્તસ્સ એવં હોતિ – અધમ્મવાદી પાચીનકા ભિક્ખૂ, ધમ્મવાદી પાવેય્યકા ભિક્ખૂતિ; અપિ ચાહં ન તાવ દિટ્ઠિં આવિ કરોમિ, અપ્પેવ નામ મં ઇમસ્મિં અધિકરણે સમ્મન્નેય્યા’’તિ.

૪૫૬. અથ ખો સઙ્ઘો તં અધિકરણં વિનિચ્છિનિતુકામો સન્નિપતિ. તસ્મિં ખો પન અધિકરણે વિનિચ્છિયમાને અનગ્ગાનિ ચેવ ભસ્સાનિ જાયન્તિ, ન ચેકસ્સ ભાસિતસ્સ અત્થો વિઞ્ઞાયતિ. અથ ખો આયસ્મા રેવતો સઙ્ઘં ઞાપેસિ –

‘‘સુણાતુ મે, ભન્તે, સઙ્ઘો. અમ્હાકં ઇમસ્મિં અધિકરણે વિનિચ્છિયમાને અનગ્ગાનિ ચેવ ભસ્સાનિ જાયન્તિ, ન ચેકસ્સ ભાસિતસ્સ અત્થો વિઞ્ઞાયતિ. યદિ સઙ્ઘસ્સ પત્તકલ્લં, સઙ્ઘો ઇમં અધિકરણં ઉબ્બાહિકાય વૂપસમેય્યા’’તિ. સઙ્ઘો ચત્તારો પાચીનકે ભિક્ખૂ, ચત્તારો પાવેય્યકે ભિક્ખૂ ઉચ્ચિનિ. પાચીનકાનં ભિક્ખૂનં – આયસ્મન્તઞ્ચ સબ્બકામિં, આયસ્મન્તઞ્ચ સાળ્હં, આયસ્મન્તઞ્ચ ખુજ્જસોભિતં, આયસ્મન્તઞ્ચ વાસભગામિકં; પાવેય્યકાનં ભિક્ખૂનં – આયસ્મન્તઞ્ચ રેવતં, આયસ્મન્તઞ્ચ સમ્ભૂતં સાણવાસિં, આયસ્મન્તઞ્ચ યસં કાકણ્ડકપુત્તં, આયસ્મન્તઞ્ચ સુમનન્તિ. અથ ખો આયસ્મા રેવતો સઙ્ઘં ઞાપેસિ –

‘‘સુણાતુ મે, ભન્તે, સઙ્ઘો. અમ્હાકં ઇમસ્મિં અધિકરણે વિનિચ્છિયમાને અનગ્ગાનિ ચેવ ભસ્સાનિ જાયન્તિ, ન ચેકસ્સ ભાસિતસ્સ અત્થો વિઞ્ઞાયતિ. યદિ સઙ્ઘસ્સ પત્તકલ્લં, સઙ્ઘો ચત્તારો પાચીનકે ભિક્ખૂ, ચત્તારો પાવેય્યકે ભિક્ખૂ સમ્મન્નેય્ય ઉબ્બાહિકાય ઇમં અધિકરણં વૂપસમેતું. એસા ઞત્તિ.

‘‘સુણાતુ મે, ભન્તે, સઙ્ઘો. અમ્હાકં ઇમસ્મિં અધિકરણે વિનિચ્છિયમાને અનગ્ગાનિ ચેવ ભસ્સાનિ જાયન્તિ, ન ચેકસ્સ ભાસિતસ્સ અત્થો વિઞ્ઞાયતિ. સઙ્ઘો ચત્તારો પાચીનકે ભિક્ખૂ, ચત્તારો પાવેય્યકે ભિક્ખૂ સમ્મન્નતિ ઉબ્બાહિકાય ઇમં અધિકરણં વૂપસમેતું. યસ્સાયસ્મતો ખમતિ ચતુન્નં પાચીનકાનં ભિક્ખૂનં, ચતુન્નં પાવેય્યકાનં ભિક્ખૂનં સમ્મુતિ, ઉબ્બાહિકાય ઇમં અધિકરણં વૂપસમેતું, સો તુણ્હસ્સ; યસ્સ નક્ખમતિ, સો ભાસેય્ય.

‘‘સમ્મતા સઙ્ઘેન ચત્તારો પાચીનકા ભિક્ખૂ, ચત્તારો પાવેય્યકા ભિક્ખૂ, ઉબ્બાહિકાય ઇમં અધિકરણં વૂપસમેતું. ખમતિ સઙ્ઘસ્સ, તસ્મા તુણ્હી, એવમેતં ધારયામી’’તિ.

તેન ખો પન સમયેન અજિતો નામ ભિક્ખુ દસવસ્સો સઙ્ઘસ્સ પાતિમોક્ખુદ્દેસકો હોતિ. અથ ખો સઙ્ઘો આયસ્મન્તમ્પિ અજિતં સમ્મન્નતિ – થેરાનં ભિક્ખૂનં આસનપઞ્ઞાપકં. અથ ખો થેરાનં ભિક્ખૂનં એતદહોસિ – ‘‘કત્થ નુ ખો મયં ઇમં અધિકરણં વૂપસમેય્યામા’’તિ? અથ ખો થેરાનં ભિક્ખૂનં એતદહોસિ – ‘‘અયં ખો વાલિકારામો રમણીયો અપ્પસદ્દો અપ્પનિગ્ઘોસો. યંનૂન મયં વાલિકારામે ઇમં અધિકરણં વૂપસમેય્યામા’’તિ.

૪૫૭. અથ ખો થેરા ભિક્ખૂ વાલિકારામં અગમંસુ – તં અધિકરણં વિનિચ્છિનિતુકામા. અથ ખો આયસ્મા રેવતો સઙ્ઘં ઞાપેસિ –

‘‘સુણાતુ મે, ભન્તે, સઙ્ઘો. યદિ સઙ્ઘસ્સ પત્તકલ્લં, અહં આયસ્મન્તં સબ્બકામિં વિનયં પુચ્છેય્ય’’ન્તિ.

આયસ્મા સબ્બકામી સઙ્ઘં ઞાપેસિ –

‘‘સુણાતુ મે, આવુસો, સઙ્ઘો. યદિ સઙ્ઘસ્સ પત્તકલ્લં, અહં રેવતેન વિનયં પુટ્ઠો વિસ્સજ્જેય્ય’’ન્તિ.

અથ ખો આયસ્મા રેવતો આયસ્મન્તં સબ્બકામિં એતદવોચ – ‘‘કપ્પતિ, ભન્તે, સિઙ્ગિલોણકપ્પો’’તિ? ‘‘કો સો, આવુસો, સિઙ્ગિલોણકપ્પો’’તિ? ‘‘કપ્પતિ, ભન્તે, સિઙ્ગિના લોણં પરિહરિતું – યત્થ અલોણકં ભવિસ્સતિ તત્થ પરિભુઞ્જિસ્સામા’’તિ? ‘‘નાવુસો, કપ્પતી’’તિ. [પાચિ. ૨૫૪ આદયો] ‘‘કત્થ પટિક્ખિત્ત’’ન્તિ? ‘‘સાવત્થિયં, સુત્તવિભઙ્ગે’’તિ. ‘‘કિં આપજ્જતી’’તિ? ‘‘સન્નિધિકારકભોજને પાચિત્તિય’’ન્તિ.

‘‘સુણાતુ મે, ભન્તે, સઙ્ઘો. ઇદં પઠમં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં પઠમં સલાકં નિક્ખિપામિ’’.

‘‘કપ્પતિ, ભન્તે, દ્વઙ્ગુલકપ્પો’’તિ? ‘‘કો સો, આવુસો, દ્વઙ્ગુલકપ્પો’’તિ? ‘‘કપ્પતિ, ભન્તે, દ્વઙ્ગુલાય છાયાય વીતિવત્તાય વિકાલે ભોજનં ભુઞ્જિતુ’’ન્તિ? ‘‘નાવુસો, કપ્પતી’’તિ [પાચિ. ૨૪૫]. ‘‘કત્થ પટિક્ખિત્ત’’ન્તિ? ‘‘રાજગહે, સુત્તવિભઙ્ગે’’તિ. ‘‘કિં આપજ્જતી’’તિ? વિકાલભોજને પાચિત્તિય’’ન્તિ.

‘‘સુણાતુ મે, ભન્તે, સઙ્ઘો. ઇદં દુતિયં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં દુતિયં સલાકં નિક્ખિપામિ’’.

‘‘કપ્પતિ, ભન્તે, ગામન્તરકપ્પો’’તિ? ‘‘કો સો, આવુસો, ગામન્તરકપ્પો’’તિ? ‘‘કપ્પતિ, ભન્તે – ઇદાનિ ગામન્તરં ગમિસ્સામીતિ – ભુત્તાવિના પવારિતેન અનતિરિત્તં ભોજનં ભુઞ્જિતુ’’ન્તિ? ‘‘નાવુસો, કપ્પતી’’તિ [પાચિ. ૨૩૪]. ‘‘કત્થ પટિક્ખિત્ત’’ન્તિ? ‘‘સાવત્થિયં, સુત્તવિભઙ્ગે’’તિ. ‘‘કિં આપજ્જતી’’તિ? ‘‘અનતિરિત્તભોજને પાચિત્તિય’’ન્તિ.

‘‘સુણાતુ મે, ભન્તે, સઙ્ઘો. ઇદં તતિયં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં તતિયં સલાકં નિક્ખિપામિ’’.

‘‘કપ્પતિ, ભન્તે, આવાસકપ્પો’’તિ? ‘‘કો સો, આવુસો, આવાસકપ્પો’’તિ? ‘‘કપ્પતિ ભન્તે, સમ્બહુલા આવાસા સમાનસીમા નાનુપોસથં કાતુ’’ન્તિ. ‘‘નાવુસો, કપ્પતી’’તિ [મહાવ. ૧૪૧ આદયો]. ‘‘કત્થ પટિક્ખિત્ત’’ન્તિ? ‘‘રાજગહે, ઉપોસથસંયુત્તે’’તિ. ‘‘કિં આપજ્જતી’’તિ? ‘‘વિનયાતિસારે દુક્કટ’’ન્તિ.

‘‘સુણાતુ મે, ભન્તે, સઙ્ઘો. ઇદં ચતુત્થં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં ચતુત્થં સલાકં નિક્ખિપામિ’’.

‘‘કપ્પતિ, ભન્તે, અનુમતિકપ્પો’’તિ? ‘‘કો સો, આવુસો, અનુમતિકપ્પો’’તિ? ‘‘કપ્પતિ, ભન્તે, વગ્ગેન સઙ્ઘેન કમ્મં કાતું – આગતે ભિક્ખૂ અનુમાનેસ્સામા’’તિ? ‘‘નાવુસો, કપ્પતી’’તિ [મહાવ. ૩૮૩ આદયો]. ‘‘કત્થ પટિક્ખિત્ત’’ન્તિ? ‘‘ચમ્પેય્યકે, વિનયવત્થુસ્મિ’’ન્તિ. ‘‘કિં આપજ્જતી’’તિ? ‘‘વિનયાતિસારે દુક્કટ’’ન્તિ.

‘‘સુણાતુ મે, ભન્તે, સઙ્ઘો. ઇદં પઞ્ચમં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં પઞ્ચમં સલાકં નિક્ખિપામિ’’.

‘‘કપ્પતિ, ભન્તે, આચિણ્ણકપ્પો’’તિ? ‘‘કો સો, આવુસો, આચિણ્ણકપ્પો’’તિ? ‘‘કપ્પતિ, ભન્તે – ઇદં મે ઉપજ્ઝાયેન અજ્ઝાચિણ્ણં, ઇદં મે આચરિયેન અજ્ઝાચિણ્ણં – તં અજ્ઝાચરિતુ’’ન્તિ? ‘‘આચિણ્ણકપ્પો ખો, આવુસો, એકચ્ચો કપ્પતિ, એકચ્ચો ન કપ્પતી’’તિ.

‘‘સુણાતુ મે, ભન્તે, સઙ્ઘો. ઇદં છટ્ઠં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં છટ્ઠં સલાકં નિક્ખિપામિ’’.

‘‘કપ્પતિ, ભન્તે, અમથિતકપ્પો’’તિ? ‘‘કો સો, આવુસો, અમથિતકપ્પો’’તિ? ‘‘કપ્પતિ, ભન્તે, યં તં ખીરં ખીરભાવં વિજહિતં, અસમ્પત્તં દધિભાવં, તં ભુત્તાવિના પવારિતેન અનતિરિત્તં પાતુ’’ન્તિ? ‘‘નાવુસો, કપ્પતી’’તિ [પાચિ. ૨૩૪]. ‘‘કત્થ પટિક્ખિત્ત’’ન્તિ? ‘‘સાવત્થિયં, સુત્તવિભઙ્ગે’’તિ. ‘‘કિં આપજ્જતી’’તિ? ‘‘અનતિરિત્તભોજને પાચિત્તિય’’ન્તિ.

‘‘સુણાતુ મે, ભન્તે, સઙ્ઘો. ઇદં સત્તમં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં સત્તમં સલાકં નિક્ખિપામિ’’.

‘‘કપ્પતિ, ભન્તે, જળોગિં પાતુ’’ન્તિ? ‘‘કા સા, આવુસો, જળોગી’’તિ? ‘‘કપ્પતિ, ભન્તે, યા સા સુરા આસુતા અસમ્પત્તા મજ્જભાવં, સા પાતુ’’ન્તિ? ‘‘નાવુસો, કપ્પતી’’તિ [પાચિ. ૩૨૬]. ‘‘કત્થ પટિક્ખિત્ત’’ન્તિ? ‘‘કોસમ્બિયં, સુત્તવિભઙ્ગે’’તિ. ‘‘કિં આપજ્જતી’’તિ. ‘‘સુરામેરયપાને પાચિત્તિય’’ન્તિ.

‘‘સુણાતુ મે, ભન્તે, સઙ્ઘો. ઇદં અટ્ઠમં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં અટ્ઠમં સલાકં નિક્ખિપામિ’’.

‘‘કપ્પતિ, ભન્તે, અદસકં નિસીદન’’ન્તિ? ‘‘નાવુસો, કપ્પતી’’તિ [પાચિ. ૫૩૧ આદયો]. ‘‘કત્થ પટિક્ખિત્ત’’ન્તિ? ‘‘સાવત્થિયં, સુત્તવિભઙ્ગે’’તિ. ‘‘કિં આપજ્જતી’’તિ? ‘‘છેદનકે પાચિત્તિય’’ન્તિ.

‘‘સુણાતુ મે, ભન્તે, સઙ્ઘો. ઇદં નવમં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં નવમં સલાકં નિક્ખિપામિ’’.

‘‘કપ્પતિ, ભન્તે, જાતરૂપરજત’’ન્તિ? ‘‘નાવુસો, કપ્પતી’’તિ [પારા. ૫૮૦ આદયો]. ‘‘કત્થ પટિક્ખિત્ત’’ન્તિ. ‘‘રાજગહે, સુત્તવિભઙ્ગે’’તિ. ‘‘કિં આપજ્જતી’’તિ? ‘‘જાતરૂપરજતપટિગ્ગહણે પાચિત્તિય’’ન્તિ.

‘‘સુણાતુ મે, ભન્તે, સઙ્ઘો. ઇદં દસમં વત્થુ સઙ્ઘેન વિનિચ્છિતં. ઇતિપિદં વત્થુ ઉદ્ધમ્મં, ઉબ્બિનયં, અપગતસત્થુસાસનં. ઇદં દસમં સલાકં નિક્ખિપામિ.

‘‘સુણાતુ મે, ભન્તે, સઙ્ઘો. ઇમાનિ દસ વત્થૂનિ સઙ્ઘેન વિનિચ્છિતાનિ. ઇતિપિમાનિ દસવત્થૂનિ ઉદ્ધમ્માનિ, ઉબ્બિનયાનિ, અપગતસત્થુસાસનાની’’તિ.

૪૫૮. ‘‘નિહતમેતં, આવુસો, અધિકરણં, સન્તં વૂપસન્તં સુવૂપસન્તં. અપિ ચ મં ત્વં, આવુસો, સઙ્ઘમજ્ઝેપિ ઇમાનિ દસ વત્થૂનિ પુચ્છેય્યાસિ – તેસં ભિક્ખૂનં સઞ્ઞત્તિયા’’તિ. અથ ખો આયસ્મા રેવતો આયસ્મન્તં સબ્બકામિં સઙ્ઘમજ્ઝેપિ ઇમાનિ દસ વત્થૂનિ પુચ્છિ. પુટ્ઠો પુટ્ઠો આયસ્મા સબ્બકામી વિસ્સજ્જેસિ. ઇમાય ખો પન વિનયસઙ્ગીતિયા સત્ત ભિક્ખુસતાનિ અનૂનાનિ અનધિકાનિ અહેસું, તસ્માયં વિનયસઙ્ગીતિ ‘‘સત્તસતિકા’’તિ વુચ્ચતીતિ.

દુતિયભાણવારો નિટ્ઠિતો.

સત્તસતિકક્ખન્ધકો દ્વાદસમો.

ઇમમ્હિ ખન્ધકે વત્થૂ પઞ્ચવીસતિ.

તસ્સુદ્દાનં –

દસ વત્થૂનિ પૂરેત્વા, કમ્મં દૂતેન પાવિસિ;

ચત્તારો પુન રૂપઞ્ચ, કોસમ્બિ ચ પાવેય્યકો.

મગ્ગો સોરેય્યં સઙ્કસ્સં, કણ્ણકુજ્જં ઉદુમ્બરં;

સહજાતિ ચ મજ્ઝેસિ, અસ્સોસિ કં નુ ખો મયં.

પત્તનાવાય ઉજ્જવિ, રહોસિ ઉપનામયં [દૂરતોપિ ઉદપાદિ (ક.)];

ગરુ [દારુણં (સ્યા.)] સઙ્ઘો ચ વેસાલિં, મેત્તા સઙ્ઘો ઉબ્બાહિકાતિ.

સત્તસતિકક્ખન્ધકો નિટ્ઠિતો.