૧. પરિમણ્ડલવગ્ગવણ્ણના

સેખિયેસુ સિક્ખિતસિક્ખેનાતિ ચતૂહિ મગ્ગેહિ તિસ્સો સિક્ખા સિક્ખિત્વા ઠિતેન, સબ્બસો પરિનિટ્ઠિતકિચ્ચેનાતિ વુત્તં હોતિ. તાદિનાતિ અટ્ઠહિ લોકધમ્મેહિ અકમ્પિયટ્ઠેન તાદિના.

૫૭૬. સિક્ખા કરણીયાતિ ‘‘એવં નિવાસેસ્સામી’’તિ આરામેપિ અન્તરઘરેપિ સબ્બત્થ સિક્ખા કત્તબ્બા. એત્થ ચ યસ્મા વત્તક્ખન્ધકે વુત્તવત્તાનિપિ સિક્ખિતબ્બત્તા સેખિયાનેવ હોન્તિ, તસ્મા પારાજિકાદીસુ વિય પરિચ્છેદો ન કતો, ચારિત્તનયદસ્સનત્થઞ્ચ ‘‘યો પન ભિક્ખુ ઓલમ્બેન્તો નિવાસેય્ય, દુક્કટ’’ન્તિ એવં આપત્તિનામેન અવત્વા ‘‘સિક્ખા કરણીયા’’તિ એવં સબ્બસિક્ખાપદેસુ પાળિ આરોપિતા. પદભાજને પન ‘‘આપત્તિ દુક્કટસ્સા’’તિ વુત્તત્તા સબ્બત્થ અનાદરિયકરણે દુક્કટં વેદિતબ્બં. વુત્તન્તિ મહાઅટ્ઠકથાયં વુત્તં. યસ્મા અટ્ઠઙ્ગુલમત્તં ઓતારેત્વા નિવત્થમેવ નિસિન્નસ્સ ચતુરઙ્ગુલમત્તં હોતિ, તસ્મા ઉભોપેતે અટ્ઠકથાવાદા એકપરિચ્છેદા. તે સબ્બેતિ નિવાસનદોસા.

તં પનાતિ તં અનાદરિયં. કિઞ્ચાપિ કુરુન્દિવાદં પચ્છા વદન્તેન ‘‘પરિમણ્ડલં નિવાસેતું અજાનન્તસ્સ અનાપત્તી’’તિ અયમત્થો પતિટ્ઠાપિતો, તથાપિ નિવાસનવત્તં સાધુકં ઉગ્ગહેતબ્બમેવ. સઞ્ચિચ્ચ અનુગ્ગણ્હન્તસ્સ અનાદરિયં સિયા. તેનેવ માતિકાટ્ઠકથાયં (કઙ્ખા. અટ્ઠ. પરિમણ્ડલસિક્ખાપદવણ્ણના) વુત્તં ‘‘અજાનન્તસ્સાતિ પરિમણ્ડલં નિવાસેતું અજાનન્તસ્સ અનાપત્તિ, અપિચ નિવાસનવત્તં ઉગ્ગહેતબ્બ’’ન્તિ.

સચિત્તકન્તિ વત્થુવિજાનનચિત્તેન પણ્ણત્તિવિજાનનચિત્તેન ચ સચિત્તકં ‘‘અનાદરિયં પટિચ્ચા’’તિ વુત્તત્તા. ‘‘પાણાતિપાતાદિ વિય નિવાસનદોસો લોકગરહિતો ન હોતીતિ પણ્ણત્તિવજ્જ’’ન્તિ ફુસ્સદેવત્થેરો આહ. ઉપતિસ્સત્થેરો પન ‘‘યસ્મા અનાદરિયવસેનેવ આપજ્જિતબ્બત્તા કેવલં અકુસલમેવ, તઞ્ચ પકતિયા વજ્જં, સઞ્ચિચ્ચ વીતિક્કમનઞ્ચ દોમનસ્સિતસ્સેવ હોતિ, તસ્મા લોકવજ્જં અકુસલચિત્તં દુક્ખવેદન’’ન્તિ આહ. અનાદરિયં, અનાપત્તિકારણાભાવો, અપરિમણ્ડલનિવાસનન્તિ ઇમાનિ પનેત્થ તીણિ અઙ્ગાનિ. યથા ચેત્થ, એવં સબ્બત્થ પુરિમાનિ દ્વે તત્થ તત્થ વુત્તપટિપક્ખકરણઞ્ચાતિ તીણિયેવ હોન્તિ.

૫૭૭. દુતિયાદીસુ અનેકપ્પકારં ગિહિપારુતન્તિ સેતપટપારુતં પરિબ્બાજકપારુતં એકસાટકપારુતન્તિઆદિ અનેકપ્પભેદં ગિહિપારુતં. તસ્સત્થો ખન્ધકેયેવ આવિ ભવિસ્સતિ. વિહારેપીતિ બુદ્ધુપટ્ઠાનાદિકાલં સન્ધાય વુત્તં.

૫૭૮. ‘‘સુપ્પટિચ્છન્નો’’તિ વુત્તત્તા ‘‘સસીસં પારુતો સબ્બથા સુપ્પટિચ્છન્નત્તા સુપ્પટિચ્છન્નો નામ હોતી’’તિ યસ્સ સિયા, તં સન્ધાયાહ ‘‘ન સસીસં પારુતેના’’તિઆદિ.

૫૮૨. એકસ્મિં પન ઠાને ઠત્વાતિ એત્થ ‘‘ગચ્છન્તોપિ પરિસ્સયાભાવં ઓલોકેતું લભતિયેવ, તથા ગામે પૂજ’’ન્તિ તીસુપિ ગણ્ઠિપદેસુ વુત્તં.

પરિમણ્ડલવગ્ગવણ્ણના નિટ્ઠિતા.