૧. રહોગતવગ્ગો

૧-૨. પઠમરહોગતસુત્તાદિવણ્ણના

૮૯૯-૯૦૦. છત્તિંસાય ઠાનેસૂતિ અજ્ઝત્તં કાયે સમુદયધમ્માનુપસ્સી, વયો, સમુદયવયો, બહિદ્ધા સમુદયો, વયો, સમુદયવયો, અજ્ઝત્તબહિદ્ધા સમુદયો, વયો, સમુદયવયધમ્માનુપસ્સીતિ નવ અનુપસ્સના, તથા વેદનાય ચિત્તે ધમ્મેસૂતિ એવં છત્તિંસાય ઠાનેસુ. દુતિયે દ્વાદસસુ ઠાનેસૂતિ કાયે અજ્ઝત્તં બહિદ્ધા અજ્ઝત્તબહિદ્ધા, વેદનાય ચિત્તે ધમ્મેસૂતિ એવં દ્વાદસસુ ઠાનેસુ.

૩. સુતનુસુત્તવણ્ણના

૯૦૧. ઇમાય પાળિયાતિ ઇમાય હીનત્તિકપાળિયા. ઇમે ધમ્મા હીના લામકટ્ઠેન. ઇમે ધમ્મા મજ્ઝિમા હીનપણીતાનં મજ્ઝે ભવાતિ. ઉત્તમટ્ઠેન અત્તપ્પકટ્ઠેન પધાનભાવં નીતાતિ પણીતા.

૪-૭. પઠમકણ્ડકીસુત્તાદિવણ્ણના

૯૦૨-૯૦૫. કણ્ડકા એતિસ્સા અત્થીતિ કણ્ડકી, કરમન્દગચ્છો. ઓસધિભાવાપેક્ખાય ઇત્થિલિઙ્ગનિદ્દેસો, તબ્બહુલતાય તં વનં ‘‘કણ્ડકીવન’’ન્તેવ પઞ્ઞાયિત્થ. સહસ્સલોકન્તિ સહસ્સચક્કવાળલોકં. દસચક્કવાળસહસ્સં એકાવજ્જનસ્સ આપાથં આગચ્છતિ તથા આલોકવડ્ઢનસ્સ કતત્તા.

૯. અમ્બપાલિવનસુત્તવણ્ણના

૯૦૭. અરહત્તભાવદીપકન્તિ અરહત્તસ્સ અત્થિભાવદીપકં. ‘‘અરહત્તભાવદીપિક’’ન્તિ વા પાઠો.

રહોગતવગ્ગવણ્ણના નિટ્ઠિતા.