૧. અભિધમ્મભાજનીયવણ્ણના

૭૦૩. પતિટ્ઠાનટ્ઠેનાતિ સમ્પયોગવસેન ઉપનિસ્સયવસેન ચ ઓકાસભાવેન. પિટ્ઠપૂવઓદનકિણ્ણનાનાસમ્ભારે પક્ખિપિત્વા મદ્દિત્વા કતા સુરા નામ. મધુકાદિપુપ્ફપનસાદિફલઉચ્છુમુદ્દિકાદિનાનાસમ્ભારાનં રસા ચિરપરિવાસિતા મેરયં નામ, આસવોતિ અત્થો.

૭૦૪. તંસમ્પયુત્તત્તાતિ વિરતિસમ્પયુત્તત્તા, વિરતિચેતનાસમ્પયુત્તત્તા વા.

કમ્મપથા એવાતિ અસબ્બસાધારણેસુ ઝાનાદિકોટ્ઠાસેસુ કમ્મપથકોટ્ઠાસિકા એવાતિ અત્થો. સુરાપાનમ્પિ ‘‘સુરાપાનં, ભિક્ખવે, આસેવિતં…પે… નિરયસંવત્તનિક’’ન્તિ (અ. નિ. ૮.૪૦) વિસું કમ્મપથભાવેન આગતન્તિ વદન્તિ. એવં સતિ એકાદસ કમ્મપથા સિયું, તસ્માસ્સ યથાવુત્તેસ્વેવ કમ્મપથેસુ ઉપકારકત્તસભાગત્તવસેન અનુપવેસો દટ્ઠબ્બો.

સત્તઇત્થિપુરિસારમ્મણતા તથાગહિતસઙ્ખારારમ્મણતાય દટ્ઠબ્બા. ‘‘પઞ્ચ સિક્ખાપદા પરિત્તારમ્મણા’’તિ હિ વુત્તં. ‘‘સબ્બાપિ હિ એતા વીતિક્કમિતબ્બવત્થું આરમ્મણં કત્વા વેરચેતનાહિ એવ વિરમન્તી’’તિ (વિભ. અટ્ઠ. ૭૦૪) ચ વક્ખતીતિ.

ગોરૂપસીલકો પકતિભદ્દો. કાકણિકમત્તસ્સ અત્થાયાતિઆદિ લોભવસેન મુસાકથને વુત્તં. દોસવસેન મુસાકથને ચ નિટ્ઠપ્પત્તો સઙ્ઘભેદો ગહિતો. દોસવસેન પરસ્સ બ્યસનત્થાય મુસાકથને પન તસ્સ તસ્સ ગુણવસેન અપ્પસાવજ્જમહાસાવજ્જતા યોજેતબ્બા, મન્દાધિમત્તબ્યસનિચ્છાવસેન ચ. નિસ્સગ્ગિયથાવરવિજ્જામયિદ્ધિમયા સાહત્થિકાણત્તિકેસ્વેવ પવિસન્તીતિ દ્વે એવ ગહિતા.

પઞ્ચપિ કમ્મપથા એવાતિ ચેતનાસઙ્ખાતં પરિયાયસીલં સન્ધાય વુત્તં, વિરતિસીલં પન મગ્ગકોટ્ઠાસિકન્તિ. તેસં પનાતિ સેસસીલાનં.

૭૧૨. ‘‘કોટ્ઠાસભાવેના’’તિ વુત્તં, ‘‘પતિટ્ઠાનભાવેના’’તિ પન વત્તબ્બં. એત્થ પન સિક્ખાપદવારે પહીનપઞ્ચાભબ્બટ્ઠાનસ્સ અરહતો વિરમિતબ્બવેરસ્સ સબ્બથા અભાવા કિરિયેસુ વિરતિયો ન સન્તીતિ ન ઉદ્ધટા, સેક્ખાનં પન પહીનપઞ્ચવેરત્તેપિ તંસભાગતાય વેરભૂતાનં અકુસલાનં વેરનિદાનાનં લોભાદીનઞ્ચ સબ્ભાવા વિરતીનં ઉપ્પત્તિ ન ન ભવિસ્સતિ. અકુસલસમુટ્ઠિતાનિ ચ કાયકમ્માદીનિ તેસં કાયદુચ્ચરિતાદીનિ વેરાનેવ, તેહિ ચ તેસં વિરતિયો હોન્તેવ, યતો નફલભૂતસ્સપિ ઉપરિમગ્ગત્તયસ્સ અટ્ઠઙ્ગિકતા હોતિ. સિક્ખાવારે ચ અભાવેતબ્બતાય ફલધમ્માપિ ન સિક્ખિતબ્બા, નાપિ સિક્ખિતસિક્ખસ્સ ઉપ્પજ્જમાના કિરિયધમ્માતિ ન કેચિ અબ્યાકતા સિક્ખાતિ ઉદ્ધટા.

અભિધમ્મભાજનીયવણ્ણના નિટ્ઠિતા.