૫-૧૦. મિગસાલાસુત્તાદિવણ્ણના

૭૫-૮૦. પઞ્ચમે ઇમસ્સ હિ પુગ્ગલસ્સ સીલવિરહિતસ્સ પઞ્ઞા સીલં પરિધોવતીતિ અખણ્ડાદિભાવાપાદનેન સીલં આદિમજ્ઝપરિયોસાનેસુ પઞ્ઞાય સુવિસોધિતં કરોતિ. યસ્સ હિ અબ્ભન્તરે સીલસંવરો નત્થિ, ઉગ્ઘટિતઞ્ઞુતાય પન ચાતુપ્પદિકગાથાપરિયોસાને પઞ્ઞાય સીલં ધોવિત્વા સહ પટિસમ્ભિદાહિ અરહત્તં પાપુણાતિ, અયં પઞ્ઞાય સીલં ધોવતિ નામ સેય્યથાપિ સન્તતિમહામત્તો.

સીલવા પન પઞ્ઞં ધોવતિ. યસ્સ (દી. નિ. અટ્ઠ. ૧.૩૧૭) હિ પુથુજ્જનસ્સ સીલં સટ્ઠિઅસીતિવસ્સાનિ અખણ્ડં હોતિ, સો મરણકાલેપિ સબ્બકિલેસે ઘાતેત્વા સીલેન પઞ્ઞં ધોવિત્વા અરહત્તં ગણ્હાતિ કન્દરસાલપરિવેણે મહાસટ્ઠિવસ્સત્થેરો વિય. થેરે કિર મરણમઞ્ચે નિપજ્જિત્વા બલવવેદનાય નિત્થુનન્તે તિસ્સમહારાજા ‘‘થેરં પસ્સિસ્સામી’’તિ ગન્ત્વા પરિવેણદ્વારે ઠિતો તં સદ્દં સુત્વા પુચ્છિ ‘‘કસ્સ સદ્દો અય’’ન્તિ. થેરસ્સ નિત્થુનનસદ્દોતિ. ‘‘પબ્બજ્જાય સટ્ઠિવસ્સેન વેદનાપરિગ્ગહમત્તમ્પિ ન કતં, ઇદાનિ ન તં વન્દિસ્સામી’’તિ નિવત્તિત્વા મહાબોધિં વન્દિતું ગતો. તતો ઉપટ્ઠાકદહરો થેરં આહ ‘‘કિં નો, ભન્તે, લજ્જાપેથ, સદ્ધોપિ રાજા વિપ્પટિસારી હુત્વા ‘ન વન્દિસ્સામી’તિ ગતો’’તિ. કસ્મા, આવુસોતિ? તુમ્હાકં નિત્થુનનસદ્દં સુત્વાતિ. ‘‘તેન હિ મે ઓકાસં કરોથા’’તિ વત્વા વેદનં વિક્ખમ્ભેત્વા અરહત્તં પત્વા દહરસ્સ સઞ્ઞં અદાસિ ‘‘ગચ્છાવુસો, ઇદાનિ રાજાનં અમ્હે વન્દાપેહી’’તિ. દહરો ગન્ત્વા ‘‘ઇદાનિ કિર થેરં વન્દથા’’તિ આહ. રાજા સુસુમારપતિતેન થેરં વન્દન્તો ‘‘નાહં અય્યસ્સ અરહત્તં વન્દામિ, પુથુજ્જનભૂમિયં પન ઠત્વા રક્ખિતસીલમેવ વન્દામી’’તિ આહ. એવં સીલેન પઞ્ઞં ધોવતિ નામ. સેસં વુત્તમેવ. છટ્ઠાદીસુ નત્થિ વત્તબ્બં.

મિગસાલાસુત્તાદિવણ્ણના નિટ્ઠિતા.

આકઙ્ખવગ્ગવણ્ણના નિટ્ઠિતા.