૨૦. વીસતિમો પરિચ્છેદો

મગ્ગામગ્ગઞાણદસ્સનવિસુદ્ધિનિદ્દેસવણ્ણના

૧૨૬૪. પચ્ચુપ્પન્નસ્સ ધમ્મસ્સાતિ પચ્ચુપ્પન્નસ્સ નામરૂપધમ્મસ્સ.

૧૨૬૬-૮. ઉપ્પજ્જતો ઉપ્પજ્જન્તસ્સ નામરૂપધમ્મસ્સ રાસિતો નિચયતો આગમનઞ્ચ નત્થિ. દિસાગમનન્તિ દિસાય ગમનં. નિરુદ્ધસ્સાપિ નામરૂપધમ્મસ્સ એકસ્મિં ઠાને નિચયોતિ ચ નત્થિ.

૧૨૭૦-૧. અવિજ્જાસમુદયા રૂપસમુદયો, અવિજ્જાનિરોધા રૂપનિરોધો. તણ્હાસમુદયા રૂપસમુદયો, તણ્હાનિરોધા રૂપનિરોધો. કમ્મસમુદયા રૂપસમુદયો, કમ્મનિરોધા રૂપનિરોધો. આહારનિરોધા રૂપનિરોધો. ધમ્મેતિ સઙ્ખારધમ્મે.

૧૨૮૦. સમ્પત્તપટિવેધસ્સાતિ સમ્પત્તલોકુત્તરસઙ્ખાતમગ્ગફલસ્સ સોતાપન્નાદિપુગ્ગલસ્સ. વિપ્પટિપન્નસ્સાતિ પટિપત્તિયં અપ્પટિપન્નસ્સ, વિરુદ્ધવસેન પટિપન્નસ્સ વા.

૧૨૮૬. કાયચિત્તાનીતિ કાયાતિ વેદનાસઞ્ઞાસઙ્ખારા. ચિત્તન્તિ વિઞ્ઞાણં.

૧૨૯૦. યતો યતો પચ્ચયાદિતો. યં અમતં નિબ્બાનં વિજાનતં વિજાનન્તાનં પીતિપામોજ્જં, તેહિ લભિતબ્બં અમતં, અમતં વિય પીતિપામોજ્જં વા.

૧૨૯૩. અપ્પત્તેતિ અત્તનિ મગ્ગફલસ્મિં અપ્પત્તે. પત્તસઞ્ઞીતિ મગ્ગફલે અહં પત્તો અસ્મિ ઇતિ સઞ્ઞિતો હોતિ.

૧૨૯૭. સારવેદિનોતિ સારજાનનસીલા. તન્તિ તં મગ્ગામગ્ગઞાણદસ્સનં. ઇદં ઞાણં મગ્ગામગ્ગઞાણદસ્સનન્તિ મગ્ગામગ્ગઞાણદસ્સનં નામ.

ઇતિ અભિધમ્માવતારટીકાય

મગ્ગામગ્ગઞાણદસ્સનવિસુદ્ધિનિદ્દેસવણ્ણના નિટ્ઠિતા.

વીસતિમો પરિચ્છેદો.