૧૧. એકાદસમો પરિચ્છેદો

નિબ્બાનનિદ્દેસવણ્ણના

૭૬૯. ભવાભવં વિનનતોતિ ખુદ્દકં, મહન્તં ભવં સિબ્બનતો. સબ્બૂપધિપટિનિસ્સગ્ગોતિ સબ્બેહિ સઙ્ખારૂપધિકિલેસૂપધિખન્ધૂપધીહિ પટિનિસ્સજ્જનં. અચ્ચુતિરસં અચુતિસમ્પત્તિકં. નિબ્બાનં પુટ્ઠેનાતિ સુગતેન નિબ્બાનં પુટ્ઠેન સારિપુત્તત્થેરેન. ઉભિન્નં સુત્તાનન્તિ ધમ્મસેનાપતિવુત્તાનં દ્વિન્નં સુત્તાનન્તિ અત્થો. ખયસ્સ ઉપનિસ્સયત્તાતિ ખયસ્સ બલવકારણત્તા. પુથૂનં ધમ્માનં અપ્પમત્તક્ખણે રાગાદિક્ખયમત્તં નિબ્બાનં ભવેય્ય. સબ્બે બાલપુથુજ્જના સમધિગતનિબ્બાના સચ્છિકતનિરોધા ભવેય્યું. કિઞ્ચ ભિય્યો કિં ઉત્તરિ કારણઞ્ચ અત્થીતિ અત્થો. રાગાદીનં સઙ્ખતત્તા તેસં સઙ્ખતાનં નિબ્બાનં સઙ્ખતલક્ખણં ભવેય્ય. કિં પનેત્થાતિ એતેસુ ખણેસુ કિં પન ખણે ત્વં વદેસિ. ખીણેસ્વેવાતિ ભવાદીસુ ખીણેસુ એવ. નિરુત્તરોતિ નિપ્ફન્નહારો.

૭૭૧. અસ્સદ્ધોતિ બાહિરસદ્ધાય વિરહિતો. વન્તાસોતિ વન્તા વમિતા આસા તણ્હા યેનાતિ વન્તાસો.

નિસ્સરણિયાતિ નિસ્સરણે નિયુત્તા. યદિદં નેક્ખમ્મં યં ઇદં કામાનં એતં નિસ્સરણં નિરોધો, તસ્સ કિઞ્ચિભૂતસ્સ સઙ્ખતસ્સ પટિચ્ચસમુપ્પન્નધમ્મજાતસ્સ નિરોધો નિસ્સરણન્તિ, એવં ઇમિના પકારેન વુત્તસ્સ તસ્સ નિસ્સરણનામકસ્સ અભાવપ્પત્તિદોસતો નિસ્સરણનામકાનં પઠમજ્ઝાનઆકાસાનઞ્ચાયતનાનમ્પિ અભાવો ભવેય્ય. અત્થિ નિસ્સરણન્તિ અત્થિ નિબ્બાનં. ઉપ્પાદાદીનન્તિ ઉપ્પાદટ્ઠિતિભઙ્ગાનં. પપઞ્ચાભાવતોતિ તણ્હામાનદિટ્ઠીનં અભાવતો.

૭૭૨. અપલોકિતન્તિ અદસ્સનધમ્મં.

૭૭૪. અબ્યાપજ્ઝન્તિ નિદુક્ખં. અક્ખરન્તિ અખરં.

૭૭૭. સદ્ધાબુદ્ધિકરં તથાગતમતે જિનવચને સમ્મોહવિદ્ધંસનં પઞ્ઞાસમ્ભવં પઞ્ઞાકારણં સમ્પસાદનકરં. અત્થબ્યઞ્જનસાલિનન્તિ અત્થબ્યઞ્જનસારવન્તં સુમધુરં સારઞ્ઞુ જિનસાસનસારઞ્ઞૂ વિમ્હાપનં અચ્છેરકરં ઇમં એવં વુત્તપ્પકારં અભિધમ્માવતારં યો જાનાતિ, સો જનો ગમ્ભીરે નિપુણે નિપુણઞાણગોચરે અભિધમ્મપિટકે પદં નિટ્ઠં ઉત્તમસન્નિટ્ઠાનં યાતિ પાપુણાતિ.

ઇતિ અભિધમ્માવતારટીકાય

નિબ્બાનનિદ્દેસવણ્ણના નિટ્ઠિતા.

એકાદસમો પરિચ્છેદો.