૪. કિમત્થિયસુત્તં

૩૧૭. ‘‘કિમત્થિયં, આવુસો સારિપુત્ત, સમણે ગોતમે બ્રહ્મચરિયં વુસ્સતી’’તિ? ‘‘દુક્ખસ્સ ખો, આવુસો, પરિઞ્ઞત્થં ભગવતિ બ્રહ્મચરિયં વુસ્સતી’’તિ. ‘‘અત્થિ પનાવુસો, મગ્ગો અત્થિ પટિપદા એતસ્સ દુક્ખસ્સ પરિઞ્ઞાયા’’તિ? ‘‘અત્થિ ખો, આવુસો, મગ્ગો અત્થિ પટિપદા, એતસ્સ દુક્ખસ્સ પરિઞ્ઞાયા’’તિ? ‘‘કતમો પનાવુસો, મગ્ગો કતમા પટિપદા, એતસ્સ દુક્ખસ્સ પરિઞ્ઞાયા’’તિ?

‘‘અયમેવ ખો, આવુસો, અરિયો અટ્ઠઙ્ગિકો મગ્ગો, એતસ્સ દુક્ખસ્સ પરિઞ્ઞાય, સેય્યથિદં – સમ્માદિટ્ઠિ સમ્માસઙ્કપ્પો સમ્માવાચા સમ્માકમ્મન્તો સમ્માઆજીવો સમ્માવાયામો સમ્માસતિ સમ્માસમાધિ. અયં ખો, આવુસો, મગ્ગો અયં પટિપદા એતસ્સ દુક્ખસ્સ પરિઞ્ઞાયા’’તિ. ‘‘ભદ્દકો, આવુસો, મગ્ગો ભદ્દિકા પટિપદા, એતસ્સ દુક્ખસ્સ પરિઞ્ઞાય. અલઞ્ચ પનાવુસો સારિપુત્ત, અપ્પમાદાયા’’તિ. ચતુત્થં.