૧૩. ભવપઞ્હાસુત્તં

૩૨૬. ‘‘‘ભવો, ભવો’તિ, આવુસો સારિપુત્ત, વુચ્ચતિ. કતમો નુ ખો, આવુસો, ભવો’’તિ? ‘‘તયો મે, આવુસો, ભવા. કામભવો, રૂપભવો, અરૂપભવો – ઇમે ખો, આવુસો, તયો ભવા’’તિ. ‘‘અત્થિ પનાવુસો, મગ્ગો અત્થિ પટિપદા, એતેસં ભવાનં પરિઞ્ઞાયા’’તિ? ‘‘અત્થિ ખો, આવુસો, મગ્ગો અત્થિ પટિપદા, એતેસં ભવાનં પરિઞ્ઞાયા’’તિ. ‘‘કતમો, પનાવુસો, મગ્ગો કતમા પટિપદા, એતેસં ભવાનં પરિઞ્ઞાયા’’તિ? ‘‘અયમેવ ખો, આવુસો, અરિયો અટ્ઠઙ્ગિકો મગ્ગો, એતેસં ભવાનં પરિઞ્ઞાય, સેય્યથિદં – સમ્માદિટ્ઠિ સમ્માસઙ્કપ્પો સમ્માવાચા સમ્માકમ્મન્તો સમ્માઆજીવો સમ્માવાયામો સમ્માસતિ સમ્માસમાધિ. અયં ખો, આવુસો, મગ્ગો અયં પટિપદા, એતેસં ભવાનં પરિઞ્ઞાયા’’તિ. ‘‘ભદ્દકો, આવુસો, મગ્ગો ભદ્દિકા પટિપદા, એતેસં ભવાનં પરિઞ્ઞાય. અલઞ્ચ પનાવુસો સારિપુત્ત, અપ્પમાદાયા’’તિ. તેરસમં.