૮. રજનીયસણ્ઠિતસુત્તં

૭૦. સાવત્થિનિદાનં. અથ ખો અઞ્ઞતરો ભિક્ખુ…પે… એકમન્તં નિસિન્નો ખો સો ભિક્ખુ ભગવન્તં એતદવોચ – ‘‘સાધુ મે, ભન્તે, ભગવા સંખિત્તેન ધમ્મં દેસેતુ, યમહં ભગવતો ધમ્મં સુત્વા…પે… વિહરેય્ય’’ન્તિ. ‘‘યં ખો, ભિક્ખુ, રજનીયસણ્ઠિતં; તત્ર તે છન્દો પહાતબ્બો’’તિ. ‘‘અઞ્ઞાતં, ભગવા; અઞ્ઞાતં, સુગતા’’તિ.

‘‘યથા કથં પન ત્વં, ભિક્ખુ, મયા સંખિત્તેન ભાસિતસ્સ વિત્થારેન અત્થં આજાનાસી’’તિ? ‘‘રૂપં ખો, ભન્તે, રજનીયસણ્ઠિતં; તત્ર મે છન્દો પહાતબ્બો. વેદના… સઞ્ઞા… સઙ્ખારા… વિઞ્ઞાણં રજનીયસણ્ઠિતં; તત્ર મે છન્દો પહાતબ્બો. ઇમસ્સ ખ્વાહં, ભન્તે, ભગવતા સંખિત્તેન ભાસિતસ્સ એવં વિત્થારેન અત્થં આજાનામી’’તિ.

‘‘સાધુ સાધુ ભિક્ખુ! સાધુ ખો ત્વં, ભિક્ખુ, મયા સંખિત્તેન ભાસિતસ્સ વિત્થારેન અત્થં આજાનાસિ. રૂપં ખો, ભિક્ખુ, રજનીયસણ્ઠિતં; તત્ર તે છન્દો પહાતબ્બો. વેદના… સઞ્ઞા… સઙ્ખારા… વિઞ્ઞાણં રજનીયસણ્ઠિતં; તત્ર તે છન્દો પહાતબ્બો. ઇમસ્સ ખો, ભિક્ખુ, મયા સંખિત્તેન ભાસિતસ્સ એવં વિત્થારેન અત્થો દટ્ઠબ્બો’’તિ…પે… અઞ્ઞતરો ચ પન સો ભિક્ખુ અરહતં અહોસીતિ. અટ્ઠમં.