૨. કિસાગોતમીથેરીઅપદાનં

૫૫. ‘‘પદુમુત્તરો નામ જિનો, સબ્બધમ્માન પારગૂ;

ઇતો સતસહસ્સમ્હિ, કપ્પે ઉપ્પજ્જિ નાયકો.

૫૬. ‘‘તદાહં હંસવતિયં, જાતા અઞ્ઞતરે કુલે;

ઉપેત્વા તં નરવરં, સરણં સમુપાગમિં.

૫૭. ‘‘ધમ્મઞ્ચ તસ્સ અસ્સોસિં, ચતુસચ્ચૂપસઞ્હિતં;

મધુરં પરમસ્સાદં, વટ્ટસન્તિસુખાવહં [ચિત્તસન્તિ … (સ્યા.)].

૫૮. ‘‘તદા ચ ભિક્ખુનિં વીરો, લૂખચીવરધારિનિં;

ઠપેન્તો એતદગ્ગમ્હિ, વણ્ણયી પુરિસુત્તમો.

૫૯. ‘‘જનેત્વાનપ્પકં પીતિં, સુત્વા ભિક્ખુનિયા ગુણે;

કારં કત્વાન બુદ્ધસ્સ, યથાસત્તિ યથાબલં.

૬૦. ‘‘નિપચ્ચ મુનિવરં તં, તં ઠાનમભિપત્થયિં;

તદાનુમોદિ સમ્બુદ્ધો, ઠાનલાભાય નાયકો.

૬૧. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૬૨. ‘‘‘તસ્સ ધમ્મેસુ દાયાદા, ઓરસા ધમ્મનિમ્મિતા;

કિસાગોતમી [ગોતમી નામ (સી. ક.)] નામેન, હેસ્સતિ સત્થુ સાવિકા’.

૬૩. ‘‘તં સુત્વા મુદિતા હુત્વા, યાવજીવં તદા જિનં;

મેત્તચિત્તા પરિચરિં, પચ્ચયેહિ વિનાયકં.

૬૪. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૬૫. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૬૬. ‘‘ઉપટ્ઠાકો મહેસિસ્સ, તદા આસિ નરિસ્સરો;

કાસિરાજા કિકી નામ, બારાણસિપુરુત્તમે.

૬૭. ‘‘પઞ્ચમી તસ્સ ધીતાસિં, ધમ્મા નામેન વિસ્સુતા;

ધમ્મં સુત્વા જિનગ્ગસ્સ, પબ્બજ્જં સમરોચયિં.

૬૮. ‘‘અનુજાનિ ન નો તાતો, અગારેવ તદા મયં;

વીસવસ્સસહસ્સાનિ, વિચરિમ્હ અતન્દિતા.

૬૯. ‘‘કોમારિબ્રહ્મચરિયં, રાજકઞ્ઞા સુખેધિતા;

બુદ્ધોપટ્ઠાનનિરતા, મુદિતા સત્ત ધીતરો.

૭૦. ‘‘સમણી સમણગુત્તા ચ, ભિક્ખુની ભિક્ખુદાયિકા;

ધમ્મા ચેવ સુધમ્મા ચ, સત્તમી સઙ્ઘદાયિકા.

૭૧. ‘‘ખેમા ઉપ્પલવણ્ણા ચ, પટાચારા ચ કુણ્ડલા;

અહઞ્ચ ધમ્મદિન્ના ચ, વિસાખા હોતિ સત્તમી.

૭૨. ‘‘તેહિ કમ્મેહિ સુકતેહિ, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૭૩. ‘‘પચ્છિમે ચ ભવે દાનિ, જાતા સેટ્ઠિકુલે અહં;

દુગ્ગતે અધને નટ્ઠે [નીચે (સ્યા.), નિદ્ધે (પી.)], ગતા ચ સધનં કુલં.

૭૪. ‘‘પતિં ઠપેત્વા સેસા મે, દેસ્સન્તિ અધના ઇતિ;

યદા ચ પસૂતા [સસુતા (સી. પી.)] આસિં, સબ્બેસં દયિતા તદા.

૭૫. ‘‘યદા સો તરુણો ભદ્દો [પુત્તો (સી. સ્યા.)], કોમલકો [કોમારકો (સ્યા.), કોમલઙ્ગો (સી. પી.)] સુખેધિતો;

સપાણમિવ કન્તો મે, તદા યમવસં ગતો.

૭૬. ‘‘સોકટ્ટા દીનવદના, અસ્સુનેત્તા રુદમ્મુખા;

મતં કુણપમાદાય, વિલપન્તી ગમામહં.

૭૭. ‘‘તદા એકેન સન્દિટ્ઠા, ઉપેત્વાભિસક્કુત્તમં;

અવોચં દેહિ ભેસજ્જં, પુત્તસઞ્જીવનન્તિ ભો.

૭૮. ‘‘ન વિજ્જન્તે મતા યસ્મિં, ગેહે સિદ્ધત્થકં તતો;

આહરાતિ જિનો આહ, વિનયોપાયકોવિદો.

૭૯. ‘‘તદા ગમિત્વા સાવત્થિં, ન લભિં તાદિસં ઘરં;

કુતો સિદ્ધત્થકં તસ્મા, તતો લદ્ધા સતિં અહં.

૮૦. ‘‘કુણપં છડ્ડયિત્વાન, ઉપેસિં લોકનાયકં;

દૂરતોવ મમં દિસ્વા, અવોચ મધુરસ્સરો.

૮૧. ‘‘‘યો ચ વસ્સસતં જીવે, અપસ્સં ઉદયબ્બયં;

એકાહં જીવિતં સેય્યો, પસ્સતો ઉદયબ્બયં.

૮૨. ‘‘‘ન ગામધમ્મો નિગમસ્સ ધમ્મો, ન ચાપિયં એકકુલસ્સ ધમ્મો;

સબ્બસ્સ લોકસ્સ સદેવકસ્સ, એસેવ ધમ્મો યદિદં અનિચ્ચતા’.

૮૩. ‘‘સાહં સુત્વાનિમા [સહસુત્વાનિમા (ક.)] ગાથા, ધમ્મચક્ખું વિસોધયિં;

તતો વિઞ્ઞાતસદ્ધમ્મા, પબ્બજિં અનગારિયં.

૮૪. ‘‘તથા પબ્બજિતા સન્તી, યુઞ્જન્તી જિનસાસને;

ન ચિરેનેવ કાલેન, અરહત્તમપાપુણિં.

૮૫. ‘‘ઇદ્ધીસુ ચ વસી હોમિ, દિબ્બાય સોતધાતુયા;

પરચિત્તાનિ જાનામિ, સત્થુસાસનકારિકા.

૮૬. ‘‘પુબ્બેનિવાસં જાનામિ, દિબ્બચક્ખુ વિસોધિતં;

ખેપેત્વા આસવે સબ્બે, વિસુદ્ધાસિં સુનિમ્મલા.

૮૭. ‘‘પરિચિણ્ણો મયા સત્થા, કતં બુદ્ધસ્સ સાસનં;

ઓહિતો ગરુકો ભારો, ભવનેત્તિ સમૂહતા.

૮૮. ‘‘યસ્સત્થાય પબ્બજિતા, અગારસ્માનગારિયં;

સો મે અત્થો અનુપ્પત્તો, સબ્બસંયોજનક્ખયો.

૮૯. ‘‘અત્થધમ્મનિરુત્તીસુ, પટિભાને તથેવ ચ;

ઞાણં મે વિમલં સુદ્ધં, બુદ્ધસેટ્ઠસ્સ વાહસા.

૯૦. ‘‘સઙ્કારકૂટા આહિત્વા, સુસાના રથિયાપિ ચ;

તતો સઙ્ઘાટિકં કત્વા, લૂખં ધારેમિ ચીવરં.

૯૧. ‘‘જિનો તસ્મિં ગુણે તુટ્ઠો, લૂખચીવરધારણે;

ઠપેસિ એતદગ્ગમ્હિ, પરિસાસુ વિનાયકો.

૯૨. ‘‘કિલેસા ઝાપિતા મય્હં…પે… વિહરામિ અનાસવા.

૯૩. ‘‘સ્વાગતં વત મે આસિ…પે… કતં બુદ્ધસ્સ સાસનં.

૯૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં કિસાગોતમી ભિક્ખુની ઇમા ગાથાયો અભાસિત્થાતિ.

કિસાગોતમીથેરિયાપદાનં દુતિયં.