૭. કટચ્છુભિક્ખાદાયિકાથેરીઅપદાનં

૬૦. ‘‘પિણ્ડચારં ચરન્તસ્સ, તિસ્સનામસ્સ સત્થુનો;

કટચ્છુભિક્ખં પગ્ગય્હ, બુદ્ધસેટ્ઠસ્સ દાસહં.

૬૧. ‘‘પટિગ્ગહેત્વા સમ્બુદ્ધો, તિસ્સો લોકગ્ગનાયકો;

વીથિયા સણ્ઠિતો સત્થા, અકા મે અનુમોદનં.

૬૨. ‘‘‘કટચ્છુભિક્ખં દત્વાન, તાવતિંસં ગમિસ્સસિ;

છત્તિંસદેવરાજૂનં, મહેસિત્તં કરિસ્સસિ.

૬૩. ‘‘‘પઞ્ઞાસં ચક્કવત્તીનં, મહેસિત્તં કરિસ્સસિ;

મનસા પત્થિતં સબ્બં, પટિલચ્છસિ સબ્બદા.

૬૪. ‘‘‘સમ્પત્તિં અનુભોત્વાન, પબ્બજિસ્સસિકિઞ્ચના;

સબ્બાસવે પરિઞ્ઞાય, નિબ્બાયિસ્સસિનાસવા’.

૬૫. ‘‘ઇદં વત્વાન સમ્બુદ્ધો, તિસ્સો લોકગ્ગનાયકો;

નભં અબ્ભુગ્ગમી વીરો, હંસરાજાવ અમ્બરે.

૬૬. ‘‘સુદિન્નં મે દાનવરં [સુદિન્નમેવ મે દાનં (સ્યા.)], સુયિટ્ઠા યાગસમ્પદા;

કટચ્છુભિક્ખં દત્વાન, પત્તાહં અચલં પદં.

૬૭. ‘‘દ્વેનવુતે ઇતો કપ્પે, યં દાનમદદિં તદા;

દુગ્ગતિં નાભિજાનામિ, ભિક્ખાદાનસ્સિદં ફલં.

૬૮. ‘‘કિલેસા ઝાપિતા મય્હં…પે… વિહરામિ અનાસવા.

૬૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૭૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં કટચ્છુભિક્ખાદાયિકા ભિક્ખુની ઇમા ગાથાયો અભાસિત્થાતિ.

કટચ્છુભિક્ખાદાયિકાથેરિયાપદાનં સત્તમં.