૩. નન્દકપેતવત્થુ

૬૫૮. રાજા પિઙ્ગલકો નામ, સુરટ્ઠાનં અધિપતિ અહુ;

મોરિયાનં ઉપટ્ઠાનં ગન્ત્વા, સુરટ્ઠં પુનરાગમા.

૬૫૯. ઉણ્હે મજ્ઝન્હિકે [મજ્ઝન્તિકે (સબ્બત્થ)] કાલે, રાજા પઙ્કં [વઙ્કં (ક.)] ઉપાગમિ;

અદ્દસ મગ્ગં રમણીયં, પેતાનં તં વણ્ણુપથં [વણ્ણનાપથં (સી. સ્યા.)].

૬૬૦. સારથિં આમન્તયી રાજા –

‘‘અયં મગ્ગો રમણીયો, ખેમો સોવત્થિકો સિવો;

ઇમિના સારથિ યામ, સુરટ્ઠાનં સન્તિકે ઇતો’’.

૬૬૧. તેન પાયાસિ સોરટ્ઠો, સેનાય ચતુરઙ્ગિનિયા;

ઉબ્બિગ્ગરૂપો પુરિસો, સોરટ્ઠં એતદબ્રવિ.

૬૬૨. ‘‘કુમ્મગ્ગં પટિપન્નમ્હા, ભિંસનં લોમહંસનં;

પુરતો દિસ્સતિ મગ્ગો, પચ્છતો ચ ન દિસ્સતિ.

૬૬૩. ‘‘કુમ્મગ્ગં પટિપન્નમ્હા, યમપુરિસાન સન્તિકે;

અમાનુસો વાયતિ ગન્ધો, ઘોસો સુય્યતિ [સૂયતિ (સી. સ્યા.)] દારુણો’’.

૬૬૪. સંવિગ્ગો રાજા સોરટ્ઠો, સારથિં એતદબ્રવિ;

‘‘કુમ્મગ્ગં પટિપન્નમ્હા, ભિંસનં લોમહંસનં;

પુરતો દિસ્સતિ મગ્ગો, પચ્છતો ચ ન દિસ્સતિ.

૬૬૫. ‘‘કુમ્મગ્ગં પટિપન્નમ્હા, યમપુરિસાન સન્તિકે;

અમાનુસો વાયતિ ગન્ધો, ઘોસો સુય્યતિ દારુણો’’.

૬૬૬. હત્થિક્ખન્ધં સમારુય્હ, ઓલોકેન્તો ચતુદ્દિસં [ચતુદ્દિસ્સા (ક.)];

અદ્દસ નિગ્રોધં રમણીયં [રુક્ખં નિગ્રોધં (સ્યા. ક.)], પાદપં છાયાસમ્પન્નં;

નીલબ્ભવણ્ણસદિસં, મેઘવણ્ણસિરીનિભં.

૬૬૭. સારથિં આમન્તયી રાજા, ‘‘કિં એસો દિસ્સતિ બ્રહા;

નીલબ્ભવણ્ણસદિસો, મેઘવણ્ણસિરીનિભો’’.

૬૬૮. ‘‘નિગ્રોધો સો મહારાજ, પાદપો છાયાસમ્પન્નો;

નીલબ્ભવણ્ણસદિસો, મેઘવણ્ણસિરીનિભો’’.

૬૬૯. તેન પાયાસિ સોરટ્ઠો, યેન સો દિસ્સતે બ્રહા;

નીલબ્ભવણ્ણસદિસો, મેઘવણ્ણસિરીનિભો.

૬૭૦. હત્થિક્ખન્ધતો ઓરુય્હ, રાજા રુક્ખં ઉપાગમિ;

નિસીદિ રુક્ખમૂલસ્મિં, સામચ્ચો સપરિજ્જનો;

પૂરં પાનીયસરકં, પૂવે વિત્તે ચ અદ્દસ.

૬૭૧. પુરિસો ચ દેવવણ્ણી, સબ્બાભરણભૂસિતો;

ઉપસઙ્કમિત્વા રાજાનં, સોરટ્ઠં એતદબ્રવિ.

૬૭૨. ‘‘સ્વાગતં તે મહારાજ, અથો તે અદુરાગતં;

પિવતુ દેવો પાનીયં, પૂવે ખાદ અરિન્દમ’’.

૬૭૩. પિવિત્વા રાજા પાનીયં, સામચ્ચો સપરિજ્જનો;

પૂવે ખાદિત્વા પિત્વા ચ, સોરટ્ઠો એતદબ્રવિ.

૬૭૪. ‘‘દેવતા નુસિ ગન્ધબ્બો, અદુ સક્કો પુરિન્દદો;

અજાનન્તા તં પુચ્છામ, કથં જાનેમુ તં મય’’ન્તિ.

૬૭૫. ‘‘નામ્હિ દેવો ન ગન્ધબ્બો, નાપિ [નમ્હિ (ક.)] સક્કો પુરિન્દદો;

પેતો અહં મહારાજ, સુરટ્ઠા ઇધ માગતો’’તિ.

૬૭૬. ‘‘કિંસીલો કિંસમાચારો, સુરટ્ઠસ્મિં પુરે તુવં;

કેન તે બ્રહ્મચરિયેન, આનુભાવો અયં તવા’’તિ.

૬૭૭. ‘‘તં સુણોહિ મહારાજ, અરિન્દમ રટ્ઠવડ્ઢન;

અમચ્ચા પારિસજ્જા ચ, બ્રાહ્મણો ચ પુરોહિતો.

૬૭૮. ‘‘સુરટ્ઠસ્મિં અહં દેવ, પુરિસો પાપચેતસો;

મિચ્છાદિટ્ઠિ ચ દુસ્સીલો, કદરિયો પરિભાસકો.

૬૭૯. ‘‘‘દદન્તાનં કરોન્તાનં, વારયિસ્સં બહુજ્જનં;

અઞ્ઞેસં દદમાનાનં, અન્તરાયકરો અહં.

૬૮૦. ‘‘‘વિપાકો નત્થિ દાનસ્સ, સંયમસ્સ કુતો ફલં;

નત્થિ આચરિયો નામ, અદન્તં કો દમેસ્સતિ.

૬૮૧. ‘‘‘સમતુલ્યાનિ ભૂતાનિ, કુતો [કુલે (સ્યા. ક.)] જેટ્ઠાપચાયિકો;

નત્થિ બલં વીરિયં વા, કુતો ઉટ્ઠાનપોરિસં.

૬૮૨. ‘‘‘નત્થિ દાનફલં નામ, ન વિસોધેતિ વેરિનં;

લદ્ધેય્યં લભતે મચ્ચો, નિયતિપરિણામજં [પરિણામજા (સી. ક.)].

૬૮૩. ‘‘‘નત્થિ માતા પિતા ભાતા, લોકો નત્થિ ઇતો પરં;

નત્થિ દિન્નં નત્થિ હુતં, સુનિહિતં ન વિજ્જતિ.

૬૮૪. ‘‘‘યોપિ હનેય્ય પુરિસં, પરસ્સ છિન્દતે [પુરિસસ્સ છિન્દે (સ્યા. ક.)] સિરં;

ન કોચિ કઞ્ચિ હનતિ, સત્તન્નં વિવરમન્તરે.

૬૮૫. ‘‘‘અચ્છેજ્જાભેજ્જો હિ [ભેજ્જો (સી.), અભેજ્જો (સ્યા.), ભેજ્જાસિ (ક.)] જીવો, અટ્ઠંસો ગુળપરિમણ્ડલો;

યોજનાનં સતં પઞ્ચ, કો જીવં છેત્તુમરહતિ.

૬૮૬. ‘‘‘યથા સુત્તગુળે ખિત્તે, નિબ્બેઠેન્તં પલાયતિ;

એવમેવ ચ સો જીવો, નિબ્બેઠેન્તો પલાયતિ.

૬૮૭. ‘‘‘યથા ગામતો નિક્ખમ્મ, અઞ્ઞં ગામં પવિસતિ;

એવમેવ ચ સો જીવો, અઞ્ઞં બોન્દિં પવિસતિ.

૬૮૮. ‘‘‘યથા ગેહતો નિક્ખમ્મ, અઞ્ઞં ગેહં પવિસતિ;

એવમેવ ચ સો જીવો, અઞ્ઞં બોન્દિં પવિસતિ.

૬૮૯. ‘‘‘ચુલ્લાસીતિ [ચુળાસીતિ (સી. સ્યા. ક.)] મહાકપ્પિનો [મહાકપ્પુનો (સી.)], સતસહસ્સાનિ હિ;

યે બાલા યે ચ પણ્ડિતા, સંસારં ખેપયિત્વાન;

દુક્ખસ્સન્તં કરિસ્સરે.

૬૯૦. ‘‘‘મિતાનિ સુખદુક્ખાનિ, દોણેહિ પિટકેહિ ચ;

જિનો સબ્બં પજાનાતિ’, સમ્મૂળ્હા ઇતરા પજા.

૬૯૧. ‘‘એવંદિટ્ઠિ પુરે આસિં, સમ્મૂળ્હો મોહપારુતો;

મિચ્છાદિટ્ઠિ ચ દુસ્સીલો, કદરિયો પરિભાસકો.

૬૯૨. ‘‘ઓરં મે છહિ માસેહિ, કાલઙ્કિરિયા ભવિસ્સતિ;

એકન્તકટુકં ઘોરં, નિરયં પપતિસ્સહં.

૬૯૩. [પે. વ. ૭૦] ‘‘ચતુક્કણ્ણં ચતુદ્વારં, વિભત્તં ભાગસો મિતં;

અયોપાકારપરિયન્તં, અયસા પટિકુજ્જિતં.

૬૯૪. [પે. વ. ૭૧] ‘‘તસ્સ અયોમયા ભૂમિ, જલિતા તેજસા યુતા;

સમન્તા યોજનસતં, ફરિત્વા તિટ્ઠતિ સબ્બદા.

૬૯૫. ‘‘વસ્સાનિ સતસહસ્સાનિ, ઘોસો સુય્યતિ તાવદે;

લક્ખો એસો મહારાજ, સતભાગવસ્સકોટિયો.

૬૯૬. ‘‘કોટિસતસહસ્સાનિ, નિરયે પચ્ચરે જના;

મિચ્છાદિટ્ઠી ચ દુસ્સીલા, યે ચ અરિયૂપવાદિનો.

૬૯૭. ‘‘તત્થાહં દીઘમદ્ધાનં, દુક્ખં વેદિસ્સ વેદનં;

ફલં પાપસ્સ કમ્મસ્સ, તસ્મા સોચામહં ભુસં.

૬૯૮. ‘‘તં સુણોહિ મહારાજ, અરિન્દમ રટ્ઠવડ્ઢન;

ધીતા મય્હં મહારાજ, ઉત્તરા ભદ્દમત્થુ તે.

૬૯૯. ‘‘કરોતિ ભદ્દકં કમ્મં, સીલેસુપોસથે રતા;

સઞ્ઞતા સંવિભાગી ચ, વદઞ્ઞૂ વીતમચ્છરા.

૭૦૦. ‘‘અખણ્ડકારી સિક્ખાય, સુણ્હા પરકુલેસુ ચ;

ઉપાસિકા સક્યમુનિનો, સમ્બુદ્ધસ્સ સિરીમતો.

૭૦૧. ‘‘ભિક્ખુ ચ સીલસમ્પન્નો, ગામં પિણ્ડાય પાવિસિ;

ઓક્ખિત્તચક્ખુ સતિમા, ગુત્તદ્વારો સુસંવુતો.

૭૦૨. ‘‘સપદાનં ચરમાનો, અગમા તં નિવેસનં;

‘તમદ્દસ મહારાજ, ઉત્તરા ભદ્દમત્થુ તે’.

૭૦૩. ‘‘પૂરં પાનીયસરકં, પૂવે વિત્તે ચ સા અદા;

‘પિતા મે કાલઙ્કતો, ભન્તે તસ્સેતં ઉપકપ્પતુ’.

૭૦૪. ‘‘સમનન્તરાનુદ્દિટ્ઠે, વિપાકો ઉદપજ્જથ;

ભુઞ્જામિ કામકામીહં, રાજા વેસ્સવણો યથા.

૭૦૫. ‘‘તં સુણોહિ મહારાજ, અરિન્દમ રટ્ઠવડ્ઢન;

સદેવકસ્સ લોકસ્સ, બુદ્ધો અગ્ગો પવુચ્ચતિ;

તં બુદ્ધં સરણં ગચ્છ, સપુત્તદારો અરિન્દમ.

૭૦૬. ‘‘અટ્ઠઙ્ગિકેન મગ્ગેન, ફુસન્તિ અમતં પદં;

તં ધમ્મં સરણં ગચ્છ, સપુત્તદારો અરિન્દમ.

૭૦૭. ‘‘ચત્તારો ચ પટિપન્ના [મગ્ગપટિપન્ના (સી. સ્યા.)], ચત્તારો ચ ફલે ઠિતા;

એસ સઙ્ઘો ઉજુભૂતો, પઞ્ઞાસીલસમાહિતો;

તં સઙ્ઘં સરણં ગચ્છ, સપુત્તદારો અરિન્દમ.

૭૦૮. ‘‘પાણાતિપાતા વિરમસ્સુ ખિપ્પં, લોકે અદિન્નં પરિવજ્જયસ્સુ;

અમજ્જપો મા ચ મુસા અભાણી, સકેન દારેન ચ હોહિ તુટ્ઠો’’તિ.

૭૦૯. ‘‘અત્થકામોસિ મે યક્ખ, હિતકામોસિ દેવતે;

કરોમિ તુય્હં વચનં, ત્વંસિ આચરિયો મમ.

૭૧૦. ‘‘ઉપેમિ સરણં બુદ્ધં, ધમ્મઞ્ચાપિ અનુત્તરં;

સઙ્ઘઞ્ચ નરદેવસ્સ, ગચ્છામિ સરણં અહં.

૭૧૧. ‘‘પાણાતિપાતા વિરમામિ ખિપ્પં, લોકે અદિન્નં પરિવજ્જયામિ;

અમજ્જપો નો ચ મુસા ભણામિ, સકેન દારેન ચ હોમિ તુટ્ઠો.

૭૧૨. ‘‘ઓફુણામિ [ઓપુણામિ (સી.), ઓફુનામિ (સ્યા. ક.), ઓપુનામિ (?)] મહાવાતે, નદિયા સીઘગામિયા;

વમામિ પાપિકં દિટ્ઠિં, બુદ્ધાનં સાસને રતો’’.

૭૧૩. ઇદં વત્વાન સોરટ્ઠો, વિરમિત્વા પાપદસ્સના [પાપદસ્સનં (સ્યા. ક.)];

નમો ભગવતો કત્વા, પામોક્ખો રથમારુહીતિ.

નન્દકપેતવત્થુ તતિયં.