૫૧. સોતધાતુવિસુદ્ધિઞાણનિદ્દેસો

૧૦૩. કથં વિતક્કવિપ્ફારવસેન નાનત્તેકત્તસદ્દનિમિત્તાનં પરિયોગાહણે પઞ્ઞા સોતધાતુવિસુદ્ધિઞાણં? ઇધ ભિક્ખુ છન્દસમાધિ…પે… વીરિયસમાધિ… ચિત્તસમાધિ… વીમંસાસમાધિપધાનસઙ્ખારસમન્નાગતં ઇદ્ધિપાદં ભાવેતિ. સો ઇમેસુ ચતૂસુ ઇદ્ધિપાદેસુ ચિત્તં પરિભાવેતિ પરિદમેતિ, મુદું કરોતિ કમ્મનિયં. સો ઇમેસુ ચતૂસુ ઇદ્ધિપાદેસુ ચિત્તં પરિભાવેત્વા પરિદમેત્વા, મુદું કરિત્વા કમ્મનિયં દૂરેપિ સદ્દાનં સદ્દનિમિત્તં મનસિ કરોતિ, સન્તિકેપિ સદ્દાનં સદ્દનિમિત્તં મનસિ કરોતિ, ઓળારિકાનમ્પિ સદ્દાનં સદ્દનિમિત્તં મનસિ કરોતિ, સુખુમાનમ્પિ સદ્દાનં સદ્દનિમિત્તં મનસિ કરોતિ, સણ્હસણ્હાનમ્પિ સદ્દાનં સદ્દનિમિત્તં મનસિ કરોતિ, પુરત્થિમાયપિ દિસાય સદ્દાનં સદ્દનિમિત્તં મનસિ કરોતિ, પચ્છિમાયપિ દિસાય સદ્દાનં સદ્દનિમિત્તં મનસિ કરોતિ, ઉત્તરાયપિ દિસાય સદ્દાનં સદ્દનિમિત્તં મનસિ કરોતિ, દક્ખિણાયપિ દિસાય સદ્દાનં સદ્દનિમિત્તં મનસિ કરોતિ, પુરત્થિમાયપિ અનુદિસાય સદ્દાનં સદ્દનિમિત્તં મનસિ કરોતિ, પચ્છિમાયપિ અનુદિસાય સદ્દાનં સદ્દનિમિત્તં મનસિ કરોતિ, ઉત્તરાયપિ અનુદિસાય સદ્દાનં સદ્દનિમિત્તં મનસિ કરોતિ, દક્ખિણાયપિ અનુદિસાય સદ્દાનં સદ્દનિમિત્તં મનસિ કરોતિ, હેટ્ઠિમાયપિ દિસાય સદ્દાનં સદ્દનિમિત્તં મનસિ કરોતિ, ઉપરિમાયપિ દિસાય સદ્દાનં સદ્દનિમિત્તં મનસિ કરોતિ. સો તથાભાવિતેન ચિત્તેન પરિસુદ્ધેન પરિયોદાતેન સોતધાતુવિસુદ્ધિઞાણાય ચિત્તં અભિનીહરતિ અભિનિન્નામેતિ. સો દિબ્બાય સોતધાતુયા વિસુદ્ધાય અતિક્કન્તમાનુસિકાય ઉભો સદ્દે સુણાતિ – દિબ્બે ચ માનુસે ચ યે દૂરે સન્તિકે ચ. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘વિતક્કવિપ્ફારવસેન નાનત્તેકત્તસદ્દનિમિત્તાનં પરિયોગાહણે પઞ્ઞા સોતધાતુવિસુદ્ધિઞાણં’’.

સોતધાતુવિસુદ્ધિઞાણનિદ્દેસો એકપઞ્ઞાસમો.