૪૨૭. ગિજ્ઝજાતકં (૧)

૧. પરિસઙ્કુપથો નામ, ગિજ્ઝપન્થો સનન્તનો;

તત્રાસિ માતાપિતરો, ગિજ્ઝો પોસેસિ જિણ્ણકે;

તેસં અજગરમેદં, અચ્ચહાસિ બહુત્તસો [પહુત્તતો (ક. સી.), પહૂતસો (સ્યા. પી.), બહુધસો (ક.)].

૨. પિતા ચ પુત્તં અવચ, જાનં ઉચ્ચં પપાતિનં;

સુપત્તં થામસમ્પન્નં [પક્ખસમ્પન્નં (સી. સ્યા. પી.)], તેજસ્સિં દૂરગામિનં.

૩. પરિપ્લવન્તં પથવિં, યદા તાત વિજાનહિ;

સાગરેન પરિક્ખિત્તં, ચક્કંવ પરિમણ્ડલં;

તતો તાત નિવત્તસ્સુ, માસ્સુ એત્તો પરં ગમિ.

૪. ઉદપત્તોસિ [ઉદ્ધં પત્તોસિ (ક. સી.)] વેગેન, બલી પક્ખી દિજુત્તમો;

ઓલોકયન્તો વક્કઙ્ગો, પબ્બતાનિ વનાનિ ચ.

૫. અદ્દસ્સ પથવિં ગિજ્ઝો, યથાસાસિ [યથાસ્સાસિ (સ્યા. અટ્ઠ. પાઠન્તરં)] પિતુસ્સુતં;

સાગરેન પરિક્ખિત્તં, ચક્કંવ પરિમણ્ડલં.

૬. તઞ્ચ સો સમતિક્કમ્મ, પરમેવચ્ચવત્તથ [પરમેવ પવત્તથ (સી. સ્યા.)];

તઞ્ચ વાતસિખા તિક્ખા, અચ્ચહાસિ બલિં દિજં.

૭. નાસક્ખાતિગતો પોસો, પુનદેવ નિવત્તિતું;

દિજો બ્યસનમાપાદિ, વેરમ્ભાનં [વેરમ્બાનં (સી. પી.)] વસં ગતો.

૮. તસ્સ પુત્તા ચ દારા ચ, યે ચઞ્ઞે અનુજીવિનો;

સબ્બે બ્યસનમાપાદું, અનોવાદકરે દિજે.

૯. એવમ્પિ ઇધ વુડ્ઢાનં, યો વાક્યં નાવબુજ્ઝતિ;

અતિસીમચરો દિત્તો, ગિજ્ઝોવાતીતસાસનો;

સ વે બ્યસનં પપ્પોતિ, અકત્વા વુડ્ઢસાસનન્તિ.

ગિજ્ઝજાતકં પઠમં.