૨૩. વેસ્સભૂબુદ્ધવંસો

૧. તત્થેવ મણ્ડકપ્પમ્હિ, અસમો અપ્પટિપુગ્ગલો;

વેસ્સભૂ નામ નામેન, લોકે ઉપ્પજ્જિ નાયકો [સો જિનો (સ્યા. કં. ક.)].

૨. આદિત્તં વત રાગગ્ગિ, તણ્હાનં વિજિતં તદા;

નાગોવ બન્ધનં છેત્વા, પત્તો સમ્બોધિમુત્તમં.

૩. ધમ્મચક્કં પવત્તેન્તે, વેસ્સભૂલોકનાયકે;

અસીતિકોટિસહસ્સાનં, પઠમાભિસમયો અહુ.

૪. પક્કન્તે ચારિકં રટ્ઠે, લોકજેટ્ઠે નરાસભે;

સત્તતિકોટિસહસ્સાનં, દુતિયાભિસમયો અહુ.

૫. મહાદિટ્ઠિં વિનોદેન્તો, પાટિહેરં કરોતિ સો;

સમાગતા નરમરૂ, દસસહસ્સી સદેવકે.

૬. મહાઅચ્છરિયં દિસ્વા, અબ્ભુતં લોમહંસનં;

દેવા ચેવ મનુસ્સા ચ, બુજ્ઝરે સટ્ઠિકોટિયો.

૭. સન્નિપાતા તયો આસું, વેસ્સભુસ્સ મહેસિનો;

ખીણાસવાનં વિમલાનં, સન્તચિત્તાન તાદિનં.

૮. અસીતિભિક્ખુસહસ્સાનં, પઠમો આસિ સમાગમો;

સત્તતિભિક્ખુસહસ્સાનં, દુતિયો આસિ સમાગમો.

૯. સટ્ઠિભિક્ખુસહસ્સાનં, તતિયો આસિ સમાગમો;

જરાદિભયભીતાનં, ઓરસાનં મહેસિનો.

૧૦. અહં તેન સમયેન, સુદસ્સનો નામ ખત્તિયો;

નિમન્તેત્વા મહાવીરં, દાનં દત્વા મહારહં;

અન્નપાનેન વત્થેન, સસઙ્ઘં જિન પૂજયિં.

૧૧. તસ્સ બુદ્ધસ્સ અસમસ્સ, ચક્કં વત્તિતમુત્તમં;

સુત્વાન પણિતં ધમ્મં, પબ્બજ્જમભિરોચયિં.

૧૨. મહાદાનં પવત્તેત્વા, રત્તિન્દિવમતન્દિતો;

પબ્બજ્જં ગુણસમ્પન્નં, પબ્બજિં જિનસન્તિકે.

૧૩. આચારગુણસમ્પન્નો, વત્તસીલસમાહિતો;

સબ્બઞ્ઞુતં ગવેસન્તો, રમામિ જિનસાસને.

૧૪. સદ્ધાપીતિં ઉપગન્ત્વા, બુદ્ધં વન્દામિ સત્થરં;

પીતિ ઉપ્પજ્જતિ મય્હં, બોધિયાયેવ કારણા.

૧૫. અનિવત્તમાનસં ઞત્વા, સમ્બુદ્ધો એતદબ્રવિ;

‘‘એકતિંસે ઇતો કપ્પે, અયં બુદ્ધો ભવિસ્સતિ.

૧૬. ‘‘અહુ કપિલવ્હયા રમ્મા…પે… હેસ્સામ સમ્મુખા ઇમં’’.

૧૭. તસ્સાહં વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૮. અનોમં નામ નગરં, સુપ્પતીતો નામ ખત્તિયો;

માતા યસવતી નામ, વેસ્સભુસ્સ મહેસિનો.

૧૯. છ ચ વસ્સસહસ્સાનિ, અગારં અજ્ઝ સો વસિ;

રુચિ સુરુચિ રતિવડ્ઢનો, તયો પાસાદમુત્તમા.

૨૦. અનૂનતિંસસહસ્સાનિ, નારિયો સમલઙ્કતા;

સુચિત્તા નામ સા નારી, સુપ્પબુદ્ધો નામ અત્રજો.

૨૧. નિમિત્તે ચતુરો દિસ્વા, સિવિકાયાભિનિક્ખમિ;

છમાસં પધાનચારં, અચરી પુરિસુત્તમો.

૨૨. બ્રહ્મુના યાચિતો સન્તો, વેસ્સભૂલોકનાયકો;

વત્તિ ચક્કં મહાવીરો, અરુણારામે નરુત્તમો.

૨૩. સોણો ચ ઉત્તરો ચેવ, અહેસું અગ્ગસાવકા;

ઉપસન્તો નામુપટ્ઠાકો, વેસ્સભુસ્સ મહેસિનો.

૨૪. રામા [દામા (સી.)] ચેવ સમાલા ચ, અહેસું અગ્ગસાવિકા;

બોધિ તસ્સ ભગવતો, મહાસાલોતિ વુચ્ચતિ.

૨૫. સોત્થિકો ચેવ રમ્ભો ચ, અહેસું અગ્ગુપટ્ઠકા;

ગોતમી સિરિમા ચેવ, અહેસું અગ્ગુપટ્ઠિકા.

૨૬. સટ્ઠિરતનમુબ્બેધો, હેમયૂપસમૂપમો;

કાયા નિચ્છરતિ રસ્મિ, રત્તિંવ પબ્બતે સિખી.

૨૭. સટ્ઠિવસ્સસહસ્સાનિ, આયુ તસ્સ મહેસિનો;

તાવતા તિટ્ઠમાનો સો, તારેસિ જનતં બહું.

૨૮. ધમ્મં વિત્થારિકં કત્વા, વિભજિત્વા મહાજનં;

ધમ્મનાવં ઠપેત્વાન, નિબ્બુતો સો સસાવકો.

૨૯. દસ્સનેય્યં સબ્બજનં, વિહારં ઇરિયાપથં;

સબ્બં તમન્તરહિતં, નનુ રિત્તા સબ્બસઙ્ખારા.

૩૦. વેસ્સભૂ જિનવરો સત્થા, ખેમારામમ્હિ નિબ્બુતો;

ધાતુવિત્થારિકં આસિ, તેસુ તેસુ પદેસતોતિ.

વેસ્સભુસ્સ ભગવતો વંસો એકવીસતિમો.