૧. રતનચઙ્કમનકણ્ડં

૧. બ્રહ્મા ચ લોકાધિપતી સહમ્પતી [સહમ્પતિ (સ્યા. કં.)], કતઞ્જલી અનધિવરં અયાચથ;

‘‘સન્તીધ સત્તાપ્પરજક્ખજાતિકા, દેસેહિ ધમ્મં અનુકમ્પિમં પજં’’.

૨. સમ્પન્નવિજ્જાચરણસ્સ તાદિનો, જુતિન્ધરસ્સન્તિમદેહધારિનો;

તથાગતસ્સપ્પટિપુગ્ગલસ્સ, ઉપ્પજ્જિ કારુઞ્ઞતા સબ્બસત્તે.

૩. ‘‘ન હેતે જાનન્તિ સદેવમાનુસા, બુદ્ધો અયં કીદિસકો નરુત્તમો;

ઇદ્ધિબલં પઞ્ઞાબલઞ્ચ કીદિસં, બુદ્ધબલં લોકહિતસ્સ કીદિસં.

૪. ‘‘ન હેતે જાનન્તિ સદેવમાનુસા, બુદ્ધો અયં એદિસકો નરુત્તમો;

ઇદ્ધિબલં પઞ્ઞાબલઞ્ચ એદિસં, બુદ્ધબલં લોકહિતસ્સ એદિસં.

૫. ‘‘હન્દાહં દસ્સયિસ્સામિ, બુદ્ધબલમનુત્તરં;

ચઙ્કમં માપયિસ્સામિ, નભે રતનમણ્ડિતં’’.

૬. ભુમ્મા મહારાજિકા તાવતિંસા, યામા ચ દેવા તુસિતા ચ નિમ્મિતા;

પરનિમ્મિતા યેપિ ચ બ્રહ્મકાયિકા, આનન્દિતા વિપુલમકંસુ ઘોસં.

૭. ઓભાસિતા ચ પથવી સદેવકા, પુથૂ ચ લોકન્તરિકા અસંવુતા;

તમો ચ તિબ્બો વિહતો તદા અહુ, દિસ્વાન અચ્છેરકં પાટિહીરં.

૮. સદેવગન્ધબ્બમનુસ્સરક્ખસે, આભા ઉળારા વિપુલા અજાયથ;

ઇમસ્મિં લોકે પરસ્મિઞ્ચોભયસ્મિં [પરસ્મિં ચૂભયે (સ્યા. કં.)], અધો ચ ઉદ્ધં તિરિયઞ્ચ વિત્થતં.

૯. સત્તુત્તમો અનધિવરો વિનાયકો, સત્થા અહૂ દેવમનુસ્સપૂજિતો;

મહાનુભાવો સતપુઞ્ઞલક્ખણો, દસ્સેસિ અચ્છેરકં પાટિહીરં.

૧૦. સો યાચિતો દેવવરેન ચક્ખુમા, અત્થં સમેક્ખિત્વા તદા નરુત્તમો;

ચઙ્કમં [ચઙ્કમં તત્થ (સી.)] માપયિ લોકનાયકો, સુનિટ્ઠિતં સબ્બરતનનિમ્મિતં.

૧૧. ઇદ્ધી ચ આદેસનાનુસાસની, તિપાટિહીરે ભગવા વસી અહુ;

ચઙ્કમં માપયિ લોકનાયકો, સુનિટ્ઠિતં સબ્બરતનનિમ્મિતં.

૧૨. દસસહસ્સીલોકધાતુયા, સિનેરુપબ્બતુત્તમે;

થમ્ભેવ દસ્સેસિ પટિપાટિયા, ચઙ્કમે રતનામયે.

૧૩. દસસહસ્સી અતિક્કમ્મ, ચઙ્કમં માપયી જિનો;

સબ્બસોણ્ણમયા પસ્સે, ચઙ્કમે રતનામયે.

૧૪. તુલાસઙ્ઘાટાનુવગ્ગા, સોવણ્ણફલકત્થતા;

વેદિકા સબ્બસોવણ્ણા, દુભતો પસ્સેસુ નિમ્મિતા.

૧૫. મણિમુત્તાવાલુકાકિણ્ણા, નિમ્મિતો રતનામયો;

ઓભાસેતિ દિસા સબ્બા, સતરંસીવ ઉગ્ગતો.

૧૬. તસ્મિં ચઙ્કમને ધીરો, દ્વત્તિંસવરલક્ખણો;

વિરોચમાનો સમ્બુદ્ધો, ચઙ્કમે ચઙ્કમી જિનો.

૧૭. દિબ્બં મન્દારવં પુપ્ફં, પદુમં પારિછત્તકં;

ચઙ્કમને ઓકિરન્તિ, સબ્બે દેવા સમાગતા.

૧૮. પસ્સન્તિ તં દેવસઙ્ઘા, દસસહસ્સી પમોદિતા;

નમસ્સમાના નિપતન્તિ, તુટ્ઠહટ્ઠા પમોદિતા.

૧૯. તાવતિંસા ચ યામા ચ, તુસિતા ચાપિ દેવતા;

નિમ્માનરતિનો દેવા, યે દેવા વસવત્તિનો;

ઉદગ્ગચિત્તા સુમના, પસ્સન્તિ લોકનાયકં.

૨૦. સદેવગન્ધબ્બમનુસ્સરક્ખસા, નાગા સુપણ્ણા અથ વાપિ કિન્નરા;

પસ્સન્તિ તં લોકહિતાનુકમ્પકં, નભેવ અચ્ચુગ્ગતચન્દમણ્ડલં.

૨૧. આભસ્સરા સુભકિણ્હા, વેહપ્ફલા અકનિટ્ઠા ચ દેવતા;

સુસુદ્ધસુક્કવત્થવસના, તિટ્ઠન્તિ પઞ્જલીકતા.

૨૨. મુઞ્ચન્તિ પુપ્ફં પન પઞ્ચવણ્ણિકં, મન્દારવં ચન્દનચુણ્ણમિસ્સિતં;

ભમેન્તિ ચેલાનિ ચ અમ્બરે તદા, ‘‘અહો જિનો લોકહિતાનુકમ્પકો.

૨૩. ‘‘તુવં સત્થા ચ કેતૂ ચ, ધજો યૂપો ચ પાણિનં;

પરાયનો પતિટ્ઠા ચ, દીપો ચ દ્વિપદુત્તમો [દિપદુત્તમો (સી. સ્યા.)].

૨૪. ‘‘દસસહસ્સીલોકધાતુયા, દેવતાયો મહિદ્ધિકા;

પરિવારેત્વા નમસ્સન્તિ, તુટ્ઠહટ્ઠા પમોદિતા.

૨૫. ‘‘દેવતા દેવકઞ્ઞા ચ, પસન્ના તુટ્ઠમાનસા;

પઞ્ચવણ્ણિકપુપ્ફેહિ, પૂજયન્તિ નરાસભં.

૨૬. ‘‘પસ્સન્તિ તં દેવસઙ્ઘા, પસન્ના તુટ્ઠમાનસા;

પઞ્ચવણ્ણિકપુપ્ફેહિ, પૂજયન્તિ નરાસભં.

૨૭. ‘‘અહો અચ્છરિયં લોકે, અબ્ભુતં લોમહંસનં;

ન મેદિસં ભૂતપુબ્બં, અચ્છેરં લોમહંસનં’’.

૨૮. સકસકમ્હિ ભવને, નિસીદિત્વાન દેવતા;

હસન્તિ તા મહાહસિતં, દિસ્વાનચ્છેરકં નભે.

૨૯. આકાસટ્ઠા ચ ભૂમટ્ઠા, તિણપન્થનિવાસિનો;

કતઞ્જલી નમસ્સન્તિ, તુટ્ઠહટ્ઠા પમોદિતા.

૩૦. યેપિ દીઘાયુકા નાગા, પુઞ્ઞવન્તો મહિદ્ધિકા;

પમોદિતા નમસ્સન્તિ, પૂજયન્તિ નરુત્તમં.

૩૧. સઙ્ગીતિયો પવત્તેન્તિ, અમ્બરે અનિલઞ્જસે;

ચમ્મનદ્ધાનિ વાદેન્તિ, દિસ્વાનચ્છેરકં નભે.

૩૨. સઙ્ખા ચ પણવા ચેવ, અથોપિ ડિણ્ડિમા [ડેણ્ડિમા (સી.)] બહૂ;

અન્તલિક્ખસ્મિં વજ્જન્તિ, દિસ્વાનચ્છેરકં નભે.

૩૩. અબ્ભુતો વત નો અજ્જ, ઉપ્પજ્જિ લોમહંસનો;

ધુવમત્થસિદ્ધિં લભામ, ખણો નો પટિપાદિતો.

૩૪. બુદ્ધોતિ તેસં સુત્વાન, પીતિ ઉપ્પજ્જિ તાવદે;

બુદ્ધો બુદ્ધોતિ કથયન્તા, તિટ્ઠન્તિ પઞ્જલીકતા.

૩૫. હિઙ્કારા સાધુકારા ચ [હિઙ્કારં સાધુકારઞ્ચ (સી. સ્યા.)], ઉક્કુટ્ઠિ સમ્પહંસનં [સમ્પસાદનં (સી.), સમ્પનાદનં (સ્યા.)];

પજા ચ વિવિધા ગગને, વત્તેન્તિ પઞ્જલીકતા.

૩૬. ગાયન્તિ સેળેન્તિ ચ વાદયન્તિ ચ, ભુજાનિ પોથેન્તિ ચ નચ્ચયન્તિ ચ;

મુઞ્ચન્તિ પુપ્ફં પન પઞ્ચવણ્ણિકં, મન્દારવં ચન્દનચુણ્ણમિસ્સિતં.

૩૭. ‘‘યથા તુય્હં મહાવીર, પાદેસુ ચક્કલક્ખણં;

ધજવજિરપટાકા, વડ્ઢમાનઙ્કુસાચિતં.

૩૮. ‘‘રૂપે સીલે સમાધિમ્હિ, પઞ્ઞાય ચ અસાદિસો;

વિમુત્તિયા અસમસમો, ધમ્મચક્કપ્પવત્તને.

૩૯. ‘‘દસનાગબલં કાયે, તુય્હં પાકતિકં બલં;

ઇદ્ધિબલેન અસમો, ધમ્મચક્કપ્પવત્તને.

૪૦. ‘‘એવં સબ્બગુણૂપેતં, સબ્બઙ્ગસમુપાગતં;

મહામુનિં કારુણિકં, લોકનાથં નમસ્સથ.

૪૧. ‘‘અભિવાદનં થોમનઞ્ચ, વન્દનઞ્ચ પસંસનં;

નમસ્સનઞ્ચ પૂજઞ્ચ, સબ્બં અરહસી તુવં.

૪૨. ‘‘યે કેચિ લોકે વન્દનેય્યા, વન્દનં અરહન્તિ યે;

સબ્બસેટ્ઠો મહાવીર, સદિસો તે ન વિજ્જતિ.

૪૩. ‘‘સારિપુત્તો મહાપઞ્ઞો, સમાધિજ્ઝાનકોવિદો;

ગિજ્ઝકૂટે ઠિતોયેવ, પસ્સતિ લોકનાયકં.

૪૪. ‘‘સુફુલ્લં સાલરાજંવ, ચન્દંવ ગગને યથા;

મજ્ઝન્હિકેવ [મજ્ઝન્તિકેવ (સબ્બત્થ)] સૂરિયં, ઓલોકેસિ નરાસભં.

૪૫. ‘‘જલન્તં દીપરુક્ખંવ, તરુણસૂરિયંવ ઉગ્ગતં;

બ્યામપ્પભાનુરઞ્જિતં, ધીરં પસ્સતિ લોકનાયકં.

૪૬. ‘‘પઞ્ચન્નં ભિક્ખુસતાનં, કતકિચ્ચાન તાદિનં;

ખીણાસવાનં વિમલાનં, ખણેન સન્નિપાતયિ.

૪૭. ‘‘લોકપ્પસાદનં નામ, પાટિહીરં નિદસ્સયિ;

અમ્હેપિ તત્થ ગન્ત્વાન, વન્દિસ્સામ મયં જિનં.

૪૮. ‘‘એથ સબ્બે ગમિસ્સામ, પુચ્છિસ્સામ મયં જિનં;

કઙ્ખં વિનોદયિસ્સામ, પસ્સિત્વા લોકનાયકં’’.

૪૯. સાધૂતિ તે પટિસ્સુત્વા, નિપકા સંવુતિન્દ્રિયા;

પત્તચીવરમાદાય, તરમાના ઉપાગમું.

૫૦. ખીણાસવેહિ વિમલેહિ, દન્તેહિ ઉત્તમે દમે;

સારિપુત્તો મહાપઞ્ઞો, ઇદ્ધિયા ઉપસઙ્કમિ.

૫૧. તેહિ ભિક્ખૂહિ પરિવુતો, સારિપુત્તો મહાગણી;

લળન્તો દેવોવ ગગને, ઇદ્ધિયા ઉપસઙ્કમિ.

૫૨. ઉક્કાસિતઞ્ચ ખિપિતં [ઉક્કાસિતઞ્ચ ખિપિતઞ્ચ (સ્યા. અટ્ઠ.)], અજ્ઝુપેક્ખિય સુબ્બતા;

સગારવા સપ્પતિસ્સા, સમ્બુદ્ધં ઉપસઙ્કમું.

૫૩. ઉપસઙ્કમિત્વા પસ્સન્તિ, સયમ્ભું લોકનાયકં;

નભે અચ્ચુગ્ગતં ધીરં, ચન્દંવ ગગને યથા.

૫૪. જલન્તં દીપરુક્ખંવ, વિજ્જુંવ ગગને યથા;

મજ્ઝન્હિકેવ સૂરિયં, પસ્સન્તિ લોકનાયકં.

૫૫. પઞ્ચભિક્ખુસતા સબ્બે, પસ્સન્તિ લોકનાયકં;

રહદમિવ વિપ્પસન્નં, સુફુલ્લં પદુમં યથા.

૫૬. અઞ્જલિં પગ્ગહેત્વાન, તુટ્ઠહટ્ઠા પમોદિતા;

નમસ્સમાના નિપતન્તિ, સત્થુનો ચક્કલક્ખણે.

૫૭. સારિપુત્તો મહાપઞ્ઞો, કોરણ્ડસમસાદિસો;

સમાધિજ્ઝાનકુસલો, વન્દતે લોકનાયકં.

૫૮. ગજ્જિતા કાલમેઘોવ, નીલુપ્પલસમસાદિસો;

ઇદ્ધિબલેન અસમો, મોગ્ગલ્લાનો મહિદ્ધિકો.

૫૯. મહાકસ્સપોપિ ચ થેરો, ઉત્તત્તકનકસન્નિભો;

ધુતગુણે અગ્ગનિક્ખિત્તો, થોમિતો સત્થુવણ્ણિતો.

૬૦. દિબ્બચક્ખૂનં યો અગ્ગો, અનુરુદ્ધો મહાગણી;

ઞાતિસેટ્ઠો ભગવતો, અવિદૂરેવ તિટ્ઠતિ.

૬૧. આપત્તિઅનાપત્તિયા, સતેકિચ્છાય કોવિદો;

વિનયે અગ્ગનિક્ખિત્તો, ઉપાલિ સત્થુવણ્ણિતો.

૬૨. સુખુમનિપુણત્થપટિવિદ્ધો, કથિકાનં પવરો ગણી;

ઇસિ મન્તાનિયા પુત્તો, પુણ્ણો નામાતિ વિસ્સુતો.

૬૩. એતેસં ચિત્તમઞ્ઞાય, ઓપમ્મકુસલો મુનિ;

કઙ્ખચ્છેદો મહાવીરો, કથેસિ અત્તનો ગુણં.

૬૪. ‘‘ચત્તારો તે અસઙ્ખેય્યા, કોટિ યેસં ન નાયતિ;

સત્તકાયો ચ આકાસો, ચક્કવાળા ચનન્તકા;

બુદ્ધઞાણં અપ્પમેય્યં, ન સક્કા એતે વિજાનિતું.

૬૫. ‘‘કિમેતં અચ્છરિયં લોકે, યં મે ઇદ્ધિવિકુબ્બનં;

અઞ્ઞે બહૂ અચ્છરિયા, અબ્ભુતા લોમહંસના.

૬૬. ‘‘યદાહં તુસિતે કાયે, સન્તુસિતો નામહં તદા;

દસસહસ્સી સમાગમ્મ, યાચન્તિ પઞ્જલી મમં.

૬૭. ‘‘‘કાલો ખો તે [કાલો દેવ (સી.), કાલોયં તે (સ્યા. ક.)] મહાવીર, ઉપ્પજ્જ માતુકુચ્છિયં;

સદેવકં તારયન્તો, બુજ્ઝસ્સુ અમતં પદં’.

૬૮. ‘‘તુસિતા કાયા ચવિત્વાન, યદા ઓક્કમિ કુચ્છિયં;

દસસહસ્સીલોકધાતુ, કમ્પિત્થ ધરણી તદા.

૬૯. ‘‘યદાહં માતુકુચ્છિતો, સમ્પજાનોવ નિક્ખમિં;

સાધુકારં પવત્તેન્તિ, દસસહસ્સી પકમ્પથ.

૭૦. ‘‘ઓક્કન્તિં મે સમો નત્થિ, જાતિતો અભિનિક્ખમે;

સમ્બોધિયં અહં સેટ્ઠો, ધમ્મચક્કપ્પવત્તને.

૭૧. ‘‘અહો અચ્છરિયં લોકે, બુદ્ધાનં ગુણમહન્તતા;

દસસહસ્સીલોકધાતુ, છપ્પકારં પકમ્પથ;

ઓભાસો ચ મહા આસિ, અચ્છેરં લોમહંસનં’’.

૭૨. ભગવા તમ્હિ [ભગવા ચ તમ્હિ (સી. સ્યા. ક.)] સમયે, લોકજેટ્ઠો નરાસભો;

સદેવકં દસ્સયન્તો, ઇદ્ધિયા ચઙ્કમી જિનો.

૭૩. ચઙ્કમે ચઙ્કમન્તોવ, કથેસિ લોકનાયકો;

અન્તરા ન નિવત્તેતિ, ચતુહત્થે ચઙ્કમે યથા.