૧૦. ગન્ધબ્બકાયસંયુત્તવણ્ણના

૪૩૮-૫૪૯. ગન્ધબ્બકાયસંયુત્તે મૂલગન્ધે અધિવત્થાતિ યસ્સ રુક્ખસ્સ મૂલે ગન્ધો અત્થિ, તં નિસ્સાય નિબ્બત્તા. સો હિ સકલોપિ રુક્ખો તેસં ઉપકપ્પતિ. સેસપદેસુપિ એસેવ નયો. ગન્ધગન્ધેતિ મૂલાદિગન્ધાનં ગન્ધે. યસ્સ હિ રુક્ખસ્સ સબ્બેસમ્પિ મૂલાદીનં ગન્ધો અત્થિ, સો ઇધ ગન્ધો નામ. તસ્સ ગન્ધસ્સ ગન્ધે, તસ્મિં અધિવત્થા. ઇધ મૂલાદીનિ સબ્બાનિ તેસંયેવ ઉપકપ્પન્તિ. સો દાતા હોતિ મૂલગન્ધાનન્તિ સો કાળાનુસારિકાદીનં મૂલગન્ધાનં દાતા હોતિ. એવં સબ્બપદેસુ અત્થો વેદિતબ્બો. એવઞ્હિ સરિક્ખદાનમ્પિ દત્વા પત્થનં ઠપેન્તિ, અસરિક્ખદાનમ્પિ. તં દસ્સેતું સો અન્નં દેતીતિઆદિ દસવિધં દાનવત્થુ વુત્તં. સેસં સબ્બત્થ ઉત્તાનમેવાતિ.

ગન્ધબ્બકાયસંયુત્તવણ્ણના નિટ્ઠિતા.