૩. પઞ્હાપુચ્છકવણ્ણના

૩૮૬. પઞ્હાપુચ્છકે પાળિઅનુસારેનેવ સતિપટ્ઠાનાનં કુસલાદિભાવો વેદિતબ્બો. આરમ્મણત્તિકેસુ પન સબ્બાનિપિ એતાનિ અપ્પમાણં નિબ્બાનં આરબ્ભ પવત્તનતો અપ્પમાણારમ્મણાનેવ, ન મગ્ગારમ્મણાનિ; સહજાતહેતુવસેન પન મગ્ગહેતુકાનિ; વીરિયં વા વીમંસં વા જેટ્ઠકં કત્વા મગ્ગભાવનાકાલે મગ્ગાધિપતીનિ; છન્દચિત્તજેટ્ઠકાય મગ્ગભાવનાય નવત્તબ્બાનિ મગ્ગાધિપતીનીતિ ફલકાલેપિ નવત્તબ્બાનેવ; અતીતાદીસુ એકારમ્મણભાવેનપિ નવત્તબ્બાનિ; નિબ્બાનસ્સ પન બહિદ્ધાધમ્મત્તા બહિદ્ધારમ્મણાનિ નામ હોન્તીતિ. એવમેતસ્મિં પઞ્હાપુચ્છકે નિબ્બત્તિતલોકુત્તરાનેવ સતિપટ્ઠાનાનિ કથિતાનિ. સમ્માસમ્બુદ્ધેન હિ સુત્તન્તભાજનીયસ્મિંયેવ લોકિયલોકુત્તરમિસ્સકા સતિપટ્ઠાના કથિતા; અભિધમ્મભાજનીયપઞ્હાપુચ્છકેસુ પન લોકુત્તરાયેવાતિ. એવમયં સતિપટ્ઠાનવિભઙ્ગોપિ તેપરિવટ્ટં નીહરિત્વા ભાજેત્વા દસ્સિતોતિ.

સમ્મોહવિનોદનિયા વિભઙ્ગટ્ઠકથાય

સતિપટ્ઠાનવિભઙ્ગવણ્ણના નિટ્ઠિતા.