૧. સબ્બસઙ્ગાહિકવારવણ્ણના

૯૭૮. ઇદાનિ તદનન્તરે ધમ્મહદયવિભઙ્ગે પાળિપરિચ્છેદો તાવ એવં વેદિતબ્બો – એત્થ હિ આદિતોવ ખન્ધાદીનં દ્વાદસન્નં કોટ્ઠાસાનં વસેન સબ્બસઙ્ગાહિકવારો નામ વુત્તો. દુતિયો તેસંયેવ ધમ્માનં કામધાતુઆદીસુ ઉપ્પત્તાનુપ્પત્તિદસ્સનવારો નામ. તતિયો તત્થેવ પરિયાપન્નાપરિયાપન્નદસ્સનવારો નામ. ચતુત્થો તીસુ ભૂમીસુ ઉપ્પત્તિક્ખણે વિજ્જમાનાવિજ્જમાનધમ્મદસ્સનવારો નામ. પઞ્ચમો તેસં ધમ્માનં ભૂમન્તરવસેન દસ્સનવારો નામ. છટ્ઠો ગતીસુ ઉપ્પાદકકમ્મઆયુપ્પમાણદસ્સનવારો નામ. સત્તમો અભિઞ્ઞેય્યાદિવારો નામ. અટ્ઠમો સારમ્મણાનારમ્મણવારો નામ. નવમો તેસં ખન્ધાદિધમ્માનં દિટ્ઠસુતાદિવસેન સઙ્ગહેત્વા દસ્સનવારો નામ. દસમો કુસલત્તિકાદિવસેન સઙ્ગહેત્વા દસ્સનવારો નામ.

૯૭૯. એવં દસહિ વારેહિ પરિચ્છિન્નાય પાળિયા પઠમે તાવ સબ્બસઙ્ગાહિકવારે ‘‘અવીચિતો યાવ ભવગ્ગં એત્થન્તરે કતિ ખન્ધા’’તિ પુચ્છિતે ‘‘એકોતિ વા…પે… ચત્તારોતિ વા છાતિ વા અવત્વા પઞ્ચાતિ વત્તું સમત્થો અઞ્ઞો નત્થી’’તિ અત્તનો ઞાણબલં દીપેન્તો પઞ્ચક્ખન્ધાતિ પુચ્છાનુરૂપં વિસ્સજ્જનં આહ. યથાપુચ્છં વિસ્સજ્જનઞ્હિ સબ્બઞ્ઞુબ્યાકરણં નામાતિ વુચ્ચતિ. દ્વાદસાયતનાનીતિઆદીસુપિ એસેવ નયો. રૂપક્ખન્ધાદીનં પભેદો ખન્ધવિભઙ્ગાદીસુ વુત્તનયેનેવ વેદિતબ્બો.