૧. કોધપેય્યાલં

૧૮૧. ઇતો પરેસુ કુજ્ઝનલક્ખણો કોધો. ઉપનન્ધનલક્ખણો ઉપનાહો. સુકતકરણમક્ખનલક્ખણો મક્ખો. યુગગ્ગાહલક્ખણો પલાસો. ઉસૂયનલક્ખણા ઇસ્સા. પઞ્ચમચ્છેરભાવો મચ્છરિયં. તં સબ્બમ્પિ મચ્છરાયનલક્ખણં. કતપટિચ્છાદનલક્ખણા માયા. કેરાટિકલક્ખણં સાઠેય્યં. અલજ્જનાકારો અહિરિકં. ઉપવાદતો અભાયનાકારો અનોત્તપ્પં. અક્કોધાદયો તેસં પટિપક્ખવસેન વેદિતબ્બા.

૧૮૫. સેક્ખસ્સ ભિક્ખુનોતિ સત્તવિધસ્સાપિ સેક્ખસ્સ ઉપરિઉપરિગુણેહિ પરિહાનાય સંવત્તન્તિ, પુથુજ્જનસ્સ પન પઠમતરંયેવ પરિહાનાય સંવત્તન્તીતિ વેદિતબ્બા. અપરિહાનાયાતિ ઉપરિઉપરિગુણેહિ અપરિહાનત્થાય.

૧૮૭. યથાભતં નિક્ખિત્તોતિ યથા આનેત્વા નિક્ખિત્તો, એવં નિરયે પતિટ્ઠિતો વાતિ વેદિતબ્બો.

૧૯૦. એકચ્ચોતિ યસ્સેતે કોધાદયો અત્થિ, સો એકચ્ચો નામ.

કોધપેય્યાલં નિટ્ઠિતં.