૬. અતીતાનાગતવારો

(ક) અનુલોમં

૪૭૫. (ક) યો ચક્ખુન્દ્રિયં પરિજાનિત્થ સો દોમનસ્સિન્દ્રિયં પજહિસ્સતીતિ? નો.

(ખ) યો વા પન દોમનસ્સિન્દ્રિયં પજહિસ્સતિ સો ચક્ખુન્દ્રિયં પરિજાનિત્થાતિ? નો.

(ક) યો ચક્ખુન્દ્રિયં પરિજાનિત્થ સો અનઞ્ઞાતઞ્ઞસ્સામીતિન્દ્રિયં ભાવેસ્સતીતિ? નો.

(ખ) યો વા પન અનઞ્ઞાતઞ્ઞસ્સામીતિન્દ્રિયં ભાવેસ્સતિ સો ચક્ખુન્દ્રિયં પરિજાનિત્થાતિ? નો.

(ક) યો ચક્ખુન્દ્રિયં પરિજાનિત્થ સો અઞ્ઞિન્દ્રિયં ભાવેસ્સતીતિ? નો.

(ખ) યો વા પન અઞ્ઞિન્દ્રિયં ભાવેસ્સતિ સો ચક્ખુન્દ્રિયં પરિજાનિત્થાતિ? નો.

(ક) યો ચક્ખુન્દ્રિયં પરિજાનિત્થ સો અઞ્ઞાતાવિન્દ્રિયં સચ્છિકરિસ્સતીતિ? નો.

(ખ) યો વા પન અઞ્ઞાતાવિન્દ્રિયં સચ્છિકરિસ્સતિ સો ચક્ખુન્દ્રિયં પરિજાનિત્થાતિ? નો. (ચક્ખુન્દ્રિયમૂલકં)

૪૭૬. (ક) યો દોમનસ્સિન્દ્રિયં પજહિત્થ સો અનઞ્ઞાતઞ્ઞસ્સામીતિન્દ્રિયં ભાવેસ્સતીતિ? નો.

(ખ) યો વા પન અનઞ્ઞાતઞ્ઞસ્સામીતિન્દ્રિયં ભાવેસ્સતિ સો દોમનસ્સિન્દ્રિયં પજહિત્થાતિ? નો.

(ક) યો દોમનસ્સિન્દ્રિયં પજહિત્થ સો અઞ્ઞિન્દ્રિયં ભાવેસ્સતીતિ?

દ્વે પુગ્ગલા દોમનસ્સિન્દ્રિયં પજહિત્થ, નો ચ અઞ્ઞિન્દ્રિયં ભાવેસ્સન્તિ. અનાગામી દોમનસ્સિન્દ્રિયઞ્ચ પજહિત્થ અઞ્ઞિન્દ્રિયઞ્ચ ભાવેસ્સતિ.

(ખ) યો વા પન અઞ્ઞિન્દ્રિયં ભાવેસ્સતિ સો દોમનસ્સિન્દ્રિયં પજહિત્થાતિ?

છ પુગ્ગલા અઞ્ઞિન્દ્રિયં ભાવેસ્સન્તિ, નો ચ દોમનસ્સિન્દ્રિયં પજહિત્થ. અનાગામી અઞ્ઞિન્દ્રિયઞ્ચ ભાવેસ્સતિ દોમનસ્સિન્દ્રિયઞ્ચ પજહિત્થ.

(ક) યો દોમનસ્સિન્દ્રિયં પજહિત્થ સો અઞ્ઞાતાવિન્દ્રિયં સચ્છિકરિસ્સતીતિ?

અરહા દોમનસ્સિન્દ્રિયં પજહિત્થ, નો ચ અઞ્ઞાતાવિન્દ્રિયં સચ્છિકરિસ્સતિ. દ્વે પુગ્ગલા દોમનસ્સિન્દ્રિયઞ્ચ પજહિત્થ અઞ્ઞાતાવિન્દ્રિયઞ્ચ સચ્છિકરિસ્સન્તિ.

(ખ) યો વા પન અઞ્ઞાતાવિન્દ્રિયં સચ્છિકરિસ્સતિ સો દોમનસ્સિન્દ્રિયં પજહિત્થાતિ?

છ પુગ્ગલા અઞ્ઞાતાવિન્દ્રિયં સચ્છિકરિસ્સન્તિ, નો ચ દોમનસ્સિન્દ્રિયં પજહિત્થ. દ્વે પુગ્ગલા અઞ્ઞાતાવિન્દ્રિયઞ્ચ સચ્છિકરિસ્સન્તિ દોમનસ્સિન્દ્રિયઞ્ચ પજહિત્થ. (દોમનસ્સિન્દ્રિયમૂલકં)

૪૭૭. (ક) યો અનઞ્ઞાતઞ્ઞસ્સામીતિન્દ્રિયં ભાવિત્થ સો અઞ્ઞિન્દ્રિયં ભાવેસ્સતીતિ?

દ્વે પુગ્ગલા અનઞ્ઞાતઞ્ઞસ્સામીતિન્દ્રિયં ભાવિત્થ, નો ચ અઞ્ઞિન્દ્રિયં ભાવેસ્સન્તિ. પઞ્ચ પુગ્ગલા અનઞ્ઞાતઞ્ઞસ્સામીતિન્દ્રિયઞ્ચ ભાવિત્થ અઞ્ઞિન્દ્રિયઞ્ચ ભાવેસ્સન્તિ.

(ખ) યો વા પન અઞ્ઞિન્દ્રિયં ભાવેસ્સતિ. સો અનઞ્ઞાતઞ્ઞસ્સામીતિન્દ્રિયં ભાવિત્થાતિ?

દ્વે પુગ્ગલા અઞ્ઞિન્દ્રિયં ભાવેસ્સન્તિ નો ચ અનઞ્ઞાતઞ્ઞસ્સામીતિન્દ્રિયં ભાવિત્થ. તયો પુગ્ગલા અઞ્ઞિન્દ્રિયઞ્ચ ભાવેસ્સન્તિ અનઞ્ઞાતઞ્ઞસ્સામીતિન્દ્રિયઞ્ચ ભાવિત્થ.

(ક) યો અનઞ્ઞાતઞ્ઞસ્સામીતિન્દ્રિયં ભાવિત્થ સો અઞ્ઞાતાવિન્દ્રિયં સચ્છિકરિસ્સતીતિ?

અરહા અનઞ્ઞાતઞ્ઞસ્સામીતિન્દ્રિયં ભાવિત્થ, નો ચ અઞ્ઞાતાવિન્દ્રિયં સચ્છિકરિસ્સતિ. છ પુગ્ગલા અનઞ્ઞાતઞ્ઞસ્સામીતિન્દ્રિયઞ્ચ ભાવિત્થ અઞ્ઞાતાવિન્દ્રિયઞ્ચ સચ્છિકરિસ્સન્તિ.

(ખ) યો વા પન અઞ્ઞાતાવિન્દ્રિયં સચ્છિકરિસ્સતિ સો અનઞ્ઞાતઞ્ઞસ્સામીતિન્દ્રિયં ભાવિત્થાતિ?

દ્વે પુગ્ગલા અઞ્ઞાતાવિન્દ્રિયં સચ્છિકરિસ્સન્તિ, નો ચ અનઞ્ઞાતઞ્ઞસ્સામીતિન્દ્રિયં ભાવિત્થ. છ પુગ્ગલા અઞ્ઞાતાવિન્દ્રિયઞ્ચ સચ્છિકરિસ્સન્તિ અનઞ્ઞાતઞ્ઞસ્સામીતિન્દ્રિયઞ્ચ ભાવિત્થ. (અનઞ્ઞાતઞ્ઞસ્સામીતિન્દ્રિયમૂલકં)

૪૭૮. (ક) યો અઞ્ઞિન્દ્રિયં ભાવિત્થ સો અઞ્ઞાતાવિન્દ્રિયં સચ્છિકરિસ્સતીતિ? નો.

(ખ) યો વા પન અઞ્ઞાતાવિન્દ્રિયં સચ્છિકરિસ્સતિ સો અઞ્ઞિન્દ્રિયં ભાવિત્થાતિ? નો. (અઞ્ઞિન્દ્રિયમૂલકં)

(ખ) પચ્ચનીકં

૪૭૯. (ક) યો ચક્ખુન્દ્રિયં ન પરિજાનિત્થ સો દોમનસ્સિન્દ્રિયં નપ્પજહિસ્સતીતિ?

પઞ્ચ પુગ્ગલા ચક્ખુન્દ્રિયં ન પરિજાનિત્થ, નો ચ દોમનસ્સિન્દ્રિયં નપ્પજહિસ્સન્તિ. ચત્તારો પુગ્ગલા ચક્ખુન્દ્રિયઞ્ચ ન પરિજાનિત્થ દોમનસ્સિન્દ્રિયઞ્ચ નપ્પજહિસ્સન્તિ.

(ખ) યો વા પન દોમનસ્સિન્દ્રિયં નપ્પજહિસ્સતિ સો ચક્ખુન્દ્રિયં ન પરિજાનિત્થાતિ?

અરહા દોમનસ્સિન્દ્રિયં નપ્પજહિસ્સતિ, નો ચ ચક્ખુન્દ્રિયં ન પરિજાનિત્થ. ચત્તારો પુગ્ગલા દોમનસ્સિન્દ્રિયઞ્ચ નપ્પજહિસ્સન્તિ ચક્ખુન્દ્રિયઞ્ચ ન પરિજાનિત્થ.

(ક) યો ચક્ખુન્દ્રિયં ન પરિજાનિત્થ સો અનઞ્ઞાતઞ્ઞસ્સામીતિન્દ્રિયં ન ભાવેસ્સતીતિ?

યે પુથુજ્જના મગ્ગં પટિલભિસ્સન્તિ તે ચક્ખુન્દ્રિયં ન પરિજાનિત્થ, નો ચ અનઞ્ઞાતઞ્ઞસ્સામીતિન્દ્રિયં ન ભાવેસ્સન્તિ. અટ્ઠ પુગ્ગલા ચક્ખુન્દ્રિયઞ્ચ ન પરિજાનિત્થ અનઞ્ઞાતઞ્ઞસ્સામીતિન્દ્રિયઞ્ચ ન ભાવેસ્સન્તિ.

(ખ) યો વા પન અનઞ્ઞાતઞ્ઞસ્સામીતિન્દ્રિયં ન ભાવેસ્સતિ સો ચક્ખુન્દ્રિયં ન પરિજાનિત્થાતિ?

અરહા અનઞ્ઞાતઞ્ઞસ્સામીતિન્દ્રિયં ન ભાવેસ્સતિ, નો ચ ચક્ખુન્દ્રિયં ન પરિજાનિત્થ. અટ્ઠ પુગ્ગલા અનઞ્ઞાતઞ્ઞસ્સામીતિન્દ્રિયઞ્ચ ન ભાવેસ્સન્તિ ચક્ખુન્દ્રિયઞ્ચ ન પરિજાનિત્થ.

(ક) યો ચક્ખુન્દ્રિયં ન પરિજાનિત્થ સો અઞ્ઞિન્દ્રિયં ન ભાવેસ્સતીતિ?

સત્ત પુગ્ગલા ચક્ખુન્દ્રિયં ન પરિજાનિત્થ, નો ચ અઞ્ઞિન્દ્રિયં ન ભાવેસ્સન્તિ. દ્વે પુગ્ગલા ચક્ખુન્દ્રિયઞ્ચ ન પરિજાનિત્થ અઞ્ઞિન્દ્રિયઞ્ચ ન ભાવેસ્સન્તિ.

(ખ) યો વા પન અઞ્ઞિન્દ્રિયં ન ભાવેસ્સતિ સો ચક્ખુન્દ્રિયં ન પરિજાનિત્થાતિ?

અરહા અઞ્ઞિન્દ્રિયં ન ભાવેસ્સતિ, નો ચ ચક્ખુન્દ્રિયં ન પરિજાનિત્થ. દ્વે પુગ્ગલા અઞ્ઞિન્દ્રિયઞ્ચ ન ભાવેસ્સન્તિ ચક્ખુન્દ્રિયઞ્ચ ન પરિજાનિત્થ.

(ક) યો ચક્ખુન્દ્રિયં ન પરિજાનિત્થ સો અઞ્ઞાતાવિન્દ્રિયં ન સચ્છિકરિસ્સતીતિ?

અટ્ઠ પુગ્ગલા ચક્ખુન્દ્રિયં ન પરિજાનિત્થ, નો ચ અઞ્ઞાતાવિન્દ્રિયં ન સચ્છિકરિસ્સન્તિ. યે પુથુજ્જના મગ્ગં ન પટિલભિસ્સન્તિ તે ચક્ખુન્દ્રિયઞ્ચ ન પરિજાનિત્થ અઞ્ઞાતાવિન્દ્રિયઞ્ચ ન સચ્છિકરિસ્સન્તિ.

(ખ) યો વા પન અઞ્ઞાતાવિન્દ્રિયં ન સચ્છિકરિસ્સતિ સો ચક્ખુન્દ્રિયં ન પરિજાનિત્થાતિ?

અરહા અઞ્ઞાતાવિન્દ્રિયં ન સચ્છિકરિસ્સતિ, નો ચ ચક્ખુન્દ્રિયં ન પરિજાનિત્થ. યે પુથુજ્જના મગ્ગં ન પટિલભિસ્સન્તિ તે અઞ્ઞાતાવિન્દ્રિયઞ્ચ ન સચ્છિકરિસ્સન્તિ ચક્ખુન્દ્રિયઞ્ચ ન પરિજાનિત્થ. (ચક્ખુન્દ્રિયમૂલકં)

૪૮૦. (ક) યો દોમનસ્સિન્દ્રિયં નપ્પજહિત્થ સો અનઞ્ઞાતઞ્ઞસ્સામીતિન્દ્રિયં ન ભાવેસ્સતીતિ?

યે પુથુજ્જના મગ્ગં પટિલભિસ્સન્તિ તે દોમનસ્સિન્દ્રિયં નપ્પજહિત્થ, નો ચ અનઞ્ઞાતઞ્ઞસ્સામીતિન્દ્રિયં ન ભાવેસ્સન્તિ. છ પુગ્ગલા દોમનસ્સિન્દ્રિયઞ્ચ નપ્પજહિત્થ અનઞ્ઞાતઞ્ઞસ્સામીતિન્દ્રિયઞ્ચ ન ભાવેસ્સન્તિ.

(ખ) યો વા પન અનઞ્ઞાતઞ્ઞસ્સામીતિન્દ્રિયં ન ભાવેસ્સતિ સો દોમનસ્સિન્દ્રિયં નપ્પજહિત્થાતિ?

તયો પુગ્ગલા અનઞ્ઞાતઞ્ઞસ્સામીતિન્દ્રિયં ન ભાવેસ્સન્તિ, નો ચ દોમનસ્સિન્દ્રિયં નપ્પજહિત્થ. છ પુગ્ગલા અનઞ્ઞાતઞ્ઞસ્સામીતિન્દ્રિયઞ્ચ ન ભાવેસ્સન્તિ દોમનસ્સિન્દ્રિયઞ્ચ નપ્પજહિત્થ.

(ક) યો દોમનસ્સિન્દ્રિયં નપ્પજહિત્થ સો અઞ્ઞિન્દ્રિયં ન ભાવેસ્સતીતિ?

છ પુગ્ગલા દોમનસ્સિન્દ્રિયં નપ્પજહિત્થ, નો ચ અઞ્ઞિન્દ્રિયં ન ભાવેસ્સન્તિ. યે પુથુજ્જના મગ્ગં ન પટિલભિસ્સન્તિ તે દોમનસ્સિન્દ્રિયઞ્ચ નપ્પજહિત્થ અઞ્ઞિન્દ્રિયઞ્ચ ન ભાવેસ્સન્તિ.

(ખ) યો વા પન અઞ્ઞિન્દ્રિયં ન ભાવેસ્સતિ સો દોમનસ્સિન્દ્રિયં નપ્પજહિત્થાતિ?

દ્વે પુગ્ગલા અઞ્ઞિન્દ્રિયં ન ભાવેસ્સન્તિ, નો ચ દોમનસ્સિન્દ્રિયં નપ્પજહિત્થ. યે પુથુજ્જના મગ્ગં ન પટિલભિસ્સન્તિ તે અઞ્ઞિન્દ્રિયઞ્ચ ન ભાવેસ્સન્તિ દોમનસ્સિન્દ્રિયઞ્ચ નપ્પજહિત્થ.

(ક) યો દોમનસ્સિન્દ્રિયં નપ્પજ્જહિત્થ સો અઞ્ઞાતાવિન્દ્રિયં ન સચ્છિકરિસ્સતીતિ?

છ પુગ્ગલા દોમનસ્સિન્દ્રિયં નપ્પજહિત્થ, નો ચ અઞ્ઞાતાવિન્દ્રિયં ન સચ્છિકરિસ્સન્તિ. યે પુથુજ્જના મગ્ગં ન પટિલભિસ્સન્તિ તે દોમનસ્સિન્દ્રિયઞ્ચ નપ્પજહિત્થ અઞ્ઞાતાવિન્દ્રિયઞ્ચ ન સચ્છિકરિસ્સન્તિ.

(ખ) યો વા પન અઞ્ઞાતાવિન્દ્રિયં ન સચ્છિકરિસ્સતિ સો દોમનસ્સિન્દ્રિયં નપ્પજહિત્થાતિ?

અરહા અઞ્ઞાતાવિન્દ્રિયં ન સચ્છિકરિસ્સતિ, નો ચ દોમનસ્સિન્દ્રિયં નપ્પજહિત્થ. યે પુથુજ્જના મગ્ગં ન પટિલભિસ્સન્તિ તે અઞ્ઞાતાવિન્દ્રિયઞ્ચ ન સચ્છિકરિસ્સન્તિ દોમનસ્સિન્દ્રિયઞ્ચ નપ્પજહિત્થ. (દોમનસ્સિન્દ્રિયમૂલકં)

૪૮૧. (ક) યો અનઞ્ઞાતઞ્ઞસ્સામીતિન્દ્રિયં ન ભાવિત્થ સો અઞ્ઞિન્દ્રિયં ન ભાવેસ્સતીતિ?

દ્વે પુગ્ગલા અનઞ્ઞાતઞ્ઞસ્સામીતિન્દ્રિયં ન ભાવિત્થ, નો ચ અઞ્ઞિન્દ્રિયં ન ભાવેસ્સન્તિ. યે પુથુજ્જના મગ્ગં ન પટિલભિસ્સન્તિ તે અનઞ્ઞાતઞ્ઞસ્સામીતિન્દ્રિયઞ્ચ ન ભાવિત્થ અઞ્ઞિન્દ્રિયઞ્ચ ન ભાવેસ્સન્તિ.

(ખ) યો વા પન અઞ્ઞિન્દ્રિયં ન ભાવેસ્સતિ સો અનઞ્ઞાતઞ્ઞસ્સામીતિન્દ્રિયં ન ભાવિત્થાતિ?

દ્વે પુગ્ગલા અઞ્ઞિન્દ્રિયં ન ભાવેસ્સન્તિ, નો ચ અનઞ્ઞાતઞ્ઞસ્સામીતિન્દ્રિયં ન ભાવિત્થ. યે પુથુજ્જના મગ્ગં ન પટિલભિસ્સન્તિ તે અઞ્ઞિન્દ્રિયઞ્ચ ન ભાવેસ્સન્તિ અનઞ્ઞાતઞ્ઞસ્સામીતિન્દ્રિયઞ્ચ ન ભાવિત્થ.

(ક) યો અનઞ્ઞાતઞ્ઞસ્સામીતિન્દ્રિયં ન ભાવિત્થ સો અઞ્ઞાતાવિન્દ્રિયં ન સચ્છિકરિસ્સતીતિ?

દ્વે પુગ્ગલા અનઞ્ઞાતઞ્ઞસ્સામીતિન્દ્રિયં ન ભાવિત્થ, નો ચ અઞ્ઞાતાવિન્દ્રિયં ન સચ્છિકરિસ્સન્તિ. યે પુથુજ્જના મગ્ગં ન પટિલભિસ્સન્તિ તે અનઞ્ઞાતઞ્ઞસ્સામીતિન્દ્રિયઞ્ચ ન ભાવિત્થ અઞ્ઞાતાવિન્દ્રિયઞ્ચ ન સચ્છિકરિસ્સન્તિ.

(ખ) યો વા પન અઞ્ઞાતાવિન્દ્રિયં ન સચ્છિકરિસ્સતિ સો અનઞ્ઞાતઞ્ઞસ્સામીતિન્દ્રિયં ન ભાવિત્થાતિ?

અરહા અઞ્ઞાતાવિન્દ્રિયં ન સચ્છિકરિસ્સતિ, નો ચ અનઞ્ઞાતઞ્ઞસ્સામીતિન્દ્રિયં ન ભાવિત્થ. યે પુથુજ્જના મગ્ગં ન પટિલભિસ્સન્તિ તે અઞ્ઞાતાવિન્દ્રિયઞ્ચ ન સચ્છિકરિસ્સન્તિ અનઞ્ઞાતઞ્ઞસ્સામીતિન્દ્રિયઞ્ચ ન ભાવિત્થ. (અનઞ્ઞાતઞ્ઞસ્સામીતિન્દ્રિયમૂલકં)

૪૮૨. (ક) યો અઞ્ઞિન્દ્રિયં ન ભાવિત્થ સો અઞ્ઞાતાવિન્દ્રિયં ન સચ્છિકરિસ્સતીતિ?

અટ્ઠ પુગ્ગલા અઞ્ઞિન્દ્રિયં ન ભાવિત્થ, નો ચ અઞ્ઞાતાવિન્દ્રિયં ન સચ્છિકરિસ્સન્તિ. યે પુથુજ્જના મગ્ગં ન પટિલભિસ્સન્તિ તે અઞ્ઞિન્દ્રિયઞ્ચ ન ભાવિત્થ અઞ્ઞાતાવિન્દ્રિયઞ્ચ ન સચ્છિકરિસ્સન્તિ.

(ખ) યો વા પન અઞ્ઞાતાવિન્દ્રિયં ન સચ્છિકરિસ્સતિ સો અઞ્ઞિન્દ્રિયં ન ભાવિત્થાતિ?

અરહા અઞ્ઞાતાવિન્દ્રિયં ન સચ્છિકરિસ્સતિ, નો ચ અઞ્ઞિન્દ્રિયં ન ભાવિત્થ. યે પુથુજ્જના મગ્ગં ન પટિલભિસ્સન્તિ તે અઞ્ઞાતાવિન્દ્રિયઞ્ચ ન સચ્છિકરિસ્સન્તિ અઞ્ઞિન્દ્રિયઞ્ચ ન ભાવિત્થ. (અઞ્ઞિન્દ્રિયમૂલકં).

પરિઞ્ઞાવારો.

ઇન્દ્રિયયમકં નિટ્ઠિતં.

યમકપકરણં નિટ્ઠિતં.