(૬) અતીતાનાગતવારો

(ક) અનુલોમપુગ્ગલો

૨૧૯. (ક) યસ્સ કુસલા ધમ્મા ઉપ્પજ્જિત્થ તસ્સ અકુસલા ધમ્મા નિરુજ્ઝિસ્સન્તીતિ?

અગ્ગમગ્ગસમઙ્ગીનં અરહન્તાનં યસ્સ ચિત્તસ્સ અનન્તરા અગ્ગમગ્ગં પટિલભિસ્સન્તિ તેસં કુસલા ધમ્મા ઉપ્પજ્જિત્થ, નો ચ તેસં અકુસલા ધમ્મા નિરુજ્ઝિસ્સન્તિ. ઇતરેસં તેસં કુસલા ચ ધમ્મા ઉપ્પજ્જિત્થ અકુસલા ચ ધમ્મા નિરુજ્ઝિસ્સન્તિ.

(ખ) યસ્સ વા પન અકુસલા ધમ્મા નિરુજ્ઝિસ્સન્તિ તસ્સ કુસલા ધમ્મા ઉપ્પજ્જિત્થાતિ? આમન્તા.

(ક) યસ્સ કુસલા ધમ્મા ઉપ્પજ્જિત્થ તસ્સ અબ્યાકતા ધમ્મા નિરુજ્ઝિસ્સન્તીતિ?

પચ્છિમચિત્તસ્સ ભઙ્ગક્ખણે તેસં કુસલા ધમ્મા ઉપ્પજ્જિત્થ, નો ચ તેસં અબ્યાકતા ધમ્મા નિરુજ્ઝિસ્સન્તિ. ઇતરેસં તેસં કુસલા ચ ધમ્મા ઉપ્પજ્જિત્થ અબ્યાકતા ચ ધમ્મા નિરુજ્ઝિસ્સન્તિ.

(ખ) યસ્સ વા પન અબ્યાકતા ધમ્મા નિરુજ્ઝિસ્સન્તિ તસ્સ કુસલા ધમ્મા ઉપ્પજ્જિત્થાતિ? આમન્તા.

૨૨૦. (ક) યસ્સ અકુસલા ધમ્મા ઉપ્પજ્જિત્થ તસ્સ અબ્યાકતા ધમ્મા નિરુજ્ઝિસ્સન્તીતિ?

પચ્છિમચિત્તસ્સ ભઙ્ગક્ખણે તેસં અકુસલા ધમ્મા ઉપ્પજ્જિત્થ, નો ચ તેસં અબ્યાકતા ધમ્મા નિરુજ્ઝિસ્સન્તિ. ઇતરેસં તેસં અકુસલા ચ ધમ્મા ઉપ્પજ્જિત્થ અબ્યાકતા ચ ધમ્મા નિરુજ્ઝિસ્સન્તિ.

(ખ) યસ્સ વા પન અબ્યાકતા ધમ્મા નિરુજ્ઝિસ્સન્તિ તસ્સ અકુસલા ધમ્મા ઉપ્પજ્જિત્થાતિ? આમન્તા.

(ખ) અનુલોમઓકાસો

૨૨૧. યત્થ કુસલા ધમ્મા ઉપ્પજ્જિત્થ તત્થ અકુસલા ધમ્મા નિરુજ્ઝિસ્સન્તીતિ?…પે….

(ગ) અનુલોમપુગ્ગલોકાસા

૨૨૨. (ક) યસ્સ યત્થ કુસલા ધમ્મા ઉપ્પજ્જિત્થ તસ્સ તત્થ અકુસલા ધમ્મા નિરુજ્ઝિસ્સન્તીતિ?

અગ્ગમગ્ગસમઙ્ગીનં અરહન્તાનં યસ્સ ચિત્તસ્સ અનન્તરા અગ્ગમગ્ગં પટિલભિસ્સન્તિ તેસં તત્થ કુસલા ધમ્મા ઉપ્પજ્જિત્થ, નો ચ તેસં તત્થ અકુસલા ધમ્મા નિરુજ્ઝિસ્સન્તિ. ઇતરેસં ચતુવોકારાનં પઞ્ચવોકારાનં તેસં તત્થ કુસલા ચ ધમ્મા ઉપ્પજ્જિત્થ અકુસલા ચ ધમ્મા નિરુજ્ઝિસ્સન્તિ.

(ખ) યસ્સ વા પન યત્થ અકુસલા ધમ્મા નિરુજ્ઝિસ્સન્તિ તસ્સ તત્થ કુસલા ધમ્મા ઉપ્પજ્જિત્થાતિ?

સુદ્ધાવાસાનં દુતિયે ચિત્તે વત્તમાને તેસં તત્થ અકુસલા ધમ્મા નિરુજ્ઝિસ્સન્તિ, નો ચ તેસં તત્થ કુસલા ધમ્મા ઉપ્પજ્જિત્થ. ઇતરેસં ચતુવોકારાનં પઞ્ચવોકારાનં તેસં તત્થ અકુસલા ચ ધમ્મા નિરુજ્ઝિસ્સન્તિ કુસલા ચ ધમ્મા ઉપ્પજ્જિત્થ.

(ક) યસ્સ યત્થ કુસલા ધમ્મા ઉપ્પજ્જિત્થ તસ્સ તત્થ અબ્યાકતા ધમ્મા નિરુજ્ઝિસ્સન્તીતિ?

પચ્છિમચિત્તસ્સ ભઙ્ગક્ખણે તેસં તત્થ કુસલા ધમ્મા ઉપ્પજ્જિત્થ, નો ચ તેસં તત્થ અબ્યાકતા ધમ્મા નિરુજ્ઝિસ્સન્તિ. ઇતરેસં ચતુવોકારાનં પઞ્ચવોકારાનં તેસં તત્થ કુસલા ચ ધમ્મા ઉપ્પજ્જિત્થ અબ્યાકતા ચ ધમ્મા નિરુજ્ઝિસ્સન્તિ.

(ખ) યસ્સ વા પન યત્થ અબ્યાકતા ધમ્મા નિરુજ્ઝિસ્સન્તિ તસ્સ તત્થ કુસલા ધમ્મા ઉપ્પજ્જિત્થાતિ?

સુદ્ધાવાસાનં દુતિયે ચિત્તે વત્તમાને અસઞ્ઞસત્તાનં તેસં તત્થ અબ્યાકતા ધમ્મા નિરુજ્ઝિસ્સન્તિ, નો ચ તેસં તત્થ કુસલા ધમ્મા ઉપ્પજ્જિત્થ. ઇતરેસં ચતુવોકારાનં પઞ્ચવોકારાનં તેસં તત્થ અબ્યાકતા ચ ધમ્મા નિરુજ્ઝિસ્સન્તિ કુસલા ચ ધમ્મા ઉપ્પજ્જિત્થ.

૨૨૩. (ક) યસ્સ યત્થ અકુસલા ધમ્મા ઉપ્પજ્જિત્થ તસ્સ તત્થ અબ્યાકતા ધમ્મા નિરુજ્ઝિસ્સન્તીતિ?

પચ્છિમચિત્તસ્સ ભઙ્ગક્ખણે તેસં તત્થ અકુસલા ધમ્મા ઉપ્પજ્જિત્થ, નો ચ તેસં તત્થ અબ્યાકતા ધમ્મા નિરુજ્ઝિસ્સન્તિ. ઇતરેસં ચતુવોકારાનં પઞ્ચવોકારાનં તેસં તત્થ અકુસલા ચ ધમ્મા ઉપ્પજ્જિત્થ અબ્યાકતા ચ ધમ્મા નિરુજ્ઝિસ્સન્તિ.

(ખ) યસ્સ વા પન યત્થ અબ્યાકતા ધમ્મા નિરુજ્ઝિસ્સન્તિ તસ્સ તત્થ અકુસલા ધમ્મા ઉપ્પજ્જિત્થાતિ?

સુદ્ધાવાસાનં દુતિયે ચિત્તે વત્તમાને અસઞ્ઞસત્તાનં તેસં તત્થ અબ્યાકતા ધમ્મા નિરુજ્ઝિસ્સન્તિ, નો ચ તેસં તત્થ અકુસલા ધમ્મા ઉપ્પજ્જિત્થ. ઇતરેસં ચતુવોકારાનં પઞ્ચવોકારાનં તેસં તત્થ અબ્યાકતા ચ ધમ્મા નિરુજ્ઝિસ્સન્તિ અકુસલા ચ ધમ્મા ઉપ્પજ્જિત્થ.

(ઘ) પચ્ચનીકપુગ્ગલો

૨૨૪. (ક) યસ્સ કુસલા ધમ્મા ન ઉપ્પજ્જિત્થ તસ્સ અકુસલા ધમ્મા ન નિરુજ્ઝિસ્સન્તીતિ? નત્થિ.

(ખ) યસ્સ વા પન અકુસલા ધમ્મા ન નિરુજ્ઝિસ્સન્તિ તસ્સ કુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

(ક) યસ્સ કુસલા ધમ્મા ન ઉપ્પજ્જિત્થ તસ્સ અબ્યાકતા ધમ્મા ન નિરુજ્ઝિસ્સન્તીતિ? નત્થિ.

(ખ) યસ્સ વા પન અબ્યાકતા ધમ્મા ન નિરુજ્ઝિસ્સન્તિ તસ્સ કુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

૨૨૫. (ક) યસ્સ અકુસલા ધમ્મા ન ઉપ્પજ્જિત્થ તસ્સ અબ્યાકતા ધમ્મા ન નિરુજ્ઝિસ્સન્તીતિ? નત્થિ.

(ખ) યસ્સ વા પન અબ્યાકતા ધમ્મા ન નિરુજ્ઝિસ્સન્તિ તસ્સ અકુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

(ઙ) પચ્ચનીકઓકાસો

૨૨૬. યત્થ કુસલા ધમ્મા ન ઉપ્પજ્જિત્થ તત્થ અકુસલા ધમ્મા ન નિરુજ્ઝિસ્સન્તીતિ?…પે….

(ચ) પચ્ચનીકપુગ્ગલોકાસા

૨૨૭. (ક) યસ્સ યત્થ કુસલા ધમ્મા ન ઉપ્પજ્જિત્થ તસ્સ તત્થ અકુસલા ધમ્મા ન નિરુજ્ઝિસ્સન્તીતિ?

સુદ્ધાવાસાનં દુતિયે ચિત્તે વત્તમાને તેસં તત્થ કુસલા ધમ્મા ન ઉપ્પજ્જિત્થ, નો ચ તેસં તત્થ અકુસલા ધમ્મા ન નિરુજ્ઝિસ્સન્તિ. અસઞ્ઞસત્તાનં તેસં તત્થ કુસલા ચ ધમ્મા ન ઉપ્પજ્જિત્થ અકુસલા ચ ધમ્મા ન નિરુજ્ઝિસ્સન્તિ.

(ખ) યસ્સ વા પન યત્થ અકુસલા ધમ્મા ન નિરુજ્ઝિસ્સન્તિ તસ્સ તત્થ કુસલા ધમ્મા ન ઉપ્પજ્જિત્થાતિ?

અગ્ગમગ્ગસમઙ્ગીનં અરહન્તાનં યસ્સ ચિત્તસ્સ અનન્તરા અગ્ગમગ્ગં પટિલભિસ્સન્તિ તેસં તત્થ અકુસલા ધમ્મા ન નિરુજ્ઝિસ્સન્તિ, નો ચ તેસં તત્થ કુસલા ધમ્મા ન ઉપ્પજ્જિત્થ. અસઞ્ઞસત્તાનં તેસં તત્થ અકુસલા ચ ધમ્મા ન નિરુજ્ઝિસ્સન્તિ કુસલા ચ ધમ્મા ન ઉપ્પજ્જિત્થ.

(ક) યસ્સ યત્થ કુસલા ધમ્મા ન ઉપ્પજ્જિત્થ તસ્સ તત્થ અબ્યાકતા ધમ્મા ન નિરુજ્ઝિસ્સન્તીતિ? નિરુજ્ઝિસ્સન્તિ.

(ખ) યસ્સ વા પન યત્થ અબ્યાકતા ધમ્મા ન નિરુજ્ઝિસ્સન્તિ તસ્સ તત્થ કુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

૨૨૮. (ક) યસ્સ યત્થ અકુસલા ધમ્મા ન ઉપ્પજ્જિત્થ તસ્સ તત્થ અબ્યાકતા ધમ્મા ન નિરુજ્ઝિસ્સન્તીતિ? નિરુજ્ઝિસ્સન્તિ.

(ખ) યસ્સ વા પન યત્થ અબ્યાકતા ધમ્મા ન નિરુજ્ઝિસ્સન્તિ તસ્સ તત્થ અકુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

ઉપ્પાદનિરોધવારો.

પવત્તિવારો નિટ્ઠિતો.