(૬) અતીતાનાગતવારો

(ક) અનુલોમપુગ્ગલો

૮૯. (ક) યસ્સ કુસલા ધમ્મા ઉપ્પજ્જિત્થ તસ્સ અકુસલા ધમ્મા ઉપ્પજ્જિસ્સન્તીતિ?

અગ્ગમગ્ગસમઙ્ગીનં અરહન્તાનં યસ્સ ચિત્તસ્સ અનન્તરા અગ્ગમગ્ગં પટિલભિસ્સન્તિ તેસં કુસલા ધમ્મા ઉપ્પજ્જિત્થ, નો ચ તેસં અકુસલા ધમ્મા ઉપ્પજ્જિસ્સન્તિ. ઇતરેસં તેસં કુસલા ચ ધમ્મા ઉપ્પજ્જિત્થ અકુસલા ચ ધમ્મા ઉપ્પજ્જિસ્સન્તિ.

(ખ) યસ્સ વા પન અકુસલા ધમ્મા ઉપ્પજ્જિસ્સન્તિ તસ્સ કુસલા ધમ્મા ઉપ્પજ્જિત્થાતિ? આમન્તા.

(ક) યસ્સ કુસલા ધમ્મા ઉપ્પજ્જિત્થ તસ્સ અબ્યાકતા ધમ્મા ઉપ્પજ્જિસ્સન્તીતિ?

પચ્છિમચિત્તસમઙ્ગીનં તેસં કુસલા ધમ્મા ઉપ્પજ્જિત્થ, નો ચ તેસં અબ્યાકતા ધમ્મા ઉપ્પજ્જિસ્સન્તિ. ઇતરેસં તેસં કુસલા ચ ધમ્મા ઉપ્પજ્જિત્થ અબ્યાકતા ચ ધમ્મા ઉપ્પજ્જિસ્સન્તિ.

(ખ) યસ્સ વા પન અબ્યાકતા ધમ્મા ઉપ્પજ્જિસ્સન્તિ તસ્સ કુસલા ધમ્મા ઉપ્પજ્જિત્થાતિ? આમન્તા.

૯૦. (ક) યસ્સ અકુસલા ધમ્મા ઉપ્પજ્જિત્થ તસ્સ અબ્યાકતા ધમ્મા ઉપ્પજ્જિસ્સન્તીતિ?

પચ્છિમચિત્તસમઙ્ગીનં તેસં અકુસલા ધમ્મા ઉપ્પજ્જિત્થ, નો ચ તેસં અબ્યાકતા ધમ્મા ઉપ્પજ્જિસ્સન્તિ. ઇતરેસં તેસં અકુસલા ચ ધમ્મા ઉપ્પજ્જિત્થ અબ્યાકતા ચ ધમ્મા ઉપ્પજ્જિસ્સન્તિ.

(ખ) યસ્સ વા પન અબ્યાકતા ધમ્મા ઉપ્પજ્જિસ્સન્તિ તસ્સ અકુસલા ધમ્મા ઉપ્પજ્જિત્થાતિ? આમન્તા.

(ખ) અનુલોમઓકાસો

૯૧. યત્થ કુસલા ધમ્મા ઉપ્પજ્જિત્થ તત્થ અકુસલા ધમ્મા ઉપ્પજ્જિસ્સન્તીતિ?…પે….

(ગ) અનુલોમપુગ્ગલોકાસા

૯૨. (ક) યસ્સ યત્થ કુસલા ધમ્મા ઉપ્પજ્જિત્થ તસ્સ તત્થ અકુસલા ધમ્મા ઉપ્પજ્જિસ્સન્તીતિ?

અગ્ગમગ્ગસમઙ્ગીનં અરહન્તાનં યસ્સ ચિત્તસ્સ અનન્તરા અગ્ગમગ્ગં પટિલભિસ્સન્તિ તેસં તત્થ કુસલા ધમ્મા ઉપ્પજ્જિત્થ, નો ચ તેસં તત્થ અકુસલા ધમ્મા ઉપ્પજ્જિસ્સન્તિ. ઇતરેસં ચતુવોકારાનં પઞ્ચવોકારાનં તેસં તત્થ કુસલા ચ ધમ્મા ઉપ્પજ્જિત્થ અકુસલા ચ ધમ્મા ઉપ્પજ્જિસ્સન્તિ.

(ખ) યસ્સ વા પન યત્થ અકુસલા ધમ્મા ઉપ્પજ્જિસ્સન્તિ તસ્સ તત્થ કુસલા ધમ્મા ઉપ્પજ્જિત્થાતિ?

સુદ્ધાવાસાનં દુતિયે ચિત્તે વત્તમાને તેસં તત્થ અકુસલા ધમ્મા ઉપ્પજ્જિસ્સન્તિ, નો ચ તેસં તત્થ કુસલા ધમ્મા ઉપ્પજ્જિત્થ. ઇતરેસં ચતુવોકારાનં પઞ્ચવોકારાનં તેસં તત્થ અકુસલા ચ ધમ્મા ઉપ્પજ્જિસ્સન્તિ કુસલા ચ ધમ્મા ઉપ્પજ્જિત્થ.

(ક) યસ્સ યત્થ કુસલા ધમ્મા ઉપ્પજ્જિત્થ તસ્સ તત્થ અબ્યાકતા ધમ્મા ઉપ્પજ્જિસ્સન્તીતિ?

પચ્છિમચિત્તસમઙ્ગીનં તેસં તત્થ કુસલા ધમ્મા ઉપ્પજ્જિત્થ, નો ચ તેસં તત્થ અબ્યાકતા ધમ્મા ઉપ્પજ્જિસ્સન્તિ. ઇતરેસં ચતુવોકારાનં પઞ્ચવોકારાનં તેસં તત્થ કુસલા ચ ધમ્મા ઉપ્પજ્જિત્થ અબ્યાકતા ચ ધમ્મા ઉપ્પજ્જિસ્સન્તિ.

(ખ) યસ્સ વા પન યત્થ અબ્યાકતા ધમ્મા ઉપ્પજ્જિસ્સન્તિ તસ્સ તત્થ કુસલા ધમ્મા ઉપ્પજ્જિત્થાતિ?

સુદ્ધાવાસાનં દુતિયે ચિત્તે વત્તમાને અસઞ્ઞસત્તાનં તેસં તત્થ અબ્યાકતા ધમ્મા ઉપ્પજ્જિસ્સન્તિ, નો ચ તેસં તત્થ કુસલા ધમ્મા ઉપ્પજ્જિત્થ. ઇતરેસં ચતુવોકારાનં પઞ્ચવોકારાનં તેસં તત્થ અબ્યાકતા ચ ધમ્મા ઉપ્પજ્જિસ્સન્તિ કુસલા ચ ધમ્મા ઉપ્પજ્જિત્થ.

૯૩. (ક) યસ્સ યત્થ અકુસલા ધમ્મા ઉપ્પજ્જિત્થ તસ્સ તત્થ અબ્યાકતા ધમ્મા ઉપ્પજ્જિસ્સન્તીતિ?

પચ્છિમચિત્તસમઙ્ગીનં તેસં તત્થ અકુસલા ધમ્મા ઉપ્પજ્જિત્થ, નો ચ તેસં તત્થ અબ્યાકતા ધમ્મા ઉપ્પજ્જિસ્સન્તિ. ઇતરેસં ચતુવોકારાનં પઞ્ચવોકારાનં તેસં તત્થ અકુસલા ચ ધમ્મા ઉપ્પજ્જિત્થ અબ્યાકતા ચ ધમ્મા ઉપ્પજ્જિસ્સન્તિ.

(ખ) યસ્સ વા પન યત્થ અબ્યાકતા ધમ્મા ઉપ્પજ્જિસ્સન્તિ તસ્સ તત્થ અકુસલા ધમ્મા ઉપ્પજ્જિત્થાતિ?

સુદ્ધાવાસાનં દુતિયે ચિત્તે વત્તમાને અસઞ્ઞસત્તાનં તેસં તત્થ અબ્યાકતા ધમ્મા ઉપ્પજ્જિસ્સન્તિ, નો ચ તેસં તત્થ અકુસલા ધમ્મા ઉપ્પજ્જિત્થ. ઇતરેસં ચતુવોકારાનં પઞ્ચવોકારાનં તેસં તત્થ અબ્યાકતા ચ ધમ્મા ઉપ્પજ્જિસ્સન્તિ અકુસલા ચ ધમ્મા ઉપ્પજ્જિત્થ.

(ઘ) પચ્ચનીકપુગ્ગલો

૯૪. (ક) યસ્સ કુસલા ધમ્મા ન ઉપ્પજ્જિત્થ તસ્સ અકુસલા ધમ્મા ન ઉપ્પજ્જિસ્સન્તીતિ? નત્થિ.

(ખ) યસ્સ વા પન અકુસલા ધમ્મા ન ઉપ્પજ્જિસ્સન્તિ તસ્સ કુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

(ક) યસ્સ કુસલા ધમ્મા ન ઉપ્પજ્જિત્થ તસ્સ અબ્યાકતા ધમ્મા ન ઉપ્પજ્જિસ્સન્તીતિ? નત્થિ.

(ખ) યસ્સ વા પન અબ્યાકતા ધમ્મા ન ઉપ્પજ્જિસ્સન્તિ તસ્સ કુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

૯૫. (ક) યસ્સ અકુસલા ધમ્મા ન ઉપ્પજ્જિત્થ તસ્સ અબ્યાકતા ધમ્મા ન ઉપ્પજ્જિસ્સન્તીતિ? નત્થિ.

(ખ) યસ્સ વા પન અબ્યાકતા ધમ્મા ન ઉપ્પજ્જિસ્સન્તિ તસ્સ અકુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

(ઙ) પચ્ચનીકઓકાસો

૯૬. યત્થ કુસલા ધમ્મા ન ઉપ્પજ્જિત્થ તત્થ અકુસલા ધમ્મા ન ઉપ્પજ્જિસ્સન્તીતિ?…પે….

(ચ) પચ્ચનીકપુગ્ગલોકાસા

૯૭. (ક) યસ્સ યત્થ કુસલા ધમ્મા ન ઉપ્પજ્જિત્થ તસ્સ તત્થ અકુસલા ધમ્મા ન ઉપ્પજ્જિસ્સન્તીતિ?

સુદ્ધાવાસાનં દુતિયે ચિત્તે વત્તમાને તેસં તત્થ કુસલા ધમ્મા ન ઉપ્પજ્જિત્થ, નો ચ તેસં તત્થ અકુસલા ધમ્મા ન ઉપ્પજ્જિસ્સન્તિ. અસઞ્ઞસત્તાનં તેસં તત્થ કુસલા ચ ધમ્મા ન ઉપ્પજ્જિત્થ અકુસલા ચ ધમ્મા ન ઉપ્પજ્જિસ્સન્તિ.

(ખ) યસ્સ વા પન યત્થ અકુસલા ધમ્મા ન ઉપ્પજ્જિસ્સન્તિ તસ્સ તત્થ કુસલા ધમ્મા ન ઉપ્પજ્જિત્થાતિ?

અગ્ગમગ્ગસમઙ્ગીનં અરહન્તાનં યસ્સ ચિત્તસ્સ અનન્તરા અગ્ગમગ્ગં પટિલભિસ્સન્તિ તેસં તત્થ અકુસલા ધમ્મા ન ઉપ્પજ્જિસ્સન્તિ, નો ચ તેસં તત્થ કુસલા ધમ્મા ન ઉપ્પજ્જિત્થ. અસઞ્ઞસત્તાનં તેસં તત્થ અકુસલા ચ ધમ્મા ન ઉપ્પજ્જિસ્સન્તિ કુસલા ચ ધમ્મા ન ઉપ્પજ્જિત્થ.

(ક) યસ્સ યત્થ કુસલા ધમ્મા ન ઉપ્પજ્જિત્થ તસ્સ તત્થ અબ્યાકતા ધમ્મા ન ઉપ્પજ્જિસ્સન્તીતિ? ઉપ્પજ્જિસ્સન્તિ.

(ખ) યસ્સ વા પન યત્થ અબ્યાકતા ધમ્મા ન ઉપ્પજ્જિસ્સન્તિ તસ્સ તત્થ કુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

૯૮. (ક) યસ્સ યત્થ અકુસલા ધમ્મા ન ઉપ્પજ્જિત્થ તસ્સ તત્થ અબ્યાકતા ધમ્મા ન ઉપ્પજ્જિસ્સન્તીતિ? ઉપ્પજ્જિસ્સન્તિ.

(ખ) યસ્સ વા પન યત્થ અબ્યાકતા ધમ્મા ન ઉપ્પજ્જિસ્સન્તિ તસ્સ તત્થ અકુસલા ધમ્મા ન ઉપ્પજ્જિત્થાતિ? ઉપ્પજ્જિત્થ.

ઉપ્પાદવારો.