૧. પુગ્ગલવારો

(૧) ઉપ્પાદનિરોધકાલસમ્ભેદવારો

૬૩. (ક) યસ્સ ચિત્તં ઉપ્પજ્જતિ ન નિરુજ્ઝતિ તસ્સ ચિત્તં નિરુજ્ઝિસ્સતિ ન ઉપ્પજ્જિસ્સતીતિ?

પચ્છિમચિત્તસ્સ ઉપ્પાદક્ખણે તેસં ચિત્તં ઉપ્પજ્જતિ ન નિરુજ્ઝતિ, નિરુજ્ઝિસ્સતિ ન ઉપ્પજ્જિસ્સતિ. ઇતરેસં ચિત્તસ્સ ઉપ્પાદક્ખણે તેસં ચિત્તં ઉપ્પજ્જતિ ન નિરુજ્ઝતિ, નિરુજ્ઝિસ્સતિ ચેવ ઉપ્પજ્જિસ્સતિ ચ.

(ખ) યસ્સ વા પન ચિત્તં નિરુજ્ઝિસ્સતિ ન ઉપ્પજ્જિસ્સતિ તસ્સ ચિત્તં ઉપ્પજ્જતિ ન નિરુજ્ઝતીતિ? આમન્તા.

(ક) યસ્સ ચિત્તં ન ઉપ્પજ્જતિ નિરુજ્ઝતિ તસ્સ ચિત્તં ન નિરુજ્ઝિસ્સતિ ઉપ્પજ્જિસ્સતીતિ? નો.

(ખ) યસ્સ વા પન ચિત્તં ન નિરુજ્ઝિસ્સતિ ઉપ્પજ્જિસ્સતિ તસ્સ ચિત્તં ન ઉપ્પજ્જતિ નિરુજ્ઝતીતિ? નત્થિ.

(૨) ઉપ્પાદુપ્પન્નવારો

૬૪. (ક) યસ્સ ચિત્તં ઉપ્પજ્જતિ તસ્સ ચિત્તં ઉપ્પન્નન્તિ? આમન્તા.

(ખ) યસ્સ વા પન ચિત્તં ઉપ્પન્નં તસ્સ ચિત્તં ઉપ્પજ્જતીતિ?

ચિત્તસ્સ ભઙ્ગક્ખણે તેસં ચિત્તં ઉપ્પન્નં, નો ચ તેસં ચિત્તં ઉપ્પજ્જતિ. ચિત્તસ્સ ઉપ્પાદક્ખણે તેસં ચિત્તં ઉપ્પન્નઞ્ચેવ ઉપ્પજ્જતિ ચ.

(ક) યસ્સ ચિત્તં ન ઉપ્પજ્જતિ તસ્સ ચિત્તં ન ઉપ્પન્નન્તિ?

ચિત્તસ્સ ભઙ્ગક્ખણે તેસં ચિત્તં ન ઉપ્પજ્જતિ, નો ચ તેસં ચિત્તં ન ઉપ્પન્નં. નિરોધસમાપન્નાનં અસઞ્ઞસત્તાનં તેસં ચિત્તં ન ચેવ ઉપ્પજ્જતિ ન ચ ઉપ્પન્નં.

(ખ) યસ્સ વા પન ચિત્તં ન ઉપ્પન્નં તસ્સ ચિત્તં ન ઉપ્પજ્જતીતિ? આમન્તા.

(૩) નિરોધુપ્પન્નવારો

૬૫. (ક) યસ્સ ચિત્તં નિરુજ્ઝતિ તસ્સ ચિત્તં ઉપ્પન્નન્તિ? આમન્તા.

(ખ) યસ્સ વા પન ચિત્તં ઉપ્પન્નં તસ્સ ચિત્તં નિરુજ્ઝતીતિ?

ચિત્તસ્સ ઉપ્પાદક્ખણે તેસં ચિત્તં ઉપ્પન્નં, નો ચ તેસં ચિત્તં નિરુજ્ઝતિ. ચિત્તસ્સ ભઙ્ગક્ખણે તેસં ચિત્તં ઉપ્પન્નઞ્ચેવ નિરુજ્ઝતિ ચ.

(ક) યસ્સ ચિત્તં ન નિરુજ્ઝતિ તસ્સ ચિત્તં ન ઉપ્પન્નન્તિ?

ચિત્તસ્સ ઉપ્પાદક્ખણે તેસં ચિત્તં ન નિરુજ્ઝતિ, નો ચ તેસં ચિત્તં ન ઉપ્પન્નં. નિરોધસમાપન્નાનં અસઞ્ઞસત્તાનં તેસં ચિત્તં ન ચેવ નિરુજ્ઝતિ ન ચ ઉપ્પન્નં.

(ખ) યસ્સ વા પન ચિત્તં ન ઉપ્પન્નં તસ્સ ચિત્તં ન નિરુજ્ઝતીતિ? આમન્તા.

(૪) ઉપ્પાદવારો

૬૬. (ક) યસ્સ ચિત્તં ઉપ્પજ્જતિ તસ્સ ચિત્તં ઉપ્પજ્જિત્થાતિ? આમન્તા.

(ખ) યસ્સ વા પન ચિત્તં ઉપ્પજ્જિત્થ તસ્સ ચિત્તં ઉપ્પજ્જતીતિ?

ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં ચિત્તં ઉપ્પજ્જિત્થ, નો ચ તેસં ચિત્તં ઉપ્પજ્જતિ. ચિત્તસ્સ ઉપ્પાદક્ખણે તેસં ચિત્તં ઉપ્પજ્જિત્થ ચેવ ઉપ્પજ્જતિ ચ.

(ક) યસ્સ ચિત્તં ન ઉપ્પજ્જતિ તસ્સ ચિત્તં ન ઉપ્પજ્જિત્થાતિ? ઉપ્પજ્જિત્થ.

(ખ) યસ્સ વા પન ચિત્તં ન ઉપ્પજ્જિત્થ તસ્સ ચિત્તં ન ઉપ્પજ્જતીતિ? નત્થિ.

૬૭. (ક) યસ્સ ચિત્તં ઉપ્પજ્જતિ તસ્સ ચિત્તં ઉપ્પજ્જિસ્સતીતિ?

પચ્છિમચિત્તસ્સ ઉપ્પાદક્ખણે તેસં ચિત્તં ઉપ્પજ્જતિ, નો ચ તેસં ચિત્તં ઉપ્પજ્જિસ્સતિ. ઇતરેસં ચિત્તસ્સ ઉપ્પાદક્ખણે તેસં ચિત્તં ઉપ્પજ્જતિ ચેવ ઉપ્પજ્જિસ્સતિ ચ.

(ખ) યસ્સ વા પન ચિત્તં ઉપ્પજ્જિસ્સતિ તસ્સ ચિત્તં ઉપ્પજ્જતીતિ?

ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં ચિત્તં ઉપ્પજ્જિસ્સતિ, નો ચ તેસં ચિત્તં ઉપ્પજ્જતિ. ચિત્તસ્સ ઉપ્પાદક્ખણે તેસં ચિત્તં ઉપ્પજ્જિસ્સતિ ચેવ ઉપ્પજ્જતિ ચ.

(ક) યસ્સ ચિત્તં ન ઉપ્પજ્જતિ તસ્સ ચિત્તં ન ઉપ્પજ્જિસ્સતીતિ?

ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં ચિત્તં ન ઉપ્પજ્જતિ, નો ચ તેસં ચિત્તં ન ઉપ્પજ્જિસ્સતિ. પચ્છિમચિત્તસ્સ ભઙ્ગક્ખણે તેસં ચિત્તં ન ચેવ ઉપ્પજ્જતિ ન ચ ઉપ્પજ્જિસ્સતિ.

(ખ) યસ્સ વા પન ચિત્તં ન ઉપ્પજ્જિસ્સતિ તસ્સ ચિત્તં ન ઉપ્પજ્જતીતિ?

પચ્છિમચિત્તસ્સ ઉપ્પાદક્ખણે તેસં ચિત્તં ન ઉપ્પજ્જિસ્સતિ, નો ચ તેસં ચિત્તં ન ઉપ્પજ્જતિ. પચ્છિમચિત્તસ્સ ભઙ્ગક્ખણે તેસં ચિત્તં ન ચેવ ઉપ્પજ્જિસ્સતિ ન ચ ઉપ્પજ્જતિ.

૬૮. (ક) યસ્સ ચિત્તં ઉપ્પજ્જિત્થ તસ્સ ચિત્તં ઉપ્પજ્જિસ્સતીતિ?

પચ્છિમચિત્તસમઙ્ગીનં તેસં ચિત્તં ઉપ્પજ્જિત્થ, નો ચ તેસં ચિત્તં ઉપ્પજ્જિસ્સતિ. ઇતરેસં તેસં ચિત્તં ઉપ્પજ્જિત્થ ચેવ ઉપ્પજ્જિસ્સતિ ચ.

(ખ) યસ્સ વા પન ચિત્તં ઉપ્પજ્જિસ્સતિ તસ્સ ચિત્તં ઉપ્પજ્જિત્થાતિ? આમન્તા.

(ક) યસ્સ ચિત્તં ન ઉપ્પજ્જિત્થ તસ્સ ચિત્તં ન ઉપ્પજ્જિસ્સતીતિ? નત્થિ.

(ખ) યસ્સ વા પન ચિત્તં ન ઉપ્પજ્જિસ્સતિ તસ્સ ચિત્તં ન ઉપ્પજ્જિત્થાતિ? ઉપ્પજ્જિત્થ.

(૫) નિરોધવારો

૬૯. (ક) યસ્સ ચિત્તં નિરુજ્ઝતિ તસ્સ ચિત્તં નિરુજ્ઝિત્થાતિ? આમન્તા.

(ખ) યસ્સ વા પન ચિત્તં નિરુજ્ઝિત્થ તસ્સ ચિત્તં નિરુજ્ઝતીતિ?

ચિત્તસ્સ ઉપ્પાદક્ખણે નિરોધસમાપન્નાનં અસઞ્ઞસત્તાનં તેસં ચિત્તં નિરુજ્ઝિત્થ, નો ચ તેસં ચિત્તં નિરુજ્ઝતિ. ચિત્તસ્સ ભઙ્ગક્ખણે તેસં ચિત્તં નિરુજ્ઝિત્થ ચેવ નિરુજ્ઝતિ ચ.

(ક) યસ્સ ચિત્તં ન નિરુજ્ઝતિ તસ્સ ચિત્તં ન નિરુજ્ઝિત્થાતિ? નિરુજ્ઝિત્થ.

(ખ) યસ્સ વા પન ચિત્તં ન નિરુજ્ઝિત્થ તસ્સ ચિત્તં ન નિરુજ્ઝતીતિ? નત્થિ.

૭૦. (ક) યસ્સ ચિત્તં નિરુજ્ઝતિ તસ્સ ચિત્તં નિરુજ્ઝિસ્સતીતિ?

પચ્છિમચિત્તસ્સ ભઙ્ગક્ખણે તેસં ચિત્તં નિરુજ્ઝતિ, નો ચ તેસં ચિત્તં નિરુજ્ઝિસ્સતિ. ઇતરેસં ચિત્તસ્સ ભઙ્ગક્ખણે તેસં ચિત્તં નિરુજ્ઝતિ ચેવ નિરુજ્ઝિસ્સતિ ચ.

(ખ) યસ્સ વા પન ચિત્તં નિરુજ્ઝિસ્સતિ તસ્સ ચિત્તં નિરુજ્ઝતીતિ?

ચિત્તસ્સ ઉપ્પાદક્ખણે નિરોધસમાપન્નાનં અસઞ્ઞસત્તાનં તેસં ચિત્તં નિરુજ્ઝિસ્સતિ, નો ચ તેસં ચિત્તં નિરુજ્ઝતિ. ચિત્તસ્સ ભઙ્ગક્ખણે તેસં ચિત્તં નિરુજ્ઝિસ્સતિ ચેવ નિરુજ્ઝતિ ચ.

(ક) યસ્સ ચિત્તં ન નિરુજ્ઝતિ તસ્સ ચિત્તં ન નિરુજ્ઝિસ્સતીતિ? નિરુજ્ઝિસ્સતિ.

(ખ) યસ્સ વા પન ચિત્તં ન નિરુજ્ઝિસ્સતિ તસ્સ ચિત્તં ન નિરુજ્ઝતીતિ? નિરુજ્ઝતિ.

૭૧. (ક) યસ્સ ચિત્તં નિરુજ્ઝિત્થ તસ્સ ચિત્તં નિરુજ્ઝિસ્સતીતિ?

પચ્છિમચિત્તસ્સ ભઙ્ગક્ખણે તેસં ચિત્તં નિરુજ્ઝિત્થ, નો ચ તેસં ચિત્તં નિરુજ્ઝિસ્સતિ. ઇતરેસં તેસં ચિત્તં નિરુજ્ઝિત્થ ચેવ નિરુજ્ઝિસ્સતિ ચ.

(ખ) યસ્સ વા પન ચિત્તં નિરુજ્ઝિસ્સતિ તસ્સ ચિત્તં નિરુજ્ઝિત્થાતિ? આમન્તા.

(ક) યસ્સ ચિત્તં ન નિરુજ્ઝિત્થ તસ્સ ચિત્તં ન નિરુજ્ઝિસ્સતીતિ? નત્થિ.

(ખ) યસ્સ વા પન ચિત્તં ન નિરુજ્ઝિસ્સતિ તસ્સ ચિત્તં ન નિરુજ્ઝિત્થાતિ? નિરુજ્ઝિત્થ.

(૬) ઉપ્પાદનિરોધવારો

૭૨. (ક) યસ્સ ચિત્તં ઉપ્પજ્જતિ તસ્સ ચિત્તં નિરુજ્ઝિત્થાતિ? આમન્તા.

(ખ) યસ્સ વા પન ચિત્તં નિરુજ્ઝિત્થ તસ્સ ચિત્તં ઉપ્પજ્જતીતિ?

ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં ચિત્તં નિરુજ્ઝિત્થ, નો ચ તેસં ચિત્તં ઉપ્પજ્જતિ. ચિત્તસ્સ ઉપ્પાદક્ખણે તેસં ચિત્તં નિરુજ્ઝિત્થ ચેવ ઉપ્પજ્જતિ ચ.

(ક) યસ્સ ચિત્તં ન ઉપ્પજ્જતિ તસ્સ ચિત્તં ન નિરુજ્ઝિત્થાતિ? નિરુજ્ઝિત્થ.

(ખ) યસ્સ વા પન ચિત્તં ન નિરુજ્ઝિત્થ તસ્સ ચિત્તં ન ઉપ્પજ્જતીતિ? નત્થિ.

૭૩. (ક) યસ્સ ચિત્તં ઉપ્પજ્જતિ તસ્સ ચિત્તં નિરુજ્ઝિસ્સતીતિ? આમન્તા.

(ખ) યસ્સ વા પન ચિત્તં નિરુજ્ઝિસ્સતિ તસ્સ ચિત્તં ઉપ્પજ્જતીતિ?

ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં ચિત્તં નિરુજ્ઝિસ્સતિ, નો ચ તેસં ચિત્તં ઉપ્પજ્જતિ. ચિત્તસ્સ ઉપ્પાદક્ખણે તેસં ચિત્તં નિરુજ્ઝિસ્સતિ ચેવ ઉપ્પજ્જતિ ચ.

(ક) યસ્સ ચિત્તં ન ઉપ્પજ્જતિ તસ્સ ચિત્તં ન નિરુજ્ઝિસ્સતીતિ?

ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં ચિત્તં ન ઉપ્પજ્જતિ, નો ચ તેસં ચિત્તં ન નિરુજ્ઝિસ્સતિ. પચ્છિમચિત્તસ્સ ભઙ્ગક્ખણે તેસં ચિત્તં ન ચેવ ઉપ્પજ્જતિ ન ચ નિરુજ્ઝિસ્સતિ.

(ખ) યસ્સ વા પન ચિત્તં ન નિરુજ્ઝિસ્સતિ તસ્સ ચિત્તં ન ઉપ્પજ્જતીતિ? આમન્તા.

૭૪. (ક) યસ્સ ચિત્તં ઉપ્પજ્જિત્થ તસ્સ ચિત્તં નિરુજ્ઝિસ્સતીતિ?

પચ્છિમચિત્તસ્સ ભઙ્ગક્ખણે તેસં ચિત્તં ઉપ્પજ્જિત્થ, નો ચ તેસં ચિત્તં નિરુજ્ઝિસ્સતિ. ઇતરેસં તેસં ચિત્તં ઉપ્પજ્જિત્થ ચેવ નિરુજ્ઝિસ્સતિ ચ.

(ખ) યસ્સ વા પન ચિત્તં નિરુજ્ઝિસ્સતિ તસ્સ ચિત્તં ઉપ્પજ્જિત્થાતિ? આમન્તા.

(ક) યસ્સ ચિત્તં ન ઉપ્પજ્જિત્થ તસ્સ ચિત્તં ન નિરુજ્ઝિસ્સતીતિ? નત્થિ.

(ખ) યસ્સ વા પન ચિત્તં ન નિરુજ્ઝિસ્સતિ તસ્સ ચિત્તં ન ઉપ્પજ્જિત્થાતિ? ઉપ્પજ્જિત્થ.

(૭) ઉપ્પજ્જમાનનનિરોધવારો

૭૫. (ક) યસ્સ ચિત્તં ઉપ્પજ્જતિ તસ્સ ચિત્તં ન નિરુજ્ઝતીતિ? આમન્તા.

(ખ) યસ્સ વા પન ચિત્તં ન નિરુજ્ઝતિ તસ્સ ચિત્તં ઉપ્પજ્જતીતિ?

નિરોધસમાપન્નાનં અસઞ્ઞસત્તાનં તેસં ચિત્તં ન નિરુજ્ઝતિ, નો ચ તેસં ચિત્તં ઉપ્પજ્જતિ. ચિત્તસ્સ ઉપ્પાદક્ખણે તેસં ચિત્તં ન નિરુજ્ઝતિ ચેવ ઉપ્પજ્જતિ ચ.

(ક) યસ્સ ચિત્તં ન ઉપ્પજ્જતિ તસ્સ ચિત્તં નિરુજ્ઝતીતિ?

નિરોધસમાપન્નાનં અસઞ્ઞસત્તાનં તેસં ચિત્તં ન ઉપ્પજ્જતિ, નો ચ તેસં ચિત્તં નિરુજ્ઝતિ. ચિત્તસ્સ ભઙ્ગક્ખણે તેસં ચિત્તં ન ઉપ્પજ્જતિ ચેવ નિરુજ્ઝતિ ચ.

(ખ) યસ્સ વા પન ચિત્તં નિરુજ્ઝતિ તસ્સ ચિત્તં ન ઉપ્પજ્જતીતિ? આમન્તા.

(૮) ઉપ્પજ્જમાનુપ્પન્નવારો

૭૬. (ક) યસ્સ ચિત્તં ઉપ્પજ્જમાનં તસ્સ ચિત્તં ઉપ્પન્નન્તિ? આમન્તા.

(ખ) યસ્સ વા પન ચિત્તં ઉપ્પન્નં તસ્સ ચિત્તં ઉપ્પજ્જમાનન્તિ?

ચિત્તસ્સ ભઙ્ગક્ખણે તેસં ચિત્તં ઉપ્પન્નં, નો ચ તેસં ચિત્તં ઉપ્પજ્જમાનં. ચિત્તસ્સ ઉપ્પાદક્ખણે તેસં ચિત્તં ઉપ્પન્નઞ્ચેવ ઉપ્પજ્જમાનઞ્ચ.

(ક) યસ્સ ચિત્તં ન ઉપ્પજ્જમાનં તસ્સ ચિત્તં ન ઉપ્પન્નન્તિ?

ચિત્તસ્સ ભઙ્ગક્ખણે તેસં ચિત્તં ન ઉપ્પજ્જમાનં, નો ચ તેસં ચિત્તં ન ઉપ્પન્નં. નિરોધસમાપન્નાનં અસઞ્ઞસત્તાનં તેસં ચિત્તં ન ચેવ ઉપ્પજ્જમાનં ન ચ ઉપ્પન્નં.

(ખ) યસ્સ વા પન ચિત્તં ન ઉપ્પન્નં તસ્સ ચિત્તં ન ઉપ્પજ્જમાનન્તિ? આમન્તા.

(૯) નિરુજ્ઝમાનુપ્પન્નવારો

૭૭. (ક) યસ્સ ચિત્તં નિરુજ્ઝમાનં તસ્સ ચિત્તં ઉપ્પન્નન્તિ? આમન્તા.

(ખ) યસ્સ વા પન ચિત્તં ઉપ્પન્નં તસ્સ ચિત્તં નિરુજ્ઝમાનન્તિ?

ચિત્તસ્સ ઉપ્પાદક્ખણે તેસં ચિત્તં ઉપ્પન્નં, નો ચ તેસં ચિત્તં નિરુજ્ઝમાનં. ચિત્તસ્સ ભઙ્ગક્ખણે તેસં ચિત્તં ઉપ્પન્નઞ્ચેવ નિરુજ્ઝમાનઞ્ચ.

(ક) યસ્સ ચિત્તં ન નિરુજ્ઝમાનં તસ્સ ચિત્તં ન ઉપ્પન્નન્તિ?

ચિત્તસ્સ ઉપ્પાદક્ખણે તેસં ચિત્તં ન નિરુજ્ઝમાનં, નો ચ તેસં ચિત્તં ન ઉપ્પન્નં. નિરોધસમાપન્નાનં અસઞ્ઞસત્તાનં તેસં ચિત્તં ન ચેવ નિરુજ્ઝમાનં ન ચ ઉપ્પન્નં.

(ખ) યસ્સ વા પન ચિત્તં ન ઉપ્પન્નં તસ્સ ચિત્તં ન નિરુજ્ઝમાનન્તિ? આમન્તા.

(૧૦) ઉપ્પન્નુપ્પાદવારો

૭૮. (ક) યસ્સ ચિત્તં ઉપ્પન્નં તસ્સ ચિત્તં ઉપ્પજ્જિત્થાતિ? આમન્તા.

(ખ) યસ્સ વા પન ચિત્તં ઉપ્પજ્જિત્થ તસ્સ ચિત્તં ઉપ્પન્નન્તિ?

નિરોધસમાપન્નાનં અસઞ્ઞસત્તાનં તેસં ચિત્તં ઉપ્પજ્જિત્થ, નો ચ તેસં ચિત્તં ઉપ્પન્નં. ચિત્તસમઙ્ગીનં તેસં ચિત્તં ઉપ્પજ્જિત્થ ચેવ ઉપ્પન્નઞ્ચ.

(ક) યસ્સ ચિત્તં ન ઉપ્પન્નં તસ્સ ચિત્તં ન ઉપ્પજ્જિત્થાતિ? ઉપ્પજ્જિત્થ.

(ખ) યસ્સ વા પન ચિત્તં ન ઉપ્પજ્જિત્થ તસ્સ ચિત્તં ન ઉપ્પન્નન્તિ? નત્થિ.

૭૯. (ક) યસ્સ ચિત્તં ઉપ્પન્નં તસ્સ ચિત્તં ઉપ્પજ્જિસ્સતીતિ?

પચ્છિમચિત્તસમઙ્ગીનં તેસં ચિત્તં ઉપ્પન્નં, નો ચ તેસં ચિત્તં ઉપ્પજ્જિસ્સતિ. ઇતરેસં ચિત્તસમઙ્ગીનં તેસં ચિત્તં ઉપ્પન્નઞ્ચેવ ઉપ્પજ્જિસ્સતિ ચ.

(ખ) યસ્સ વા પન ચિત્તં ઉપ્પજ્જિસ્સતિ તસ્સ ચિત્તં ઉપ્પન્નન્તિ?

નિરોધસમાપન્નાનં અસઞ્ઞસત્તાનં તેસં ચિત્તં ઉપ્પજ્જિસ્સતિ, નો ચ તેસં ચિત્તં ઉપ્પન્નં. ચિત્તસમઙ્ગીનં તેસં ચિત્તં ઉપ્પજ્જિસ્સતિ ચેવ ઉપ્પન્નઞ્ચ.

(ક) યસ્સ ચિત્તં ન ઉપ્પન્નં તસ્સ ચિત્તં ન ઉપ્પજ્જિસ્સતીતિ? ઉપ્પજ્જિસ્સતિ.

(ખ) યસ્સ વા પન ચિત્તં ન ઉપ્પજ્જિસ્સતિ તસ્સ ચિત્તં ન ઉપ્પન્નન્તિ? ઉપ્પન્નં.

(૧૧) અતીતાનાગતવારો

૮૦. (ક) યસ્સ ચિત્તં ઉપ્પજ્જિત્થ નો ચ તસ્સ ચિત્તં ઉપ્પન્નં, તસ્સ ચિત્તં ઉપ્પજ્જિસ્સતીતિ? આમન્તા.

(ખ) યસ્સ વા પન ચિત્તં ઉપ્પજ્જિસ્સતિ નો ચ તસ્સ ચિત્તં ઉપ્પન્નં, તસ્સ ચિત્તં ઉપ્પજ્જિત્થાતિ? આમન્તા.

(ક) યસ્સ ચિત્તં ન ઉપ્પજ્જિત્થ નો ચ તસ્સ ચિત્તં ન ઉપ્પન્નં, તસ્સ ચિત્તં ન ઉપ્પજ્જિસ્સતીતિ? નત્થિ.

(ખ) યસ્સ વા પન ચિત્તં ન ઉપ્પજ્જિસ્સતિ નો ચ તસ્સ ચિત્તં ન ઉપ્પન્નં, તસ્સ ચિત્તં ન ઉપ્પજ્જિત્થાતિ? ઉપ્પજ્જિત્થ.

(૧૨) ઉપ્પન્નુપ્પજ્જમાનવારો

૮૧. (ક) ઉપ્પન્નં ઉપ્પજ્જમાનન્તિ?

ભઙ્ગક્ખણે ઉપ્પન્નં, નો ચ ઉપ્પજ્જમાનં. ઉપ્પાદક્ખણે ઉપ્પન્નઞ્ચેવ ઉપ્પજ્જમાનઞ્ચ.

(ખ) ઉપ્પજ્જમાનં ઉપ્પન્નન્તિ? આમન્તા.

(ક) ન ઉપ્પન્નં ન ઉપ્પજ્જમાનન્તિ? આમન્તા.

(ખ) ન ઉપ્પજ્જમાનં ન ઉપ્પન્નન્તિ?

ભઙ્ગક્ખણે ન ઉપ્પજ્જમાનં, નો ચ ન ઉપ્પન્નં. અતીતાનાગતં ચિત્તં ન ચેવ ઉપ્પજ્જમાનં ન ચ ઉપ્પન્નં.

(૧૩) નિરુદ્ધનિરુજ્ઝમાનવારો

૮૨. (ક) નિરુદ્ધં નિરુજ્ઝમાનન્તિ? નો.

(ખ) નિરુજ્ઝમાનં નિરુદ્ધન્તિ? નો.

(ક) ન નિરુદ્ધં ન નિરુજ્ઝમાનન્તિ?

ભઙ્ગક્ખણે ન નિરુદ્ધં, નો ચ ન નિરુજ્ઝમાનં. ઉપ્પાદક્ખણે અનાગતઞ્ચ ચિત્તં ન ચેવ નિરુદ્ધં ન ચ નિરુજ્ઝમાનં.

(ખ) ન નિરુજ્ઝમાનં ન નિરુદ્ધન્તિ?

અતીતં ચિત્તં ન નિરુજ્ઝમાનં, નો ચ ન નિરુદ્ધં. ઉપ્પાદક્ખણે અનાગતઞ્ચ ચિત્તં ન ચેવ નિરુજ્ઝમાનં ન ચ નિરુદ્ધં.

(૧૪) અતિક્કન્તકાલવારો

૮૩. (ક) યસ્સ ચિત્તં ઉપ્પજ્જમાનં ખણં ખણં વીતિક્કન્તં અતિક્કન્તકાલં, નિરુજ્ઝમાનં ખણં ખણં વીતિક્કન્તં અતિક્કન્તકાલં તસ્સ ચિત્તન્તિ?

ભઙ્ગક્ખણે ચિત્તં ઉપ્પાદક્ખણં વીતક્કન્તં ભઙ્ગક્ખણં અવીતિક્કન્તં, અતીતં ચિત્તં ઉપ્પાદક્ખણઞ્ચ વીતિક્કન્તં ભઙ્ગક્ખણઞ્ચ વીતિક્કન્તં.

(ખ) યસ્સ વા પન ચિત્તં નિરુજ્ઝમાનં ખણં ખણં વીતિક્કન્તં અતિક્કન્તકાલં, ઉપ્પજ્જમાનં ખણં ખણં વીતિક્કન્તં અતિક્કન્તકાલં તસ્સ ચિત્તન્તિ?

અતીતં ચિત્તં.

(ક) યસ્સ ચિત્તં ન ઉપ્પજ્જમાનં ખણં ખણં વીતિક્કન્તં અતિક્કન્તકાલં, ન નિરુજ્ઝમાનં ખણં ખણં વીતિક્કન્તં અતિક્કન્તકાલં તસ્સ ચિત્તન્તિ?

ઉપ્પાદક્ખણે અનાગતં ચિત્તં.

(ખ) યસ્સ વા પન ચિત્તં ન નિરુજ્ઝમાનં ખણં ખણં વીતિક્કન્તં અતિક્કન્તકાલં, ન ઉપ્પજ્જમાનં ખણં ખણં વીતિક્કન્તં અતિક્કન્તકાલં તસ્સ ચિત્તન્તિ?

ભઙ્ગક્ખણે ચિત્તં ભઙ્ગક્ખણં અવીતિક્કન્તં નો ચ ઉપ્પાદક્ખણં અવીતિક્કન્તં, ઉપ્પાદક્ખણે અનાગતઞ્ચ ચિત્તં ભઙ્ગક્ખણઞ્ચ અવીતિક્કન્તં ઉપ્પાદક્ખણઞ્ચ અવીતિક્કન્તં.