(ખ) અનુલોમઓકાસો

૧૧૦. યત્થ કાયસઙ્ખારો નિરુજ્ઝતિ…પે….

(ગ) અનુલોમપુગ્ગલોકાસા

૧૧૧. (ક) યસ્સ યત્થ કાયસઙ્ખારો નિરુજ્ઝતિ તસ્સ તત્થ વચીસઙ્ખારો નિરુજ્ઝિસ્સતીતિ?

દુતિયજ્ઝાનં તતિયજ્ઝાનં સમાપન્નાનં અસ્સાસપસ્સાસાનં ભઙ્ગક્ખણે તેસં તત્થ કાયસઙ્ખારો નિરુજ્ઝતિ, નો ચ તેસં તત્થ વચીસઙ્ખારો નિરુજ્ઝિસ્સતિ. પઠમજ્ઝાનં સમાપન્નાનં કામાવચરાનં અસ્સાસપસ્સાસાનં ભઙ્ગક્ખણે તેસં તત્થ કાયસઙ્ખારો ચ નિરુજ્ઝતિ વચીસઙ્ખારો ચ નિરુજ્ઝિસ્સતિ.

(ખ) યસ્સ વા પન યત્થ વચીસઙ્ખારો નિરુજ્ઝિસ્સતિ તસ્સ તત્થ કાયસઙ્ખારો નિરુજ્ઝતીતિ?

પઠમજ્ઝાનં સમાપન્નાનં કામાવચરાનં અસ્સાસપસ્સાસાનં ઉપ્પાદક્ખણે તેસંયેવ વિના અસ્સાસપસ્સાસેહિ ચિત્તસ્સ ભઙ્ગક્ખણે રૂપાવચરાનં અરૂપાવચરાનં તેસં તત્થ વચીસઙ્ખારો નિરુજ્ઝિસ્સતિ, નો ચ તેસં તત્થ કાયસઙ્ખારો નિરુજ્ઝતિ. પઠમજ્ઝાનં સમાપન્નાનં કામાવચરાનં અસ્સાસપસ્સાસાનં ભઙ્ગક્ખણે તેસં તત્થ વચીસઙ્ખારો ચ નિરુજ્ઝિસ્સતિ કાયસઙ્ખારો ચ નિરુજ્ઝતિ.

(ક) યસ્સ યત્થ કાયસઙ્ખારો નિરુજ્ઝતિ તસ્સ તત્થ ચિત્તસઙ્ખારો નિરુજ્ઝિસ્સતીતિ? આમન્તા.

(ખ) યસ્સ વા પન યત્થ ચિત્તસઙ્ખારો નિરુજ્ઝિસ્સતિ તસ્સ તત્થ કાયસઙ્ખારો નિરુજ્ઝતીતિ?

સબ્બેસં ચિત્તસ્સ ઉપ્પાદક્ખણે વિના અસ્સાસપસ્સાસેહિ ચિત્તસ્સ ભઙ્ગક્ખણે તેસં તત્થ ચિત્તસઙ્ખારો નિરુજ્ઝિસ્સતિ, નો ચ તેસં તત્થ કાયસઙ્ખારો નિરુજ્ઝતિ. અસ્સાસપસ્સાસાનં ભઙ્ગક્ખણે તેસં તત્થ ચિત્તસઙ્ખારો ચ નિરુજ્ઝિસ્સતિ કાયસઙ્ખારો ચ નિરુજ્ઝતિ.

૧૧૨. (ક) યસ્સ યત્થ વચીસઙ્ખારો નિરુજ્ઝતિ તસ્સ તત્થ ચિત્તસઙ્ખારો નિરુજ્ઝિસ્સતીતિ?

સવિતક્કસવિચારપચ્છિમચિત્તસ્સ ભઙ્ગક્ખણે તેસં તત્થ વચીસઙ્ખારો નિરુજ્ઝતિ, નો ચ તેસં તત્થ ચિત્તસઙ્ખારો નિરુજ્ઝિસ્સતિ. ઇતરેસં વિતક્કવિચારાનં ભઙ્ગક્ખણે તેસં તત્થ વચીસઙ્ખારો ચ નિરુજ્ઝતિ ચિત્તસઙ્ખારો ચ નિરુજ્ઝિસ્સતિ.

(ખ) યસ્સ વા પન યત્થ ચિત્તસઙ્ખારો નિરુજ્ઝિસ્સતિ તસ્સ તત્થ વચીસઙ્ખારો નિરુજ્ઝતીતિ?

સબ્બેસં ચિત્તસ્સ ઉપ્પાદક્ખણે વિના વિતક્કવિચારેહિ ચિત્તસ્સ ભઙ્ગક્ખણે તેસં તત્થ ચિત્તસઙ્ખારો નિરુજ્ઝિસ્સતિ, નો ચ તેસં તત્થ વચીસઙ્ખારો નિરુજ્ઝતિ. વિતક્કવિચારાનં ભઙ્ગક્ખણે તેસં તત્થ ચિત્તસઙ્ખારો ચ નિરુજ્ઝિસ્સતિ વચીસઙ્ખારો ચ નિરુજ્ઝતિ.

(ઘ) પચ્ચનીકપુગ્ગલો

૧૧૩. (ક) યસ્સ કાયસઙ્ખારો ન નિરુજ્ઝતિ તસ્સ વચીસઙ્ખારો ન નિરુજ્ઝિસ્સતીતિ?

સબ્બેસં ચિત્તસ્સ ઉપ્પાદક્ખણે વિના અસ્સાસપસ્સાસેહિ ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં કાયસઙ્ખારો ન નિરુજ્ઝતિ, નો ચ તેસં વચીસઙ્ખારો ન નિરુજ્ઝિસ્સતિ. સવિતક્કસવિચારપચ્છિમચિત્તસ્સ ભઙ્ગક્ખણે અવિતક્કઅવિચારપચ્છિમચિત્તસમઙ્ગીનં યસ્સ ચિત્તસ્સ અનન્તરા અવિતક્કઅવિચારં પચ્છિમચિત્તં ઉપ્પજ્જિસ્સતિ તેસં કાયસઙ્ખારો ચ ન નિરુજ્ઝતિ વચીસઙ્ખારો ચ ન નિરુજ્ઝિસ્સતિ.

(ખ) યસ્સ વા પન વચીસઙ્ખારો ન નિરુજ્ઝિસ્સતિ તસ્સ કાયસઙ્ખારો ન નિરુજ્ઝતીતિ? આમન્તા.

(ક) યસ્સ કાયસઙ્ખારો ન નિરુજ્ઝતિ તસ્સ ચિત્તસઙ્ખારો ન નિરુજ્ઝિસ્સતીતિ?

સબ્બેસં ચિત્તસ્સ ઉપ્પાદક્ખણે વિના અસ્સાસપસ્સાસેહિ ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં કાયસઙ્ખારો ન નિરુજ્ઝતિ, નો ચ તેસં ચિત્તસઙ્ખારો ન નિરુજ્ઝિસ્સતિ. પચ્છિમચિત્તસ્સ ભઙ્ગક્ખણે તેસં કાયસઙ્ખારો ચ ન નિરુજ્ઝતિ ચિત્તસઙ્ખારો ચ ન નિરુજ્ઝિસ્સતિ.

(ખ) યસ્સ વા પન…પે…? આમન્તા.

૧૧૪. (ક) યસ્સ વચીસઙ્ખારો ન નિરુજ્ઝતિ તસ્સ ચિત્તસઙ્ખારો ન નિરુજ્ઝિસ્સતીતિ?

સબ્બેસં ચિત્તસ્સ ઉપ્પાદક્ખણે વિના વિતક્કવિચારેહિ ચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં વચીસઙ્ખારો ન નિરુજ્ઝતિ, નો ચ તેસં ચિત્તસઙ્ખારો ન નિરુજ્ઝિસ્સતિ. અવિતક્કઅવિચારપચ્છિમચિત્તસ્સ ભઙ્ગક્ખણે તેસં વચીસઙ્ખારો ચ ન નિરુજ્ઝતિ ચિત્તસઙ્ખારો ચ ન નિરુજ્ઝિસ્સતિ.

(ખ) યસ્સ વા પન ચિત્તસઙ્ખારો ન નિરુજ્ઝિસ્સતિ તસ્સ વચીસઙ્ખારો ન નિરુજ્ઝતીતિ?

સવિતક્કસવિચારપચ્છિમચિત્તસ્સ ભઙ્ગક્ખણે તેસં ચિત્તસઙ્ખારો ન નિરુજ્ઝિસ્સતિ, નો ચ તેસં વચીસઙ્ખારો ન નિરુજ્ઝતિ. અવિતક્કઅવિચારપચ્છિમચિત્તસ્સ ભઙ્ગક્ખણે તેસં ચિત્તસઙ્ખારો ચ ન નિરુજ્ઝિસ્સતિ વચીસઙ્ખારો ચ ન નિરુજ્ઝતિ.

(ઙ) પચ્ચનીકઓકાસો

૧૧૫. યત્થ કાયસઙ્ખારો ન નિરુજ્ઝતિ…પે….

(ચ) પચ્ચનીકપુગ્ગલોકાસા

૧૧૬. (ક) યસ્સ યત્થ કાયસઙ્ખારો ન નિરુજ્ઝતિ તસ્સ તત્થ વચીસઙ્ખારો ન નિરુજ્ઝિસ્સતીતિ?

પઠમજ્ઝાનં સમાપન્નાનં કામાવચરાનં અસ્સાસપસ્સાસાનં ઉપ્પાદક્ખણે તેસંયેવ વિના અસ્સાસપસ્સાસેહિ ચિત્તસ્સ ભઙ્ગક્ખણે રૂપાવચરાનં અરૂપાવચરાનં તેસં તત્થ કાયસઙ્ખારો ન નિરુજ્ઝતિ, નો ચ તેસં તત્થ વચીસઙ્ખારો ન નિરુજ્ઝિસ્સતિ. સવિતક્કસવિચારપચ્છિમચિત્તસ્સ ભઙ્ગક્ખણે અવિતક્કઅવિચારપચ્છિમચિત્તસમઙ્ગીનં યસ્સ ચિત્તસ્સ અનન્તરા અવિતક્કઅવિચારં પચ્છિમચિત્તં ઉપ્પજ્જિસ્સતિ દુતિયજ્ઝાનં તતિયજ્ઝાનં સમાપન્નાનં અસ્સાસપસ્સાસાનં ઉપ્પાદક્ખણે તેસંયેવ વિના અસ્સાસપસ્સાસેહિ ચિત્તસ્સ ભઙ્ગક્ખણે ચતુત્થજ્ઝાનં સમાપન્નાનં અસઞ્ઞસત્તાનં તેસં તત્થ કાયસઙ્ખારો ચ ન નિરુજ્ઝતિ વચીસઙ્ખારો ચ ન નિરુજ્ઝિસ્સતિ.

(ખ) યસ્સ વા પન યત્થ વચીસઙ્ખારો ન નિરુજ્ઝિસ્સતિ તસ્સ તત્થ કાયસઙ્ખારો ન નિરુજ્ઝતીતિ?

દુતિયજ્ઝાનં તતિયજ્ઝાનં સમાપન્નાનં અસ્સાસપસ્સાસાનં ભઙ્ગક્ખણે તેસં તત્થ વચીસઙ્ખારો ન નિરુજ્ઝિસ્સતિ, નો ચ તેસં તત્થ કાયસઙ્ખારો ન નિરુજ્ઝતિ. સવિતક્કસવિચારપચ્છિમચિત્તસ્સ ભઙ્ગક્ખણે અવિતક્કઅવિચારપચ્છિમચિત્તસમઙ્ગીનં યસ્સ ચિત્તસ્સ અનન્તરા અવિતક્કઅવિચારં પચ્છિમચિત્તં ઉપ્પજ્જિસ્સતિ દુતિયજ્ઝાનં તતિયજ્ઝાનં સમાપન્નાનં અસ્સાસપસ્સાસાનં ઉપ્પાદક્ખણે તેસંયેવ વિના અસ્સાસપસ્સાસેહિ ચિત્તસ્સ ભઙ્ગક્ખણે ચતુત્થજ્ઝાનં સમાપન્નાનં અસઞ્ઞસત્તાનં તેસં તત્થ વચીસઙ્ખારો ચ ન નિરુજ્ઝિસ્સતિ કાયસઙ્ખારો ચ ન નિરુજ્ઝતિ.

(ક) યસ્સ યત્થ કાયસઙ્ખારો ન નિરુજ્ઝતિ તસ્સ તત્થ ચિત્તસઙ્ખારો ન નિરુજ્ઝિસ્સતીતિ?

સબ્બેસં ચિત્તસ્સ ઉપ્પાદક્ખણે વિના અસ્સાસપસ્સાસેહિ ચિત્તસ્સ ભઙ્ગક્ખણે તેસં તત્થ કાયસઙ્ખારો ન નિરુજ્ઝતિ, નો ચ તેસં તત્થ ચિત્તસઙ્ખારો ન નિરુજ્ઝિસ્સતિ. પચ્છિમચિત્તસ્સ ભઙ્ગક્ખણે અસઞ્ઞસત્તાનં તેસં તત્થ કાયસઙ્ખારો ચ ન નિરુજ્ઝતિ ચિત્તસઙ્ખારો ચ ન નિરુજ્ઝિસ્સતિ.

(ખ) યસ્સ વા પન…પે…? આમન્તા.

૧૧૭. (ક) યસ્સ યત્થ વચીસઙ્ખારો ન નિરુજ્ઝતિ તસ્સ તત્થ ચિત્તસઙ્ખારો ન નિરુજ્ઝિસ્સતીતિ?

સબ્બેસં ચિત્તસ્સ ઉપ્પાદક્ખણે વિના વિતક્કવિચારેહિ ચિત્તસ્સ ભઙ્ગક્ખણે તેસં તત્થ વચીસઙ્ખારો ન નિરુજ્ઝતિ, નો ચ તેસં તત્થ ચિત્તસઙ્ખારો ન નિરુજ્ઝિસ્સતિ. અવિતક્કઅવિચારપચ્છિમચિત્તસ્સ ભઙ્ગક્ખણે અસઞ્ઞસત્તાનં તેસં તત્થ વચીસઙ્ખારો ચ ન નિરુજ્ઝતિ ચિત્તસઙ્ખારો ચ ન નિરુજ્ઝિસ્સતિ.

(ખ) યસ્સ વા પન યત્થ ચિત્તસઙ્ખારો ન નિરુજ્ઝિસ્સતિ તસ્સ તત્થ વચીસઙ્ખારો ન નિરુજ્ઝતીતિ?

સવિતક્કસવિચારપચ્છિમચિત્તસ્સ ભઙ્ગક્ખણે તેસં તત્થ ચિત્તસઙ્ખારો ન નિરુજ્ઝિસ્સતિ, નો ચ તેસં તત્થ વચીસઙ્ખારો ન નિરુજ્ઝતિ. અવિતક્કઅવિચારપચ્છિમચિત્તસ્સ ભઙ્ગક્ખણે અસઞ્ઞસત્તાનં તેસં તત્થ ચિત્તસઙ્ખારો ચ ન નિરુજ્ઝિસ્સતિ વચીસઙ્ખારો ચ ન નિરુજ્ઝતિ.