(૧) પચ્ચુપ્પન્નવારો

(ક) અનુલોમપુગ્ગલો

૭૯. (ક) યસ્સ કાયસઙ્ખારો નિરુજ્ઝતિ તસ્સ વચીસઙ્ખારો નિરુજ્ઝતીતિ?

વિના વિતક્કવિચારેહિ અસ્સાસપસ્સાસાનં ભઙ્ગક્ખણે તેસં કાયસઙ્ખારો નિરુજ્ઝતિ, નો ચ તેસં વચીસઙ્ખારો નિરુજ્ઝતિ. પઠમજ્ઝાનં સમાપન્નાનં કામાવચરાનં અસ્સાસપસ્સાસાનં ભઙ્ગક્ખણે તેસં કાયસઙ્ખારો ચ નિરુજ્ઝતિ વચીસઙ્ખારો ચ નિરુજ્ઝતિ.

(ખ) યસ્સ વા પન વચીસઙ્ખારો નિરુજ્ઝતિ તસ્સ કાયસઙ્ખારો નિરુજ્ઝતીતિ?

વિના અસ્સાસપસ્સાસેહિ વિતક્કવિચારાનં ભઙ્ગક્ખણે તેસં વચીસઙ્ખારો નિરુજ્ઝતિ, નો ચ તેસં કાયસઙ્ખારો નિરુજ્ઝતિ. પઠમજ્ઝાનં સમાપન્નાનં કામાવચરાનં અસ્સાસપસ્સાસાનં ભઙ્ગક્ખણે તેસં વચીસઙ્ખારો ચ નિરુજ્ઝતિ કાયસઙ્ખારો ચ નિરુજ્ઝતિ.

(ક) યસ્સ કાયસઙ્ખારો નિરુજ્ઝતિ તસ્સ ચિત્તસઙ્ખારો નિરુજ્ઝતીતિ? આમન્તા.

(ખ) યસ્સ વા પન ચિત્તસઙ્ખારો નિરુજ્ઝતિ તસ્સ કાયસઙ્ખારો નિરુજ્ઝતીતિ?

વિના અસ્સાસપસ્સાસેહિ ચિત્તસ્સ ભઙ્ગક્ખણે તેસં ચિત્તસઙ્ખારો નિરુજ્ઝતિ, નો ચ તેસં કાયસઙ્ખારો નિરુજ્ઝતિ. અસ્સાસપસ્સાસાનં ભઙ્ગક્ખણે તેસં ચિત્તસઙ્ખારો ચ નિરુજ્ઝતિ કાયસઙ્ખારો ચ નિરુજ્ઝતિ.

૮૦. (ક) યસ્સ વચીસઙ્ખારો નિરુજ્ઝતિ તસ્સ ચિત્તસઙ્ખારો નિરુજ્ઝતીતિ? આમન્તા.

(ખ) યસ્સ વા પન ચિત્તસઙ્ખારો નિરુજ્ઝતિ તસ્સ વચીસઙ્ખારો નિરુજ્ઝતીતિ?

વિના વિતક્કવિચારેહિ ચિત્તસ્સ ભઙ્ગક્ખણે તેસં ચિત્તસઙ્ખારો નિરુજ્ઝતિ, નો ચ તેસં વચીસઙ્ખારો નિરુજ્ઝતિ. વિતક્કવિચારાનં ભઙ્ગક્ખણે તેસં ચિત્તસઙ્ખારો ચ નિરુજ્ઝતિ વચીસઙ્ખારો ચ નિરુજ્ઝતિ.

(ખ) અનુલોમઓકાસો

૮૧. યત્થ કાયસઙ્ખારો નિરુજ્ઝતિ તત્થ વચીસઙ્ખારો નિરુજ્ઝતીતિ?…પે….

(ગ) અનુલોમપુગ્ગલોકાસા

૮૨. યસ્સ યત્થ કાયસઙ્ખારો નિરુજ્ઝતિ તસ્સ તત્થ વચીસઙ્ખારો નિરુજ્ઝતીતિ?…પે…. (યસ્સકમ્પિ યસ્સયત્થકમ્પિ સદિસં.)

(ઘ) પચ્ચનીકપુગ્ગલો

૮૩. (ક) યસ્સ કાયસઙ્ખારો ન નિરુજ્ઝતિ તસ્સ વચીસઙ્ખારો ન નિરુજ્ઝતીતિ?

વિના અસ્સાસપસ્સાસેહિ વિતક્કવિચારાનં ભઙ્ગક્ખણે તેસં કાયસઙ્ખારો ન નિરુજ્ઝતિ, નો ચ તેસં વચીસઙ્ખારો ન નિરુજ્ઝતિ. સબ્બેસં ચિત્તસ્સ ઉપ્પાદક્ખણે વિના અસ્સાસપસ્સાસેહિ અવિતક્કઅવિચારચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં કાયસઙ્ખારો ચ ન નિરુજ્ઝતિ વચીસઙ્ખારો ચ ન નિરુજ્ઝતિ.

(ખ) યસ્સ વા પન વચીસઙ્ખારો ન નિરુજ્ઝતિ તસ્સ કાયસઙ્ખારો ન નિરુજ્ઝતીતિ?

વિના વિતક્કવિચારેહિ અસ્સાસપસ્સાસાનં ભઙ્ગક્ખણે તેસં વચીસઙ્ખારો ન નિરુજ્ઝતિ, નો ચ તેસં કાયસઙ્ખારો ન નિરુજ્ઝતિ. સબ્બેસં ચિત્તસ્સ ઉપ્પાદક્ખણે વિના અસ્સાસપસ્સાસેહિ અવિતક્કઅવિચારચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં વચીસઙ્ખારો ચ ન નિરુજ્ઝતિ કાયસઙ્ખારો ચ ન નિરુજ્ઝતિ.

(ક) યસ્સ કાયસઙ્ખારો ન નિરુજ્ઝતિ તસ્સ ચિત્તસઙ્ખારો ન નિરુજ્ઝતીતિ?

વિના અસ્સાસપસ્સાસેહિ ચિત્તસ્સ ભઙ્ગક્ખણે તેસં કાયસઙ્ખારો ન નિરુજ્ઝતિ, નો ચ તેસં ચિત્તસઙ્ખારો ન નિરુજ્ઝતિ. સબ્બેસં ચિત્તસ્સ ઉપ્પાદક્ખણે નિરોધસમાપન્નાનં અસઞ્ઞસત્તાનં તેસં કાયસઙ્ખારો ચ ન નિરુજ્ઝતિ ચિત્તસઙ્ખારો ચ ન નિરુજ્ઝતિ.

(ખ) યસ્સ વા પન…પે…? આમન્તા.

૮૪. (ક) યસ્સ વચીસઙ્ખારો ન નિરુજ્ઝતિ તસ્સ ચિત્તસઙ્ખારો ન નિરુજ્ઝતીતિ?

વિના વિતક્કવિચારેહિ ચિત્તસ્સ ભઙ્ગક્ખણે તેસં વચીસઙ્ખારો ન નિરુજ્ઝતિ, નો ચ તેસં ચિત્તસઙ્ખારો ન નિરુજ્ઝતિ. સબ્બેસં ચિત્તસ્સ ઉપ્પાદક્ખણે નિરોધસમાપન્નાનં અસઞ્ઞસત્તાનં તેસં વચીસઙ્ખારો ચ ન નિરુજ્ઝતિ ચિત્તસઙ્ખારો ચ ન નિરુજ્ઝતિ.

(ખ) યસ્સ વા પન…પે…? આમન્તા.

(ઙ) પચ્ચનીકઓકાસા

૮૫. યત્થ કાયસઙ્ખારો ન નિરુજ્ઝતિ…પે….

(ચ) પચ્ચનીકપુગ્ગલોકાસા

૮૬. યસ્સ યત્થ કાયસઙ્ખારો ન નિરુજ્ઝતિ તસ્સ તત્થ વચીસઙ્ખારો ન નિરુજ્ઝતીતિ?

વિના અસ્સાસપસ્સાસેહિ વિતક્કવિચારાનં ભઙ્ગક્ખણે તેસં તત્થ કાયસઙ્ખારો ન નિરુજ્ઝતિ, નો ચ તેસં તત્થ વચીસઙ્ખારો ન નિરુજ્ઝતિ. સબ્બેસં ચિત્તસ્સ ઉપ્પાદક્ખણે વિના અસ્સાસપસ્સાસેહિ અવિતક્કઅવિચારચિત્તસ્સ ભઙ્ગક્ખણે અસઞ્ઞસત્તાનં તેસં તત્થ કાયસઙ્ખારો ચ ન નિરુજ્ઝતિ વચીસઙ્ખારો ચ ન નિરુજ્ઝતિ.

યસ્સ વા પન યત્થ વચીસઙ્ખારો ન નિરુજ્ઝતિ…પે….

(યસ્સકમ્પિ યસ્સયત્થકમ્પિ સદિસં વિત્થારેતબ્બં, યસ્સયત્થકે નિરોધસમાપન્નાનન્તિ ન કાતબ્બં.)