(૧) પચ્ચુપ્પન્નવારો

(ક) અનુલોમપુગ્ગલો

૧૩૬. (ક) યસ્સ દુક્ખસચ્ચં ઉપ્પજ્જતિ તસ્સ સમુદયસચ્ચં નિરુજ્ઝતીતિ? નો.

(ખ) યસ્સ વા પન સમુદયસચ્ચં નિરુજ્ઝતિ તસ્સ દુક્ખસચ્ચં ઉપ્પજ્જતીતિ? નો.

(ક) યસ્સ દુક્ખસચ્ચં ઉપ્પજ્જતિ તસ્સ મગ્ગસચ્ચં નિરુજ્ઝતીતિ? નો.

(ખ) યસ્સ વા પન મગ્ગસચ્ચં નિરુજ્ઝતિ તસ્સ દુક્ખસચ્ચં ઉપ્પજ્જતીતિ? નો.

૧૩૭. (ક) યસ્સ સમુદયસચ્ચં ઉપ્પજ્જતિ તસ્સ મગ્ગસચ્ચં નિરુજ્ઝતીતિ? નો.

(ખ) યસ્સ વા પન મગ્ગસચ્ચં નિરુજ્ઝતિ તસ્સ સમુદયસચ્ચં ઉપ્પજ્જતીતિ? નો.

(ખ) અનુલોમઓકાસો

૧૩૮. યત્થ દુક્ખસચ્ચં ઉપ્પજ્જતિ તત્થ સમુદયસચ્ચં નિરુજ્ઝતીતિ?

અસઞ્ઞસત્તે તત્થ દુક્ખસચ્ચં ઉપ્પજ્જતિ, નો ચ તત્થ સમુદયસચ્ચં નિરુજ્ઝતિ…પે….

(યત્થકં ઉપ્પાદવારેપિ નિરોધવારેપિ ઉપ્પાદનિરોધવારેપિ સદિસં નત્થિ નાનાકરણં).

(ગ) અનુલોમપુગ્ગલોકાસા

૧૩૯. યસ્સ યત્થ દુક્ખસચ્ચં ઉપ્પજ્જતિ તસ્સ તત્થ સમુદયસચ્ચં નિરુજ્ઝતીતિ? નો.

(યસ્સકમ્પિ યસ્સયત્થકમ્પિ સદિસં).

(ઘ) પચ્ચનીકપુગ્ગલો

૧૪૦. (ક) યસ્સ દુક્ખસચ્ચં નુપ્પજ્જતિ તસ્સ સમુદયસચ્ચં ન નિરુજ્ઝતીતિ?

તણ્હાય ભઙ્ગક્ખણે તેસં દુક્ખસચ્ચં નુપ્પજ્જતિ, નો ચ તેસં સમુદયસચ્ચં ન નિરુજ્ઝતિ. સબ્બેસં ચવન્તાનં પવત્તે તણ્હાવિપ્પયુત્તચિત્તસ્સ ભઙ્ગક્ખણે અરૂપે મગ્ગસ્સ ચ ફલસ્સ ચ ઉપ્પાદક્ખણે તેસં દુક્ખસચ્ચઞ્ચ નુપ્પજ્જતિ સમુદયસચ્ચઞ્ચ ન નિરુજ્ઝતિ.

(ખ) યસ્સ વા પન સમુદયસચ્ચં ન નિરુજ્ઝતિ તસ્સ દુક્ખસચ્ચં નુપ્પજ્જતીતિ?

સબ્બેસં ઉપપજ્જન્તાનં પવત્તે ચિત્તસ્સ ઉપ્પાદક્ખણે તેસં સમુદયસચ્ચં ન નિરુજ્ઝતિ, નો ચ તેસં દુક્ખસચ્ચં નુપ્પજ્જતિ. સબ્બેસં ચવન્તાનં પવત્તે તણ્હાવિપ્પયુત્તચિત્તસ્સ ભઙ્ગક્ખણે અરૂપે મગ્ગસ્સ ચ ફલસ્સ ચ ઉપ્પાદક્ખણે તેસં સમુદયસચ્ચઞ્ચ ન નિરુજ્ઝતિ દુક્ખસચ્ચઞ્ચ નુપ્પજ્જતિ.

(ક) યસ્સ દુક્ખસચ્ચં નુપ્પજ્જતિ તસ્સ મગ્ગસચ્ચં ન નિરુજ્ઝતીતિ?

મગ્ગસ્સ ભઙ્ગક્ખણે તેસં દુક્ખસચ્ચં નુપ્પજ્જતિ, નો ચ તેસં મગ્ગસચ્ચં ન નિરુજ્ઝતિ. સબ્બેસં ચવન્તાનં પવત્તે મગ્ગવિપ્પયુત્તચિત્તસ્સ ભઙ્ગક્ખણે અરૂપે મગ્ગસ્સ ચ ફલસ્સ ચ ઉપ્પાદક્ખણે તેસં દુક્ખસચ્ચઞ્ચ નુપ્પજ્જતિ મગ્ગસચ્ચઞ્ચ ન નિરુજ્ઝતિ.

(ખ) યસ્સ વા પન મગ્ગસચ્ચં ન નિરુજ્ઝતિ તસ્સ દુક્ખસચ્ચં નુપ્પજ્જતીતિ?

સબ્બેસં ઉપપજ્જન્તાનં પવત્તે ચિત્તસ્સ ઉપ્પાદક્ખણે તેસં મગ્ગસચ્ચં ન નિરુજ્ઝતિ, નો ચ તેસં દુક્ખસચ્ચં નુપ્પજ્જતિ. સબ્બેસં ચવન્તાનં પવત્તે મગ્ગવિપ્પયુત્તચિત્તસ્સ ભઙ્ગક્ખણે અરૂપે મગ્ગસ્સ ચ ફલસ્સ ચ ઉપ્પાદક્ખણે તેસં મગ્ગસચ્ચઞ્ચ ન નિરુજ્ઝતિ દુક્ખસચ્ચઞ્ચ નુપ્પજ્જતિ.

૧૪૧. (ક) યસ્સ સમુદયસચ્ચં નુપ્પજ્જતિ તસ્સ મગ્ગસચ્ચં ન નિરુજ્ઝતીતિ?

મગ્ગસ્સ ભઙ્ગક્ખણે તેસં સમુદયસચ્ચં નુપ્પજ્જતિ, નો ચ તેસં મગ્ગસચ્ચં ન નિરુજ્ઝતિ. તણ્હાવિપ્પયુત્તચિત્તસ્સ ઉપ્પાદક્ખણે મગ્ગવિપ્પયુત્તચિત્તસ્સ ભઙ્ગક્ખણે નિરોધસમાપન્નાનં અસઞ્ઞસત્તાનં તેસં સમુદયસચ્ચઞ્ચ નુપ્પજ્જતિ મગ્ગસચ્ચઞ્ચ ન નિરુજ્ઝતિ.

(ખ) યસ્સ વા પન મગ્ગસચ્ચં ન નિરુજ્ઝતિ તસ્સ સમુદયસચ્ચં નુપ્પજ્જતીતિ?

તણ્હાય ઉપ્પાદક્ખણે તેસં મગ્ગસચ્ચં ન નિરુજ્ઝતિ, નો ચ તેસં સમુદયસચ્ચં નુપ્પજ્જતિ. મગ્ગવિપ્પયુત્તચિત્તસ્સ ભઙ્ગક્ખણે તણ્હાવિપ્પયુત્તચિત્તસ્સ ઉપ્પાદક્ખણે નિરોધસમાપન્નાનં અસઞ્ઞસત્તાનં તેસં મગ્ગસચ્ચઞ્ચ ન નિરુજ્ઝતિ સમુદયસચ્ચઞ્ચ નુપ્પજ્જતિ.

(ઙ) પચ્ચનીકઓકાસો

૧૪૨. યત્થ દુક્ખસચ્ચં નુપ્પજ્જતિ…પે….

(ચ) પચ્ચનીકપુગ્ગલોકાસા

૧૪૩. યસ્સ યત્થ દુક્ખસચ્ચં નુપ્પજ્જતિ…પે….

(યસ્સકમ્પિ યસ્સયત્થકમ્પિ સદિસં, યસ્સયત્થકેપિ નિરોધસમાપન્નાનન્તિ ન કાતબ્બં).