(૩) અનાગતવારો

(ક) અનુલોમપુગ્ગલો

૧૭૫. (ક) યસ્સ રૂપક્ખન્ધો ઉપ્પજ્જિસ્સતિ તસ્સ વેદનાક્ખન્ધો નિરુજ્ઝિસ્સતીતિ? આમન્તા.

(ખ) યસ્સ વા પન વેદનાક્ખન્ધો નિરુજ્ઝિસ્સતિ તસ્સ રૂપક્ખન્ધો ઉપ્પજ્જિસ્સતીતિ?

પચ્છિમભવિકાનં ઉપપજ્જન્તાનં યે ચ અરૂપં ઉપપજ્જિત્વા પરિનિબ્બાયિસ્સન્તિ તેસં વેદનાક્ખન્ધો નિરુજ્ઝિસ્સતિ, નો ચ તેસં રૂપક્ખન્ધો ઉપ્પજ્જિસ્સતિ. ઇતરેસં તેસં વેદનાક્ખન્ધો ચ નિરુજ્ઝિસ્સતિ રૂપક્ખન્ધો ચ ઉપ્પજ્જિસ્સતિ.

૧૭૬. (ક) યસ્સ વેદનાક્ખન્ધો ઉપ્પજ્જિસ્સતિ તસ્સ સઞ્ઞાક્ખન્ધો નિરુજ્ઝિસ્સતીતિ? આમન્તા.

(ખ) યસ્સ વા પન સઞ્ઞાક્ખન્ધો નિરુજ્ઝિસ્સતિ તસ્સ વેદનાક્ખન્ધો ઉપ્પજ્જિસ્સતીતિ?

પચ્છિમભવિકાનં ઉપપજ્જન્તાનં તેસં સઞ્ઞાક્ખન્ધો નિરુજ્ઝિસ્સતિ, નો ચ તેસં વેદનાક્ખન્ધો ઉપ્પજ્જિસ્સતિ. ઇતરેસં તેસં સઞ્ઞાક્ખન્ધો ચ નિરુજ્ઝિસ્સતિ વેદનાક્ખન્ધો ચ ઉપ્પજ્જિસ્સતિ.

(ખ) અનુલોમઓકાસો

૧૭૭. યત્થ રૂપક્ખન્ધો ઉપ્પજ્જિસ્સતિ…પે….

(ગ) અનુલોમપુગ્ગલોકાસા

૧૭૮. (ક) યસ્સ યત્થ રૂપક્ખન્ધો ઉપ્પજ્જિસ્સતિ તસ્સ તત્થ વેદનાક્ખન્ધો નિરુજ્ઝિસ્સતીતિ?

અસઞ્ઞસત્તાનં તેસં તત્થ રૂપક્ખન્ધો ઉપ્પજ્જિસ્સતિ, નો ચ તેસં તત્થ વેદનાક્ખન્ધો નિરુજ્ઝિસ્સતિ. પઞ્ચવોકારાનં તેસં તત્થ રૂપક્ખન્ધો ચ ઉપ્પજ્જિસ્સતિ વેદનાક્ખન્ધો ચ નિરુજ્ઝિસ્સતિ.

(ખ) યસ્સ વા પન યત્થ વેદનાક્ખન્ધો નિરુજ્ઝિસ્સતિ તસ્સ તત્થ રૂપક્ખન્ધો ઉપ્પજ્જિસ્સતીતિ?

પચ્છિમભવિકાનં પઞ્ચવોકારં ઉપપજ્જન્તાનં અરૂપાનં તેસં તત્થ વેદનાક્ખન્ધો નિરુજ્ઝિસ્સતિ, નો ચ તેસં તત્થ રૂપક્ખન્ધો ઉપ્પજ્જિસ્સતિ. ઇતરેસં પઞ્ચવોકારાનં તેસં તત્થ વેદનાક્ખન્ધો ચ નિરુજ્ઝિસ્સતિ રૂપક્ખન્ધો ચ ઉપ્પજ્જિસ્સતિ.

૧૭૯. (ક) યસ્સ યત્થ વેદનાક્ખન્ધો ઉપ્પજ્જિસ્સતિ તસ્સ તત્થ સઞ્ઞાક્ખન્ધો નિરુજ્ઝિસ્સતીતિ? આમન્તા.

(ખ) યસ્સ વા પન યત્થ સઞ્ઞાક્ખન્ધો નિરુજ્ઝિસ્સતિ તસ્સ તત્થ વેદનાક્ખન્ધો ઉપ્પજ્જિસ્સતીતિ?

પચ્છિમભવિકાનં ઉપપજ્જન્તાનં તેસં તત્થ સઞ્ઞાક્ખન્ધો નિરુજ્ઝિસ્સતિ, નો ચ તેસં તત્થ વેદનાક્ખન્ધો ઉપ્પજ્જિસ્સતિ. ઇતરેસં ચતુવોકારાનં પઞ્ચવોકારાનં તેસં તત્થ સઞ્ઞાક્ખન્ધો ચ નિરુજ્ઝિસ્સતિ વેદનાક્ખન્ધો ચ ઉપ્પજ્જિસ્સતિ.

(ઘ) પચ્ચનીકપુગ્ગલો

૧૮૦. (ક) યસ્સ રૂપક્ખન્ધો નુપ્પજ્જિસ્સતિ તસ્સ વેદનાક્ખન્ધો ન નિરુજ્ઝિસ્સતીતિ?

પચ્છિમભવિકાનં ઉપપજ્જન્તાનં યે ચ અરૂપં ઉપપજ્જિત્વા પરિનિબ્બાયિસ્સન્તિ તેસં રૂપક્ખન્ધો નુપ્પજ્જિસ્સતિ, નો ચ તેસં વેદનાક્ખન્ધો ન નિરુજ્ઝિસ્સતિ. પરિનિબ્બન્તાનં તેસં રૂપક્ખન્ધો ચ નુપ્પજ્જિસ્સતિ વેદનાક્ખન્ધો ચ ન નિરુજ્ઝિસ્સતિ.

(ખ) યસ્સ વા પન વેદનાક્ખન્ધો ન નિરુજ્ઝિસ્સતિ તસ્સ રૂપક્ખન્ધો નુપ્પજ્જિસ્સતીતિ? આમન્તા.

૧૮૧. (ક) યસ્સ વેદનાક્ખન્ધો નુપ્પજ્જિસ્સતિ તસ્સ સઞ્ઞાક્ખન્ધો ન નિરુજ્ઝિસ્સતીતિ?

પચ્છિમભવિકાનં ઉપપજ્જન્તાનં તેસં વેદનાક્ખન્ધો નુપ્પજ્જિસ્સતિ, નો ચ તેસં સઞ્ઞાક્ખન્ધો ન નિરુજ્ઝિસ્સતિ. પરિનિબ્બન્તાનં તેસં વેદનાક્ખન્ધો ચ નુપ્પજ્જિસ્સતિ સઞ્ઞાક્ખન્ધો ચ ન નિરુજ્ઝિસ્સતિ.

(ખ) યસ્સ વા પન સઞ્ઞાક્ખન્ધો ન નિરુજ્ઝિસ્સતિ તસ્સ વેદનાક્ખન્ધો નુપ્પજ્જિસ્સતીતિ? આમન્તા.

(ઙ) પચ્ચનીકઓકાસો

૧૮૨. યત્થ રૂપક્ખન્ધો નુપ્પજ્જિસ્સતિ…પે….

(ચ) પચ્ચનીકપુગ્ગલોકાસા

૧૮૩. (ક) યસ્સ યત્થ રૂપક્ખન્ધો નુપ્પજ્જિસ્સતિ તસ્સ તત્થ વેદનાક્ખન્ધો ન નિરુજ્ઝિસ્સતીતિ?

પચ્છિમભવિકાનં પઞ્ચવોકારં ઉપપજ્જન્તાનં અરૂપાનં તેસં તત્થ રૂપક્ખન્ધો નુપ્પજ્જિસ્સતિ, નો ચ તેસં તત્થ વેદનાક્ખન્ધો ન નિરુજ્ઝિસ્સતિ. પરિનિબ્બન્તાનં તેસં તત્થ રૂપક્ખન્ધો ચ નુપ્પજ્જિસ્સતિ વેદનાક્ખન્ધો ચ ન નિરુજ્ઝિસ્સતિ.

(ખ) યસ્સ વા પન યત્થ વેદનાક્ખન્ધો ન નિરુજ્ઝિસ્સતિ તસ્સ તત્થ રૂપક્ખન્ધો નુપ્પજ્જિસ્સતીતિ?

અસઞ્ઞસત્તાનં તેસં તત્થ વેદનાક્ખન્ધો ન નિરુજ્ઝિસ્સતિ, નો ચ તેસં તત્થ રૂપક્ખન્ધો નુપ્પજ્જિસ્સતિ. પરિનિબ્બન્તાનં તેસં તત્થ વેદનાક્ખન્ધો ચ ન નિરુજ્ઝિસ્સતિ રૂપક્ખન્ધો ચ નુપ્પજ્જિસ્સતિ.

૧૮૪. (ક) યસ્સ યત્થ વેદનાક્ખન્ધો નુપ્પજ્જિસ્સતિ તસ્સ તત્થ સઞ્ઞાક્ખન્ધો ન નિરુજ્ઝિસ્સતીતિ?

પચ્છિમભવિકાનં ઉપપજ્જન્તાનં તેસં તત્થ વેદનાક્ખન્ધો નુપ્પજ્જિસ્સતિ, નો ચ તેસં તત્થ સઞ્ઞાક્ખન્ધો ન નિરુજ્ઝિસ્સતિ. પરિનિબ્બન્તાનં અસઞ્ઞસત્તાનં તેસં તત્થ વેદનાક્ખન્ધો ચ નુપ્પજ્જિસ્સતિ સઞ્ઞાક્ખન્ધો ચ ન નિરુજ્ઝિસ્સતિ.

(ખ) યસ્સ વા પન યત્થ સઞ્ઞાક્ખન્ધો ન નિરુજ્ઝિસ્સતિ તસ્સ તત્થ વેદનાક્ખન્ધો નુપ્પજ્જિસ્સતીતિ? આમન્તા.