(૩) મૂલકનયો

૯૨. (ક) યે કેચિ નામા ધમ્મા, સબ્બે તે નામમૂલકાતિ?

અહેતુકં નામં ન નામમૂલકં. સહેતુકં નામં નામમૂલકં.

(ખ) યે વા પન નામમૂલકા, સબ્બે તે ધમ્મા નામાતિ?

નામસમુટ્ઠાનં રૂપં નામમૂલકં, ન નામં. નામં નામમૂલકઞ્ચેવ નામઞ્ચ.

૯૩. (ક) યે કેચિ નામા ધમ્મા, સબ્બે તે નામમૂલેન એકમૂલકાતિ?

અહેતુકં નામં નામમૂલેન ન એકમૂલકં. સહેતુકં નામં નામમૂલેન એકમૂલકં.

(ખ) યે વા પન નામમૂલેન એકમૂલકા, સબ્બે તે ધમ્મા નામાતિ?

નામસમુટ્ઠાનં રૂપં નામમૂલેન એકમૂલકં, ન નામં. નામં નામમૂલેન એકમૂલકઞ્ચેવ નામઞ્ચ.

૯૪. (ક) યે કેચિ નામમૂલેન એકમૂલકા ધમ્મા, સબ્બે તે નામમૂલેન અઞ્ઞમઞ્ઞમૂલકાતિ?

મૂલાનિ યાનિ એકતો ઉપ્પજ્જન્તિ નામમૂલાનિ એકમૂલકાનિ ચેવ અઞ્ઞમઞ્ઞમૂલકાનિ ચ. અવસેસા નામમૂલસહજાતા ધમ્મા નામમૂલેન એકમૂલકા, ન ચ અઞ્ઞમઞ્ઞમૂલકા.

(ખ) યે વા પન નામમૂલેન અઞ્ઞમઞ્ઞમૂલકા, સબ્બે તે ધમ્મા નામાતિ? આમન્તા.