૨. વેદનાત્તિકં

૧-૭. પટિચ્ચવારાદિ

૧૧. નસુખાય વેદનાય સમ્પયુત્તં ધમ્મં પટિચ્ચ નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. નસુખાય વેદનાય સમ્પયુત્તં ધમ્મં પટિચ્ચ નદુક્ખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. નસુખાય વેદનાય સમ્પયુત્તં ધમ્મં પટિચ્ચ નઅદુક્ખમસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. નસુખાય વેદનાય સમ્પયુત્તં ધમ્મં પટિચ્ચ નસુખાય વેદનાય સમ્પયુત્તો ચ નઅદુક્ખમસુખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. નસુખાય વેદનાય સમ્પયુત્તં ધમ્મં પટિચ્ચ નદુક્ખાય વેદનાય સમ્પયુત્તો ચ નઅદુક્ખમસુખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. નસુખાય વેદનાય સમ્પયુત્તં ધમ્મં પટિચ્ચ નસુખાય વેદનાય સમ્પયુત્તો ચ નદુક્ખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. નસુખાય વેદનાય સમ્પયુત્તં ધમ્મં પટિચ્ચ નસુખાય વેદનાય સમ્પયુત્તો ચ નદુક્ખાય વેદનાય સમ્પયુત્તો ચ નઅદુક્ખમસુખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. (૭)

નદુક્ખાય વેદનાય સમ્પયુત્તં ધમ્મં પટિચ્ચ નદુક્ખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા… સત્ત.

નઅદુક્ખમસુખાય વેદનાય સમ્પયુત્તં ધમ્મં પટિચ્ચ નઅદુક્ખમસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા… સત્ત. (સંખિત્તં.)