૨-૧. સહેતુકાદિદુકાનિ-હેતુદુકં

૪૮. નસહેતુકં નહેતું ધમ્મં પટિચ્ચ સહેતુકો હેતુ ધમ્મો ઉપ્પજ્જતિ હેતુપચ્ચયા. નઅહેતુકં નહેતું ધમ્મં પટિચ્ચ સહેતુકો હેતુ ધમ્મો ઉપ્પજ્જતિ હેતુપચ્ચયા. નસહેતુકં નહેતુઞ્ચ નઅહેતુકં નહેતુઞ્ચ ધમ્મં પટિચ્ચ સહેતુકો હેતુ ધમ્મો ઉપ્પજ્જતિ હેતુપચ્ચયા. હેતુયા તીણિ.

નસહેતુકં નનહેતું ધમ્મં પટિચ્ચ સહેતુકો નહેતુ ધમ્મો ઉપ્પજ્જતિ હેતુપચ્ચયા… તીણિ.

નઅહેતુકં નનહેતું ધમ્મં પટિચ્ચ અહેતુકો નહેતુ ધમ્મો ઉપ્પજ્જતિ હેતુપચ્ચયા… તીણિ. હેતુયા છ.

૪૯. નહેતુસમ્પયુત્તં નહેતું ધમ્મં પટિચ્ચ હેતુસમ્પયુત્તો હેતુ ધમ્મો ઉપ્પજ્જતિ હેતુપચ્ચયા… તીણિ. (સહેતુકદુકસદિસં.)

૫૦. નહેતુઞ્ચેવ નઅહેતુકં નહેતું ધમ્મં પટિચ્ચ હેતુ ચેવ સહેતુકો ચ હેતુ ધમ્મો ઉપ્પજ્જતિ હેતુપચ્ચયા. હેતુયા એકં.

નઅહેતુકઞ્ચેવ નન ચ હેતું નનહેતું ધમ્મં પટિચ્ચ સહેતુકો ચેવ ન ચ હેતુ નહેતુ ધમ્મો ઉપ્પજ્જતિ હેતુપચ્ચયા. હેતુયા એકં.

૫૧. નહેતુઞ્ચેવ નહેતુવિપ્પયુત્તઞ્ચ નહેતું ધમ્મં પટિચ્ચ હેતુ ચેવ હેતુસમ્પયુત્તો ચ હેતુ ધમ્મો ઉપ્પજ્જતિ હેતુપચ્ચયા. હેતુયા એકં.

નહેતુવિપ્પયુત્તઞ્ચેવ નનહેતુઞ્ચ નનહેતું ધમ્મં પટિચ્ચ હેતુસમ્પયુત્તો ચેવ ન ચ હેતુ નહેતુ ધમ્મો ઉપ્પજ્જતિ હેતુપચ્ચયા. હેતુયા એકં. (અન્તિમદુકં ન લબ્ભતિ.)