૧-૧. હેતુદુક-સહેતુકદુકં

૧. હેતું સહેતુકં ધમ્મં પટિચ્ચ નહેતુ નસહેતુકો ધમ્મો ઉપ્પજ્જતિ હેતુપચ્ચયા. નહેતું સહેતુકં ધમ્મં પટિચ્ચ નહેતુ નસહેતુકો ધમ્મો ઉપ્પજ્જતિ હેતુપચ્ચયા. હેતું સહેતુકઞ્ચ નહેતું સહેતુકઞ્ચ ધમ્મં પટિચ્ચ નહેતુ નસહેતુકો ધમ્મો ઉપ્પજ્જતિ હેતુપચ્ચયા. (સંખિત્તં.) હેતુયા તીણિ, આરમ્મણે એકં…પે… અવિગતે પઞ્ચ.

૨. નહેતું સહેતુકં ધમ્મં પટિચ્ચ નનહેતુ નસહેતુકો ધમ્મો ઉપ્પજ્જતિ નહેતુપચ્ચયા… (સંખિત્તં.) નહેતુયા એકં, નઆરમ્મણે તીણિ…પે… નોવિગતે તીણિ.

(સહજાતવારમ્પિ…પે… સમ્પયુત્તવારમ્પિ પટિચ્ચવારસદિસં.)

હેતુ-આરમ્મણપચ્ચયા

૩. હેતુ સહેતુકો ધમ્મો નહેતુસ્સ નસહેતુકસ્સ ધમ્મસ્સ હેતુપચ્ચયેન પચ્ચયો. (૧)

હેતુ સહેતુકો ધમ્મો નહેતુસ્સ નસહેતુકસ્સ ધમ્મસ્સ આરમ્મણપચ્ચયેન પચ્ચયો. હેતુ સહેતુકો ધમ્મો નનહેતુસ્સ નસહેતુકસ્સ ધમ્મસ્સ આરમ્મણપચ્ચયેન પચ્ચયો. હેતુ સહેતુકો ધમ્મો નહેતુસ્સ નસહેતુકસ્સ ચ નનહેતુસ્સ નસહેતુકસ્સ ચ ધમ્મસ્સ આરમ્મણપચ્ચયેન પચ્ચયો. (૩)

નહેતુ સહેતુકો ધમ્મો નનહેતુસ્સ નસહેતુકસ્સ ધમ્મસ્સ આરમ્મણપચ્ચયેન પચ્ચયો. નહેતુ સહેતુકો ધમ્મો નહેતુસ્સ નસહેતુકસ્સ ધમ્મસ્સ આરમ્મણપચ્ચયેન પચ્ચયો. નહેતુ સહેતુકો ધમ્મો નહેતુસ્સ નસહેતુકસ્સ ચ નનહેતુસ્સ નસહેતુકસ્સ ચ ધમ્મસ્સ આરમ્મણપચ્ચયેન પચ્ચયો. (૩) (સંખિત્તં.)

હેતુયા એકં, આરમ્મણે છ, અધિપતિયા દ્વે…પે… અવિગતે પઞ્ચ. (પઞ્હાવારં વિત્થારેતબ્બં.)

૪. હેતું અહેતુકં ધમ્મં પટિચ્ચ નહેતુ નઅહેતુકો ધમ્મો ઉપ્પજ્જતિ હેતુપચ્ચયા. (૧)

નહેતું અહેતુકં ધમ્મં પટિચ્ચ નનહેતુ નઅહેતુકો ધમ્મો ઉપ્પજ્જતિ હેતુપચ્ચયા… તીણિ. (સંખિત્તં.) હેતુયા ચત્તારિ.