ધમ્માનુલોમપચ્ચનીયે તિકતિકપટ્ઠાનં

૧-૧. કુસલત્તિક-વેદનાત્તિકં

૧. કુસલં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. કુસલં સુખાય વેદનાય સમ્પયુત્તં ધમ્મં પટિચ્ચ નઅકુસલો નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા…પે… કુસલં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ચ નઅકુસલો નસુખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. પઞ્ચ.

અકુસલં સુખાય વેદનાય સમ્પયુત્તં ધમ્મં પટિચ્ચ નઅકુસલો નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. અકુસલં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા…પે… અકુસલં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ચ નઅકુસલો નસુખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. પઞ્ચ.

અબ્યાકતં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. અબ્યાકતં સુખાય વેદનાય સમ્પયુત્તં ધમ્મં પટિચ્ચ નઅકુસલો નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. અબ્યાકતં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ચ નઅકુસલો નસુખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. તીણિ. (સંખિત્તં.)

હેતુયા તેરસ, આરમ્મણે નવ…પે… અવિગતે તેરસ.

પચ્ચનીયં

નહેતુનઆરમ્મણપચ્ચયાદિ

૨. અબ્યાકતં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ધમ્મો ઉપ્પજ્જતિ નહેતુપચ્ચયા … તીણિ.

૩. કુસલં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ધમ્મો ઉપ્પજ્જતિ નઆરમ્મણપચ્ચયા. કુસલં સુખાય વેદનાય સમ્પયુત્તં ધમ્મં પટિચ્ચ નઅકુસલો નસુખાય વેદનાય સમ્પયુત્તો ધમ્મો ઉપ્પજ્જતિ નઆરમ્મણપચ્ચયા. કુસલં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ચ નઅકુસલો નસુખાય વેદનાય સમ્પયુત્તો ચ ધમ્મા ઉપ્પજ્જન્તિ નઆરમ્મણપચ્ચયા. તીણિ.

અકુસલં સુખાય વેદનાય સમ્પયુત્તં ધમ્મં પટિચ્ચ નઅકુસલો નસુખાય વેદનાય સમ્પયુત્તો ધમ્મો ઉપ્પજ્જતિ નઆરમ્મણપચ્ચયા… તીણિ.

અબ્યાકતં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ધમ્મો ઉપ્પજ્જતિ નઆરમ્મણપચ્ચયા. અબ્યાકતં સુખાય વેદનાય સમ્પયુત્તં ધમ્મં પટિચ્ચ નઅકુસલો નસુખાય વેદનાય સમ્પયુત્તો ધમ્મો ઉપ્પજ્જતિ નઆરમ્મણપચ્ચયા. અબ્યાકતં સુખાય વેદનાય સમ્પયુત્તં ધમ્મં પટિચ્ચ નકુસલો નસુખાય વેદનાય સમ્પયુત્તો ચ નઅકુસલો નસુખાય વેદનાય સમ્પયુત્તો ચ ધમ્મા ઉપ્પજ્જન્તિ નઆરમ્મણપચ્ચયા. તીણિ.

૪. નહેતુયા તીણિ, નઆરમ્મણે નવ, નઅધિપતિયા તેરસ…પે… નોવિગતે નવ.

હેતુપચ્ચયા નઆરમ્મણે નવ.

નહેતુપચ્ચયા આરમ્મણે તીણિ.

(સહજાતવારમ્પિ પચ્ચયવારમ્પિ નિસ્સયવારમ્પિ સંસટ્ઠવારમ્પિ સમ્પયુત્તવારમ્પિ પટિચ્ચવારસદિસં.)

૫. કુસલો સુખાય વેદનાય સમ્પયુત્તો ધમ્મો નકુસલસ્સ નસુખાય વેદનાય સમ્પયુત્તસ્સ ધમ્મસ્સ હેતુપચ્ચયેન પચ્ચયો…પે….

આરમ્મણે અટ્ઠારસ. (પઞ્હાવારમ્પિ વિત્થારેતબ્બં.)

અકુસલપદં

હેતુપચ્ચયો

૬. અકુસલં દુક્ખાય વેદનાય સમ્પયુત્તં ધમ્મં પટિચ્ચ નઅકુસલો નદુક્ખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. અકુસલં દુક્ખાય વેદનાય સમ્પયુત્તં ધમ્મં પટિચ્ચ નકુસલો નદુક્ખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા…પે… અકુસલં દુક્ખાય વેદનાય સમ્પયુત્તં ધમ્મં પટિચ્ચ નકુસલો નદુક્ખાય વેદનાય સમ્પયુત્તો ચ નઅકુસલો નદુક્ખાય વેદનાય સમ્પયુત્તો ચ ધમ્મા ઉપ્પજ્જન્તિ હેતુપચ્ચયા. હેતુયા પઞ્ચ, આરમ્મણે છ…પે… અવિગતે અટ્ઠ.

અબ્યાકતપદં

પચ્ચનીયં

૭. અબ્યાકતં દુક્ખાય વેદનાય સમ્પયુત્તં ધમ્મં પટિચ્ચ નકુસલો નદુક્ખાય વેદનાય સમ્પયુત્તો ધમ્મો ઉપ્પજ્જતિ નહેતુપચ્ચયા. અબ્યાકતં દુક્ખાય વેદનાય સમ્પયુત્તં ધમ્મં પટિચ્ચ નઅકુસલો નદુક્ખાય વેદનાય સમ્પયુત્તો ધમ્મો ઉપ્પજ્જતિ નહેતુપચ્ચયા. અબ્યાકતં દુક્ખાય વેદનાય સમ્પયુત્તં ધમ્મં પટિચ્ચ નકુસલો નદુક્ખાય વેદનાય સમ્પયુત્તો ચ નઅકુસલો નદુક્ખાય વેદનાય સમ્પયુત્તો ચ ધમ્મા ઉપ્પજ્જન્તિ નહેતુપચ્ચયા.

નહેતુયા તીણિ. (સહજાતવારમ્પિ…પે… પઞ્હાવારમ્પિ વિત્થારેતબ્બં.)

૮. કુસલં અદુક્ખમસુખાય વેદનાય સમ્પયુત્તં ધમ્મં પટિચ્ચ નકુસલો નઅદુક્ખમસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા. (સંખિત્તં.) હેતુયા તેરસ. (સબ્બત્થ વિત્થારો).

૧-૨. કુસલત્તિક-વિપાકત્તિકં

૯. અબ્યાકતં વિપાકં ધમ્મં પટિચ્ચ નકુસલો નવિપાકો ધમ્મો ઉપ્પજ્જતિ હેતુપચ્ચયા… હેતુયા તીણિ.

૧૦. કુસલં વિપાકધમ્મધમ્મં પટિચ્ચ નકુસલો નવિપાકધમ્મધમ્મો ઉપ્પજ્જતિ હેતુપચ્ચયા. કુસલં વિપાકધમ્મધમ્મં પટિચ્ચ નઅકુસલો નવિપાકધમ્મધમ્મો ઉપ્પજ્જતિ હેતુપચ્ચયા. કુસલં વિપાકધમ્મધમ્મં પટિચ્ચ નકુસલો નવિપાકધમ્મધમ્મો ચ નઅકુસલો નવિપાકધમ્મધમ્મો ચ ધમ્મા ઉપ્પજ્જન્તિ હેતુપચ્ચયા. તીણિ.

અકુસલં વિપાકધમ્મધમ્મં પટિચ્ચ નઅકુસલો નવિપાકધમ્મધમ્મો ઉપ્પજ્જતિ હેતુપચ્ચયા. અકુસલં વિપાકધમ્મધમ્મં પટિચ્ચ નકુસલો નવિપાકધમ્મધમ્મો ઉપ્પજ્જતિ હેતુપચ્ચયા. અકુસલં વિપાકધમ્મધમ્મં પટિચ્ચ નકુસલો નવિપાકધમ્મધમ્મો ચ નઅકુસલો નવિપાકધમ્મધમ્મો ચ ધમ્મા ઉપ્પજ્જન્તિ હેતુપચ્ચયા. (૩) …હેતુયા છ.

૧૧. અબ્યાકતં નેવવિપાકનવિપાકધમ્મધમ્મં પટિચ્ચ નકુસલો નનેવવિપાકનવિપાકધમ્મધમ્મો ઉપ્પજ્જતિ હેતુપચ્ચયા. અબ્યાકતં નેવવિપાકનવિપાકધમ્મધમ્મં પટિચ્ચ નઅકુસલો નનેવવિપાકનવિપાકધમ્મધમ્મો ઉપ્પજ્જતિ હેતુપચ્ચયા. અબ્યાકતં નેવવિપાકનવિપાકધમ્મધમ્મં પટિચ્ચ નકુસલો નનેવવિપાકનવિપાકધમ્મધમ્મો ચ નઅકુસલો નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ હેતુપચ્ચયા. હેતુયા તીણિ.

૧-૩. કુસલત્તિક-ઉપાદિન્નત્તિકં

૧૨. અબ્યાકતં ઉપાદિન્નુપાદાનિયં ધમ્મં પટિચ્ચ નકુસલો નઉપાદિન્નુપાદાનિયો ધમ્મો ઉપ્પજ્જતિ હેતુપચ્ચયા. અબ્યાકતં ઉપાદિન્નુપાદાનિયં ધમ્મં પટિચ્ચ નઅકુસલો નઉપાદિન્નુપાદાનિયો ધમ્મો ઉપ્પજ્જતિ હેતુપચ્ચયા. અબ્યાકતં ઉપાદિન્નુપાદાનિયં ધમ્મં પટિચ્ચ નકુસલો નઉપાદિન્નુપાદાનિયો ચ નઅકુસલો નઉપાદિન્નુપાદાનિયો ચ ધમ્મા ઉપ્પજ્જન્તિ હેતુપચ્ચયા. હેતુયા તીણિ.

૧૩. કુસલો અનુપાદિન્નુપાદાનિયો ધમ્મો નકુસલસ્સ નઅનુપાદિન્નુપાદાનિયસ્સ ધમ્મસ્સ આરમ્મણપચ્ચયેન પચ્ચયો. કુસલો અનુપાદિન્નુપાદાનિયો ધમ્મો નઅકુસલસ્સ નઅનુપાદિન્નુપાદાનિયસ્સ ધમ્મસ્સ આરમ્મણપચ્ચયેન પચ્ચયો. કુસલો અનુપાદિન્નુપાદાનિયો ધમ્મો નકુસલસ્સ નઅનુપાદિન્નુપાદાનિયસ્સ ચ નઅકુસલસ્સ નઅનુપાદિન્નુપાદાનિયસ્સ ચ ધમ્મસ્સ આરમ્મણપચ્ચયેન પચ્ચયો. તીણિ.

અકુસલે તીણિ. અબ્યાકતં અનુપાદિન્નુપાદાનિયે તીણિયેવ…પે….

૧૪. કુસલં અનુપાદિન્નઅનુપાદાનિયં ધમ્મં પટિચ્ચ નકુસલો નઅનુપાદિન્નઅનુપાદાનિયો ધમ્મો ઉપ્પજ્જતિ હેતુપચ્ચયા… તીણિ.

અબ્યાકતં અનુપાદિન્નઅનુપાદાનિયં ધમ્મં પટિચ્ચ નકુસલો નઅનુપાદિન્નઅનુપાદાનિયો ધમ્મો ઉપ્પજ્જતિ હેતુપચ્ચયા… તીણિ. …હેતુયા છ.

૧-૪. કુસલત્તિક-સંકિલિટ્ઠત્તિકં

૧૫. અકુસલં સંકિલિટ્ઠસંકિલેસિકં ધમ્મં પટિચ્ચ નઅકુસલો નસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા… હેતુયા તીણિ.

અબ્યાકતં અસંકિલિટ્ઠસંકિલેસિકં ધમ્મં પચ્ચયા નઅબ્યાકતો નઅસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા. અબ્યાકતં અસંકિલિટ્ઠસંકિલેસિકં ધમ્મં પચ્ચયા નકુસલો નઅસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા. અબ્યાકતં અસંકિલિટ્ઠસંકિલેસિકં ધમ્મં પચ્ચયા નઅકુસલો નઅસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા. અબ્યાકતં અસંકિલિટ્ઠસંકિલેસિકં ધમ્મં પચ્ચયા નકુસલો નઅસંકિલિટ્ઠસંકિલેસિકો ચ નઅબ્યાકતો નઅસંકિલિટ્ઠસંકિલેસિકો ચ ધમ્મા ઉપ્પજ્જન્તિ હેતુપચ્ચયા. અબ્યાકતં અસંકિલિટ્ઠસંકિલેસિકં ધમ્મં પચ્ચયા નઅકુસલો નઅસંકિલિટ્ઠસંકિલેસિકો ચ નઅબ્યાકતો નઅસંકિલિટ્ઠસંકિલેસિકો ચ ધમ્મા ઉપ્પજ્જન્તિ હેતુપચ્ચયા. અબ્યાકતં અસંકિલિટ્ઠસંકિલેસિકં ધમ્મં પચ્ચયા નકુસલો નઅસંકિલિટ્ઠસંકિલેસિકો ચ નઅકુસલો નઅસંકિલિટ્ઠસંકિલેસિકો ચ ધમ્મા ઉપ્પજ્જન્તિ હેતુપચ્ચયા. હેતુયા છ.

૧૬. કુસલં અસંકિલિટ્ઠઅસંકિલેસિકં ધમ્મં પટિચ્ચ નકુસલો નઅસંકિલિટ્ઠઅસંકિલેસિકો ધમ્મો ઉપ્પજ્જતિ હેતુપચ્ચયા… તીણિ.

અબ્યાકતં અસંકિલિટ્ઠઅસંકિલેસિકં ધમ્મં પટિચ્ચ નકુસલો નઅસંકિલિટ્ઠઅસંકિલેસિકો ધમ્મો ઉપ્પજ્જતિ હેતુપચ્ચયા… તીણિ… હેતુયા છ.

૧-૫. કુસલત્તિક-વિતક્કત્તિકં

૧૭. કુસલં સવિતક્કસવિચારં ધમ્મં પટિચ્ચ નકુસલો નસવિતક્કસવિચારો ધમ્મો ઉપ્પજ્જતિ હેતુપચ્ચયા… હેતુયા તેરસ. (કુસલે પઞ્ચ, અકુસલે પઞ્ચ, અબ્યાકતે તીણિ.)

કુસલં અવિતક્કવિચારમત્તં ધમ્મં પટિચ્ચ નકુસલો નઅવિતક્કવિચારમત્તો ધમ્મો ઉપ્પજ્જતિ હેતુપચ્ચયા… હેતુયા તેરસ.

કુસલં અવિતક્કઅવિચારં ધમ્મં પટિચ્ચ નકુસલો નઅવિતક્કઅવિચારો ધમ્મો ઉપ્પજ્જતિ હેતુપચ્ચયા… તીણિ.

અબ્યાકતં અવિતક્કઅવિચારં ધમ્મં પટિચ્ચ નકુસલો નઅવિતક્કઅવિચારો ધમ્મો ઉપ્પજ્જતિ હેતુપચ્ચયા… તીણિ… હેતુયા છ.

૧-૬. કુસલત્તિક-પીતિત્તિકં

૧૮. કુસલં પીતિસહગતં ધમ્મં પટિચ્ચ નકુસલો નપીતિસહગતો ધમ્મો ઉપ્પજ્જતિ હેતુપચ્ચયા… પઞ્ચ… હેતુયા તેરસ.

કુસલં સુખસહગતં ધમ્મં પટિચ્ચ નકુસલો નસુખસહગતો ધમ્મો ઉપ્પજ્જતિ હેતુપચ્ચયા… પઞ્ચ… હેતુયા તેરસ.

કુસલં ઉપેક્ખાસહગતં ધમ્મં પટિચ્ચ નકુસલો નઉપેક્ખાસહગતો ધમ્મો ઉપ્પજ્જતિ હેતુપચ્ચયા… પઞ્ચ… હેતુયા તેરસ.

૧-૭. કુસલત્તિક-દસ્સનત્તિકં

૧૯. અકુસલં દસ્સનેન પહાતબ્બં ધમ્મં પટિચ્ચ નઅકુસલો નદસ્સનેન પહાતબ્બો ધમ્મો ઉપ્પજ્જતિ હેતુપચ્ચયા… હેતુયા તીણિ.

અકુસલં ભાવનાય પહાતબ્બં ધમ્મં પટિચ્ચ નઅકુસલો નભાવનાય પહાતબ્બો ધમ્મો ઉપ્પજ્જતિ હેતુપચ્ચયા… હેતુયા તીણિ.

અબ્યાકતં નેવદસ્સનેન નભાવનાય પહાતબ્બં ધમ્મં પચ્ચયા નઅબ્યાકતો નનેવદસ્સનેન નભાવનાય પહાતબ્બો ધમ્મો ઉપ્પજ્જતિ હેતુપચ્ચયા… હેતુયા તીણિ.

૧-૮. કુસલત્તિક-દસ્સનહેતુત્તિકં

૨૦. અકુસલં દસ્સનેન પહાતબ્બહેતુકં ધમ્મં પટિચ્ચ નઅકુસલો નદસ્સનેન પહાતબ્બહેતુકો ધમ્મો ઉપ્પજ્જતિ હેતુપચ્ચયા… હેતુયા તીણિ.

અકુસલં ભાવનાય પહાતબ્બહેતુકં ધમ્મં પટિચ્ચ નઅકુસલો નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા… હેતુયા તીણિ.

અકુસલં નેવદસ્સનેન નભાવનાય પહાતબ્બહેતુકં ધમ્મં પટિચ્ચ નકુસલો નનેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા… હેતુયા તીણિ.

અબ્યાકતં નેવદસ્સનેન નભાવનાય પહાતબ્બહેતુકં ધમ્મં પચ્ચયા નઅબ્યાકતો નનેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા… હેતુયા તીણિ.

૧-૯. કુસલત્તિક-આચયગામિત્તિકં

૨૧. કુસલં આચયગામિં ધમ્મં પટિચ્ચ નકુસલો નઆચયગામી ધમ્મો ઉપ્પજ્જતિ હેતુપચ્ચયા… હેતુયા છ.

કુસલં અપચયગામિં ધમ્મં પટિચ્ચ નકુસલો નઅપચયગામી ધમ્મો ઉપ્પજ્જતિ હેતુપચ્ચયા… હેતુયા તીણિ.

અબ્યાકતં નેવાચયગામિનાપચયગામિં ધમ્મં પચ્ચયા નઅબ્યાકતો નનેવાચયગામિનાપચયગામી ધમ્મો ઉપ્પજ્જતિ હેતુપચ્ચયા… હેતુયા પઞ્ચ.

૧-૧૦. કુસલત્તિક-સેક્ખત્તિકં

૨૨. કુસલં સેક્ખં ધમ્મં પટિચ્ચ નકુસલો નસેક્ખો ધમ્મો ઉપ્પજ્જતિ હેતુપચ્ચયા. (દ્વે મૂલાનિ.)… હેતુયા છ.

અબ્યાકતં અસેક્ખં ધમ્મં પટિચ્ચ નકુસલો નઅસેક્ખો ધમ્મો ઉપ્પજ્જતિ હેતુપચ્ચયા… હેતુયા તીણિ.

અબ્યાકતં નેવસેક્ખનાસેક્ખં ધમ્મં પચ્ચયા નઅબ્યાકતો નનેવસેક્ખનાસેક્ખો ધમ્મો ઉપ્પજ્જતિ હેતુપચ્ચયા… હેતુયા પઞ્ચ.

૧-૧૧. કુસલત્તિક-પરિત્તત્તિકં

૨૩. અબ્યાકતં પરિત્તં ધમ્મં પટિચ્ચ નકુસલો નપરિત્તો ધમ્મો ઉપ્પજ્જતિ હેતુપચ્ચયા… હેતુયા તીણિ.

કુસલં મહગ્ગતં ધમ્મં પટિચ્ચ નકુસલો નમહગ્ગતો ધમ્મો ઉપ્પજ્જતિ હેતુપચ્ચયા… હેતુયા છ.

કુસલં અપ્પમાણં ધમ્મં પટિચ્ચ નકુસલો નઅપ્પમાણો ધમ્મો ઉપ્પજ્જતિ હેતુપચ્ચયા… હેતુયા છ.

૧-૧૨. કુસલત્તિક-પરિત્તારમ્મણત્તિકં

૨૪. કુસલં પરિત્તારમ્મણં ધમ્મં પટિચ્ચ નકુસલો નપરિત્તારમ્મણો ધમ્મો ઉપ્પજ્જતિ હેતુપચ્ચયા… હેતુયા નવ.

કુસલં મહગ્ગતારમ્મણં ધમ્મં પટિચ્ચ નકુસલો નમહગ્ગતારમ્મણો ધમ્મો ઉપ્પજ્જતિ હેતુપચ્ચયા… હેતુયા નવ.

કુસલં અપ્પમાણારમ્મણં ધમ્મં પટિચ્ચ નકુસલો નઅપ્પમાણારમ્મણો ધમ્મો ઉપ્પજ્જતિ હેતુપચ્ચયા… હેતુયા છ.

૧-૧૩. કુસલત્તિક-હીનત્તિકં

૨૫. અકુસલં હીનં ધમ્મં પટિચ્ચ નઅકુસલો નહીનો ધમ્મો ઉપ્પજ્જતિ હેતુપચ્ચયા… હેતુયા તીણિ.

અબ્યાકતં મજ્ઝિમં ધમ્મં પચ્ચયા નઅબ્યાકતો નમજ્ઝિમો ધમ્મો ઉપ્પજ્જતિ હેતુપચ્ચયા… હેતુયા છ.

કુસલં પણીતં ધમ્મં પટિચ્ચ નકુસલો નપણીતો ધમ્મો ઉપ્પજ્જતિ હેતુપચ્ચયા… હેતુયા છ.

૧-૧૪. કુસલત્તિક-મિચ્છત્તનિયતત્તિકં

૨૬. અકુસલં મિચ્છત્તનિયતં ધમ્મં પટિચ્ચ નઅકુસલો નમિચ્છત્તનિયતો ધમ્મો ઉપ્પજ્જતિ હેતુપચ્ચયા… હેતુયા તીણિ.

કુસલં સમ્મત્તનિયતં ધમ્મં પટિચ્ચ નકુસલો નસમ્મત્તનિયતો ધમ્મો ઉપ્પજ્જતિ હેતુપચ્ચયા… હેતુયા તીણિ.

અબ્યાકતં અનિયતં ધમ્મં પચ્ચયા નઅબ્યાકતો નઅનિયતો ધમ્મો ઉપ્પજ્જતિ હેતુપચ્ચયા… હેતુયા પઞ્ચ.

૧-૧૫. કુસલત્તિક-મગ્ગારમ્મણત્તિકં

૨૭. કુસલં મગ્ગારમ્મણં ધમ્મં પટિચ્ચ નકુસલો નમગ્ગારમ્મણો ધમ્મો ઉપ્પજ્જતિ હેતુપચ્ચયા… હેતુયા છ.

કુસલં મગ્ગહેતુકં ધમ્મં પટિચ્ચ નકુસલો નમગ્ગહેતુકો ધમ્મો ઉપ્પજ્જતિ હેતુપચ્ચયા… હેતુયા તીણિ.

કુસલં મગ્ગાધિપતિં ધમ્મં પટિચ્ચ નકુસલો નમગ્ગાધિપતિ ધમ્મો ઉપ્પજ્જતિ હેતુપચ્ચયા… હેતુયા છ.

૧-૧૬. કુસલત્તિક-ઉપ્પન્નત્તિકં

૨૮. કુસલો અનુપ્પન્નો ધમ્મો નકુસલસ્સ નઅનુપ્પન્નસ્સ ધમ્મસ્સ આરમ્મણપચ્ચયેન પચ્ચયો… આરમ્મણે અટ્ઠારસ. (ઉપ્પાદી અનુપ્પન્નસદિસં.)

૧-૧૭. કુસલત્તિક-અતીતત્તિકં

૨૯. કુસલો અતીતો ધમ્મો નકુસલસ્સ નઅતીતસ્સ ધમ્મસ્સ આરમ્મણપચ્ચયેન પચ્ચયો.

આરમ્મણે અટ્ઠારસ. (અનાગતં અતીતસદિસં.)

૧-૧૮. કુસલત્તિક-અતીતારમ્મણત્તિકં

૩૦. કુસલં અતીતારમ્મણં ધમ્મં પટિચ્ચ નકુસલો નઅતીતારમ્મણો ધમ્મો ઉપ્પજ્જતિ હેતુપચ્ચયા… હેતુયા નવ.

કુસલં અનાગતારમ્મણં ધમ્મં પટિચ્ચ નકુસલો નઅનાગતારમ્મણો ધમ્મો ઉપ્પજ્જતિ હેતુપચ્ચયા… હેતુયા નવ.

કુસલં પચ્ચુપ્પન્નારમ્મણં ધમ્મં પટિચ્ચ નકુસલો નપચ્ચુપ્પન્નારમ્મણો ધમ્મો ઉપ્પજ્જતિ હેતુપચ્ચયા… હેતુયા નવ.

૧-૧૯-૨૦. કુસલત્તિક-અજ્ઝત્તત્તિકદ્વયં

૩૧. કુસલો અજ્ઝત્તો ધમ્મો નઅજ્ઝત્તસ્સ નકુસલસ્સ ધમ્મસ્સ આરમ્મણપચ્ચયેન પચ્ચયો. (સંખિત્તં.)… આરમ્મણે અટ્ઠારસ.

કુસલો બહિદ્ધા ધમ્મો નબહિદ્ધા નકુસલસ્સ ધમ્મસ્સ આરમ્મણપચ્ચયેન પચ્ચયો. (સંખિત્તં.)… આરમ્મણે અટ્ઠારસ.

૩૨. કુસલં અજ્ઝત્તારમ્મણં ધમ્મં પટિચ્ચ નકુસલો નઅજ્ઝત્તારમ્મણો ધમ્મો ઉપ્પજ્જતિ હેતુપચ્ચયા… હેતુયા નવ.

કુસલં બહિદ્ધારમ્મણં ધમ્મં પટિચ્ચ નકુસલો નબહિદ્ધારમ્મણો ધમ્મો ઉપ્પજ્જતિ હેતુપચ્ચયા… હેતુયા નવ.

૧-૨૧. કુસલત્તિક-સનિદસ્સનત્તિકં

૩૩. અબ્યાકતો સનિદસ્સનસપ્પટિઘો ધમ્મો નઅબ્યાકતસ્સ નસનિદસ્સનસપ્પટિઘસ્સ ધમ્મસ્સ આરમ્મણપચ્ચયેન પચ્ચયો… આરમ્મણે છ. (તીણિ વેદિતકં કાતબ્બં.)

૩૪. અબ્યાકતં અનિદસ્સનસપ્પટિઘં ધમ્મં પટિચ્ચ કુસલો નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. અબ્યાકતં અનિદસ્સનસપ્પટિઘં ધમ્મં પટિચ્ચ નઅકુસલો નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. અબ્યાકતં અનિદસ્સનસપ્પટિઘં ધમ્મં પટિચ્ચ નકુસલો નઅનિદસ્સનસપ્પટિઘો ચ નઅકુસલો નઅનિદસ્સનસપ્પટિઘો ચ ધમ્મા ઉપ્પજ્જન્તિ હેતુપચ્ચયા. હેતુયા તીણિ.

૩૫. કુસલં અનિદસ્સનઅપ્પટિઘં ધમ્મં પટિચ્ચ નકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા. કુસલં અનિદસ્સનઅપ્પટિઘં ધમ્મં પટિચ્ચ નઅકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા. કુસલં અનિદસ્સનઅપ્પટિઘં ધમ્મં પટિચ્ચ નકુસલો નઅનિદસ્સનઅપ્પટિઘો ચ નઅકુસલો નઅનિદસ્સનઅપ્પટિઘો ચ ધમ્મા ઉપ્પજ્જન્તિ હેતુપચ્ચયા. તીણિ.

અકુસલં અનિદસ્સનઅપ્પટિઘં ધમ્મં પટિચ્ચ નઅકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા. અકુસલં અનિદસ્સનઅપ્પટિઘં ધમ્મં પટિચ્ચ નકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા. અકુસલં અનિદસ્સનઅપ્પટિઘં ધમ્મં પટિચ્ચ નકુસલો નઅનિદસ્સનઅપ્પટિઘો ચ નઅકુસલો નઅનિદસ્સનઅપ્પટિઘો ચ ધમ્મા ઉપ્પજ્જન્તિ હેતુપચ્ચયા. તીણિ.

અબ્યાકતં અનિદસ્સનઅપ્પટિઘં ધમ્મં પટિચ્ચ નકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા. અબ્યાકતં અનિદસ્સનઅપ્પટિઘં ધમ્મં પટિચ્ચ નઅકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા. અબ્યાકતં અનિદસ્સનઅપ્પટિઘં ધમ્મં પટિચ્ચ નકુસલો નઅનિદસ્સનઅપ્પટિઘો ચ નઅકુસલો નઅનિદસ્સનઅપ્પટિઘો ચ ધમ્મા ઉપ્પજ્જન્તિ હેતુપચ્ચયા. તીણિ.

કુસલં અનિદસ્સનઅપ્પટિઘઞ્ચ અબ્યાકતં અનિદસ્સનઅપ્પટિઘઞ્ચ ધમ્મં પટિચ્ચ નકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા… તીણિ.

અકુસલં અનિદસ્સનઅપ્પટિઘઞ્ચ અબ્યાકતં અનિદસ્સનઅપ્પટિઘઞ્ચ ધમ્મં પટિચ્ચ નકુસલો નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા… તીણિ… હેતુયા પન્નરસ.

૨-૧. વેદનાત્તિક-કુસલત્તિકં

૩૬. સુખાય વેદનાય સમ્પયુત્તં કુસલં ધમ્મં પટિચ્ચ નસુખાય વેદનાય સમ્પયુત્તો નકુસલો ધમ્મો ઉપ્પજ્જતિ હેતુપચ્ચયા. સુખાય વેદનાય સમ્પયુત્તં કુસલં ધમ્મં પટિચ્ચ નદુક્ખાય વેદનાય સમ્પયુત્તો નકુસલો ધમ્મો ઉપ્પજ્જતિ હેતુપચ્ચયા. સુખાય વેદનાય સમ્પયુત્તં કુસલં ધમ્મં પટિચ્ચ નઅદુક્ખમસુખાય વેદનાય સમ્પયુત્તો નકુસલો ધમ્મો ઉપ્પજ્જતિ હેતુપચ્ચયા. સુખાય વેદનાય સમ્પયુત્તં કુસલં ધમ્મં પટિચ્ચ નસુખાય વેદનાય સમ્પયુત્તો નકુસલો ચ નઅદુક્ખમસુખાય વેદનાય સમ્પયુત્તો નકુસલો ચ ધમ્મા ઉપ્પજ્જન્તિ હેતુપચ્ચયા. સુખાય વેદનાય સમ્પયુત્તં કુસલં ધમ્મં પટિચ્ચ નદુક્ખાય વેદનાય સમ્પયુત્તો નકુસલો ચ નઅદુક્ખમસુખાય વેદનાય સમ્પયુત્તો નકુસલો ચ ધમ્મા ઉપ્પજ્જન્તિ હેતુપચ્ચયા. સુખાય વેદનાય સમ્પયુત્તં કુસલં ધમ્મં પટિચ્ચ નસુખાય વેદનાય સમ્પયુત્તો નકુસલો ચ નદુક્ખાય વેદનાય સમ્પયુત્તો નકુસલો ચ ધમ્મા ઉપ્પજ્જન્તિ હેતુપચ્ચયા. સુખાય વેદનાય સમ્પયુત્તં કુસલં ધમ્મં પટિચ્ચ નસુખાય વેદનાય સમ્પયુત્તો નકુસલો ચ નદુક્ખાય વેદનાય સમ્પયુત્તો નકુસલો ચ નઅદુક્ખમસુખાય વેદનાય સમ્પયુત્તો નકુસલો ચ ધમ્મા ઉપ્પજ્જન્તિ હેતુપચ્ચયા. સત્ત.

અદુક્ખમસુખાય વેદનાય સમ્પયુત્તં કુસલં ધમ્મં પટિચ્ચ નઅદુક્ખમસુખાય વેદનાય સમ્પયુત્તો નકુસલો ધમ્મો ઉપ્પજ્જતિ હેતુપચ્ચયા… સત્ત… હેતુયા ચુદ્દસ.

૩૭. સુખાય વેદનાય સમ્પયુત્તં અકુસલં ધમ્મં પટિચ્ચ નસુખાય વેદનાય સમ્પયુત્તો નકુસલો ધમ્મો ઉપ્પજ્જતિ હેતુપચ્ચયા… સત્ત.

દુક્ખાય વેદનાય સમ્પયુત્તં અકુસલં ધમ્મં પટિચ્ચ નદુક્ખાય વેદનાય સમ્પયુત્તો નઅકુસલો ધમ્મો ઉપ્પજ્જતિ હેતુપચ્ચયા… સત્ત.

અદુક્ખમસુખાય વેદનાય સમ્પયુત્તં અકુસલં ધમ્મં પટિચ્ચ નઅદુક્ખમસુખાય વેદનાય સમ્પયુત્તો નઅકુસલો ધમ્મો ઉપ્પજ્જતિ હેતુપચ્ચયા… સત્ત. (એકવીસતિ પઞ્હા.)

૩૮. સુખાય વેદનાય સમ્પયુત્તો અબ્યાકતો ધમ્મો નસુખાય વેદનાય સમ્પયુત્તસ્સ નઅબ્યાકતસ્સ ધમ્મસ્સ આરમ્મણપચ્ચયેન પચ્ચયો. (સંખિત્તં.)

આરમ્મણે એકવીસતિ. (દુક્ખાય વેદનાય સમ્પયુત્તઅબ્યાકતમૂલં અદુક્ખમસુખાય વેદનાય સમ્પયુત્તઅબ્યાકતમૂલમ્પિ કાતબ્બં.)

૩-૧. વિપાકત્તિક-કુસલત્તિકં

૩૯. વિપાકધમ્મધમ્મં કુસલં ધમ્મં પટિચ્ચ નવિપાકધમ્મધમ્મો નકુસલો ધમ્મો ઉપ્પજ્જતિ હેતુપચ્ચયા… હેતુયા તીણિ.

વિપાકધમ્મધમ્મં અકુસલં ધમ્મં પટિચ્ચ નવિપાકધમ્મધમ્મો નઅકુસલો ધમ્મો ઉપ્પજ્જતિ હેતુપચ્ચયા… હેતુયા તીણિ.

નેવવિપાકનવિપાકધમ્મધમ્મં અબ્યાકતં ધમ્મં પચ્ચયા નનેવવિપાકનવિપાકધમ્મધમ્મો નઅબ્યાકતો ધમ્મો ઉપ્પજ્જતિ હેતુપચ્ચયા… હેતુયા તીણિ.

૪-૧. ઉપાદિન્નત્તિક-કુસલત્તિકં

૪૦. અનુપાદિન્નુપાદાનિયં કુસલં ધમ્મં પટિચ્ચ નઉપાદિન્નુપાદાનિયો નકુસલો ધમ્મો ઉપ્પજ્જતિ હેતુપચ્ચયા… તીણિ.

અનુપાદિન્નઅનુપાદાનિયં કુસલં ધમ્મં પટિચ્ચ નઅનુપાદિન્નઅનુપાદાનિયો નકુસલો ધમ્મો ઉપ્પજ્જતિ હેતુપચ્ચયા… તીણિ હેતુયા છ.

અનુપાદિન્નુપાદાનિયં અકુસલં ધમ્મં પટિચ્ચ નઉપાદિન્નુપાદાનિયો નઅકુસલો ધમ્મો ઉપ્પજ્જતિ હેતુપચ્ચયા… હેતુયા તીણિ.

ઉપાદિન્નુપાદાનિયં અબ્યાકતં ધમ્મં પચ્ચયા નઉપાદિન્નુપાદાનિયો નઅબ્યાકતો ધમ્મો ઉપ્પજ્જતિ હેતુપચ્ચયા… હેતુયા પઞ્ચ.

૫-૧. સંકિલિટ્ઠત્તિક-કુસલત્તિકં

૪૧. અસંકિલિટ્ઠસંકિલેસિકં કુસલં ધમ્મં પટિચ્ચ નસંકિલિટ્ઠસંકિલેસિકો નકુસલો ધમ્મો ઉપ્પજ્જતિ હેતુપચ્ચયા… તીણિ.

અસંકિલિટ્ઠઅસંકિલેસિકં કુસલં ધમ્મં પટિચ્ચ નઅસંકિલિટ્ઠઅસંકિલેસિકો નકુસલો ધમ્મો ઉપ્પજ્જતિ હેતુપચ્ચયા… તીણિ… હેતુયા છ.

સંકિલિટ્ઠસંકિલેસિકં અકુસલં ધમ્મં પટિચ્ચ નસંકિલિટ્ઠસંકિલેસિકો નઅકુસલો ધમ્મો ઉપ્પજ્જતિ હેતુપચ્ચયા… તીણિ.

અસંકિલિટ્ઠસંકિલેસિકં અબ્યાકતં ધમ્મં પચ્ચયા નઅસંકિલિટ્ઠસંકિલેસિકો નઅબ્યાકતો ધમ્મો ઉપ્પજ્જતિ હેતુપચ્ચયા… (સંખિત્તં.) હેતુયા છ…પે… અવિગતે છ.

૬-૧. વિતક્કત્તિક-કુસલત્તિકં

૪૨. સવિતક્કસવિચારં કુસલં ધમ્મં પટિચ્ચ નસવિતક્કસવિચારો નકુસલો ધમ્મો ઉપ્પજ્જતિ હેતુપચ્ચયા… તીણિ.

અવિતક્કવિચારમત્તં કુસલં ધમ્મં પટિચ્ચ નઅવિતક્કવિચારમત્તો નકુસલો ધમ્મો ઉપ્પજ્જતિ હેતુપચ્ચયા… હેતુયા પન્નરસ.

સવિતક્કસવિચારં અકુસલં ધમ્મં પટિચ્ચ નસવિતક્કસવિચારો નઅકુસલો ધમ્મો ઉપ્પજ્જતિ હેતુપચ્ચયા… હેતુયા નવ.

૭-૧. પીતિત્તિક-કુસલત્તિકં

૪૩. પીતિસહગતં કુસલં ધમ્મં પટિચ્ચ નપીતિસહગતો નકુસલો ધમ્મો ઉપ્પજ્જતિ હેતુપચ્ચયા… સત્ત.

સુખસહગતં કુસલં ધમ્મં પટિચ્ચ નસુખસહગતો નકુસલો ધમ્મો ઉપ્પજ્જતિ હેતુપચ્ચયા… સત્ત.

ઉપેક્ખાસહગતં કુસલં ધમ્મં પટિચ્ચ નઉપેક્ખાસહગતો નકુસલો ધમ્મો ઉપ્પજ્જતિ હેતુપચ્ચયા… સત્ત. (વેદનાત્તિકસદિસં. સંખિત્તં.)

૨૨-૧. સનિદસ્સનત્તિક-કુસલત્તિકં

૪૪. અનિદસ્સનઅપ્પટિઘં કુસલં ધમ્મં પટિચ્ચ નઅનિદસ્સનઅપ્પટિઘો નકુસલો ધમ્મો ઉપ્પજ્જતિ હેતુપચ્ચયા. અનિદસ્સનઅપ્પટિઘં કુસલં ધમ્મં પટિચ્ચ નસનિદસ્સનસપ્પટિઘો નકુસલો ધમ્મો ઉપ્પજ્જતિ હેતુપચ્ચયા…પે… અનિદસ્સનઅપ્પટિઘં કુસલં ધમ્મં પટિચ્ચ નસનિદસ્સનસપ્પટિઘો નકુસલો ચ નઅનિદસ્સનસપ્પટિઘો નકુસલો ચ ધમ્મા ઉપ્પજ્જન્તિ હેતુપચ્ચયા… હેતુયા છ.

અનિદસ્સનઅપ્પટિઘં અકુસલં ધમ્મં પટિચ્ચ નઅનિદસ્સનઅપ્પટિઘો નઅકુસલો ધમ્મો ઉપ્પજ્જતિ હેતુપચ્ચયા. અનિદસ્સનઅપ્પટિઘં અકુસલં ધમ્મં પટિચ્ચ નસનિદસ્સનસપ્પટિઘો નકુસલો ધમ્મો ઉપ્પજ્જતિ હેતુપચ્ચયા…પે… અનિદસ્સનઅપ્પટિઘં અકુસલં ધમ્મં પટિચ્ચ નસનિદસ્સનસપ્પટિઘો નકુસલો ચ નઅનિદસ્સનસપ્પટિઘો નઅકુસલો ચ ધમ્મા ઉપ્પજ્જન્તિ હેતુપચ્ચયા (સંખિત્તં.) હેતુયા છ…પે… અવિગતે છ.

અનિદસ્સનઅપ્પટિઘં અબ્યાકતં ધમ્મં પચ્ચયા નસનિદસ્સનસપ્પટિઘો નઅબ્યાકતો ધમ્મો ઉપ્પજ્જતિ હેતુપચ્ચયા. અનિદસ્સનઅપ્પટિઘં અબ્યાકતં ધમ્મં પચ્ચયા નઅનિદસ્સનસપ્પટિઘો નઅબ્યાકતો ધમ્મો ઉપ્પજ્જતિ હેતુપચ્ચયા. અનિદસ્સનઅપ્પટિઘં અબ્યાકતં ધમ્મં પચ્ચયા નસનિદસ્સનસપ્પટિઘો નઅબ્યાકતો ચ નઅનિદસ્સનસપ્પટિઘો નઅબ્યાકતો ચ ધમ્મા ઉપ્પજ્જન્તિ હેતુપચ્ચયા… હેતુયા તીણિ…પે… અવિગતે તીણિ.

૨૨-૨. સનિદસ્સનત્તિક-વેદનાત્તિકં

૪૫. અનિદસ્સનઅપ્પટિઘં સુખાય વેદનાય સમ્પયુત્તં ધમ્મં પટિચ્ચ નઅનિદસ્સનઅપ્પટિઘો નસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા… હેતુયા છ.

અનિદસ્સનઅપ્પટિઘં દુક્ખાય વેદનાય સમ્પયુત્તં ધમ્મં પટિચ્ચ નઅનિદસ્સનઅપ્પટિઘો નદુક્ખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા… હેતુયા છ.

અનિદસ્સનઅપ્પટિઘં અદુક્ખમસુખાય વેદનાય સમ્પયુત્તં ધમ્મં પટિચ્ચ નઅનિદસ્સનઅપ્પટિઘો નઅદુક્ખમસુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયા… હેતુયા છ.

૨૨-૩. સનિદસ્સનત્તિક-વિપાકત્તિકં

૪૬. અનિદસ્સનઅપ્પટિઘં વિપાકં ધમ્મં પટિચ્ચ નઅનિદસ્સનઅપ્પટિઘો નવિપાકો ધમ્મો ઉપ્પજ્જતિ હેતુપચ્ચયા… હેતુયા છ.