૧. વિભઙ્ગવારો

હેતુપચ્ચયો

૬૩. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ હેતુપચ્ચયેન પચ્ચયો – પરામાસસમ્પયુત્તા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (મૂલં કાતબ્બં) પરામાસસમ્પયુત્તા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (મૂલં કાતબ્બં) પરામાસસમ્પયુત્તા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ હેતુપચ્ચયેન પચ્ચયો – પરામાસવિપ્પયુત્તા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

આરમ્મણપચ્ચયો

૬૪. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – રાગં અસ્સાદેતિ અભિનન્દતિ, તં આરબ્ભ પરામાસસમ્પયુત્તો રાગો ઉપ્પજ્જતિ; પરામાસસમ્પયુત્તે ખન્ધે અસ્સાદેતિ અભિનન્દતિ, તં આરબ્ભ પરામાસસમ્પયુત્તો રાગો ઉપ્પજ્જતિ. (૧)

પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો – અરિયા પરામાસસમ્પયુત્તે પહીને કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ, પરામાસસમ્પયુત્તે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ પરામાસવિપ્પયુત્તો રાગો…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ; ચેતોપરિયઞાણેન પરામાસસમ્પયુત્તચિત્તસમઙ્ગિસ્સ ચિત્તં જાનાતિ, પરામાસસમ્પયુત્તા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૬૫. પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં પચ્ચવેક્ખતિ, અસ્સાદેતિ અભિનન્દતિ, તં આરબ્ભ પરામાસવિપ્પયુત્તો રાગો…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ; પુબ્બે સુચિણ્ણાનિ…પે… ઝાના…પે… અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં…પે… નિબ્બાનં…પે… નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો; અરિયા પરામાસવિપ્પયુત્તે પહીને કિલેસે…પે… વિક્ખમ્ભિતે કિલેસે…પે… પુબ્બે…પે… ચક્ખું…પે… વત્થું પરામાસવિપ્પયુત્તે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ પરામાસવિપ્પયુત્તો રાગો…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. ચેતોપરિયઞાણેન પરામાસવિપ્પયુત્તચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… પરામાસવિપ્પયુત્તા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

પરામાસવિપ્પયુત્તો ધમ્મો પરામાસસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં…પે… પુબ્બે…પે… ઝાના…પે… ચક્ખું…પે… વત્થું પરામાસવિપ્પયુત્તે ખન્ધે અસ્સાદેતિ અભિનન્દતિ. તં આરબ્ભ પરામાસસમ્પયુત્તો રાગો ઉપ્પજ્જતિ. (૨)

અધિપતિપચ્ચયો

૬૬. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – રાગં ગરું કત્વા અસ્સાદેતિ અભિનન્દતિ, તં ગરું કત્વા પરામાસસમ્પયુત્તો રાગો ઉપ્પજ્જતિ, પરામાસસમ્પયુત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા પરામાસસમ્પયુત્તો રાગો ઉપ્પજ્જતિ. સહજાતાધિપતિ – પરામાસસમ્પયુત્તાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – પરામાસસમ્પયુત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા પરામાસવિપ્પયુત્તો રાગો ઉપ્પજ્જતિ. સહજાતાધિપતિ – પરામાસસમ્પયુત્તાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

પરામાસસમ્પયુત્તો ધમ્મો પરામાસસમ્પયુત્તસ્સ ચ પરામાસવિપ્પયુત્તસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – પરામાસસમ્પયુત્તાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૬૭. પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા પચ્ચવેક્ખતિ, અસ્સાદેતિ અભિનન્દતિ, તં ગરું કત્વા પરામાસવિપ્પયુત્તો રાગો ઉપ્પજ્જતિ, પુબ્બે…પે… ઝાના…પે… અરિયા મગ્ગા વુટ્ઠહિત્વા મગ્ગં ગરું કત્વા…પે… ફલં…પે… નિબ્બાનં…પે… નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ અધિપતિપચ્ચયેન પચ્ચયો; ચક્ખું…પે… વત્થું પરામાસવિપ્પયુત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા પરામાસવિપ્પયુત્તો રાગો ઉપ્પજ્જતિ. સહજાતાધિપતિ – પરામાસવિપ્પયુત્તાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

પરામાસવિપ્પયુત્તો ધમ્મો પરામાસસમ્પયુત્તસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા અસ્સાદેતિ અભિનન્દતિ, તં ગરું કત્વા પરામાસસમ્પયુત્તો રાગો ઉપ્પજ્જતિ, પુબ્બે…પે… ઝાના…પે… ચક્ખું…પે… વત્થું પરામાસવિપ્પયુત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા પરામાસસમ્પયુત્તો રાગો ઉપ્પજ્જતિ. (૨)

અનન્તર-સમનન્તરપચ્ચયા

૬૮. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા પરામાસસમ્પયુત્તા ખન્ધા પચ્છિમાનં પચ્છિમાનં પરામાસસમ્પયુત્તકાનં ખન્ધાનં અનન્તરપચ્ચયેન પચ્ચયો. (૧)

પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ અનન્તરપચ્ચયેન પચ્ચયો – પરામાસસમ્પયુત્તા ખન્ધા વુટ્ઠાનસ્સ અનન્તરપચ્ચયેન પચ્ચયો. (૨)

૬૯. પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા પરામાસવિપ્પયુત્તા ખન્ધા પચ્છિમાનં પચ્છિમાનં પરામાસવિપ્પયુત્તાનં ખન્ધાનં અનન્તરપચ્ચયેન પચ્ચયો; અનુલોમં…પે… ફલસમાપત્તિયા અનન્તરપચ્ચયેન પચ્ચયો. (૧)

પરામાસવિપ્પયુત્તો ધમ્મો પરામાસસમ્પયુત્તસ્સ ધમ્મસ્સ અનન્તરપચ્ચયેન પચ્ચયો – આવજ્જના પરામાસસમ્પયુત્તકાનં ખન્ધાનં અનન્તરપચ્ચયેન પચ્ચયો… સમનન્તરપચ્ચયેન પચ્ચયો. (૨)

સહજાતપચ્ચયાદિ

૭૦. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ સહજાતપચ્ચયેન પચ્ચયો… પઞ્ચ… અઞ્ઞમઞ્ઞપચ્ચયેન પચ્ચયો… દ્વે… નિસ્સયપચ્ચયેન પચ્ચયો… સત્ત.

ઉપનિસ્સયપચ્ચયો

૭૧. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પરામાસસમ્પયુત્તો રાગો… મોહો… પત્થના પરામાસસમ્પયુત્તસ્સ રાગસ્સ… મોહસ્સ… પત્થનાય ઉપનિસ્સયપચ્ચયેન પચ્ચયો. (૧)

પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પરામાસસમ્પયુત્તં રાગં ઉપનિસ્સાય દાનં દેતિ…પે… સમાપત્તિં ઉપ્પાદેતિ, માનં જપ્પેતિ; પરામાસસમ્પયુત્તં મોહં… પત્થનં ઉપનિસ્સાય દાનં દેતિ…પે… સમાપત્તિં ઉપ્પાદેતિ, માનં જપ્પેતિ, પાણં હનતિ…પે… સઙ્ઘં ભિન્દતિ; પરામાસસમ્પયુત્તો રાગો… મોહો… પત્થના સદ્ધાય …પે… પઞ્ઞાય, રાગસ્સ… દોસસ્સ… મોહસ્સ… માનસ્સ… પત્થનાય… કાયિકસ્સ સુખસ્સ…પે… ફલસમાપત્તિયા ઉપનિસ્સયપચ્ચયેન પચ્ચયો. (૨)

૭૨. પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ …પે… સમાપત્તિં ઉપ્પાદેતિ, માનં જપ્પેતિ; સીલં…પે… પઞ્ઞં, રાગં…પે… માનં…પે… પત્થનં ઉપનિસ્સાય દાનં દેતિ…પે… સમાપત્તિં ઉપ્પાદેતિ, પાણં હનતિ…પે… સઙ્ઘં ભિન્દતિ; કાયિકં સુખં…પે… સેનાસનં ઉપનિસ્સાય દાનં દેતિ…પે… સઙ્ઘં ભિન્દતિ; સદ્ધા…પે… પઞ્ઞા, રાગો…પે… માનો… પત્થના… કાયિકં સુખં…પે… સેનાસનં સદ્ધાય…પે… પઞ્ઞાય, રાગસ્સ…પે… માનસ્સ… પત્થનાય… કાયિકસ્સ સુખસ્સ…પે… ફલસમાપત્તિયા ઉપનિસ્સયપચ્ચયેન પચ્ચયો. (૧)

પરામાસવિપ્પયુત્તો ધમ્મો પરામાસસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય પરામાસસમ્પયુત્તો રાગો ઉપ્પજ્જતિ; સીલં…પે… સેનાસનં ઉપનિસ્સાય પરામાસસમ્પયુત્તો રાગો ઉપ્પજ્જતિ; સદ્ધા…પે… સેનાસનં પરામાસસમ્પયુત્તસ્સ રાગસ્સ…પે… પત્થનાય ઉપનિસ્સયપચ્ચયેન પચ્ચયો. (૨)

પુરેજાતપચ્ચયો

૭૩. પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ પરામાસવિપ્પયુત્તો રાગો…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ …પે… કાયાયતનં કાયવિઞ્ઞાણસ્સ…પે… વત્થુ પરામાસવિપ્પયુત્તાનં ખન્ધાનં પુરેજાતપચ્ચયેન પચ્ચયો. (૧)

પરામાસવિપ્પયુત્તો ધમ્મો પરામાસસમ્પયુત્તસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ પરામાસસમ્પયુત્તો રાગો ઉપ્પજ્જતિ. વત્થુપુરેજાતં – વત્થુ પરામાસસમ્પયુત્તકાનં ખન્ધાનં પુરેજાતપચ્ચયેન પચ્ચયો. (૨)

પચ્છાજાતાસેવનપચ્ચયા

૭૪. પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). (૧)

પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). (૧)

પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ આસેવનપચ્ચયેન પચ્ચયો… દ્વે.

કમ્મપચ્ચયાદિ

૭૫. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ કમ્મપચ્ચયેન પચ્ચયો – પરામાસસમ્પયુત્તા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – પરામાસસમ્પયુત્તા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – પરામાસસમ્પયુત્તા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (મૂલં કાતબ્બં) પરામાસસમ્પયુત્તા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – પરામાસવિપ્પયુત્તા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – પરામાસવિપ્પયુત્તા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

વિપાકપચ્ચયેન પચ્ચયો… એકં, આહારપચ્ચયેન પચ્ચયો… ચત્તારિ, ઇન્દ્રિયપચ્ચયેન પચ્ચયો… ચત્તારિ, ઝાનપચ્ચયેન પચ્ચયો… ચત્તારિ, મગ્ગપચ્ચયેન પચ્ચયો… ચત્તારિ, સમ્પયુત્તપચ્ચયેન પચ્ચયો… દ્વે.

વિપ્પયુત્તપચ્ચયો

૭૬. પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (સંખિત્તં). (૧)

પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં (સંખિત્તં). (૧)

પરામાસવિપ્પયુત્તો ધમ્મો પરામાસસમ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ પરામાસમ્પયુત્તકાનં ખન્ધાનં વિપ્પયુત્તપચ્ચયેન પચ્ચયો. (૧)

અત્થિપચ્ચયો

૭૭. પરામાસસમ્પયુત્તો ધમ્મો પરામાસસમ્પયુત્તસ્સ ધમ્મસ્સ અત્થિપચ્ચયેન પચ્ચયો – પરામાસસમ્પયુત્તો એકો ખન્ધો તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા…પે…. (૧)

પરામાસસમ્પયુત્તો ધમ્મો પરામાસવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – પરામાસસમ્પયુત્તા ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. (મૂલં કાતબ્બં.) (૨)

પરામાસસમ્પયુત્તો ધમ્મો પરામાસસમ્પયુત્તસ્સ ચ પરામાસવિપ્પયુત્તસ્સ ચ ધમ્મસ્સ અત્થિપચ્ચયેન પચ્ચયો – પરામાસસમ્પયુત્તો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે…. (૩)

૭૮. પરામાસવિપ્પયુત્તો ધમ્મો પરામાસવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). (૧)

પરામાસવિપ્પયુત્તો ધમ્મો પરામાસસમ્પયુત્તસ્સ ધમ્મસ્સ અત્થિપચ્ચયેન પચ્ચયો. પુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ પરામાસસમ્પયુત્તો રાગો ઉપ્પજ્જતિ, વત્થુ પરામાસસમ્પયુત્તકાનં ખન્ધાનં અત્થિપચ્ચયેન પચ્ચયો. (૨)

૭૯. પરામાસસમ્પયુત્તો ચ પરામાસવિપ્પયુત્તો ચ ધમ્મા પરામાસસમ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – પરામાસસમ્પયુત્તો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. (૧)

પરામાસસમ્પયુત્તો ચ પરામાસવિપ્પયુત્તો ચ ધમ્મા પરામાસવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – પરામાસસમ્પયુત્તા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – પરામાસસમ્પયુત્તા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – પરામાસસમ્પયુત્તા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)