૧. વિભઙ્ગવારો

હેતુપચ્ચયો

૫૪. પરામાસસમ્પયુત્તં ધમ્મં પચ્ચયા પરામાસસમ્પયુત્તો ધમ્મો ઉપ્પજ્જતિ હેતુપચ્ચયા… તીણિ (પટિચ્ચવારસદિસો).

પરામાસવિપ્પયુત્તં ધમ્મં પચ્ચયા પરામાસવિપ્પયુત્તો ધમ્મો ઉપ્પજ્જતિ હેતુપચ્ચયા – પરામાસવિપ્પયુત્તં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… (યાવ અજ્ઝત્તિકા મહાભૂતા) વત્થું પચ્ચયા પરામાસવિપ્પયુત્તા ખન્ધા. (૧)

પરામાસવિપ્પયુત્તં ધમ્મં પચ્ચયા પરામાસસમ્પયુત્તો ધમ્મો ઉપ્પજ્જતિ હેતુપચ્ચયા – વત્થું પચ્ચયા પરામાસસમ્પયુત્તકા ખન્ધા. (૨)

પરામાસવિપ્પયુત્તં ધમ્મં પચ્ચયા પરામાસસમ્પયુત્તો ચ પરામાસવિપ્પયુત્તો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા પરામાસસમ્પયુત્તકા ખન્ધા, મહાભૂતે પચ્ચયા ચિત્તસમુટ્ઠાનં રૂપં. (૩)

૫૫. પરામાસસમ્પયુત્તઞ્ચ પરામાસવિપ્પયુત્તઞ્ચ ધમ્મં પચ્ચયા પરામાસસમ્પયુત્તો ધમ્મો ઉપ્પજ્જતિ હેતુપચ્ચયા – પરામાસસમ્પયુત્તં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે…. (૧)

પરામાસસમ્પયુત્તઞ્ચ પરામાસવિપ્પયુત્તઞ્ચ ધમ્મં પચ્ચયા પરામાસવિપ્પયુત્તો ધમ્મો ઉપ્પજ્જતિ હેતુપચ્ચયા – પરામાસસમ્પયુત્તે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. (૨)

પરામાસસમ્પયુત્તઞ્ચ પરામાસવિપ્પયુત્તઞ્ચ ધમ્મં પચ્ચયા પરામાસસમ્પયુત્તો ચ પરામાસવિપ્પયુત્તો ચ ધમ્મા ઉપ્પજ્જન્તિ હેતુપચ્ચયા – પરામાસસમ્પયુત્તં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… પરામાસસમ્પયુત્તે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં (સંખિત્તં). (૩)