૧. વિભઙ્ગવારો

હેતુપચ્ચયો

૯૦. નીવરણો ચેવ નીવરણિયો ચ ધમ્મો નીવરણસ્સ ચેવ નીવરણિયસ્સ ચ ધમ્મસ્સ હેતુપચ્ચયેન પચ્ચયો – નીવરણા ચેવ નીવરણિયા ચ હેતૂ સમ્પયુત્તકાનં નીવરણાનં હેતુપચ્ચયેન પચ્ચયો. (૧)

નીવરણો ચેવ નીવરણિયો ચ ધમ્મો નીવરણિયસ્સ ચેવ નો ચ નીવરણસ્સ ધમ્મસ્સ હેતુપચ્ચયેન પચ્ચયો – નીવરણા ચેવ નીવરણિયા ચ હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૨)

નીવરણો ચેવ નીવરણિયો ચ ધમ્મો નીવરણસ્સ ચેવ નીવરણિયસ્સ ચ નીવરણિયસ્સ ચેવ નો ચ નીવરણસ્સ ચ ધમ્મસ્સ હેતુપચ્ચયેન પચ્ચયો – નીવરણા ચેવ નીવરણિયા ચ હેતૂ સમ્પયુત્તકાનં ખન્ધાનં નીવરણાનઞ્ચ ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

નીવરણિયો ચેવ નો ચ નીવરણો ધમ્મો નીવરણિયસ્સ ચેવ નો ચ નીવરણસ્સ ધમ્મસ્સ હેતુપચ્ચયેન પચ્ચયો – નીવરણિયા ચેવ નો ચ નીવરણા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

આરમ્મણપચ્ચયો

૯૧. નીવરણો ચેવ નીવરણિયો ચ ધમ્મો નીવરણસ્સ ચેવ નીવરણિયસ્સ ચ ધમ્મસ્સ આરમ્મણપચ્ચયેન પચ્ચયો – નીવરણે આરબ્ભ નીવરણા ઉપ્પજ્જન્તિ. (મૂલં પુચ્છિતબ્બં) નીવરણે આરબ્ભ નીવરણિયા ચેવ નો ચ નીવરણા ખન્ધા ઉપ્પજ્જન્તિ. (મૂલં પુચ્છિતબ્બં) નીવરણે આરબ્ભ નીવરણા ચ સમ્પયુત્તકા ચ ખન્ધા ઉપ્પજ્જન્તિ. (૩)

નીવરણિયો ચેવ નો ચ નીવરણો ધમ્મો નીવરણિયસ્સ ચેવ નો ચ નીવરણસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં પચ્ચવેક્ખતિ, અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ… વિચિકિચ્છા… ઉદ્ધચ્ચં… દોમનસ્સં ઉપ્પજ્જતિ; પુબ્બે સુચિણ્ણાનિ…પે… ઝાના…પે… અરિયા ગોત્રભું પચ્ચવેક્ખન્તિ, વોદાનં…પે… પહીને કિલેસે …પે… વિક્ખમ્ભિતે કિલેસે…પે… પુબ્બે સમુદાચિણ્ણે…પે… ચક્ખું…પે… વત્થું નીવરણિયે ચેવ નો ચ નીવરણે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ…પે… (યાવ આવજ્જના તાવ કાતબ્બા). (૧)

નીવરણિયો ચેવ નો ચ નીવરણો ધમ્મો નીવરણસ્સ ચેવ નીવરણિયસ્સ ચ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં…પે… પુબ્બે સુચિણ્ણાનિ…પે… ઝાના…પે… ચક્ખું…પે… વત્થું નીવરણિયે ચેવ નો ચ નીવરણે ખન્ધે અસ્સાદેતિ અભિનન્દતિ, તં આરબ્ભ રાગો…પે… દિટ્ઠિ… વિચિકિચ્છા… ઉદ્ધચ્ચં… દોમનસ્સં ઉપ્પજ્જતિ. (૨)

નીવરણિયો ચેવ નો ચ નીવરણો ધમ્મો નીવરણસ્સ ચેવ નીવરણિયસ્સ ચ નીવરણિયસ્સ ચેવ નો ચ નીવરણસ્સ ચ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં…પે… પુબ્બે સુચિણ્ણાનિ…પે… ઝાના …પે… ચક્ખું…પે… વત્થું નીવરણિયે ચેવ નો ચ નીવરણે ખન્ધે અસ્સાદેતિ અભિનન્દતિ, તં આરબ્ભ નીવરણા ચ સમ્પયુત્તકા ચ ખન્ધા ઉપ્પજ્જન્તિ (એવં ઇતરેપિ તીણિ કાતબ્બા). (૩)

(આરમ્મણસદિસા અધિપતિપચ્ચયા, પુરેજાતમ્પિ આરમ્મણસદિસં. ઉપનિસ્સયેપિ લોકુત્તરં ન કાતબ્બં. સંખિત્તં, એવં વિત્થારેતબ્બં યથા નીવરણદુકં, એવં પચ્ચવેક્ખિત્વા કાતબ્બં.)

નીવરણનીવરણિયદુકં નિટ્ઠિતં.