૧. વિભઙ્ગવારો

હેતુપચ્ચયો

૧૩. નીવરણં ધમ્મં પચ્ચયા નીવરણો ધમ્મો ઉપ્પજ્જતિ હેતુપચ્ચયા… તીણિ.

નોનીવરણં ધમ્મં પચ્ચયા નોનીવરણો ધમ્મો ઉપ્પજ્જતિ હેતુપચ્ચયા – નોનીવરણં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… (યાવ અજ્ઝત્તિકા મહાભૂતા), વત્થું પચ્ચયા નોનીવરણા ખન્ધા. (૧)

નોનીવરણં ધમ્મં પચ્ચયા નીવરણો ધમ્મો ઉપ્પજ્જતિ હેતુપચ્ચયા – નોનીવરણે ખન્ધે પચ્ચયા નીવરણા, વત્થું પચ્ચયા નીવરણા. (૨)

નોનીવરણં ધમ્મં પચ્ચયા નીવરણો ચ નોનીવરણો ચ ધમ્મા ઉપ્પજ્જન્તિ હેતુપચ્ચયા – નોનીવરણં એકં ખન્ધં પચ્ચયા તયો ખન્ધા નીવરણા ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે… વત્થું પચ્ચયા નીવરણા, મહાભૂતે પચ્ચયા ચિત્તસમુટ્ઠાનં રૂપં, વત્થું પચ્ચયા નીવરણા ચ સમ્પયુત્તકા ચ ખન્ધા. (૩)

૧૪. નીવરણઞ્ચ નોનીવરણઞ્ચ ધમ્મં પચ્ચયા નીવરણો ધમ્મો ઉપ્પજ્જતિ હેતુપચ્ચયા – કામચ્છન્દનીવરણઞ્ચ સમ્પયુત્તકે ચ ખન્ધે પચ્ચયા થિનમિદ્ધનીવરણં ઉદ્ધચ્ચનીવરણં અવિજ્જાનીવરણં (ચક્કં). કામચ્છન્દનીવરણઞ્ચ વત્થુઞ્ચ પચ્ચયા થિનમિદ્ધનીવરણં ઉદ્ધચ્ચનીવરણં અવિજ્જાનીવરણં (ચક્કં). (૧)

નીવરણઞ્ચ નોનીવરણઞ્ચ ધમ્મં પચ્ચયા નોનીવરણો ધમ્મો ઉપ્પજ્જતિ હેતુપચ્ચયા – નોનીવરણં એકં ખન્ધઞ્ચ નીવરણઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… નીવરણઞ્ચ વત્થુઞ્ચ પચ્ચયા સમ્પયુત્તકા ખન્ધા, નીવરણઞ્ચ સમ્પયુત્તકે ચ ખન્ધે પચ્ચયા ચિત્તસમુટ્ઠાનં રૂપં, નીવરણે ચ મહાભૂતે ચ પચ્ચયા ચિત્તસમુટ્ઠાનં રૂપં. (૨)

નીવરણઞ્ચ નોનીવરણઞ્ચ ધમ્મં પચ્ચયા નીવરણો ચ નોનીવરણો ચ ધમ્મા ઉપ્પજ્જન્તિ હેતુપચ્ચયા – નોનીવરણં એકં ખન્ધઞ્ચ કામચ્છન્દનીવરણઞ્ચ પચ્ચયા તયો ખન્ધા થિનમિદ્ધનીવરણં ઉદ્ધચ્ચનીવરણં અવિજ્જાનીવરણં…પે… દ્વે ખન્ધે …પે… (ચક્કં). કામચ્છન્દનીવરણઞ્ચ વત્થુઞ્ચ પચ્ચયા થિનમિદ્ધનીવરણં ઉદ્ધચ્ચનીવરણં અવિજ્જાનીવરણં સમ્પયુત્તકા ચ ખન્ધા (ચક્કં. સંખિત્તં). (૩)