૧-૪. પચ્ચયચતુક્કં

હેતુપચ્ચયો

૧૦૭. ગન્થઞ્ચેવ ગન્થસમ્પયુત્તઞ્ચ ધમ્મં પટિચ્ચ ગન્થો ચેવ ગન્થસમ્પયુત્તો ચ ધમ્મો ઉપ્પજ્જતિ હેતુપચ્ચયા – સીલબ્બતપરામાસં કાયગન્થં પટિચ્ચ અભિજ્ઝાકાયગન્થો, અભિજ્ઝાકાયગન્થં પટિચ્ચ સીલબ્બતપરામાસો કાયગન્થો, ઇદંસચ્ચાભિનિવેસકાયગન્થં પટિચ્ચ અભિજ્ઝાકાયગન્થો, અભિજ્ઝાકાયગન્થં પટિચ્ચ ઇદંસચ્ચાભિનિવેસો કાયગન્થો. (૧)

ગન્થઞ્ચેવ ગન્થસમ્પયુત્તઞ્ચ ધમ્મં પટિચ્ચ ગન્થસમ્પયુત્તો ચેવ નો ચ ગન્થો ધમ્મો ઉપ્પજ્જતિ હેતુપચ્ચયા – ગન્થે પટિચ્ચ સમ્પયુત્તકા ખન્ધા. (૨)

ગન્થઞ્ચેવ ગન્થસમ્પયુત્તઞ્ચ ધમ્મં પટિચ્ચ ગન્થો ચેવ ગન્થસમ્પયુત્તો ચ ગન્થસમ્પયુત્તો ચેવ નો ચ ગન્થો ચ ધમ્મા ઉપ્પજ્જન્તિ હેતુપચ્ચયા – સીલબ્બતપરામાસં કાયગન્થં પટિચ્ચ અભિજ્ઝાકાયગન્થો સમ્પયુત્તકા ચ ખન્ધા (ચક્કં). (૩)

૧૦૮. ગન્થસમ્પયુત્તઞ્ચેવ નો ચ ગન્થં ધમ્મં પટિચ્ચ ગન્થસમ્પયુત્તો ચેવ નો ચ ગન્થો ધમ્મો ઉપ્પજ્જતિ હેતુપચ્ચયા – ગન્થસમ્પયુત્તઞ્ચેવ નો ચ ગન્થં એકં ખન્ધં પટિચ્ચ તયો ખન્ધા…પે… દ્વે ખન્ધે…પે…. (૧)

ગન્થસમ્પયુત્તઞ્ચેવ નો ચ ગન્થં ધમ્મં પટિચ્ચ ગન્થો ચેવ ગન્થસમ્પયુત્તો ચ ધમ્મો ઉપ્પજ્જતિ હેતુપચ્ચયા – ગન્થસમ્પયુત્તે ચેવ નો ચ ગન્થે ખન્ધે પટિચ્ચ ગન્થા. (૨)

ગન્થસમ્પયુત્તઞ્ચેવ નો ચ ગન્થં ધમ્મં પટિચ્ચ ગન્થો ચેવ ગન્થસમ્પયુત્તો ચ ગન્થસમ્પયુત્તો ચેવ નો ચ ગન્થો ચ ધમ્મા ઉપ્પજ્જન્તિ હેતુપચ્ચયા – ગન્થસમ્પયુત્તઞ્ચેવ નો ચ ગન્થં એકં ખન્ધં પટિચ્ચ તયો ખન્ધા ગન્થા ચ…પે… દ્વે ખન્ધે…પે…. (૩)

૧૦૯. ગન્થઞ્ચેવ ગન્થસમ્પયુત્તઞ્ચ ગન્થસમ્પયુત્તઞ્ચેવ નો ચ ગન્થઞ્ચ ધમ્મં પટિચ્ચ ગન્થો ચેવ ગન્થસમ્પયુત્તો ચ ધમ્મો ઉપ્પજ્જતિ હેતુપચ્ચયા – ગન્થે ચ સમ્પયુત્તકે ચ ખન્ધે પટિચ્ચ ગન્થા. (૧)

ગન્થઞ્ચેવ ગન્થસમ્પયુત્તઞ્ચ ગન્થસમ્પયુત્તઞ્ચેવ નો ચ ગન્થઞ્ચ ધમ્મં પટિચ્ચ ગન્થસમ્પયુત્તો ચેવ નો ચ ગન્થો ધમ્મો ઉપ્પજ્જતિ હેતુપચ્ચયા – ગન્થસમ્પયુત્તઞ્ચેવ નો ચ ગન્થં એકં ખન્ધઞ્ચ ગન્થે ચ પટિચ્ચ તયો ખન્ધા…પે… દ્વે ખન્ધે ચ…પે…. (૨)

ગન્થઞ્ચેવ ગન્થસમ્પયુત્તઞ્ચ ગન્થસમ્પયુત્તઞ્ચેવ નો ચ ગન્થઞ્ચ ધમ્મં પટિચ્ચ ગન્થો ચેવ ગન્થસમ્પયુત્તો ચ ગન્થસમ્પયુત્તો ચેવ નો ચ ગન્થો ચ ધમ્મા ઉપ્પજ્જન્તિ હેતુપચ્ચયા – ગન્થસમ્પયુત્તઞ્ચેવ નો ચ ગન્થં એકં ખન્ધઞ્ચ સીલબ્બતપરામાસં કાયગન્થઞ્ચ પટિચ્ચ તયો ખન્ધા અભિજ્ઝાકાયગન્થો ચ…પે… દ્વે ખન્ધે ચ…પે… (ચક્કં બન્ધિતબ્બં. સંખિત્તં). (૩)

૧૧૦. હેતુયા નવ, આરમ્મણે નવ (સબ્બત્થ નવ), કમ્મે નવ, આહારે નવ…પે… અવિગતે નવ.

અનુલોમં.