૧. વિભઙ્ગવારો

નહેતુપચ્ચયો

૫. નોગન્થં ધમ્મં પટિચ્ચ નોગન્થો ધમ્મો ઉપ્પજ્જતિ નહેતુપચ્ચયા – અહેતુકં નોગન્થં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… અહેતુકપટિસન્ધિક્ખણે (યાવ અસઞ્ઞસત્તા), વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૧)

નઆરમ્મણપચ્ચયાદિ

૬. ગન્થં ધમ્મં પટિચ્ચ નોગન્થો ધમ્મો ઉપ્પજ્જતિ નઆરમ્મણપચ્ચયા – ગન્થે પટિચ્ચ ચિત્તસમુટ્ઠાનં રૂપં. (૧)

નોગન્થં ધમ્મં પટિચ્ચ નોગન્થો ધમ્મો ઉપ્પજ્જતિ નઆરમ્મણપચ્ચયા – નોગન્થે ખન્ધે પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે… (યાવ અસઞ્ઞસત્તા). (૧)

ગન્થઞ્ચ નોગન્થઞ્ચ ધમ્મં પટિચ્ચ નોગન્થો ધમ્મો ઉપ્પજ્જતિ નઆરમ્મણપચ્ચયા – ગન્થે ચ સમ્પયુત્તકે ચ ખન્ધે પટિચ્ચ ચિત્તસમુટ્ઠાનં રૂપં (સંખિત્તં).

નઅધિપતિપચ્ચયા… નવ, નઅનન્તરપચ્ચયા… તીણિ, નસમનન્તરપચ્ચયા… તીણિ, નઅઞ્ઞમઞ્ઞપચ્ચયા… તીણિ, નઉપનિસ્સયપચ્ચયા… તીણિ.

નપુરેજાતપચ્ચયાદિ

૭. ગન્થં ધમ્મં પટિચ્ચ ગન્થો ધમ્મો ઉપ્પજ્જતિ નપુરેજાતપચ્ચયા – અરૂપે ઇદંસચ્ચાભિનિવેસં કાયગન્થં પટિચ્ચ અભિજ્ઝાકાયગન્થો, અભિજ્ઝાકાયગન્થં પટિચ્ચ ઇદંસચ્ચાભિનિવેસો કાયગન્થો (અરૂપે સીલબ્બતપરામાસો નત્થિ, એવં નવ પઞ્હા કાતબ્બા), નપચ્છાજાતે નવ, નઆસેવને નવ, નકમ્મે તીણિ, નવિપાકે નવ, નઆહારે એકં, નઇન્દ્રિયે એકં, નઝાને એકં, નમગ્ગે એકં, નસમ્પયુત્તે તીણિ, નવિપ્પયુત્તે નવ, નોનત્થિયા તીણિ, નોવિગતે તીણિ.