૨. સઙ્ખ્યાવારો

સુદ્ધં

૯૬. હેતુયા નવ, આરમ્મણે નવ, અધિપતિયા નવ, અનન્તરે નવ, સમનન્તરે નવ, સહજાતે નવ, અઞ્ઞમઞ્ઞે છ, નિસ્સયે નવ, ઉપનિસ્સયે નવ, પુરેજાતે તીણિ, પચ્છાજાતે તીણિ, આસેવને નવ, કમ્મે ચત્તારિ, વિપાકે એકં, આહારે ચત્તારિ, ઇન્દ્રિયે ચત્તારિ, ઝાને ચત્તારિ, મગ્ગે ચત્તારિ, સમ્પયુત્તે છ, વિપ્પયુત્તે પઞ્ચ, અત્થિયા નવ, નત્થિયા નવ, વિગતે નવ, અવિગતે નવ.

અનુલોમં.

પચ્ચનીયુદ્ધારો

૯૭. ગન્થસમ્પયુત્તો ધમ્મો ગન્થસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો. (૧)

ગન્થસમ્પયુત્તો ધમ્મો ગન્થવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો… પચ્છાજાતપચ્ચયેન પચ્ચયો… કમ્મપચ્ચયેન પચ્ચયો. (૨)

ગન્થસમ્પયુત્તો ધમ્મો ગન્થસમ્પયુત્તસ્સ ચ ગન્થવિપ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો. (૩)

૯૮. ગન્થવિપ્પયુત્તો ધમ્મો ગન્થવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો… પુરેજાતપચ્ચયેન પચ્ચયો… પચ્છાજાતપચ્ચયેન પચ્ચયો… કમ્મપચ્ચયેન પચ્ચયો… આહારપચ્ચયેન પચ્ચયો… ઇન્દ્રિયપચ્ચયેન પચ્ચયો. (૧)

ગન્થવિપ્પયુત્તો ધમ્મો ગન્થસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો… પુરેજાતપચ્ચયેન પચ્ચયો. (૨)

ગન્થવિપ્પયુત્તો ધમ્મો ગન્થસમ્પયુત્તસ્સ ચ ગન્થવિપ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો… પુરેજાતપચ્ચયેન પચ્ચયો. (૩)

૯૯. ગન્થસમ્પયુત્તો ચ ગન્થવિપ્પયુત્તો ચ ધમ્મા ગન્થસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો. (૧)

ગન્થસમ્પયુત્તો ચ ગન્થવિપ્પયુત્તો ચ ધમ્મા ગન્થવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો… પચ્છાજાતપચ્ચયેન પચ્ચયો. (૨)

ગન્થસમ્પયુત્તો ચ ગન્થવિપ્પયુત્તો ચ ધમ્મા ગન્થસમ્પયુત્તસ્સ ચ ગન્થવિપ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો… સહજાતપચ્ચયેન પચ્ચયો… ઉપનિસ્સયપચ્ચયેન પચ્ચયો. (૩)