૧. વિભઙ્ગવારો

હેતુપચ્ચયો

૫૫. ગન્થસમ્પયુત્તં ધમ્મં પચ્ચયા ગન્થસમ્પયુત્તો ધમ્મો ઉપ્પજ્જતિ હેતુપચ્ચયા… તીણિ (પટિચ્ચસદિસા).

ગન્થવિપ્પયુત્તં ધમ્મં પચ્ચયા ગન્થવિપ્પયુત્તો ધમ્મો ઉપ્પજ્જતિ હેતુપચ્ચયા – ગન્થવિપ્પયુત્તં એકં ખન્ધં પચ્ચયા…પે… પટિસન્ધિક્ખણે…પે… ખન્ધે પચ્ચયા વત્થુ, વત્થું પચ્ચયા ખન્ધા, એકં મહાભૂતં…પે… વત્થું પચ્ચયા ગન્થવિપ્પયુત્તા ખન્ધા. (૧)

ગન્થવિપ્પયુત્તં ધમ્મં પચ્ચયા ગન્થસમ્પયુત્તો ધમ્મો ઉપ્પજ્જતિ હેતુપચ્ચયા – વત્થું પચ્ચયા ગન્થસમ્પયુત્તકા ખન્ધા, દિટ્ઠિગતવિપ્પયુત્તં લોભં પચ્ચયા સમ્પયુત્તકા ખન્ધા, પટિઘં પચ્ચયા સમ્પયુત્તકા ખન્ધા. (૨)

ગન્થવિપ્પયુત્તં ધમ્મં પચ્ચયા ગન્થસમ્પયુત્તો ચ ગન્થવિપ્પયુત્તો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા ગન્થસમ્પયુત્તકા ખન્ધા, મહાભૂતે પચ્ચયા ચિત્તસમુટ્ઠાનં રૂપં, દિટ્ઠિગતવિપ્પયુત્તં લોભં પચ્ચયા સમ્પયુત્તકા ખન્ધા ચિત્તસમુટ્ઠાનઞ્ચ રૂપં, પટિઘં પચ્ચયા સમ્પયુત્તકા ખન્ધા ચિત્તસમુટ્ઠાનઞ્ચ રૂપં, વત્થું પચ્ચયા દિટ્ઠિગતવિપ્પયુત્તલોભસહગતા ખન્ધા ચ લોભો ચ, વત્થું પચ્ચયા દોમનસ્સસહગતા ખન્ધા ચ પટિઘઞ્ચ. (૩)

૫૬. ગન્થસમ્પયુત્તઞ્ચ ગન્થવિપ્પયુત્તઞ્ચ ધમ્મં પચ્ચયા ગન્થસમ્પયુત્તો ધમ્મો ઉપ્પજ્જતિ હેતુપચ્ચયા – ગન્થસમ્પયુત્તં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… દિટ્ઠિગતવિપ્પયુત્તલોભસહગતં એકં ખન્ધઞ્ચ વત્થુઞ્ચ લોભઞ્ચ પચ્ચયા તયો ખન્ધા …પે… દ્વે ખન્ધે…પે… દોમનસ્સસહગતં એકં ખન્ધઞ્ચ વત્થુઞ્ચ પટિઘઞ્ચ પચ્ચયા તયો ખન્ધા…પે… દ્વે ખન્ધે…પે…. (૧)

ગન્થસમ્પયુત્તઞ્ચ ગન્થવિપ્પયુત્તઞ્ચ ધમ્મં પચ્ચયા ગન્થવિપ્પયુત્તો ધમ્મો ઉપ્પજ્જતિ હેતુપચ્ચયા – ગન્થસમ્પયુત્તે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, દિટ્ઠિગતવિપ્પયુત્તલોભસહગતે ખન્ધે ચ લોભઞ્ચ પચ્ચયા ચિત્તસમુટ્ઠાનં રૂપં, દોમનસ્સસહગતે ખન્ધે ચ પટિઘઞ્ચ પચ્ચયા ચિત્તસમુટ્ઠાનં રૂપં, દિટ્ઠિગતવિપ્પયુત્તલોભસહગતે ખન્ધે ચ વત્થુઞ્ચ પચ્ચયા લોભો, દોમનસ્સસહગતે ખન્ધે ચ વત્થુઞ્ચ પચ્ચયા પટિઘં. (૨)

ગન્થસમ્પયુત્તઞ્ચ ગન્થવિપ્પયુત્તઞ્ચ ધમ્મં પચ્ચયા ગન્થસમ્પયુત્તો ચ ગન્થવિપ્પયુત્તો ચ ધમ્મા ઉપ્પજ્જન્તિ હેતુપચ્ચયા – ગન્થસમ્પયુત્તં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… ગન્થસમ્પયુત્તે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, દિટ્ઠિગતવિપ્પયુત્તલોભસહગતં એકં ખન્ધઞ્ચ લોભઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… દોમનસ્સસહગતં એકં ખન્ધઞ્ચ પટિઘઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… દિટ્ઠિગતવિપ્પયુત્તલોભસહગતં એકં ખન્ધઞ્ચ વત્થુઞ્ચ પચ્ચયા તયો ખન્ધા લોભો ચ…પે… દ્વે ખન્ધે…પે… દોમનસ્સસહગતં એકં ખન્ધઞ્ચ વત્થુઞ્ચ પચ્ચયા તયો ખન્ધા પટિઘઞ્ચ…પે… દ્વે ખન્ધે…પે… (સંખિત્તં). (૩)