૧. વિભઙ્ગવારો

હેતુપચ્ચયો

૧. ગન્થં ધમ્મં પટિચ્ચ ગન્થો ધમ્મો ઉપ્પજ્જતિ હેતુપચ્ચયા – સીલબ્બતપરામાસં કાયગન્થં પટિચ્ચ અભિજ્ઝાકાયગન્થો, અભિજ્ઝાકાયગન્થં પટિચ્ચ સીલબ્બતપરામાસો કાયગન્થો, ઇદંસચ્ચાભિનિવેસં કાયગન્થં પટિચ્ચ અભિજ્ઝાકાયગન્થો, અભિજ્ઝાકાયગન્થં પટિચ્ચ ઇદંસચ્ચાભિનિવેસો કાયગન્થો. (૧)

ગન્થં ધમ્મં પટિચ્ચ નોગન્થો ધમ્મો ઉપ્પજ્જતિ હેતુપચ્ચયા – ગન્થે પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં. (૨)

ગન્થં ધમ્મં પટિચ્ચ ગન્થો ચ નોગન્થો ચ ધમ્મા ઉપ્પજ્જન્તિ હેતુપચ્ચયા – સીલબ્બતપરામાસં કાયગન્થં પટિચ્ચ અભિજ્ઝાકાયગન્થો સમ્પયુત્તકા ચ ખન્ધા ચિત્તસમુટ્ઠાનઞ્ચ રૂપં (ચક્કં). (૩)

૨. નોગન્થં ધમ્મં પટિચ્ચ નોગન્થો ધમ્મો ઉપ્પજ્જતિ હેતુપચ્ચયા – નોગન્થં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા, એકં મહાભૂતં…પે…. (૧)

નોગન્થં ધમ્મં પટિચ્ચ ગન્થો ધમ્મો ઉપ્પજ્જતિ હેતુપચ્ચયા – નોગન્થે ખન્ધે પટિચ્ચ ગન્થા. (૨)

નોગન્થં ધમ્મં પટિચ્ચ ગન્થો ચ નોગન્થો ચ ધમ્મા ઉપ્પજ્જન્તિ હેતુપચ્ચયા – નોગન્થં એકં ખન્ધં પટિચ્ચ તયો ખન્ધા ગન્થા ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે…. (૩)

૩. ગન્થઞ્ચ નોગન્થઞ્ચ ધમ્મં પટિચ્ચ ગન્થો ધમ્મો ઉપ્પજ્જતિ હેતુપચ્ચયા – સીલબ્બતપરામાસં કાયગન્થઞ્ચ સમ્પયુત્તકે ચ ખન્ધે પટિચ્ચ અભિજ્ઝાકાયગન્થો (ચક્કં). (૧)

ગન્થઞ્ચ નોગન્થઞ્ચ ધમ્મં પટિચ્ચ નોગન્થો ધમ્મો ઉપ્પજ્જતિ હેતુપચ્ચયા – નોગન્થં એકં ખન્ધઞ્ચ ગન્થે ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે… ગન્થે ચ સમ્પયુત્તકે ખન્ધે ચ પટિચ્ચ ચિત્તસમુટ્ઠાનં રૂપં. (૨)

ગન્થઞ્ચ નોગન્થઞ્ચ ધમ્મં પટિચ્ચ ગન્થો ચ નોગન્થો ચ ધમ્મા ઉપ્પજ્જન્તિ હેતુપચ્ચયા – નોગન્થં એકં ખન્ધઞ્ચ સીલબ્બતપરામાસકાયગન્થઞ્ચ પટિચ્ચ તયો ખન્ધા અભિજ્ઝાકાયગન્થો ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે…. (ચક્કં. સંખિત્તં.) (૩)

આરમ્મણપચ્ચયા…પે… અવિગતપચ્ચયા.