૧. વિભઙ્ગવારો

હેતુપચ્ચયો

૬૮. અપ્પટિઘો ધમ્મો અપ્પટિઘસ્સ ધમ્મસ્સ હેતુપચ્ચયેન પચ્ચયો – અપ્પટિઘા હેતૂ સમ્પયુત્તકાનં ખન્ધાનં અપ્પટિઘાનઞ્ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

અપ્પટિઘો ધમ્મો સપ્પટિઘસ્સ ધમ્મસ્સ હેતુપચ્ચયેન પચ્ચયો – અપ્પટિઘા હેતૂ સપ્પટિઘાનં ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૨)

અપ્પટિઘો ધમ્મો સપ્પટિઘસ્સ ચ અપ્પટિઘસ્સ ચ ધમ્મસ્સ હેતુપચ્ચયેન પચ્ચયો – અપ્પટિઘા હેતૂ સમ્પયુત્તકાનં ખન્ધાનં સપ્પટિઘાનઞ્ચ અપ્પટિઘાનઞ્ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૩)

આરમ્મણપચ્ચયો

૬૯. સપ્પટિઘો ધમ્મો અપ્પટિઘસ્સ ધમ્મસ્સ આરમ્મણપચ્ચયેન પચ્ચયો – ચક્ખું…પે… ફોટ્ઠબ્બે અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… સપ્પટિઘા ખન્ધા ઇદ્ધિવિધઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અપ્પટિઘો ધમ્મો અપ્પટિઘસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, ઝાના વુટ્ઠહિત્વા ઝાનં પચ્ચવેક્ખતિ, અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ, નિબ્બાનં પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો; અરિયા પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ; વત્થું…પે… ઇત્થિન્દ્રિયં… પુરિસિન્દ્રિયં… જીવિતિન્દ્રિયં… આપોધાતું, કબળીકારં આહારં અનિચ્ચતો…પે… દોમનસ્સં ઉપ્પજ્જતિ; ચેતોપરિયઞાણેન અપ્પટિઘચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… અપ્પટિઘા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અધિપતિપચ્ચયો

૭૦. સપ્પટિઘો ધમ્મો અપ્પટિઘસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – ચક્ખું…પે… ફોટ્ઠબ્બે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૧)

અપ્પટિઘો ધમ્મો અપ્પટિઘસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે સુચિણ્ણાનિ ગરું કત્વા પચ્ચવેક્ખતિ, ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, ફલં ગરું કત્વા પચ્ચવેક્ખન્તિ, નિબ્બાનં ગરું કત્વા પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ અધિપતિપચ્ચયેન પચ્ચયો; વત્થું…પે… ઇત્થિન્દ્રિયં… પુરિસિન્દ્રિયં… જીવિતિન્દ્રિયં… આપોધાતું, કબળીકારં આહારં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – અપ્પટિઘાધિપતિ સમ્પયુત્તકાનં ખન્ધાનં અપ્પટિઘાનઞ્ચ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૧)

અપ્પટિઘો ધમ્મો સપ્પટિઘસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અપ્પટિઘાધિપતિ સપ્પટિઘાનં ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૧)

અપ્પટિઘો ધમ્મો સપ્પટિઘસ્સ ચ અપ્પટિઘસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અપ્પટિઘાધિપતિ સમ્પયુત્તકાનં ખન્ધાનં સપ્પટિઘાનઞ્ચ અપ્પટિઘાનઞ્ચ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૩)

અનન્તરપચ્ચયો

૭૧. અપ્પટિઘો ધમ્મો અપ્પટિઘસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અપ્પટિઘા ખન્ધા…પે… ફલસમાપત્તિયા અનન્તરપચ્ચયેન પચ્ચયો.

સમનન્તરપચ્ચયો

૭૨. અપ્પટિઘો ધમ્મો અપ્પટિઘસ્સ ધમ્મસ્સ સમનન્તરપચ્ચયેન પચ્ચયો…પે….

સહજાતપચ્ચયાદિ

૭૩. સપ્પટિઘો ધમ્મો સપ્પટિઘસ્સ ધમ્મસ્સ સહજાતપચ્ચયેન પચ્ચયો… નવ… અઞ્ઞમઞ્ઞપચ્ચયેન પચ્ચયો… છ… નિસ્સયપચ્ચયેન પચ્ચયો… નવ.

ઉપનિસ્સયપચ્ચયો

૭૪. સપ્પટિઘો ધમ્મો અપ્પટિઘસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, પકતૂપનિસ્સયો…પે…. પકતૂપનિસ્સયો – ઉતું, સેનાસનં ઉપનિસ્સાય દાનં દેતિ…પે… સઙ્ઘં ભિન્દતિ; ઉતુ, સેનાસનં સદ્ધાય…પે… ફલસમાપત્તિયા ઉપનિસ્સયપચ્ચયેન પચ્ચયો. (૧)

અપ્પટિઘો ધમ્મો અપ્પટિઘસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… દિટ્ઠિં ગણ્હાતિ; સીલં…પે… કાયિકં સુખં, કાયિકં દુક્ખં, ભોજનં ઉપનિસ્સાય દાનં દેતિ…પે… સઙ્ઘં ભિન્દતિ; સદ્ધા…પે… ભોજનં સદ્ધાય…પે… ફલસમાપત્તિયા ઉપનિસ્સયપચ્ચયેન પચ્ચયો. (૧)

પુરેજાતપચ્ચયો

૭૫. સપ્પટિઘો ધમ્મો અપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… ફોટ્ઠબ્બે અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ પુરેજાતપચ્ચયેન પચ્ચયો. (૧)

અપ્પટિઘો ધમ્મો અપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – વત્થું…પે… ઇત્થિન્દ્રિયં, પુરિસિન્દ્રિયં, જીવિતિન્દ્રિયં, આપોધાતું, કબળીકારં આહારં અનિચ્ચતો …પે… દોમનસ્સં ઉપ્પજ્જતિ. વત્થુપુરેજાતં – વત્થુ અપ્પટિઘાનં ખન્ધાનં પુરેજાતપચ્ચયેન પચ્ચયો. (૧)

સપ્પટિઘો ચ અપ્પટિઘો ચ ધમ્મા અપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. ચક્ખાયતનઞ્ચ વત્થુ ચ…પે… ફોટ્ઠબ્બાયતનઞ્ચ વત્થુ ચ અપ્પટિઘાનં ખન્ધાનં પુરેજાતપચ્ચયેન પચ્ચયો. (૧)

પચ્છાજાતપચ્ચયો

૭૬. અપ્પટિઘો ધમ્મો અપ્પટિઘસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અપ્પટિઘા ખન્ધા પુરેજાતસ્સ ઇમસ્સ અપ્પટિઘસ્સ કાયસ્સ પચ્છાજાતપચ્ચયેન પચ્ચયો. (મૂલં કાતબ્બં) પચ્છાજાતા અપ્પટિઘા ખન્ધા પુરેજાતસ્સ ઇમસ્સ સપ્પટિઘસ્સ કાયસ્સ પચ્છાજાતપચ્ચયેન પચ્ચયો. (મૂલં કાતબ્બં) પચ્છાજાતા અપ્પટિઘા ખન્ધા પુરેજાતસ્સ ઇમસ્સ સપ્પટિઘસ્સ ચ અપ્પટિઘસ્સ ચ કાયસ્સ પચ્છાજાતપચ્ચયેન પચ્ચયો (દ્વિન્નમ્પિ મૂલા કાતબ્બા). (૩)

આસેવનપચ્ચયો

૭૭. અપ્પટિઘો ધમ્મો અપ્પટિઘસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા અપ્પટિઘા ખન્ધા…પે… વોદાનં મગ્ગસ્સ આસેવનપચ્ચયેન પચ્ચયો. (૧)

કમ્મપચ્ચયો

૭૮. અપ્પટિઘો ધમ્મો અપ્પટિઘસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અપ્પટિઘા ચેતના સમ્પયુત્તકાનં ખન્ધાનં અપ્પટિઘાનઞ્ચ ચિત્તસમુટ્ઠાનાનં રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – અપ્પટિઘા ચેતના વિપાકાનં ખન્ધાનં અપ્પટિઘાનઞ્ચ કટત્તારૂપાનં કમ્મપચ્ચયેન પચ્ચયો. (૧)

અપ્પટિઘો ધમ્મો સપ્પટિઘસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અપ્પટિઘા ચેતના સપ્પટિઘાનં ચિત્તસમુટ્ઠાનાનં રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – અપ્પટિઘા ચેતના સપ્પટિઘાનં કટત્તારૂપાનં કમ્મપચ્ચયેન પચ્ચયો. (૨)

અપ્પટિઘો ધમ્મો સપ્પટિઘસ્સ ચ અપ્પટિઘસ્સ ચ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અપ્પટિઘા ચેતના સમ્પયુત્તકાનં ખન્ધાનં સપ્પટિઘાનઞ્ચ અપ્પટિઘાનઞ્ચ ચિત્તસમુટ્ઠાનાનં રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – અપ્પટિઘા ચેતના વિપાકાનં ખન્ધાનં સપ્પટિઘાનઞ્ચ અપ્પટિઘાનઞ્ચ કટત્તારૂપાનં કમ્મપચ્ચયેન પચ્ચયો. (૩)

વિપાકપચ્ચયો

૭૯. અપ્પટિઘો ધમ્મો અપ્પટિઘસ્સ ધમ્મસ્સ વિપાકપચ્ચયેન પચ્ચયો – વિપાકો અપ્પટિઘો…પે… તીણિ.

આહારપચ્ચયો

૮૦. અપ્પટિઘો ધમ્મો અપ્પટિઘસ્સ ધમ્મસ્સ આહારપચ્ચયેન પચ્ચયો – અપ્પટિઘા આહારા સમ્પયુત્તકાનં ખન્ધાનં અપ્પટિઘાનઞ્ચ ચિત્તસમુટ્ઠાનાનં રૂપાનં આહારપચ્ચયેન પચ્ચયો; પટિસન્ધિક્ખણે…પે… કબળીકારો આહારો ઇમસ્સ અપ્પટિઘસ્સ કાયસ્સ આહારપચ્ચયેન પચ્ચયો (અવસેસા દ્વેપિ પઞ્હા કાતબ્બા, પટિસન્ધિ કબળીકારો આહારો દ્વીસુપિ કાતબ્બો અગ્ગે). (૩)

ઇન્દ્રિયપચ્ચયાદિ

૮૧. સપ્પટિઘો ધમ્મો અપ્પટિઘસ્સ ધમ્મસ્સ ઇન્દ્રિયપચ્ચયેન પચ્ચયો – ચક્ખુન્દ્રિયં ચક્ખુવિઞ્ઞાણસ્સ…પે… કાયિન્દ્રિયં કાયવિઞ્ઞાણસ્સ ઇન્દ્રિયપચ્ચયેન પચ્ચયો. (૧)

અપ્પટિઘો ધમ્મો અપ્પટિઘસ્સ ધમ્મસ્સ ઇન્દ્રિયપચ્ચયેન પચ્ચયો… તીણિ (તીસુપિ જીવિતિન્દ્રિયં અગ્ગે કાતબ્બં). (૩)

સપ્પટિઘો ચ અપ્પટિઘો ચ ધમ્મા અપ્પટિઘસ્સ ધમ્મસ્સ ઇન્દ્રિયપચ્ચયેન પચ્ચયો – ચક્ખુન્દ્રિયઞ્ચ ચક્ખુવિઞ્ઞાણઞ્ચ ચક્ખુવિઞ્ઞાણસહગતાનં ખન્ધાનં ઇન્દ્રિયપચ્ચયેન પચ્ચયો…પે… કાયિન્દ્રિયઞ્ચ કાયવિઞ્ઞાણઞ્ચ કાયવિઞ્ઞાણસહગતાનં ખન્ધાનં ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… તીણિ… મગ્ગપચ્ચયેન પચ્ચયો… તીણિ… સમ્પયુત્તપચ્ચયેન પચ્ચયો… એકં.

વિપ્પયુત્તપચ્ચયો

૮૨. સપ્પટિઘો ધમ્મો અપ્પટિઘસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ વિપ્પયુત્તપચ્ચયેન પચ્ચયો. (૧)

અપ્પટિઘો ધમ્મો અપ્પટિઘસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતા – અપ્પટિઘા ખન્ધા અપ્પટિઘાનં ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો; પટિસન્ધિક્ખણે…પે… ખન્ધા વત્થુસ્સ વિપ્પયુત્તપચ્ચયેન પચ્ચયો, વત્થુ ખન્ધાનં વિપ્પયુત્તપચ્ચયેન પચ્ચયો. પુરેજાતં – વત્થુ અપ્પટિઘાનં ખન્ધાનં વિપ્પયુત્તપચ્ચયેન પચ્ચયો. પચ્છાજાતા – અપ્પટિઘા ખન્ધા પુરેજાતસ્સ ઇમસ્સ અપ્પટિઘસ્સ કાયસ્સ વિપ્પયુત્તપચ્ચયેન પચ્ચયો. (૧)

અપ્પટિઘો ધમ્મો સપ્પટિઘસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – અપ્પટિઘા ખન્ધા સપ્પટિઘાનં ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો; પટિસન્ધિક્ખણે…પે…. પચ્છાજાતા – અપ્પટિઘા ખન્ધા પુરેજાતસ્સ ઇમસ્સ સપ્પટિઘસ્સ કાયસ્સ વિપ્પયુત્તપચ્ચયેન પચ્ચયો. (૨)

અપ્પટિઘો ધમ્મો સપ્પટિઘસ્સ ચ અપ્પટિઘસ્સ ચ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – અપ્પટિઘા ખન્ધા સપ્પટિઘાનઞ્ચ અપ્પટિઘાનઞ્ચ ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો; પટિસન્ધિક્ખણે …પે…. પચ્છાજાતા – અપ્પટિઘા ખન્ધા પુરેજાતસ્સ ઇમસ્સ સપ્પટિઘસ્સ ચ અપ્પટિઘસ્સ ચ કાયસ્સ વિપ્પયુત્તપચ્ચયેન પચ્ચયો. (૩)

અત્થિપચ્ચયો

૮૩. સપ્પટિઘો ધમ્મો સપ્પટિઘસ્સ ધમ્મસ્સ અત્થિપચ્ચયેન પચ્ચયો… એકં (પટિચ્ચસદિસા પઠમપઞ્હા). (૧)

સપ્પટિઘો ધમ્મો અપ્પટિઘસ્સ ધમ્મસ્સ અત્થિપચ્ચયેન પચ્ચયો સહજાતં, પુરેજાતં. સહજાતા – સપ્પટિઘા મહાભૂતા આપોધાતુયા અત્થિપચ્ચયેન પચ્ચયો, સપ્પટિઘા મહાભૂતા અપ્પટિઘાનં ચિત્તસમુટ્ઠાનાનં રૂપાનં કટત્તારૂપાનં ઉપાદારૂપાનં અત્થિપચ્ચયેન પચ્ચયો; ફોટ્ઠબ્બાયતનં ઇત્થિન્દ્રિયસ્સ…પે… કબળીકારસ્સ આહારસ્સ અત્થિપચ્ચયેન પચ્ચયો; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં…પે…. પુરેજાતં – ચક્ખું…પે… ફોટ્ઠબ્બે અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનઞ્ચ ચક્ખાયતનઞ્ચ ચક્ખુવિઞ્ઞાણસ્સ…પે… ફોટ્ઠબ્બાયતનઞ્ચ કાયાયતનઞ્ચ કાયવિઞ્ઞાણસ્સ અત્થિપચ્ચયેન પચ્ચયો. (૨)

સપ્પટિઘો ધમ્મો સપ્પટિઘસ્સ ચ અપ્પટિઘસ્સ ચ ધમ્મસ્સ અત્થિપચ્ચયેન પચ્ચયો – સપ્પટિઘં એકં મહાભૂતં દ્વિન્નં મહાભૂતાનં આપોધાતુયા ચ અત્થિપચ્ચયેન પચ્ચયો…પે… (પટિચ્ચસદિસં યાવ અસઞ્ઞસત્તા). (૩)

૮૪. અપ્પટિઘો ધમ્મો અપ્પટિઘસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – અપ્પટિઘો એકો ખન્ધો તિણ્ણન્નં ખન્ધાનં…પે… (યાવ અસઞ્ઞસત્તા). પુરેજાતં – વત્થું…પે… ઇત્થિન્દ્રિયં… પુરિસિન્દ્રિયં… જીવિતિન્દ્રિયં… આપોધાતું… કબળીકારં આહારં અનિચ્ચતો…પે… દોમનસ્સં ઉપ્પજ્જતિ; વત્થુ અપ્પટિઘાનં ખન્ધાનં અત્થિપચ્ચયેન પચ્ચયો. પચ્છાજાતા – અપ્પટિઘા ખન્ધા પુરેજાતસ્સ ઇમસ્સ અપ્પટિઘસ્સ કાયસ્સ અત્થિપચ્ચયેન પચ્ચયો; કબળીકારો આહારો ઇમસ્સ અપ્પટિઘસ્સ કાયસ્સ અત્થિપચ્ચયેન પચ્ચયો; રૂપજીવિતિન્દ્રિયં અપ્પટિઘાનં કટત્તારૂપાનં અત્થિપચ્ચયેન પચ્ચયો. (૧)

અપ્પટિઘો ધમ્મો સપ્પટિઘસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – અપ્પટિઘા ખન્ધા સપ્પટિઘાનં ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; પટિસન્ધિક્ખણે…પે… આપોધાતુ સપ્પટિઘાનં મહાભૂતાનં અત્થિપચ્ચયેન પચ્ચયો; આપોધાતુ સપ્પટિઘાનં ચિત્તસમુટ્ઠાનાનં રૂપાનં કટત્તારૂપાનં ઉપાદારૂપાનં અત્થિપચ્ચયેન પચ્ચયો; આપોધાતુ ચક્ખાયતનસ્સ…પે… ફોટ્ઠબ્બાયતનસ્સ અત્થિપચ્ચયેન પચ્ચયો; બાહિરં, આહારસમુટ્ઠાનં, ઉતુસમુટ્ઠાનં, અસઞ્ઞસત્તાનં…પે…. પચ્છાજાતા – અપ્પટિઘા ખન્ધા પુરેજાતસ્સ ઇમસ્સ સપ્પટિઘસ્સ કાયસ્સ અત્થિપચ્ચયેન પચ્ચયો; કબળીકારો આહારો ઇમસ્સ સપ્પટિઘસ્સ કાયસ્સ અત્થિપચ્ચયેન પચ્ચયો; રૂપજીવિતિન્દ્રિયં સપ્પટિઘાનં કટત્તારૂપાનં અત્થિપચ્ચયેન પચ્ચયો. (૨)

અપ્પટિઘો ધમ્મો સપ્પટિઘસ્સ ચ અપ્પટિઘસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતો – અપ્પટિઘો એકો ખન્ધો તિણ્ણન્નં ખન્ધાનં સપ્પટિઘાનઞ્ચ અપ્પટિઘાનઞ્ચ…પે… (પટિચ્ચસદિસં યાવ અસઞ્ઞસત્તા). પચ્છાજાતા – અપ્પટિઘા ખન્ધા પુરેજાતસ્સ ઇમસ્સ સપ્પટિઘસ્સ ચ અપ્પટિઘસ્સ ચ કાયસ્સ અત્થિપચ્ચયેન પચ્ચયો; કબળીકારો આહારો ઇમસ્સ સપ્પટિઘસ્સ ચ અપ્પટિઘસ્સ ચ કાયસ્સ અત્થિપચ્ચયેન પચ્ચયો; રૂપજીવિતિન્દ્રિયં સપ્પટિઘાનઞ્ચ અપ્પટિઘાનઞ્ચ કટત્તારૂપાનં અત્થિપચ્ચયેન પચ્ચયો. (૩)

૮૫. સપ્પટિઘો ચ અપ્પટિઘો ચ ધમ્મા સપ્પટિઘસ્સ ધમ્મસ્સ અત્થિપચ્ચયેન પચ્ચયો (પટિચ્ચસદિસં યાવ અસઞ્ઞસત્તા). (૧)

સપ્પટિઘો ચ અપ્પટિઘો ચ ધમ્મા અપ્પટિઘસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતા – અપ્પટિઘા ખન્ધા ચ મહાભૂતા ચ અપ્પટિઘાનં ચિત્તસમુટ્ઠાનાનં રૂપાનં…પે… (પટિચ્ચસદિસં યાવ અસઞ્ઞસત્તા). સહજાતો – ચક્ખુવિઞ્ઞાણસહગતો એકો ખન્ધો ચ ચક્ખાયતનઞ્ચ તિણ્ણન્નં ખન્ધાનં…પે… દ્વે ખન્ધા ચ…પે… કાયવિઞ્ઞાણસહગતો એકો ખન્ધો ચ કાયાયતનઞ્ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. (૨)

સપ્પટિઘો ચ અપ્પટિઘો ચ ધમ્મા સપ્પટિઘસ્સ ચ અપ્પટિઘસ્સ ચ ધમ્મસ્સ અત્થિપચ્ચયેન પચ્ચયો (પટિચ્ચસદિસં). (૩)