૧. વિભઙ્ગવારો

હેતુપચ્ચયો

૫૩. સપ્પટિઘં ધમ્મં પટિચ્ચ સપ્પટિઘો ધમ્મો ઉપ્પજ્જતિ હેતુપચ્ચયા – સપ્પટિઘં એકં મહાભૂતં પટિચ્ચ દ્વે મહાભૂતા, દ્વે મહાભૂતે પટિચ્ચ એકં મહાભૂતં, સપ્પટિઘે મહાભૂતે પટિચ્ચ સપ્પટિઘં ચિત્તસમુટ્ઠાનં રૂપં, કટત્તારૂપં, ઉપાદારૂપં, ફોટ્ઠબ્બાયતનં પટિચ્ચ ચક્ખાયતનં…પે… રસાયતનં. (૧)

સપ્પટિઘં ધમ્મં પટિચ્ચ અપ્પટિઘો ધમ્મો ઉપ્પજ્જતિ હેતુપચ્ચયા – સપ્પટિઘે મહાભૂતે પટિચ્ચ આપોધાતુ, સપ્પટિઘે મહાભૂતે પટિચ્ચ અપ્પટિઘં ચિત્તસમુટ્ઠાનં રૂપં, કટત્તારૂપં, ઉપાદારૂપં, ફોટ્ઠબ્બાયતનં પટિચ્ચ આપોધાતુ ઇત્થિન્દ્રિયં…પે… કબળીકારો આહારો. (૨)

સપ્પટિઘં ધમ્મં પટિચ્ચ સપ્પટિઘો ચ અપ્પટિઘો ચ ધમ્મા ઉપ્પજ્જન્તિ હેતુપચ્ચયા – સપ્પટિઘં એકં મહાભૂતં પટિચ્ચ દ્વે મહાભૂતા આપોધાતુ ચ, દ્વે મહાભૂતે…પે… સપ્પટિઘે મહાભૂતે પટિચ્ચ સપ્પટિઘઞ્ચ અપ્પટિઘઞ્ચ ચિત્તસમુટ્ઠાનં રૂપં, કટત્તારૂપં, ઉપાદારૂપં, ફોટ્ઠબ્બાયતનં પટિચ્ચ ચક્ખાયતનં…પે… રસાયતનં આપોધાતુ ઇત્થિન્દ્રિયં…પે… કબળીકારો આહારો. (૩)

૫૪. અપ્પટિઘં ધમ્મં પટિચ્ચ અપ્પટિઘો ધમ્મો ઉપ્પજ્જતિ હેતુપચ્ચયા – અપ્પટિઘં એકં ખન્ધં પટિચ્ચ તયો ખન્ધા અપ્પટિઘં ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા, આપોધાતું પટિચ્ચ અપ્પટિઘં ચિત્તસમુટ્ઠાનં રૂપં, કટત્તારૂપં, ઉપાદારૂપં, આપોધાતું પટિચ્ચ ઇત્થિન્દ્રિયં…પે… કબળીકારો આહારો. (૧)

અપ્પટિઘં ધમ્મં પટિચ્ચ સપ્પટિઘો ધમ્મો ઉપ્પજ્જતિ હેતુપચ્ચયા – અપ્પટિઘે ખન્ધે પટિચ્ચ સપ્પટિઘં ચિત્તસમુટ્ઠાનં રૂપં; પટિસન્ધિક્ખણે…પે… આપોધાતું પટિચ્ચ સપ્પટિઘા મહાભૂતા, આપોધાતું પટિચ્ચ સપ્પટિઘં ચિત્તસમુટ્ઠાનં રૂપં, કટત્તારૂપં, ઉપાદારૂપં, આપોધાતું પટિચ્ચ ચક્ખાયતનં…પે… ફોટ્ઠબ્બાયતનં. (૨)

અપ્પટિઘં ધમ્મં પટિચ્ચ સપ્પટિઘો ચ અપ્પટિઘો ચ ધમ્મા ઉપ્પજ્જન્તિ હેતુપચ્ચયા – અપ્પટિઘં એકં ખન્ધં પટિચ્ચ તયો ખન્ધા સપ્પટિઘઞ્ચ અપ્પટિઘઞ્ચ ચિત્તસમુટ્ઠાનં રૂપં…પે… દ્વે ખન્ધે…પે… પટિસન્ધિક્ખણે…પે… આપોધાતું પટિચ્ચ સપ્પટિઘઞ્ચ અપ્પટિઘઞ્ચ ચિત્તસમુટ્ઠાનં રૂપં, કટત્તારૂપં, ઉપાદારૂપં, આપોધાતું પટિચ્ચ ચક્ખાયતનં…પે… ફોટ્ઠબ્બાયતનં, ઇત્થિન્દ્રિયં…પે… કબળીકારો આહારો. (૩)

૫૫. સપ્પટિઘઞ્ચ અપ્પટિઘઞ્ચ ધમ્મં પટિચ્ચ સપ્પટિઘો ધમ્મો ઉપ્પજ્જતિ હેતુપચ્ચયા – અપ્પટિઘે ખન્ધે ચ મહાભૂતે ચ પટિચ્ચ સપ્પટિઘં ચિત્તસમુટ્ઠાનં રૂપં; પટિસન્ધિક્ખણે…પે… સપ્પટિઘં એકં મહાભૂતઞ્ચ આપોધાતુઞ્ચ પટિચ્ચ દ્વે મહાભૂતા…પે… સપ્પટિઘે મહાભૂતે ચ આપોધાતુઞ્ચ પટિચ્ચ સપ્પટિઘં ચિત્તસમુટ્ઠાનં રૂપં, કટત્તારૂપં, ઉપાદારૂપં, ફોટ્ઠબ્બાયતનઞ્ચ આપોધાતુઞ્ચ પટિચ્ચ ચક્ખાયતનં…પે…. (૧)

સપ્પટિઘઞ્ચ અપ્પટિઘઞ્ચ ધમ્મં પટિચ્ચ અપ્પટિઘો ધમ્મો ઉપ્પજ્જતિ હેતુપચ્ચયા – અપ્પટિઘે ખન્ધે ચ મહાભૂતે ચ પટિચ્ચ અપ્પટિઘં ચિત્તસમુટ્ઠાનં રૂપં; પટિસન્ધિક્ખણે અપ્પટિઘે ખન્ધે ચ મહાભૂતે ચ પટિચ્ચ અપ્પટિઘં કટત્તારૂપં, ફોટ્ઠબ્બાયતનઞ્ચ આપોધાતુઞ્ચ પટિચ્ચ અપ્પટિઘં ચિત્તસમુટ્ઠાનં રૂપં, કટત્તારૂપં, ઉપાદારૂપં, ફોટ્ઠબ્બાયતનઞ્ચ આપોધાતુઞ્ચ પટિચ્ચ ઇત્થિન્દ્રિયં…પે… કબળીકારો આહારો. (૨)

સપ્પટિઘઞ્ચ અપ્પટિઘઞ્ચ ધમ્મં પટિચ્ચ સપ્પટિઘો ચ અપ્પટિઘો ચ ધમ્મા ઉપ્પજ્જન્તિ હેતુપચ્ચયા – અપ્પટિઘે ખન્ધે ચ મહાભૂતે ચ પટિચ્ચ સપ્પટિઘઞ્ચ અપ્પટિઘઞ્ચ ચિત્તસમુટ્ઠાનં રૂપં; પટિસન્ધિક્ખણે…પે… અપ્પટિઘે ખન્ધે ચ મહાભૂતે ચ પટિચ્ચ સપ્પટિઘઞ્ચ અપ્પટિઘઞ્ચ કટત્તારૂપં, ફોટ્ઠબ્બાયતનઞ્ચ આપોધાતુઞ્ચ પટિચ્ચ સપ્પટિઘઞ્ચ અપ્પટિઘઞ્ચ ચિત્તસમુટ્ઠાનં રૂપં, કટત્તારૂપં, ઉપાદારૂપં, ફોટ્ઠબ્બાયતનઞ્ચ આપોધાતુઞ્ચ પટિચ્ચ ચક્ખાયતનં…પે… રસાયતનં, ઇત્થિન્દ્રિયં…પે… કબળીકારો આહારો. (૩)

આરમ્મણપચ્ચયો

૫૬. અપ્પટિઘં ધમ્મં પટિચ્ચ અપ્પટિઘો ધમ્મો ઉપ્પજ્જતિ આરમ્મણપચ્ચયા – અપ્પટિઘં એકં ખન્ધં પટિચ્ચ તયો ખન્ધા…પે… દ્વે ખન્ધે…પે… પટિસન્ધિક્ખણે…પે… વત્થું પટિચ્ચ ખન્ધા.

અધિપતિપચ્ચયાદિ

૫૭. સપ્પટિઘં ધમ્મં પટિચ્ચ અપ્પટિઘો ધમ્મો ઉપ્પજ્જતિ અધિપતિપચ્ચયા (પટિસન્ધિ વજ્જેતબ્બા, કટત્તારૂપા ચ)… અનન્તરપચ્ચયા… સમનન્તરપચ્ચયા… સહજાતપચ્ચયા (સબ્બે મહાભૂતા કાતબ્બા)… અઞ્ઞમઞ્ઞપચ્ચયા – સપ્પટિઘં એકં મહાભૂતં પટિચ્ચ દ્વે મહાભૂતા, દ્વે મહાભૂતે…પે…. (૧)

સપ્પટિઘં ધમ્મં પટિચ્ચ અપ્પટિઘો ધમ્મો ઉપ્પજ્જતિ અઞ્ઞમઞ્ઞપચ્ચયા – સપ્પટિઘે મહાભૂતે પટિચ્ચ આપોધાતુ…પે…. (૨)

સપ્પટિઘં ધમ્મં પટિચ્ચ સપ્પટિઘો ચ અપ્પટિઘો ચ ધમ્મા ઉપ્પજ્જન્તિ અઞ્ઞમઞ્ઞપચ્ચયા – સપ્પટિઘં એકં મહાભૂતં પટિચ્ચ દ્વે મહાભૂતા આપોધાતુ ચ, દ્વે મહાભૂતે…પે…. (૩)

૫૮. અપ્પટિઘં ધમ્મં પટિચ્ચ અપ્પટિઘો ધમ્મો ઉપ્પજ્જતિ અઞ્ઞમઞ્ઞપચ્ચયા – અપ્પટિઘં એકં ખન્ધં પટિચ્ચ તયો ખન્ધા…પે… દ્વે ખન્ધે…પે… પટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા. (૧)

અપ્પટિઘં ધમ્મં પટિચ્ચ સપ્પટિઘો ધમ્મો ઉપ્પજ્જતિ અઞ્ઞમઞ્ઞપચ્ચયા – આપોધાતું પટિચ્ચ સપ્પટિઘા મહાભૂતા (ઇમે અજ્ઝત્તિકબાહિરા મહાભૂતા કાતબ્બા). (૨)

સપ્પટિઘઞ્ચ અપ્પટિઘઞ્ચ ધમ્મં પટિચ્ચ સપ્પટિઘો ધમ્મો ઉપ્પજ્જતિ અઞ્ઞમઞ્ઞપચ્ચયા – સપ્પટિઘં એકં મહાભૂતઞ્ચ આપોધાતુઞ્ચ પટિચ્ચ દ્વે મહાભૂતા…પે… નિસ્સયપચ્ચયા…પે… અવિગતપચ્ચયા.