૧-૪. પચ્ચયાનુલોમાદિ

૧. સપ્પચ્ચયં ધમ્મં પટિચ્ચ સપ્પચ્ચયો ધમ્મો ઉપ્પજ્જતિ હેતુપચ્ચયા – સપ્પચ્ચયં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા, એકં મહાભૂતં…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં.

સપ્પચ્ચયં ધમ્મં પટિચ્ચ સપ્પચ્ચયો ધમ્મો ઉપ્પજ્જતિ આરમ્મણપચ્ચયા…પે… અવિગતપચ્ચયા.

૨. હેતુયા એકં, આરમ્મણે એકં…પે… અવિગતે એકં.

અનુલોમં.

૩. સપ્પચ્ચયં ધમ્મં પટિચ્ચ સપ્પચ્ચયો ધમ્મો ઉપ્પજ્જતિ નહેતુપચ્ચયા – અહેતુકં સપ્પચ્ચયં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં, દ્વે ખન્ધે…પે… અહેતુકપટિસન્ધિક્ખણે …પે… (યાવ અસઞ્ઞસત્તા) વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો (સંખિત્તં).

૪. નહેતુયા એકં, નઆરમ્મણે એકં, નઅધિપતિયા એકં…પે… નોવિગતે એકં.

પચ્ચનીયં.

૫. હેતુપચ્ચયા નઆરમ્મણે એકં, નઅધિપતિયા એકં…પે… નોવિગતે એકં.

અનુલોમપચ્ચનીયં.

૬. નહેતુપચ્ચયા આરમ્મણે એકં અનન્તરે એકં…પે… અવિગતે એકં.

પચ્ચનીયાનુલોમં.